“Oktubre 19–25. 3 Nefi 27–4 Nefi: ‘Wala Na sing Mas Malipayon Pa nga Katawhan,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Oktubre 19–25. 3 Nefi 27–4 Nefi,” Dali, Magsunod sa Akon—Para sa Mga Indibidwal kag Mga Pamilya: 2020
Pangamuyo ni Cristo, ni Derek Hegsted
Oktubre 19–25
3 Nefi 27–4 Nefi
“Wala Na sing Mas Malipayon Pa nga Katawhan”
Ginsugo sang Ginuo ang Iya mga disipulo nga isulat ang mga butang nga ila naeksperiyensyahan (tan-awa sa 3 Nefi 27:23–24). Sa imo pagtuon, isulat ang imo mga espirituhanon nga eksperiyensya.
Isulat Ang Imo Mga Panghunahuna
Ang mga pinanudlo ni Jesucristo indi lamang mga matahum nga pilosopiya nga dapat binagbinagon. Masobra pa ini sa dira—gintuyo ini para bag-uhon ang aton mga kabuhi. Ang libro nga 4 Nefi nagahatag sang matahum nga halimbawa sini, nga nagalarawan kon paano lubos nga mabag-o sang ebanghelyo sang Manluluwas ang isa ka katawhan. Pagkatapos sang malip-ot nga pag-alagad ni Jesus, ang pila ka siglo nga pag-ilinaway sa tunga sang mga Nefinhon kag Lamanhon natapos. Duha ka mga nasyon nga nakilala sa oposisyon kag bugal “nagakaisa, ang mga anak ni Cristo” (4 Nefi 1:17), kag nagsugod sila nga maggawi nga ang “tanan nga mga butang kabilugan sa ila” (4 Nefi 1:3). Ang “gugma sang Dios … nagpuno sa mga tagipusuon sang katawhan,” kag “wala na sing isa ka mas malipayon pa nga katawhan sa tunga sang tanan nga katawhan nga gintuga sang kamot sang Dios” (4 Nefi 1:15–16). Sa amo sini ginabag-o sang mga pinanudlo sang Manluluwas ang mga Nefinhon kag mga Lamanhon. Paano ka sini ginabag-o?
Mga Ideya para sa Personal nga Pagtuon sang Balaan nga Mga Kasulatan
Ang Simbahan ni Jesucristo ginatawag sa Iya ngalan.
Sang nagasugod ang mga disipulo sang Manluluwas sa pagpasad sang Iya Simbahan sa bilog nga kadutaan, nagtuhaw ang pamangkot nga, para sa pila, daw gamay lamang nga punto—ano dapat ang ngalan sang Simbahan? (tan-awa sa 3 Nefi 27:1–3). Ano ang imo matun-an parte sa importansya sang sining ngalan sa sabat sang Manluluwas sa 3 Nefi 27:4–12? Sang 1838 ginpahayag sang Ginuo ang ngalan sang Iya Simbahan sa karon (tan-awa sa Doktrina kag mga Kasugtanan 115:4). Pamensara sing maayo ang tagsa ka tinaga sa sina nga ngalan. Paano kita ginabuligan sining mga tinaga nga mahibal-an kon sin-o kita, kon ano ang aton ginapatihan, kag kon paano kita dapat maggawi?
Tan-awa man sa Russell M. Nelson, “Ang Husto nga Ngalan sang Simbahan,” Ensign ukon Liahona, Nob. 2018, 87–80.
Samtang ginatinloan ko ang akon mga handum, mahimo ako nga mangin mas matinuohon nga disipulo.
Ano ang imo ihambal kon pamangkuton ka sang Manluluwas, pareho sang Iya ginpamangkot sa Iya mga disipulo, “Ano bala ang inyo luyag gikan sa akon?” (3 Nefi 28:1). Hunahunaa ini samtang imo ginabasa ang eksperiyensya sang mga disipulo sang Manluluwas sa 3 Nefi 28:1–11. Ano ang inyo matun-an parte sa mga handum sang mga tagipusuon sang mga disipulo sa ila mga sabat sa Iya pamangkot? Si Pangulong Dallin H. Oaks nagtudlo: “Agud mabaton ang aton wala katapusan nga kapalaran, handumon naton kag pangabudlayan ang mga kalidad nga kinahanglanon agud mangin tinuga nga dayon. … Handumon naton nga mangin pareho kay [Jesucristo]” (“Desire,” Ensign ukon Liahona, Mayo 2011, 44–45). Ano ang sarang mo obrahon para himuon nga mas matarong ang mga handum sang imo tagipusuon?
Ang pagkahaylo kay Jesucristo kag sa Iya ebanghelyo nagagiya sa paghiliusa kag kalipayan.
Mapensar mo bala kon ano ayhan ang magpangabuhi sa mga tinuig pagkatapos sang pagbisita sang Manluluwas? Paano namentinar sang katawhan ining diosnon nga paghidaet sing tama kalawig—halos 200 ka tuig? Sa imo pagtuon sang 4 Nefi 1:1–18, pamensara nga markahan ukon tandaan ang mga pagpili nga ginhimo sang mga tawo para maeksperiyensyahan ining ginbugayan nga kabuhi.
Pamensara kon ano ang pwede mo himuon para buligan ang imo pamilya, ward, ukon komunidad nga magpangabuhi sa mas dako nga paghiliusa kag kalipayan, pareho sa mga tawo sa 4 Nefi. Ano nga mga pinanudlo ni Jesucristo ang sarang mo nga ipangabuhi sing mas kompleto para matuman ining tuyo? Ano ang sarang mo himuon para buligan ang iban nga maintiendihan kag ipangabuhi ining mga pinanudlo?
Ang kalautan nagadala sang pagbinahin-bahin kag kasubo.
Sa masubo nga palad, ang sosyedad sang Sion nga ginlaragway sa 4 Nefi (tan-awa man sa Moses 7:18) sang ulihi napugday. Samtang imo ginabasa ang 4 Nefi 1:19–49, pangitaa ang mga pamatasan kag pangginawi nga nagtuga sang pagkabungkag sining sosyedad. May nakita ka bala nga mga senyales sining mga pamatasan ukon pangginawi sa imo kaugalingon?
Mga Ideya para sa Pang-pamilya nga Pagtuon sang Balaan nga mga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
3 Nefi 27:13–21
Ang ining mga bersikulo makabulig sa mga miyembro sang pamilya nga mas maintiendihan kon ano ang buot silingon sang Manluluwas sang gintumod Niya ang “akon ebanghelyo.” Pagkatapos nga basahon kag hambalan ang ining mga bersikulo, pwede mo pangabayon ang tagsa ka miyembro sang pamilya nga palip-uton kon ano ang ebanghelyo sa isa lang ka pulong (sentence).
3 Nefi 27:23–26
Ano na ang aton nahuman sa pagrekord sang mga butang nga aton “nakita kag nabatian”—bilang indibidwal kag bilang pamilya? Ngaa importante nga magtago sang rekord sang espirituhanon nga mga butang?
3 Nefi 27:30–31
Para buligan ang mga miyembro sang pamilya nga maintiendihan ang kalipay nga ginlaragway sang Manluluwas sa sining mga bersikulo, pwede kamo maghampang nga manago ang mga miyembro sang pamilya kag ang isa ka miyembro sang pamilya mangita sa ila. Mahimo nga magadala ini sa pag-istoryahanay kon ngaa importante nga pangitaon ang tagsa ka miyembro sang pamilya para nga “wala’y isa sa ila nga madula.” Paano naton buligan ang mga miyembro sang aton pamilya nga magpadayon nga mabakod sa ebanghelyo ukon magbalik kon nagbiya sila?
3 Nefi 28:17–18, 36–40
Ano ang aton matun-an sa ehemplo ni Mormon sang wala niya maintiendihan ang tanan parte sa pagbag-o nga natabo sa tatlo ka Nefinhon nga mga disipulo? Ano ang pwede naton himuon kon wala naton naintiendihan ang tanan parte sa isa ka prinsipyo sang ebanghelyo? Si Pangulong Dieter F. Uchtdorf nagtudlo: “Nagaulikid ang Dios sa inyo. Magapamati Sia, kag magasabat Sia sa inyo personal nga mga pamangkot. Ang mga sabat sa inyo mga pangamuyo magaabot sa Iya kaugalingon nga paagi kag sa Iya kaugalingon nga tion, kag gani, kinahanglan ninyo nga pamatian ang Iya tingug” (“Ang Pagbaton sang Panaksihon sang Kasanag kag Kamatuoran,” Ensign ukon Liahona, Nob. 2014, 21).
4 Nefi 1:15
Para maghagan-hagan ang pagbinaisay sa inyo balay, mahimo nga magbutang ang mga miyembro sang pamilya sang lalab-uton nga mangin mas mapinalanggaon sa kada isa sini nga semana. Pagkatapos sang semana, rebyuha ang inyo pag-uswag sing ululupod kag hambali kon paano ang pagpakita sing mas daku nga gugma nag-apekto sa imo pamilya.
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Magpangayo sang rebelasyon kada adlaw. Ang rebelasyon sa masami nagaabot “dinalan sa dinalan” (2 Nefi 28:30). Sa imo pagbinagbinag sang mga bersikulo nga imo ginatun-an, ang mga ideya kag mga impresyon mahimo nga mag-abot sa imo sa bilog nga adlaw. Indi pagpamensara ang pagtuon sang ebanghelyo nga isa ka butang nga “ginahatagan sang tion” kundi isa ka butang nga pirme mo ginahimo” (tan-awa sa Teaching in the Savior’s Way,12).
Christ with Three Nephite Disciples, ni Gary L. Kapp