Kapitulo 25
Sa Ika-duha nga Pagkari, ang mga bugalon kag mga malain masunog pareho sang ginaraban—Si Elias magabalik antes sinang dako kag makahaladlok nga adlaw—Ikomparar ang Malaquias 4. Mga A.D. 34.
1 Kay tan-awa, ang adlaw magaabot nga magadabadaba pareho sang hurno; kag ang tanan nga bugalon, huo, kag ang tanan nga nagahimo sang malain, mangin ginaraban; kag ang adlaw nga magaabot ang magasunog sa ila, siling sang Ginuo sang mga Kasoldadohan, nga indi sila pagbinlan sang gamot man ukon sanga.
2 Apang sa inyo nga nahadlok sa akon ngalan, ang Anak sang Pagkamatarong magabangon nga may pag-ayo sa iya mga pakpak; kag magagwa kamo kag magadako pareho sang mga tinday sa toril.
3 Kag tasakon ninyo ang mga malain; kay mangin abo sila sa idalom sang mga dapa-dapa sang inyo mga tiil sa adlaw nga himuon ko ini, siling sang Ginuo sang mga Kasoldadohan.
4 Dumduma ninyo ang layi ni Moises, ang akon alagad, nga ginsugo ko sa iya sa Horeb para sa bug-os nga Israel, lakip ang mga pagsulundan kag mga paghukom.
5 Tan-awa, ipadala ko sa inyo si Elias nga propeta antes mag-abot ang dako kag makahaladlok nga adlaw sang Ginuo;
6 Kag lisuon niya ang tagipusuon sang mga amay sa mga anak, kag ang tagipusuon sang mga anak sa ila mga amay, kay basi maabot ako kag sakiton ang duta sang sumpa.