“Nobyembre 2–8. Mormon 7–9: ‘Nagahambal Ako sa Inyo nga Daw Yara Kamo,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)

“Nobyembre 2–8. Mormon 7–9,” Dali, Magsunod sa Akon—Para sa Mga Indibidwal kag Mga Pamilya: 2020

Litrato

Si Moroni nga nagasulat sa bulawan nga mga lamina

Moroni Writing on Gold Plates, ni Dale Kilborn

Nobyembre 2–8

Mormon 7–9

“Nagahambal Ako sa Inyo nga Daw Yara Kamo”

Sanday Mormon kag Moroni may pagtuo nga ang ila sinulatan magainspirar sadtong mga magakabuhi sa ulihing mga adlaw. Samtang imo ginabasa ang Mormon 7–9, isulat ang mga impresyon nga nagaabot sa imo parte sa kon paano mo ipangabuhi ang imo mga natun-an.

Isulat Ang Imo Mga Panghunahuna

Sanday Mormon kag Moroni nakahibalo kon ano ang balatyagon sang nagaisahanon sa isa ka malaut nga kalibutan. Para kay Moroni ang kasubo sigurado nga mas malala pagkatapos nga napatay ang iya amay sa giyera kag ang mga Nefinhon naubos. “Kay bisan ako lamang ang nabilin nga isahanon,” ginsulat niya. “Wala ako sing mga kaabyanan ukon makadtuan nga kon diin” (Mormon 8:3, 5). Ayhan daw wala na sing paglaum sa mga butang, pero nakakita si Moroni sing paglaum sa iya panaksihon sang Manluluwas kag sa iya ihibalo nga “ang wala’y katapusan nga mga katuyuan sang Ginuo magapadayon” (Mormon 8:22). Kag nahibal-an ni Moroni nga ang isa ka mayor nga papel sa sining wala katapusan nga mga katuyuan pagatungdan sang Libro ni Mormon—ang rekord nga matutom niya karon nga ginatapos, ang sinulatan nga sa pila ka adlaw “ipagwa ini sa kadudulman” kag magadala sang madamo nga tawo sa “sa ihibalo nahanungod kay Cristo” (Mormon 8:16; 9:36). Ang pagtuo ni Moroni sa sining mga promisa nagtugot sa iya nga magpahayag sa palaabuton nga mga bumalasa sining libro, “Nagahambal ako sa inyo nga daw yara kamo” kag “nahibal-an ko nga manginsa inyo ang akon mga pulong” (Mormon 8:35; 9:30). Karon ara matuod sa aton ang iya mga pulong, kag ang buluhaton sang Ginuo naga padayon, bangud sa isa ka bahin sanday Mormon kag Moroni nagpabilin nga matutom sa ila misyon, bisan pa nga nagaisahanon sila.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Mormon 7

Kinahanglan ko nga magpati kay Jesucristo kag “magkapyot” sa Iya ebanghelyo.

Ang katapusan nga narekord nga mga tinaga ni Mormon, nga makita sa Mormon 7, ginapatuhoy sa Lamanhon nga mga kaliwatan sa ulihing mga adlaw, pero nagaunod ini sang mga kamatuoran nga para gid sa aton tanan. Ano ang ginatudlo sang mensahe ni Mormon sa imo parte kay Jesucristo kag sang Iya ebanghelyo? Ngaa ayhan nga ginpili ni Mormon ining mensahe sa pagtakop sang iya mga sinulatan?

Mormon 7:8–10; 8:12–22; 9:31–37

Ang Libro ni Mormon may dako kaayo nga bili.

Si Pangulong Russell M. Nelson nagpamangkot: “Kon tanyagan ka sang mga diamante ukon mga rubi ukon sang Libro ni Mormon, diin ang imo pilion? Sa matuod lang, diin ang mas bilidhon para sa imo?” (“The Book of Mormon: What Would Your Life Be Like without It?” Ensign ukon Liahona, Nob. 2017, 61).

Nahibal-an nanday Mormon kag Moroni nga ang rekord nga ila ginatipigan mangin dako kaayo ang bili sa aton panahon, gani naghimo sila sang dalagko nga mga sakripisyo sa paghanda kag pag-amlig sini. Sa imo pagbasa sang Mormon 7:8–10; 8:12–22; kag 9:31–37, binagbinaga kon ngaa ang rekord tama ka malahalon sa aton nga panahon karon. Mahimo nga makakita ka sang dugang nga ihibalo sa 1 Nefi 13:38–41; 2 Nefi 3:11–12; kag Doktrina kag mga Kasugtanan 33:16; 42:12–13. Ano nga mga eksperiyensya ang nakabulig sa imo nga mahibal-an nga ang Libro ni Mormon may dako kaayo nga bili?

Ang mga sinulatan sang mga propeta sa Libro ni Mormon para man sa aton.

Mormon 8:26–41; 9:1–30

Ang Libro ni Mormon ginsulat para sa aton panahon.

Ginpakita ni Jesucristo kay Moroni kon ano ang matabo sa paggwa sang Libro ni Mormon (tan-awa sa Mormon 8:34–35), kag ang mga nakita ni Moroni nagtulod sa iya nga maghatag sang maisog nga mga paandam para sa aton panahon. Samtang imo ginabasa ang Mormon 8:26–41 kag 9:1–30, pamensara kon may mga patimaan bala sining mga pamatasan kag aksyon sa imo kabuhi. Ano ang pwede mo lainon?

Halimbawa, ang Mormon 9:1–30 nagaunod sang mensahe ni Moroni bilang sabat sa malapnagon nga kawala pagtuo kay Jesucristo nga nakita niya sa aton panahon. Hunahunaa ang pagsulat sang imo matun-an sa iya mga pulong parte sa masunod:

Ang mga konsikwensya sang indi pagpati kay Cristo (mga bersikulo 1–6, 26)
Ang importansya sang pagpati sa Dios sang rebelasyon kag mga milagro (mga bersikulo 7–20)
Ang laygay ni Moroni sa aton (mga bersikulo 21–30)

Ano ang imo matun-an kay Moroni nga makabulig sa imo nga mas ilapit ang iban sa Amay nga Langitnon kag kay Jesucristo?

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Mormon 7:5–7, 10; 9:11–14

Ano ang ginatudlo sining mga bersikulo sa aton parte sa plano sang Amay nga Langitnon kag kon ngaa kinahanglan naton sang Manluluwas?

Mormon 7:8–10

Ano ang aton natun-an sa aton pagtuon sang Libro ni Mormon sini nga tuig nga nakabulig pabakod sang aton pagpati sa Biblia? Agud sugdan ang paghinambalanay, pwede ninyo basahon sing ululupod ang pila ka balaan nga mga kasulatan sa Libro ni Mormon kag sa Biblia nga nagatudlo sang magkaanggid nga mga kamatuoran, pareho sa Alma 7:11–13 kag Isaias 53:3–5 ukon 3 Nefi 15:16–24 kag Juan 10:16.

Mormon 8:1–9

Ano ayhan ang pamatyagan sang mag-isahanon pareho kay Moroni? Ano ang bili sa aton sang buluhaton nga iya natapos?

Mormon 8:12, 17–21; 9:31

Pamensara nga basahon ining mga bersikulo bilang pamilya kag dayon basahon ang masunod nga pahayag ni Elder Jeffrey R. Holland: “Magluwas sa kaso sang Iya nagaisahanon nga perpekto nga Inanak, mga indi perpekto nga tawo lamang ang mga nangin katrabaho sang Dios. … Kon makakita kamo sang pagka-indi perpekto, tandai nga ang limitasyon wala sa kadiosnon sang buluhaton” (“Lord, I Believe,” Ensign ukon Liahona, Mayo 2013, 94). Ngaa delikado ang magtutok sa pagka-indi perpekto sang iban, lakip na sadtong mga nagsulat sang Libro ni Mormon?

Mormon 8:36–38

Ano ang buot silingon sang dalhon ang ngalan ni Jesucristo sa aton mga kaugalingon? Ngaa ayhan nga mahuya ang isa ka tawo sa pagdala sa iya kaugalingon sang ngalan ni Jesucristo? Paano kita mangin maisog sa aton mga panaksihon sa Manluluwas?

Mormon 9:16–24

Pila ka mga sangkap ang kinahanglan agud madinalag-on ang pagkompleto sang eksperimento sa siyensya ukon pagluto. Pamensara ang paghimo sang eksperimento ukon pagluto sang paborito nga pagkaon bilang pamilya antes magbasa sang Mormon 9:16–24. Samtang inyo ginabasa ang mga bersikulo (ilabi na ang mga bersikulo 20–21), pangitaa ang kinahanglanon nga “mga sangkap” nga nagahimo sang mga milagro nga posible. Ano nga mga milagro ang makita naton sa kalibutan sa aton palibot kag sa aton pamilya?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Maggamit sang opisyal nga mga balasahon sang Simbahan. Kon may mga pamangkot ka parte sa ebanghelyo, ang pinakamaayo nga mga kuluhaan sang sabat amo ang pangamuyo, ang balaan nga mga kasulatan, ang mga pulong sang buhi nga mga propeta, kag iban pa nga opisyal nga mga balasahon sang Simbahan (tan-awa sa Teaching in the Savior’s Way, 17–18, 23–24).