Mormon Abridging the Plates, ni Tom Lovell

Oktubre 26–Nobyembre 1

Mormon 1–6

“Luyag Ko nga Malugpayan Ko Kamo Tanan … sa Paghinulsol”

Samtang imo ginabasa ang Mormon 1–6, binagbinaga ang imo matun-an sa ehemplo ni Mormon. Isulat ang ginapabatyag sa imo nga imo himuon.

Isulat Ang Imo Mga Panghunahuna

Wala na ginsulat ni Mormon ang “bug-os nga kasaysayan” sang “makakulugmat nga talan-awon” sang kalautan kag pagpatyanay nga iya nakita sa tunga sang mga Nefinhon (Mormon 2:18; 5:8). Pero ang iya ginsulat sa Mormon 1–6 hustohan na agud padumdumon kita kon daw paano maguba ang sadto matarong nga katawhan. Sa tunga sang malapnagon nga kalautan, wala sing may makabasol kay Mormon nga makapoy kag bisan pa gani mangluya. Pero sa tunga sang tanan nga iya nakita kag naeksperiyensyahan, wala sia nawad-an sang pagsalig sa dako nga kaluoy sang Dios kag sang pagpati nga ang paghinulsol amo ang paagi agud mabaton ini. Kag bisan pa nga ginsikway sang katawhan mismo ni Mormon ang iya nagapangabay nga mga imbitasyon sa paghinulsol nahibal-an niya nga may mas dako sia nga tagpalamati nga dapat lugpayan. “Yari karon,” pahayag niya, “nagasulat ako sa tanan nga mga yara sa mga ukbong sang duta.” Buot silingon, nagsulat sia sa imo (tan-awa sa Mormon 3:17–20). Kag ang iya mensahe sa imo, sa sini nga panahon, amo man nga mensahe nga nakaluwas kuntani sa mga Nefinhon sa ila panahon: “Magpati sa ebanghelyo ni Jesucristo. … [Maghinulsol] kag maghanda sa pagtindog sa atubang sang hukom-lingkuranan ni Cristo” (Mormon 3:21–22).

Mga Ideya para sa Personal nga Pagtuon sang Balaan nga Mga Kasulatan

Mormon 1

Pwede ako magkabuhi nga matarong wala sapayan sang kalautan sa akon palibot.

Sa pagsugod sang una nga kapitulo sang Mormon, matalupangdan mo ang mayor nga mga kinalain sa tunga ni Mormon kag sang katawhan sa iya palibot. Sa imo pagbasa sang Mormon 1, hunahunaa nga ikumparar ang mga kalidad kag mga handum ni Mormon sa iya katawhan. Pat-ini ang mga konsikwensya nga nag-abot sa iya kag sa ila (may makita ka nga isa ka halimbawa sa bersikulo 14–15). Ano ang imo matun-an nga nagainspirar sa imo nga magpangabuhi sing matarong sa malaut nga kalibutan?

Samtang imo ginabasa ang Mormon 2–6, padayuna sa pagpangita kon paano ginpakita ni Mormon ang iya pagtuo sa Amay nga Langitnon kag kay Jesucristo wala sapayan sa malain nga mga impluwensya sa iya palibot.

Battle, ni Jorge Cocco

Mormon 2:10–15

Ang diosnon nga kasubo nagagiya sa matuod kag nagadugay nga pagbag-o.

Sang makita ni Mormon ang kasubo sang iya katawhan, naglaum sia nga magahinulsol sila. Pero “ang ila pagpangalisud indi tuhoy sa paghinulsol” (Mormon 2:13)—indi ini ang klase sang diosnon nga kasubo nga nagapadulong sa tunay nga pagbag-o (tan-awa sa 2 Mga Taga-Corinto 7:8–11). Sa baylo, nakabatyag ang mga Nefinhon sang dutan-on nga kasubo (tan-awa sa Mormon 2:10–11). Para maintiendihan ang kinalain sang diosnon nga kasubo kag dutan-on nga kasubo, pamensara nga maghimo sang tsart kon sa diin pwede mo irekord ang imo matun-an sa Mormon 2:10–15 parte sa sining duha ka klase sang kasubo. Mahimo nga daw amo sini ang hitsura sang imo tsart:

Diosnon nga kasubo	Dutan-on nga kasubo
Diosnon nga kasubo Nagadangop kay Jesus (bersikulo 14)	Dutan-on nga kasubo Nagapakamalaut sa Dios (bersikulo 14)
Diosnon nga kasubo	Dutan-on nga kasubo
Diosnon nga kasubo	Dutan-on nga kasubo

Sa imo pagpamensar sang imo natun-an, binagbinaga kon paano sini maimpluwensyahan ang imo mga pagpaninguha nga malampuwasan ang sala kag mangin mas pareho sa Amay nga Langitnon kag sa Manluluwas.

   

Mormon 3:3, 9

Dapat ko pirme nga kilalahon ang impluwensya sang Dios sa akon kabuhi.

Ginsulat ni Mormon ang kahuyang nga iya nakita sa mga Nefinhon: nagpalya sila sa pagkilala sang mga paagi nga ginbugayan sila sang Ginuo. Si Pangulong Henry B. Eyring nagpaisog sa aton “sa pagpangita sang mga paagi agud kilalahon kag dumdumon ang kaayo sang Dios. … Magpangamuyo kag pamensara sing maayo, samtang nagapamangkot: Nagpadala bala ang Dios sang mensahe nga para gid sa akon? Nakita ko bala ang Iya impluwensya sa akon kabuhi ukon sa kabuhi sang akon mga kabataan? … Nagasaksi ako nga palangga Niya kita kag ginabugayan kita, nga labaw pa sangsa natalupangdan sang kalabanan sa aton” (“O Remember, Remember,” Ensign ukon Liahona, Nob. 2007, 67, 69).

Sa imo pagbasa sang Mormon 3:3, 9, pwede mo binagbinagon kon paano mo ginakilala ang impluwensya sang Dios sa imo kabuhi. Ano nga mga bugay ang magaabot kon imo kilalahon ang Iya impluwensya? Ano ang mga konsikwensya sang indi pagkilala sa Iya? (tan-awa sa Mormon 2:26).

Mormon 5:8–24; 6:16–22

Nagatindog si Jesucristo nga bukas ang mga kamot sa pagbaton sa akon.

Ginsikway sang mga Nefinhon ang mga pinanudlo ni Mormon, pero may paglaum sia nga ang iya sinulatan magaimpluwensya sa imo. Sa imo pagbasa sang Mormon 5:8–24 kag 6:16–22, ano ang imo matun-an parte sa mga konsikwensya sang sala? Ano ang imo matun-an sa sining mga dinalan parte sa mga balatyagon sang Amay nga Langitnon kag ni Jesus sa imo, bisan pa kon makasala ka? Paano mo nabatyagan ang paglab-ot ni Jesucristo sa imo nga bukas ang mga kamot? Ano ang ginapabatyag sa imo nga imo himuon bilang resulta?

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Mormon 1:2

Ano ang buot silingon sang mangin “maabtik sa pagpanilag”?   Sa ano nangin bugay kay Mormon ang regalo sang pagkaabtik sa pagpanilag? Paano ini mangin bugay sa aton?

Mormon 1:1–6, 15; 2:1–2

Ang mga kabataan bala sa imo pamilya nakaintiendi nga sarang sila magpatubo sang dako nga espirituhanon nga mga kalidad kag gahum bisan bata pa sila? Mahimo nga makabulig sa ila ang ehemplo ni Mormon. Pamensara ang maghimo sang pasunod sang mga hitabo (timeline) sang pagkabata kag pagkalamharon ni Mormon, nga ginagamit ang mga edad kag mga hitabo nga ginhatag sa Mormon 1:1–6, 15 kag 2:1–2. Samtang inyo ginahambalan ang mga kalidad kag mga eksperiyensya ni Mormon, sambita ang mga kalidad sang imo kabataan nga nakainspirar sa imo kag sa iban sa ila palibot.

Mormon 2:18–19

Ano nga mga tinaga ang gingamit ni Mormon sa paglaragway sang kalibutan nga iya ginaestaran? Paano niya ginpadayon ang paglaum wala sapayan sang kalautan sa iya palibot? Paano himuon sang aton pamilya ang amo man?

Mormon 3:12

Ano ang nabatyagan ni Mormon parte sa mga tawo sa iya palibot, bisan pa nga malaut sila? Ano ang pwede naton himuon para patubuon ang klase sang pagpalangga niya?

Mormon 5:2

Ngaa ayhan nga nagaalang-alang kita sa pagpanawag sa Amay nga Langitnon kon ginabudlayan kita? Ano ang pwede naton himuon para magsalig pa gid sa Amay nga Langitnon?

Mormon 5:16–18

Para buligan ang imo pamilya nga mapanan-aw kon ano ang buot silingon sang “ginapalid-palid sila subong sang labhang sa atubang sang hangin” (bersikulo 16), gisi-gisia ang isa ka panid sang papel sa magagmay nga mga bahin kag ipahuyop ini sa mga miyembro sang pamilya. Ipaathag sa ila nga ang labhang amo ang panit sang liso, kag mamag-an ini nga pwede lang paliron. Paano ang pagka-“wala sing Cristo kag Dios sa kalibutan” (bersikulo 16) daw pareho sang labhang nga ginahuyop sang hangin?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magtudlo sang maathag kag simple nga doktrina. Ang ebanghelyo sang Ginuo matahum sa iya kasimple (tan-awa sa Doktrina kag mga Kasugtanan 133:57). Imbes nga magtinguha nga lingawon ang imo pamilya gamit ang garboso nga mga leksyon, siguroha nga ang imo ginatudlo nasentro sa puro kag simple nga doktrina.

Mormon’s Miraculous Book, ni Joseph Brickey