I Will Bring You up Again out of the Depths, ni Jonathan Arthur Clarke

Nobyembre 16–22

Eter 6–11

“Agud ang Kalainan Mahimo nga Madula Na”

Nga nagatumod sa Jarednon nga rekord, nagsiling si Mormon nga “ginakinahanglan nga ang tanan nga katawhan dapat nga makahibalo sang mga butang nga ginsulat sa sini nga kasaysayan” (Mosias 28:19). Tandai ini samtang imo ginabasa ang Eter 6–11. Ngaa kinahanglanon ining mga butang—ukon mapuslanon—sa imo kag sa imo mga mahal sa kabuhi?

Isulat Ang Imo Mga Panghunahuna

Ginatos ka tinuig pagkatapos nga maubos ang mga Jarednon, nadiskubrehan sang mga Nefinhon, ang mga bilin sang ila dumaan nga sibilisasyon. Upod sa sining mga ginub-an ang isa ka misteryoso nga kasulatan—mga lamina sang “puraw bulawan” nga “napuno sang mga kinurit” (Mosias 8:9). Ang Nefinhon nga hari, nga si Limhi, nakabatyag nga importante ining rekord: “Wala’y duhaduha nga nagaunod sang isa ka dako nga katanhagaan ining mga lamina,” siling niya (Mosias 8:19). Sa karon ara sa imo ang pinalip-ot sining kasulatan, nga ginlubad sa imo lenggwahe, kag ginatawag ini nga libro ni Eter. Nagahalin ini sa pareho nga kasulatan nga “indi matakos ang handum” sang mga Nefinhon nga basahon, kag sang mabasa nila, “napuno sila sang kasubo; wala’y sapayan sini naghatag ini sa ila sing dako nga ihibalo, nga sa sini sila nagkasadya” (Mosias 28:12, 18). Sa imo pagbasa parte sa pag-uswag kag sang masubo nga pagkaguba sang mga Jarednon, makakita ka sang madamo nga masubo nga mga tinion. Pero indi pagkalimti ang kalipay sang pagtuon sang mga leksyon sa sining kasaysayan. Kon hunahunaon, suno sa ginsulat ni Moroni, “Isa ka kaalam sa Dios nga ining mga butang igapakita sa inyo” (Eter 8:23), kay kon manuto kita sa mga kapaslawan kag sa mga kadalag-an sang mga Jarednon, “ang kalainan mahimo nga madula na, kag … ang tion mahimo nga mag-abot nga si Satanas mahimo nga indi na makaangkon sing gahum sa pagpangibabaw sa mga tagipusuon sang mga anak sang tawo” (Eter 8:26).

Mga Ideya para sa Personal nga Pagtuon sang Balaan nga Mga Kasulatan

Eter 6:1–12

Tuytuyan ako sang Ginuo padulong sa akon duta nga ginpangako.

Mahimo ka nga makakita sang espirituhanon nga mga ideya kon imo ikumparar ang biyahe sang mga Jarednon patabok sa kadagatan sa imo pagpanglakaton sa mortalidad. Halimbawa, ano ang gintigana sang Ginuo nga nagaiwag sang imo dalan pareho sang mga bato sa sulod sang mga barkasa sang mga Jarednon? Ano ayhan ang ginarepresentar sang mga barkasa, ukon sang hangin nga “naghuyop padulong sa duta nga ginpanaad”? (Eter 6:8). Ano ang imo matun-an sa mga aksyon sang mga Jarednon antes, sa tion sang, kag pagkatapos sang biyahe? Paano ka ginatuytuyan sang Ginuo padulong sa imo duta nga ginpangako?

Minerva•K. Teichert (1888–1976), Journey of the Jaredites across Asia, 1935, oil sa linen sa masonite, 35 x 48 inches. Brigham Young University Museum of Art.

Eter 6:5–18, 30; 9:28–35; 10:1–2

Ginabendisyunan ako sang Ginuo kon mapainubuson ako.

Bisan nga daw nangibabaw ang bugal kag kalautan sa kasaysayan sang Jarednon, may mga halimbawa man sang pagkamapainubuson sa sining mga kapitulo—ilabi na sa Eter 6:5–18, 30; 9:28–35; kag 10:1–2. Ang pagbinagbinag sang masunod nga mga pamangkot makabulig sa imo nga makatuon sa sining mga halimbawa: Ngaa nga ginpaubos sang mga Jarednon ang ila mga kaugalingon sa sining mga sitwasyon? Ano ang ila ginhimo para ipakita ang ila pagpaubos? Paano sila ginbendisyunan bilang resulta? Talupangda nga sa pila ka mga kaso, ang mga tawo napilitan nga magpaubos bangud sang ila mga sirkumstansya. Binagbinaga kon ano ang sarang mo himuon agud hugot sa buot nga “maglakat sing mapainubusuon sa atubang sang Ginuo” (Eter 6:17) imbes nga ginapilit nga mangin mapainubuson (tan-awa sa Mosias 4:11–12; Alma 32:14–18).

 

Eter 7–11

Ginabugayan sang matarong nga mga lider ang katawhan nga ila ginadumalahan.

Ang mga kapitulo 7–11 sang Eter nagaunod sang indi magnubo sa 28 ka mga henerasyon. Bisan indi tama ka damo nga detalye ang mahatag sa amo kagamay nga espasyo, isa ka sulundan ang madasig nga naglutaw: ang matarong nga liderato nagadala sang mga bugay kag katin-aran, samtang ang malaut nga liderato nagadala sang pagkabihag kag pagkaguba.

Sa idalom ang pila lamang sa mga hari nga ginmitlang sa sining mga kapitulo. Basaha ang naangot nga mga bersikulo, kag tan-awa kon ano ang sarang mo matun-an sa ila mga ehemplo—positibo kag negatibo—parte sa pagkalider. Samtang ginahimo mo ini, pamensara ang mga oportunidad nga mahimo mo maangkon sa pagpanguna ukon pag-impluwensya sa iban sa inyo balay, sa imo komunidad, sa imo calling sa Simbahan, kag iban pa.

• Orihas—Eter 6:30–7:1

• Shul—Eter 7:23–27

• Jared—Eter 8:1–7, 11–15

• Emer kag Coriantum—Eter 9:21–23

• Het—Eter 9:26–30

• Sez—Eter 10:1–2

• Riplakis—Eter 10:5–8

• Morianton—Eter 10:10–11

• Lib—Eter 10:19–28

• Etem—Eter 11:11–13

Eter 8:7–26

Ano ang likom nga kaisahan?

Kon ang duha ukon madamo pa nga mga tawo nagsugtanay nga isekreto ang ila malaut nga mga binuhatan, kabahin sila sa isa ka likom nga kaisahan. Masami ang nagatulod sa ila amo ang handum sa gahum ukon manggad. Dugang pa sa likom nga kaisahan nga ginlaragway sa Eter 8:7–18, ang iban pa nga mga halimbawa makita sa Helaman 1:9–12; 2:2–11; 6:16–30; kag Moses 5:29–33. Sa Eter 8:18–26, ginlaragway ni Moroni ang mga konsikwensya sang likom nga mga kaisahan (tan-awa sa Eter 9:4–12) kag nagapaandam sa aton nga indi ini pagsuportahan.

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Eter 6:2–12

Masadyahan ayhan ang imo pamilya nga idrama-drama ang biyahe sang mga Jarednon padulong sa duta nga ginpangako? Basi pwede kamo maggamit sang madulom nga kuwarto bilang barkasa kag mga flashlight nga kuno abi nagasiliga nga mga bato. Pwede ninyo hambalan kon paano ginpakita sang nga Jarednon ang ila pagtuo sa Ginuo paagi sa pagsulod sa mga barkasa, bisan pa nga nakahibalo sila nga “malubong sila sa kaidadalman sang dagat” (Eter 6:6). Pagkatapos nga basahon ang bersikulo 9, pwede magpaambit ang mga miyembro sang pamilya sang ila paborito nga mga kalantahon sang pagdayaw kag kantahon ini sing ululupod. Sa ano makumparar ang aton mga puluy-an sa mga barkasa sang mga Jarednon? Ano ang duta nga ginpangako nga ginadalhan sa aton sang Ginuo?

Eter 6:22–23

Sining bilog nga semana, pwede nga bantayan sang imo pamilya kon paano natuman ang ginpropesiya nga paandam sang utod ni Jared. Ano nga mga paandam ang ginhatag sa aton sang mga lider sang Simbahan? Sa ano nga paagi ang pagsikway sang ila mga laygay magapadulong sa pagkabihag?

Eter 8:23–26

Suno sa sining mga bersikulo, ngaa ginsugo si Moroni nga isulat “ang ining mga butang” parte sa likom nga mga kaisahan? (Eter 8:23). Ano ang aton matun-an sa libro ni Eter nga makabulig sa aton sa pagbaton sang mga bugay nga ginlaragway sa bersikulo 26?

Eter 9:11

Paano makaapekto ang aton mga handum sa aton mga pagpili? Ano ang sarang naton himuon bilang pamilya para siguruhon nga ginahandum naton ang mga butang sang Dios?

Eter 11:8

Agud matun-an pa gid ang parte sa kaluoy sang Ginuo sa ila nga nagahinulsol, pwede ninyo basahon ang Mosias 26:29–30; 29:18–20; Alma 34:14–16; ukon Moroni 6:8. Ayhan pwede mag-istorya ang mga miyembro sang pamilya sang mga halimbawa sang kaluoy sang Dios halin sa balaan nga mga kasulatan ukon sa ila mismo mga kabuhi.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Aktuhi ang imo natun-an. Ang pagtuon sang ebanghelyo nagalakip sang masobra pa sangsa pagbasa kag pagbinagbinag. Sa masami labi nga makatuon kita paagi sa pag-akto sa mga kamatuoran sa balaan nga mga kasulatan (tan-awa sa Juan 7:17). Ano ang imo himuon para ipangabuhi ang imo nabasa sa Eter 6–11?

Jaredite Barges, ni Gary Ernest Smith