1 Kag natabo ini nga sa hingapusan nga bahin sang ika-disiotso nga tuig inang mga kasoldadohan sang mga tulisan naghanda para sa inaway, kag nagsugod sa pagdulhog kag sa pagsalakay sing hinali halin sa mga bungyod, kag halin sa mga kabukiran, kag sa mga kamingawan, kag sa ila mga pamakod, kag sa ila sekreto nga mga lugar, kag nagsugod sa pagpanag-iya sang mga duta, pareho nga yara sa duta sa sur kag yara sa duta sa norte, kag nagsugod sa pagpanag-iya sang tanan nga kadutaan nga ginpangbayaan sang mga Nefinhon, kag sang mga siyudad nga ginbayaan nga mamingaw.

2 Apang tan-awa, wala sing mabangis nga mga sapat ukon maila nga mga sapat sa sinang mga duta nga ginpangbayaan sang mga Nefinhon, kag wala sing maila nga mga sapat para sa mga tulisan luwas lang sa kamingawan.

3 Kag ang mga tulisan indi mabuhi luwas lang sa kamingawan tungod sang kakulang sang pagkaon; kay ang mga Nefinhon nagbiya sang ila mga duta nga mamingaw, kag ginpanipon ang ila mga panong kag ang ila mga baka kag ang tanan nila nga pagkabutang, kag tingob sila sa isa ka grupo.

4 Gani, wala sing kahigayunan para sa mga tulisan nga magpangagaw kag magpanguha sang pagkaon, luwas lang kon magsalakay sa hayag nga inaway batok sa mga Nefinhon; kag ang mga Nefinhon nga tingob sa isa ka grupo, kag tuman kadamo, kag nakahupot para sa ila mga kaugalingon sing mga panigana, kag mga kabayo kag mga kasapatan, kag mga panong sang tagsa ka sahi, agud mabuhi sila sa sulod sang pito ka tuig, nga sa amo nga panahon naglaum sila sa pagpamatay sang mga tulisan halin sa ibabaw sang kadutaan; kag gani nagligad ang ika-disiotso nga tuig.

5 Kag natabo ini nga sa ika-disenuebe nga tuig nabinag-binag ni Gidianhi nga kinahanglanon nga magpakig-away sia batok sa mga Nefinhon kay wala na sing paagi nga mabuhi sila luwas lang sa pagpangagaw kag pagpangawat kag pagpamatay.

6 Kag wala sila nangisog sa paglapta sang ila mga kaugalingon sa ibabaw sang kadutaan agud nga makapananom sila sing uyas, kay basi magsalakay sa ila ang mga Nefinhon kag pamatyon sila; gani naghatag si Gidianhi sang kasugoan sa iya mga kasoldadohan nga sa sini nga tuig magapakig-away sila batok sa mga Nefinhon.

7 Kag natabo ini nga nagpakig-away sila; kag sa ika-anum ini nga bulan; kag tan-awa, dako kag makakululba ang adlaw nga nagpakig-away sila; kag nawagkosan sila suno sa pamaagi sang mga tulisan; kag may panit sila sang carnero nga nawagkos sa ila balikawang, kag nalugom sila sa dugo, kag ang ila mga ulo kiniskisan, kag may mga panaming sila sa ulo; kag dako kag makakululba ang dagway sang mga kasoldadohan ni Gidianhi, tungod sang ila hinganib, kag tungod sang ila pagkalugom sa dugo.

8 Kag natabo ini nga ang mga kasoldadohan sang mga Nefinhon, sang nakita nila ang dagway sang kasoldadohan ni Gidianhi, naghapa tanan sa duta, kag nagpakitluoy sa Ginuo nga ila Dios nga kaluoyan niya sila kag luwason sila halin sa mga kamot sang ila mga kaaway.

9 Kag natabo ini nga sang nakita ini sang mga kasoldadohan ni Gidianhi nagsugod sila sa pagsininggit sa mabaskog nga tingug tungod sang ila kalipay kay naghunahuna sila nga ang mga Nefinhon nagkalatumba sa kahadlok tungod sang kakulba sa ila mga kasoldadohan.

10 Apang sa sini nga butang napaslawan sila, kay ang mga Nefinhon wala nahadlok sa ila; kundi nga nagkahadlok sila sa ila Dios kag nag-ampo sa iya para sa pangamlig; gani, sang nagsalakay sa ila ang mga kasoldadohan ni Gidianhi nakahanda sila sa pagsugata sa ila; huo, sa kusog sang Ginuo gin-atubang nila sila.

11 Kag ang inaway nagsugod sa sining ika-anum nga bulan; kag dako kag makakululba ang inaway nga ini, huo, dako kag makakululba ang pagpinatyanay nga ini, sa bagay nga wala pa gid sing nahibal-an nga amo kadako nga pagpinatyanay sa tanan nga katawhan ni Lehi halin sang pagbiya niya sa Jerusalem.

12 Kag sa pihak sang mga pagpamahog kag mga panumpa nga ginhimo ni Gidianhi, tan-awa, ginpierde sila sang mga Nefinhon, sa bagay nga nag-isol sila halin sa ila atubang.

13 Kag natabo ini nga nagsugo si Gidgidoni nga panglagson sila sang iya mga kasoldadohan tubtob sa mga dulonan sang kamingawan, kag indi nila pagkaluoyan ang bisan sin-o sang mga tulisan nga mahulog sa ila mga kamot sa dalanon; kag gani ginpanglagas nila sila kag ginpamatay sila, tubtob sa mga dulonan sang kamingawan, bisan tubtob nga natuman nila ang sugo ni Gidgidoni.

14 Kag natabo ini nga si Gidianhi, nga nagtindog kag nagpakig-away sing may kaisog, ginlagas samtang nagapalagyo sia; kag tungod kapoy bangod sang iya tuman nga pagpakig-away nalab-ot sia kag ginpatay. Kag amo ini ang katapusan ni Gidianhi nga tulisan.

15 Kag natabo ini nga ang mga kasoldadohan sang mga Nefinhon nagbalik liwat sa ila lugar sang pangamlig. Kag natabo ini nga ining ika-disenuebe nga tuig nagligad, kag ang mga tulisan wala na nagsalakay liwat agud magpakig-away; kag wala man sila nagbalik liwat sa ika-beynte nga tuig.

16 Kag sa ika-beynte uno nga tuig wala sila nagkadto agud magpakig-away, apang nagtaklad sila sa tanan nga bahin agud palibutan ang katawhan ni Nefi; kay naghunahuna sila nga kon lambatan nila ang katawhan ni Nefi sa ila mga kadutaan, kag sirhan sila sa tagsa ka kilid, kag kon malambatan nila sila sa tanan nila nga hilikuton sa gwa sang ila mga pamakod, nga mahimo nila nga paampuon sila suno sa ila mga luyag.

17 Karon nagpili sila para sa ila mga kaugalingon sing lain nga lider, nga ang ngalan amo si Zemnarias; gani si Zemnarias ang nagpahanabo sining pagpalibot.

18 Apang tan-awa, nangin bentaha ini para sa mga Nefinhon; kay indi mahimo sang mga tulisan ang magpalibot sa igo nga kalawigon agud may yara sing ano man nga epekto sa mga Nefinhon tungod sang ila madamo nga panigana nga ila ginpain,

19 Kag tungod sang kaiwat sang mga panigana sa mga tulisan; kay tan-awa, wala gid sila may natago magluwas sa karne para sa ila pagkaon, nga ang amo nga karne ila pa ginkuha sa kamingawan;

20 Kag natabo ini nga ang maila nga mga sapat nangin maiwat sa kamingawan sa bagay nga ang mga tulisan lapit na lang magkalamatay sa gutom.

21 Kag ang mga Nefinhon dalayon nga nagalakat sa adlaw kag sa gab-i, kag nagasalakay sa ila mga kasoldadohan, kag ginapamatay sila sa linibo kag napulo ka linibo.

22 Kag gani nangin handum sang katawhan ni Zemnarias ang mag-isol sa ila plano tungod sang dako nga kalaglagan nga nagtupa sa ila sa gab-i kag sa adlaw.

23 Kag natabo ini nga si Zemnarias nagsugo sa iya katawhan nga mag-untat sila sa ila pagpangibon, kag maglakat padulong sa pinakamalayo nga mga bahin sang kadutaan pa-norte.

24 Kag karon, si Gidgidoni nga nakahibalo sang ila plano, kag nakahibalo sang ila kahuyangan tungod sang kakulang sang pagkaon, kag sang tuman kadako nga pagpamatay nga nahimo sa ila, gani ginpadala niya ang iya mga kasoldadohan sa kagab-ihon, kag ginpabalabagan ang alagyan sang ila pag-isol, kag ginpahamtang ang iya mga kasoldadohan sa alagyan sang ila pag-isol.

25 Kag ginhimo nila ini sa kagab-ihon, kag nagpadayon sang ila paglakat agud unahan ang mga tulisan sa bagay nga pagkaaga, sang ang mga tulisan nagsugod sang ila paglakat, ginsugata sila sang mga kasoldadohan sang mga Nefinhon sa ila atubang kag sa ila likod.

26 Kag ang mga tulisan nga yara sa sur ginbalabagan man sa ila mga lugar nga ginakutaan. Kag ining tanan nga butang ginhimo paagi sa sugo ni Gidgidoni.

27 Kag may madamo nga linibo nga nag-ampo sang ila mga kaugalingon bilang mga bihag sa mga Nefinhon, kag ang nagkalabilin sa ila ginpamatay.

28 Kag ang ila lider nga si Zemnarias gindakop kag ginbitay sa isa ka kahoy, huo, bisan sa ibabaw sini tubtob nga napatay sia. Kag sang ginbitay nila sia tubtob nga napatay sia gintumba nila ang kahoy sa duta, kag nagsinggit sa mabaskog nga tingug nga nagasiling:

29 Kabay nga amligan sang Ginuo ang iya katawhan sa pagkamatarong kag sa pagkabalaan sang tagipusuon, agud mapahanabo nila ang pagpatumba sa duta sang tanan nga nagahangad sa pagpatay sa ila tungod sang gahum kag sekreto nga mga pagkunsabo, sa amo man nga paagi nga ginpatumba ining lalaki sa duta.

30 Kag nagkinasadya sila kag nagsininggit liwat sa isa ka tingug nga nagasiling: Kabay nga ang Dios ni Abraham, kag ang Dios ni Isaac, kag ang Dios ni Jacob, mag-amlig sining katawhan sa pagkamatarong, samtang nga nagapanawag sila sa ngalan sang ila Dios para sa pangamlig.

31 Kag natabo ini nga nagsugod sila tanan sa pagkanta sing dulungan, kag sa pagdayaw sa ila Dios tungod sang dako nga butang nga iya ginhimo para sa ila, sa pag-amlig sa ila halin sa pagkahulog sa mga kamot sang ila mga kaaway.

32 Huo, nagsinggit sila: Hosana sa Labing Mataas nga Dios. Kag nagsinggit sila: Bulahan ang ngalan sang Ginuong Dios nga Makagagahum, ang Labing Mataas nga Dios.

33 Kag ang ila mga tagipusuon napuno sa kalipay, tubtob sa pagtulo sang madamo nga luha, tungod sang dako nga kaayo sang Dios sa pagluwas sa ila halin sa mga kamot sang ila mga kaaway; kag nahibal-an nila nga tungod ini sang ila paghinulsol kag sang ila pagpaubos nga naluwas sila halin sa wala’y katubtuban nga kalaglagan.