“Septyembre 28–Oktubre 11. 3 Nefi 17–19: ‘Tan-awa, Nalubos ang Akon Kalipay,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Septyembre 28–Oktubre 11. 3 Nefi 17–19,” Dali, Magsunod sa Akon—Para sa Mga Indibidwal kag Mga Pamilya: 2020
Ang Kasanag sa Iya Nawong Nagsilak sa Ila, ni Gary L. Kapp
Septyembre 28–Oktubre 11
3 Nefi 17–19
“Tan-awa, Nalubos ang Akon Kalipay”
Samtang nga ang nagliligad nga mga kapitulo sa 3 Nefi nagtutok sa mga pulong sang Manluluwas, ang mga kapitulo 17–19 nagalaragway sang Iya pag-alagad kag pinanudlo sa tunga sang katawhan. Samtang imo ginabasa ining mga kapitulo, ano ang ginatudlo sang Espiritu sa imo parte sa Manluluwas?
Isulat Ang Imo Mga Panghunahuna
Si Jesucristo bag-o lang nagtapos sang bilog nga adlaw sa pagminister sa duta sang Bugana, nga nagatudlo sang Iya ebanghelyo, nga nagahatag sa katawhan sang kahigayunan nga makita kag mahikap ang mga marka sa Iya nabanhaw nga lawas, kag nagapamatuod nga Sia amo ang ginpromisa nga Manluluwas. Kag nag-abot na ang tiyempo nga Sia magbiya. Kinahanglan Niya nga magbalik sa Iya Amay, kag nahibal-an niya nga kinahanglan sang katawhan sang tiyempo para pamensaron sing maayo ang Iya ginpanudlo. Gani ginapapauli Niya ang kadam-an, nga nagapromisa nga mabalik sa madason nga adlaw. Pero wala sang naghalin. Wala sila nagahambal sang ila nabatyagan, pero nasat-uman ini ni Jesus: nagalaum sila nga Sia “magpabilin sing diutay pa gid upod sa ila” (3 Nefi 17:5). May iban pa Sia nga importante nga buluhaton, pero ang oportunidad nga magpakita sang kaluoy wala pirme nagaabot sa gusto mo nga tiyempo, gani nagpabilin si Jesus sing diutay pa gid. Ang nagsunod nga hitabo mahimo nga amo ang pinakamakatalandog nga halimbawa sang ministering nga nasulat sa balaan nga mga kasulatan. Ang ara didto nakasiling lamang nga indi ini malaragway (tan-awa sa 3 Nefi 17:16–17). Si Jesus Mismo ang nagsumaryo sang wala ginplano nga espirituhanon nga pagbubo sa sining simple nga mga tinaga: “Karon tan-awa, nalubos ang akon kalipay” (3 Nefi 17:20).
Mga Ideya para sa Personal nga Pagtuon sang Balaan nga Mga Kasulatan
Ang Manluluwas amo ang akon perpekto nga ehemplo sang ministering.
Nakahibalo kita nga may halos 2,500 ka mga tawo (tan-awa sa 3 Nefi 17:25) nga nakaeksperiyensya sang una nga pagbisita ni Cristo, sa nasulat sa 3 Nefi 11–18. Pero ang Manluluwas nakakita sang paagi sa pagminister sa ila sing tinag-isaisa. Ano ang imo matun-an parte sa ministering halin sa ehemplo sang Manluluwas sa sining kapitulo? Ano nga mga panginahanglan ang Iya ginministeran? Binagbinaga kon paano makabulig sa imo ang Iya ehemplo nga magminister sa iban.
Tuloka ang Inyo Magagmay nga mga Anak, ni Gary L. Kapp
3 Nefi 17:13–22; 18:15–25; 19:6–9, 15–36
Gintudloan kita sang Manluluwas kon paano mangamuyo.
Hunahunaa kon daw ano ayhan nga mabatian ang Manluluwas nga nagapangamuyo para sa imo. Ano ayhan ang Iya ihambal para sa imo? Ang Iya mga pinanudlo kag mga pangamuyo sa sining mga kapitulo makahatag sa imo sang ideya. Sa imo pagtuon, ano ang imo matun-an sa ehemplo sang Manluluwas nga makahimo sang imo kaugalingon nga mga pangamuyo nga mas makahulugan? Ano nga mga bugay halin sa pangamuyo ang imo nakita sa imo kabuhi?
Pwede ako mapuno sa espirituhanon samtang nagaambit ako sang sakramento.
Samtang imo ginabasa ang 3 Nefi 18:1–12, pamensara sing maayo kon paano ang pag-ambit sang sakramento makabulig sa imo nga “mabusog” sa espirituhanon (3 Nefi 18:3–5, 9; tan-awa man sa 3 Nefi 20:1–9). Halimbawa, pwede mo ilista ang mga pamangkot para magsugod sang personal nga pagbinagbinag kon mag-ambit ka sang sakramento, pareho sang “Ano ang akon nabatyagan parte sa Manluluwas kag sa Iya sakripisyo para sa akon?” “Paano nagaimpluwensya sa akon adlaw-adlaw nga pangabuhi ang Iya sakripisyo?” ukon “Ano ang ginahimo ko nga maayo bilang disipulo, kag ano ang pwede ko panamion pa?”
Ining mga pulong ni Pangulong Henry B. Eyring mahimo nga makabulig sa imo sa pagbinagbinag sang isa ka paagi nga ang sakramento makabulig sa imo nga mabusog sa espirituhanon: “Sa inyo pagbinagbinag sang inyo kabuhi sa tion sang ordinansa sang sakramento, kabay nga ang inyo mga hunahuna nagasentro indi lamang sa mga sala nga inyo nahimo kundi subong man sa husto ninyo nga nahimo—ang mga tinion sang nabatyagan ninyo nga ang Amay nga Langitnon kag ang Manluluwas nahamuot sa inyo. Mahimo nga hatagan gid ninyo sing tiyempo sa tion sang sakramento ang magpangayo sa Dios nga buligan kamo nga makita ining mga butang. … Sang ginhimo ko ini, ang Espiritu nagpasalig sa akon nga bisan malayo pa ako sa pagkaperpekto, mas maayo ako subong sangsa kahapon. Kag nagahatag ini sa akon sang kompiyansa, nga bangud sa Manluluwas, pwede ako nga mangin mas maayo pa gid bwas” (“Always Remember Him,” Ensign, Peb. 2018, 5).
Ang mga disipulo ni Jesucristo nagahandum sang regalo sang Balaan nga Espiritu.
Pamensara ang pinakaulihi nga pangamuyo nga imo ginsambit. Ano ang ginatudlo sa imo sang imo mga pangamuyo parte sa imo pinakahugot nga mga handum? Pagkatapos nga magtiner sa presensya sang Manluluwas sang isa ka adlaw, ang kadam-an “nagpangamuyo para sa sinang ila labing ginahandum”—ang [regalo] sang Balaan nga Espiritu (3 Nefi 19:9). Samtang imo ginabasa ining mga dinalan, binagbinaga ang imo kaugalingon nga handum sang pagpakig-upod sang Balaan nga Espiritu. Ano ang imo matun-an parte paghandum sang pagpakig-upod sang Balaan nga Espiritu?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
3 Nefi 17
Samtang inyo ginabasa ining kapitulo bilang pamilya, pamensara ang magpundo sing panalagsa para hagaron ang imo pamilya nga hunahunaon nga kuno abi ginaeksperiyensyahan ining mga hitabo mismo. Halimbawa, mahimo ka magpamangkot sang “Ano nga mga pag-antos ang imo dalhon sa Manluluwas para mag-ayo?” “Ano ang gusto mo nga pangamuyuon Niya para sa imo?” ukon “Sin-o sa imo mga pinalangga ang gusto mo nga Iya bendisyunan?” Ang pagbasa sining kapitulo mahimo nga makainspirar sa imo nga magpangamuyo para sa mga miyembro sang imo pamilya, sing tinag-isaisa, pareho sa ginhimo ni Jesus.
3 Nefi 18:1–12
Ano ang kahulugan sang “mabusog” paagi sa pag-ambit sang sakramento, kag paano naton ini maeksperiyensyahan? Ano ang aton matun-an sa mga bersikulo 5–7 kon ngaa ginhatagan kita ni Jesus sang ordinansa sang sakramento?
3 Nefi 18:17–21
Ano ang aton matun-an sa sining mga bersikulo parte sa mga katuyuan sang pangamuyo? Paano naton pauswagon ang espirituhanon nga gahum sang aton mga pangamuyo, sa pareho indibidwal kag bilang pamilya?
3 Nefi 18:25; 19:1–3
Ano ang naeksperiyensyahan sang aton pamilya paagi sa ebanghelyo nga kuntani maeksperiyensyahan man sang tanan nga ara sa aton palibot? Paano naton sundon ang ehemplo sang mga tawo sa sining mga bersikulo kag “naghimakas sing tuman” (3 Nefi 19:3) para dalhon ang iban kay Cristo, agud nga sila man “makahikap kag makakita” (3 Nefi 18:25) sang aton nakita sa ebanghelyo?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Tugoti ang Espiritu nga maggiya sa imo pagtuon. Ang Balaan nga Espiritu makagiya sa imo padulong sa mga butang nga kinahanglan mo matun-an kada adlaw. Magmangin sensitibo sa Iya mga pagpabatyag, bisan pa nga daw nagapanugyan ini nga basahon mo ang lain nga topiko ukon magtuon sa lain nga paagi sangsa imo ginahimo. Halimbawa, samtang imo ginabasa ang parte sa sakramento sa 3 Nefi 18, mahimo nga magpabatyag sa imo ang Espiritu nga maghatag pa sang dugang nga tiyempo sa sina nga topiko sangsa imo ginplano.
Nakita Niya ang mga Langit nga Bukas, ni Walter Rane