“Nobyembre 9–15. Eter 1–5: ‘[Gisia Inang Belo] sang Pagkawala’y Pagtuo,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Nobyembre 9–15. Eter 1–5,” Dali, Magsunod sa Akon—Para sa Mga Indibidwal kag Mga Pamilya: 2020
The Jaredites Leaving Babel, ni Albin Veselka
Nobyembre 9–15
Eter 1–5
“[Gisia Inang Belo] sang Pagkawala’y Pagtuo”
Ang libro ni Eter amo ang rekord sang mga Jarednon, nga nag-abot sa duta nga ginpangako pila ka mga siglo antes pa sang mga Nefinhon. Gin-inspirar sang Dios si Moroni nga ilakip ang sinulatan ni Eter sa Libro ni Mormon bangud sang iya kapuslanan sini sa aton panahon. Paano ini sa pamatyag mo nangin mapuslanon sa imo kabuhi?
Isulat Ang Imo Mga Panghunahuna
Samtang matuod nga ang mga pamaagi sang Dios mas mataas sangsa aton, kag dapat kita pirme magpaubos sa Iya pagbuot, ginapaisog man Niya kita nga magpamensar kag maggiho para sa aton kaugalingon. Isa ina ka leksyon nga natun-an ni Jared kag sang iya utod. Halimbawa, ang ideya sang pagbiyahe sa bag-o nga lugar nga “labing hamili sa tanan sa bug-os nga duta” daw nagsugod sa hunahuna ni Jared, kag ang Ginuo “naluoy” kag nagpromisa nga ihatag ang ginpangabay, nga nagasiling, “Amo ini ang akon pagahimuon sa imo sanglit sa sining malawig nga panahon nag-ampo ka sa akon” (tan-awa sa Eter 1:38–43). Kag sang marealisar sang utod ni Jared kon daw ano kadulom sa sulod sang mga barkasa [barge] nga magadala sa ila sa ila duta nga ginpangako, gin-agda sia sang Ginuo nga magpanugyan sang solusyon, nga nagapamangkot sang masami naton ginapamangkot sa Iya: “Ano bala ang luyag ninyo nga himuon ko?” (Eter 2:23). Ang mensahe amo nga indi kita dapat magpaabot sa Dios nga suguon kita sa tanan nga mga butang. Pwede naton ihambal sa Iya ang aton kaugalingon nga mga panghunahuna kag mga ideya, kag magapamati Sia kag magahatag sang Iya kumpirmasyon ukon indi gani maglaygay sa aton. Kon kaisa ang nagaseparar lamang sa aton sa mga bugay nga aton ginapangayo amo ang aton mismo “[belo] sang pagkawala’y pagtuo,” kag kon sarang “gision inang [belo]” (Eter 4:15), mahimo nga masorpresa kita kon ano ang handa himuon sang Ginuo para sa aton.
Mga Ideya para sa Personal nga Pagtuon sang Balaan nga Mga Kasulatan
Sa akon sinsero nga pagpangamuyo sa Ginuo, pagakaluy-an Niya ako.
Ang Eter 1:33–43 nagaistorya parte sa tatlo ka mga pangamuyo sang utod ni Jared. Ano ang imo matun-an sa sabat sang Ginuo sa tagsa sining mga pangamuyo? Panumduma ang tion nga naeksperiyensyahan mo ang kaluoy sang Ginuo sa imo samtang nagapanawag ka sa Iya sa pangamuyo? Basi gusto mo nga isulat ining eksperiyensya kag iistorya ini sa tawo nga kinahanglan makabati sang imo panaksihon.
Mahimo ako nga magbaton sang rebelasyon para sa akon kabuhi.
Si Pangulong Russell M. Nelson nagsiling: “Nagapangabay ako sa inyo nga inyo patubuon ang inyo espirituhanon nga kapasidad sa pagbaton sang rebelasyon. … Pilia nga himuon ang espirituhanon nga buluhaton nga ginapangayo para mabaton ang regalo sang Balaan nga Espiritu kag mabatian ang tingug sang Espiritu nga mas pirme kag mas maathag” (“Revelation for the Church, Revelation for Our Lives,” Ensign ukon Liahona, Mayo 2018, 96).
Sa imo pagtuon sang Eter 2; 3:1–6; kag 4:7–15, ano nga mga kamatuoran ang imo makita nga nagabulig sa imo nga maintiendihan kon paano magpangita sang personal nga rebelasyon? Pwede mo markahan sa isa ka kolor ang mga pamangkot ukon mga palaligban sang utod ni Jared kag kon ano ang iya ginhimo sa mga ini, kag sa lain nga kolor pwede mo markahan kon paano ang Ginuo nagbulig sa iya kag nagpahibalo sa iya sang Iya pagbuot. Ano ang nanamian mo sa paagi nga nakig-istorya ang utod ni Jared sa Ginuo, kag ano ang imo matun-an sa sini kon paano patubuon ang pag-ilig sang rebelasyon sa imo kabuhi?
Ang Ginuo magahanda sa akon nga makatabok sa akon “dako nga kadadalman.”
Para makalab-ot sa duta nga ginpangako, gin-atubang sang mga Jarednon ang isa ka mayor nga sablag: ang pagtabok sa “dako nga kadadalman” (Eter 2:25). Ang dinalan nga “dako nga kadadalman” mahimo nga insakto nga paagi para ilaragway ang pamatyagan kon kaisa sang aton mga pagtilaw kag mga hangkat. Kag kon kaisa, pareho sa kaso sang mga Jarednon, ang pagtabok sa aton kaugalingon nga “dako nga kadadalman” amo lang ang solo nga paagi nga matuman ang pagbuot sang Dios para sa aton. Nakakita ka bala sang mga pagpalareho sa imo kabuhi sa Eter 2:16–25? Paano ka ginhanda sang Ginuo para sa imo mga hangkat? Ano ayhan ang ipangabay Niya nga imo himuon karon sa paghanda para sa kinahanglan Niya nga ipahimo sa imo sa palaabuton?
Gintuga ako sa imahe sang Dios.
Sa Bukid sang Selem, madamo sang natun-an ang utod ni Jared parte sa Dios kag parte sa iya kaugalingon. Ano ang imo matun-an sa Eter 3 parte sa espirituhanon kag pisikal nga kinaugali sang Dios? Paano makabulig sa imo ining mga kamatuoran nga maintiendihan ang imo diosnon nga pagkatawo kag potensyal?
Tanan kita mga anak sang Dios.
Ang utod ni Jared bala ang una nga tawo nga nakakita sa Ginuo?
Ginpakita na sang Dios ang Iya Kaugalingon sa iban pa nga mga propeta antes sa utod ni Jared (halimbawa, tan-awa sa Moses 7:4, 59), gani ngaa ginsiling sang Ginuo sa iya, “Wala ko pa gid nga mas-a ginpakita ang akon kaugalingon sa tawo”? (Eter 3:15). Si Elder Jeffrey R. Holland nagtanyag sining posible nga paathag: “Ginasiling ni Cristo sa utod ni Jared, ‘Wala ko pa gid nga mas-a ginpakita ang akon kaugalingon sa tawo sa sini nga paagi, nga indi sa akon pagbuot, nga tuga lamang sang pagtuo sang nakakita’” (Christ and the New Covenant [1997], 23).
Mga Ideya para sa Pang-pamilya nga Pagtuon sang Balaan nga mga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Eter 1:34–37
Ano ang aton matun-an sa sining mga bersikulo parte sa pagpangamuyo para sa iban? Ano pa ang iban nga mga kamatuoran parte sa pangamuyo ang ginapakita sining mga bersikulo?
Eter 2:16–3:6
Ano ang ginatudlo sa aton sang ehemplo sang utod ni Jared parte sa kon paano magpangita sang mga sabat sa aton mga problema kag mga pamangkot? Ayhan pwede mag-istorya ang mga miyembro sang pamilya sang mga eksperiyensya sang nagpangayo sila kag nakabaton sang mga sabat halin sa Ginuo.
Eter 4:11–12
Pagkatapos basahon ining mga bersikulo, pwede nga isulat sang mga miyembro sang pamilya ang pila sa adlaw-adlaw nga mga butang nga nagaimpluwensya sa inyo pamilya (pareho sang mga sine, mga kanta, mga hampang, ukon mga tawo) sa mga panid sang papel kag isulod ini sa isa ka yahong. Dayon pwede sila magbulos-bulos sa pagkuha sang isa ka panid kag hambalan kon bala ini “nagalugpay [sa ila] sa paghimo sang maayo” (Eter 4:12). Ano nga mga pagbag-o ang nabatyagan nga himuon sang imo pamilya?
Eter 5
Pwede ka magtago sang isa ka butang ukon kalan-unon sa isa ka kahon kag hagaron ang isa ka miyembro sang pamilya nga tan-awon ang unod kag hatagan sang tanda ang iban nga miyembro sang pamilya para buligan sila nga mapaktan kon ano ini. Samtang inyo ginabasa ang Eter 5 sing ululupod, hambali kon ngaa importante nga maggamit ang Ginuo sang mga saksi sa Iya buluhaton. Paano naton mapaambit ang aton saksi sang Libro ni Mormon sa iban?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Magmangin handa pirme. “Ang indi pormal nga mga tion sa pagtudlo madasig nga nagalabay, gani importante nga panginpuslan ini dayon tagsa nga mag-abot. … Halimbawa, ang isa ka tin-edyer nga may hilimuon nga mabudlay nga desisyon mahimo nga handa magtuon parte sa kon paano magbaton sang personal nga rebelasyon” (Teaching in the Savior’s Way, 16).
Nakakita Ka Bala sang Kapin Pa Sangsa Sini? ni Marcus Alan Vincent