“Oktubre 12–18. 3 Nefi 20–26: ‘Mga Anak Kamo sang Kasugtanan’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Oktubre 12–18. 3 Nefi 20–26,” Dali, Magsunod sa Akon—Para sa Mga Indibidwal kag Mga Pamilya: 2020
Larawan ni Cristo nga nagapakita sa mga Nefinhon ni Andrew Bosley
Oktubre 12–18
3 Nefi 20–26
“Mga Anak Kamo sang Kasugtanan”
Kon maghambal parte sa balaan nga mga kasulatan, si Jesus masami nagagamit sang tinaga nga usisaa (tan-awa sa 3 Nefi 20:11; 23:1, 5). Sa imo pagbasa sang 3 Nefi 20–26, ano ang usisaon mo?
Isulat Ang Imo Mga Panghunahuna
Kon mabatian mo ang mga tawo nga nagagamit sang mga tinaga pareho sang panimalay sang Israel, mabatyagan mo bala nga parte sa imo ang ila ginhambalan? Ang mga Nefinhon kag mga Lamanhon literal nga mga kaliwat ni Israel—ang ila istorya nagsugod pa gani sa Jerusalem—pero para sa iban sa ila, ang Jerusalem daw pareho sang “isa ka duta nga tama kalayo, isa ka duta nga wala naton mahibal-i” (Helaman 16:20). Huo, sila “isa ka sanga sang kahoy sang Israel,” pero sila man “nabanggi sa puno sini” (Alma 26:36; tan-awa man sa 1 Nefi 15:12). Pero sang nagpakita ang Manluluwas sa ila, gusto Niya nga mahibal-an nila nga wala sila nadula para sa Iya. “Iya kamo sang panimalay sang Israel,” siling Niya, “kag nalakip kamo sa kasugtanan” (3 Nefi 20:25). Mahimo nga magsiling Sia sa imo sang daw pareho sini sa karon nga panahon, bangud ang bisan sin-o nga ginbunyagan kag nagahimo sang mga kasugtanan sa Iya nalakip man sa panimalay sang Israel, “sa kasugtanan,” bisan kay sin-o ka man naghalin ukon sa diin ka nagaistar. Buot silingon, kon maghambal si Jesus parte sa panimalay sang Israel, nagahambal Sia parte sa imo. Ang instruksyon nga bugayan “ang tanan nga mga kaliwatan sang duta” para sa imo (3 Nefi 20:27). Ang imbitasyon nga “magbugtaw liwat, kag isul-ob ang imo kusog” para sa imo (3 Nefi 20:36). Kag ang Iya bilidhon nga promisa, “Ang akon kaayo indi magtaliwan sa imo, ukon man ang kasugtanan sang akon paghidaet maghalin,” para sa imo (3 Nefi 22:10).
Mga Ideya para sa Personal nga Pagtuon sang Balaan nga Mga Kasulatan
Sa ulihing mga adlaw, ang Dios magahikot sang dako kag makahalangyag nga buluhaton.
Ang Manluluwas naghatag sa kadam-an sang dalagko nga mga promisa kag nagpropesiya parte sa palaabuton sang Iya katawhan sang kasugtanan—kag nalakip ka dira. Pareho sang ginsiling ni Pangulong Russell M. Nelson: “Nalakip kita sa katawhan sang kasugtanan sang Ginuo. Aton ang pribelihiyo nga personal nga magpasakop sa katumanan sining mga promisa. Daw ano kasadya nga panahon para mabuhi!” (“The Gathering of Scattered Israel,” Ensign ukon Liahona, Nob. 2006, 79).
Pangitaa ang mga propesiya parte sa ulihing mga adlaw sa mga pulong sang Manluluwas sa 3 Nefi 20–22. Diin sining mga propesiya ang nagapalangkag gid sa imo? Ano ang pwede mo himuon para makabulig sa pagpatuman sang mga propesiya sa sining mga kapitulo?
Tandai nga ang 3 Nefi 21:1–7 nagapakita sang paggwa sang Libro ni Mormon (“ining mga butang” sa bersikulo 2 kag 3) isa ka tanda nga ang mga promisa sang Dios nagsugod na nga matuman. Ano inang mga promisa, kag paano nagabulig ang Libro ni Mormon nga matuman ang mga ini?
Gusto sang Manluluwas nga usisaon ko ang mga pulong sang mga propeta.
Ang mga pulong kag aksyon ni Jesus sa sining mga kapitulo nagapakita kon ano ang Iya nabatyagan parte sa balaan nga mga kasulatan. Ano ang imo matun-an parte sa balaan nga mga kasulatan sa 3 Nefi 20:10–12; 23; kag 26:1–12? Ano ang imo makita sa sining mga bersikulo nga nagainspirar sa imo nga “usisaon sing maukod ining mga butang”? (3 Nefi 23:1).
Maluluy-on ang Dios sa mga nagabalik sa Iya.
Sa 3 Nefi 22 kag 24, ginsambit sang Manluluwas ang mga pulong ni Isaias kag Malaquias nga puno sang maathag nga mga imahe kag mga pagkumparar—maduagon nga pundasyon nga mga bato, mga baga sa kalayo, gintinluan nga pilak, ang mga bintana sang langit. Mahimo nga mangin makalilingaw ang paglista sang mga ini. Ano ang ginatudlo sang kada isa sini sa inyo parte sa relasyon sang Dios sa Iya katawhan? Halimbawa, ginakumparar sang 3 Nefi 22:4–8 ang Dios sa bana kag ang Iya katawhan sa isa ka asawa. Ang pagbasa sining mga imahe makatulod sa imo sa pagpanumdom sang imo kaugalingon nga relasyon sa Ginuo. Paano natuman ang mga promisa sa sining mga kapitulo sa imo kabuhi? (tan-awa ilabi na gid sa 3 Nefi 22:7–8, 10–17; 24:10–12, 17–18).
Ang akon tagipusuon dapat nga magliso sa akon mga katigulangan.
Ang ginpromisa nga pagbalik ni Elias ginbantayan sang mga Judio nga may kalangkag sa bilog nga kalibutan sa madamo nga siglo. Ang mga Santos sa Ulihing mga Adlaw nakahibalo nga nagbalik na si Elias, nga nagpakita kay Joseph Smith sa Templo sang Kirtland sang 1836 (tan-awa sa Doktrina kag mga Kasugtanan 110:13–16). Ang hilikuton sang pagliso sang mga tagipusuon sa mga amay—buluhaton sa templo kag family history—madugay-dugay na nga nagapadayon. Ano nga mga eksperiyensya ang imo naangkon nga nakabulig liso sang imo tagipusuon sa imo mga katigulangan?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
3 Nefi 22:2
Pagkatapos nga basahon ining bersikulo, basi pwede kamo maghimo sang balay-balay nga tolda kag hambalan kon paano ang Simbahan pareho sang tolda sa kamingawan. Ano ayhan ang buot silingon sang “palabaa ang [iya] mga banting” kag “palig-una ang [iya] mga palpal”? Paano naton agdahon ang iban nga magpangita sang “palasilungan” sa Simbahan?
3 Nefi 23:6–13
Kon tan-awon sang Manluluwas ang mga rekord nga ginatipigan sang aton pamilya, ano nga mga pamangkot ang pwede Niya ipamangkot sa aton? May importante bala nga mga hitabo ukon espirituhanon nga mga eksperiyensya nga dapat naton irekord? Basi subong na ang maayo nga tion para maghimo ukon magdugang sa rekord sang pamilya kag hambalan sing ululupod kon ano ang ilakip. Basi masadyahan ang mas magagmay nga mga miyembro sang pamilya sa pagdekorar sang inyo rekord sang mga litrato ukon mga drowing. Ngaa importante nga irekord ang espirituhanon nga mga eksperiyensya sang aton pamilya?
3 Nefi 24:7–18
Paano naton naeksperiyensyahan ang mga bugay sang pagbayad sang ika-pulo nga ginpromisa sa sining mga bersikulo?
3 Nefi 25:5–6
Paano mo buligan ang mga miyembro sang imo pamilya nga magliso ang ila mga tagipusuon sa ila mga amay? Basi pwede mo tokahan ang mga miyembro sang pamilya sa pagtuon parte sa isa sang inyo mga katigulangan kag iistorya sa bilog nga pamilya ang ila natun-an. Ukon pwede kamo magbuligay sa pagpangita sang katigulangan nga nagakinahanglan sang mga ordinansa sa templo kag magplano sang biyahe sa templo para hikuton ining mga ordinansa.
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Ipangabuhi ang imo panaksihon. “Ginatudlo mo kon ano ka,” panudlo ni Elder Neal A. Maxwell. “Ang imo mga kinaiya mas madumduman … sangsa isa ka partikular nga kamatuoran sa isa ka partikular nga leksyon” (“But a Few Days” [pamulong-pulong sa relihiyoso nga mga manunudlo sa Church Educational System, Sep. 10, 1982], 2). Kon gusto mo nga magtudlo sang isa ka prinsipyo sang ebanghelyo, himoa ang imo pinakamaayo para ipangabuhi ang ina nga prinsipyo.
Bring Forth the Record, ni Gary L. Kapp