Ether Hiding in the Cavity of a Rock, ni Gary Ernest Smith

Nobyembre 23–29

Eter 12–15

“Paagi sa Pagtuo ang Tanan nga mga Butang Matuman”

Ang pagsulat sang mga impresyon sarang mag-imbitar sang dugang nga rebelasyon kag makapabakod sang imo panaksihon. Nagabulig man ini sa imo nga madumduman ang imo mga panghunahuna kag maistorya ini sa iban sa palaabuton.

Isulat Ang Imo Mga Panghunahuna

Ang mga propesiya ni Eter sa mga Jarednon “dalagko kag makahalangyag” (Eter 12:5). “Ginsugiran niya sila sang tanan nga mga butang, gikan pa sa ginsuguran sang tawo” (Eter 13:2). Nakita na niya ang “mga adlaw ni Cristo” kag ang Bag-ong Jerusalem sa ulihing mga adlaw (Eter 13:4). Kag naghambal sia parte sa “paglaum sing pat-od sa isa ka mas maayo nga kalibutan, huo, bisan isa ka duog sa tuo nayon nga kamot sang Dios” (Eter 12:4). Pero ginsikway sang mga Jarednon ang iya mga pulong, sa pareho nga rason nga ginasikway sang mga tawo ang mga propesiya sang mga alagad sang Dios sa karon nga panahon—“sanglit wala nila [makita] ang mga ini” (Eter 12:5). Nagakinahanglan sang pagtuo agud magpati sa mga promisa kag mga paandam parte sa mga butang nga indi naton makita, pareho nga ginkinahanglan ni Eter sang pagtuo agud magpropesiya parte sa “dalagko kag makahalangyag nga mga butang” sa wala nagapati nga katawhan. Ginkinahanglan ni Moroni sang pagtuo agud magsalig nga makakas sang Ginuo ang iya “kahuyang sa pagsulat” kag bayluhan ini sang kabakod (tan-awa sa Eter 12:23–27). Amo ini ang klase sang pagtuo nga nagahimo sa aton nga “pat-od kag malig-on, nga dalayon nga nagabugana sa maayo nga mga buluhaton, nga natuytuyan sa paghimaya sa Dios” (Eter 12:4). Kag amo ini ang klase sang pagtuo kon sa diin “ang tanan nga mga butang matuman” (Eter 12:3).

Mga Ideya para sa Personal nga Pagtuon sang Balaan nga Mga Kasulatan

Eter 12

Ang pagtuo kay Jesucristo nagadala sang mabaskog nga mga milagro.

Madamo nga mga tawo sa karon nga panahon, pareho sa mga Jarednon sa panahon ni Eter, ang gusto makakita sang ebidensya antes sila magpati sa Dios kag sa Iya gahum. Ugaling, gintudlo ni Moroni nga “ang pagtuo amo ang mga butang nga ginalauman kag wala makita” kag nga kamo “indi makabaton sing saksi tubtob sa pagkatapos sang pagtilaw sang inyo pagtuo” (Eter 12:6).

Markahi tagsa nga makita mo ang tinaga nga “pagtuo” sa Eter 12, kag isulat kon ano ang imo matun-an parte sa pagtuo. Pangitaa ang mga sabat sa mga pamangkot pareho sini: Ano ang pagtuo? Ano ang mga bunga sang puno-sang-pagtuo nga kabuhi? Pwede mo man isulat ang imo mga panghunahuna parte sa mga saksi nga imo nabaton “pagkatapos sang pagtilaw sang imo pagtuo” (Eter 12:6).

Tan-awa man sa Mga Hebreo 11; Alma 32.

Eter 12:1–9, 28, 32

Si Jesucristo nagahatag sa aton sang “isa ka mas maayo nga paglaum.”

Dugang pa sa dalagko nga mga panghunahuna parte sa pagtuo, madamo man sang ihambal ang Eter 12 parte sa paglaum—basi pwede mo markahan tagsa nga maggwa ang tinaga nga “paglaum”. Ano ang kahulugan sang paglaum sa imo? Ano ang mga rason nga si Eter “[nagalaum] sing pat-od sa isa ka mas maayo nga kalibutan”? (tan-awa sa Eter 12:2–5). Paano ang ebanghelyo ni Jesucristo nagahatag sa imo sang “isa ka mas maayo nga paglaum”? (Eter 12:32).

Tan-awa man sa Moroni 7:40–41; Dieter F. Uchtdorf, “The Infinite Power of Hope,” Ensign ukon Liahona, Nob. 2008, 21–24; Preach My Gospel, 117.

Eter 12:23–29

Sarang ni Jesucristo himuon ang mga mahuyang nga mabakod.

Kon basahon naton ang mabaskog nga mga sinulatan ni Moroni, mahapos malimtan nga nabalaka sia sa iya “kahuyang sa pagsulat” kag nahadlok nga yagutaon sang mga tawo ang iya mga pulong (tan-awa sa Eter 12:23–25). Pero ang Dios nagpromisa nga Iya “himuon ang mahuyang nga mga butang nga mangin mabakod” para sa mga mapainubuson (bersikulo 27), kag ang espirituhanon nga gahum sa mga sinulatan ni Moroni isa ka makakumbinsi nga ebidensya nga ang Ginuo nagtuman sining promisa.

Pagkatapos nga basahon ang Eter 12:23–29, pamensara ang mga tion sang ang Dios nagbulig sa imo nga makita ang imo mga kahuyang kag ginpabakod ka wala sapayan sang mga ini. Basi isa ini ka maayo nga tion para panumdumon ang mga kahuyang nga imo karon ginapakigbatuan. Ano sa pamatyag mo ang kinahanglan mo himuon para ipaubos ang imo kaugalingon sa atubang sang Ginuo kag magpakita sang pagtuo sa Iya para mabaton ang Iya promisa nga “himuon ang mahuyang nga mga butang nga mangin mabakod”? (Eter 12:27).

Samtang imo ginabinagbinag ining mga bersikulo, basi makabulig ang masunod nga panghunahuna halin kay Elder Neal A. Maxwell: “Kon mabasahan naton sa balaan nga mga kasulatan ang parte sa tawhanon nga ‘kahuyang,’ ining tinaga nagalakip sang … kahuyang nga duna sa pangkabilugan nga kondisyon sang tawo kon sa diin ang unod may sige-sige nga impluwensya sa espiritu (tan-awa sa Eter 12:28–29). Ang kahuyang nagalakip man ugaling, sang aton partikular, indibidwal nga mga kahuyang, nga dapat naton malampuwasan (tan-awa sa Doktrina kag mga Kasugtanan 66:3; Jacob 4:7)” (Lord, Increase Our Faith [1994], 84).

 

Eter 13:13–22; 14–15

Ang pagsikway sang mga propeta nagadala sang espirituhanon nga katalagman.

Ang mangin hari sang mga Jarednon, sa kasaysayan, isa ka delikado nga posisyon. Labi nga matuod ini para kay Coriantumr, sang ang madamo nga “gung-an nga mga lalaki … naghangad sa pagpatay sa iya” (Eter 13:15–16). Sa Eter 13:15–22, pat-ini kon ano ang ginhimo ni Coriantumr para protektahan ang iya kaugalingon kag kon ano ang ginlaygay ni propetang Eter sa baylo nga iya himuon. Sa imo pagbasa sang nabilin sa libro ni Eter, pamensara ang mga konsikwensya sang pagsikway sang mga propeta. Ano ang matabo kon “ang Espiritu sang Ginuo [nag-untat na] sa pag-impluwensya sa ila”? (Eter 15:19).

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Eter 12:7–22

Sa inyo pagbasa sining mga bersikulo sing ululupod, mahimo ninyo rebyuhon ang pila ka makainspirar nga mga halimbawa sang pagtuo nga inyo nabasahan sa Libro ni Mormon. Pwede ini magpadulong sa paghinambalanay parte sa mga halimbawa sang pagtuo sa inyo mga katigulangan ukon sa inyo mismo nga mga kabuhi—hunahunaa ang pagsulat sining mga eksperiyensya kon wala pa ninyo nahimo.

Eter 12:27

Ngaa ginahatagan kita sang Ginuo sang mga kahuyang? Ano ang aton bahin sa paghimo sang “mahuyang nga mga butang nga mangin mabakod”? Ano ang bahin sang Manluluwas?

Eter 12:41

May masadya bala nga paagi nga imo matudloan ang imo kabataan sa “pagpangita … sining Jesus”? Basi isa ka paagi amo ang pagtago sang litrato ni Jesus kag hagaron ang mga miyembro sang imo pamilya nga “pangitaon” ang litrato. Paano naton ginapangita si Jesus, kag paano kita ginabugayan kon makita naton Sia?

Eter 13:13–14; 15:19, 33–34

Mahimo nga mangin makalilingaw para sa mga miyembro sang pamilya ang pagkumparar sang eksperiyensya ni Eter sa mga eksperiyensya ni Mormon kag Moroni (tan-awa sa Mormon 6; 8:1–10). Sa ano sila nagaanggid? Sa ano nangin pareho ang banas padulong sa kalaglagan sang mga Nefinhon sa banas sang mga Jarednon? (ikumparar ang Eter 15:19 sa Moroni 8:28). Ano nga mga kamatuoran ang aton matun-an nga makabulig sa aton nga malikawan ang natabo sa ila?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Paisoga ang pagpamangkot. Natural nga mausisa ang mga kabataan. Kon kaisa mahimo nga sa panan-aw mo ang ila mga pamangkot mga awat sa kon ano nga imo gusto itudlo. Sa baylo, kabiga ang mga pamangkot bilang mga oportunidad. Indikasyon ini nga ang mga kabataan handa sa pagtuon—nagahatag ang mga ini sa imo sang ideya sang mga ginapaligban sang imo kabataan kag kon ano ang ila nabatyagan parte sa ila mga ginatun-an (tan-awa sa Teaching in the Savior’s Way, 25–26).

Makahalangyag ang mga Panagna ni Eter, ni Walter Rane