Minerva K. Teichert (1888–1976), Alma Baptizes in the Waters of Mormon, 1949–1951, oil sa masonite, 35⅞ x 48 inches. Brigham Young University Museum of Art, 1969.

Nobyembre 30–Disyembre 6

Moroni 1–6

“Sa Pagtipig sa Ila sa Husto nga Dalan”

Ginrekord ni Moroni ang ginlauman niya nga “mangin may bili … sa pila ka adlaw nga palaabuton” (Moroni 1:4). Ano ang imo nakita sa Moroni 1–6 nga may bili para sa imo? Isulat ang imo madiskubrehan, kag pamensara nga iistorya ini sa isa ka tawo nga mahimo makakita man sang bili sini.

Isulat Ang Imo Mga Panghunahuna

Sang matapos ang sinulatan sang iya amay parte sa mga Nefinhon kag sa pagpalip-ot sang rekord sang mga Jarednon, abi ni Moroni sang primero nga tapos na ang iya buluhaton sang pagtipig-sang-mga-kasulatan (tan-awa sa Moroni 1:1). Ano pa ang dapat ihambal parte sa duha ka nasyon nga napapas na sing lubos? Pero nakita ni Moroni ang aton panahon (tan-awa sa Mormon 8:35), kag nainspirar sia sa “pagsulat sang pila pa ka dugang nga mga butang, agud ayhan mahimo nga mangin may bili … sa pila ka adlaw nga palaabuton” (Moroni 1:4). Nahibal-an niya nga magaabot ang malapnagon nga apostasiya, nga nagadala sang kagumon parte sa mga ordinansa sang priesthood kag sa relihiyon sa kabilugan. Siguro amo ini ang rason nga naghatag sia sang nagaklaro nga mga detalye parte sa sakramento, bunyag, paghatag sang regalo sang Balaan nga Espiritu, kag sang mga bugay sang pagtililipon upod sa pareho nga tumuluo sa “pagtipig [sang kada isa] sa husto nga dalan, … nga nagasandig lamang sa mga merito ni Cristo, nga amo ang pangulo kag manughimpit sang [aton] pagtuo” (Moroni 6:4). Ang malahalon nga mga panan-aw pareho sang mga ini ang nagahatag sa aton sang rason nga magpasalamat nga gintipigan sang Ginuo ang kabuhi ni Moroni agud sa “pagsulat sang pila pa ka dugang nga mga butang” (Moroni 1:4).

Mga Ideya para sa Personal nga Pagtuon sang Balaan nga Mga Kasulatan

Moroni 1

Ang mga disipulo ni Jesucristo nagapabilin nga matinuohon bisan may oposisyon.

Para sa iban nga tawo, mas mahapos nga mangin matinuohon sa panahon sang kahulas kag kasulhay. Pero bilang mga disipulo ni Jesucristo, kinahanglan naton magpabilin nga matinuohon bisan pa nga nagaatubang kita sang mga pagtilaw kag oposisyon. Sa imo pagbasa sang Moroni 1, ano ang nagainspirar sa imo parte sa pagkamatinuohon ni Moroni sa Ginuo kag sa iya buluhaton? Paano mo sundon ang iya ehemplo?

Moroni 2–6

Ang mga ordinansa sang priesthood kinahanglan hikuton suno sa ginasugo sang Ginuo.

Sa tion sang Iya dutan-on nga pag-alagad, nagbaton kag naghikot ang Manluluwas sang sagrado nga mga ordinansa, pareho sang bunyag (tan-awa sa Mateo 3:13–17; pag-ordin sa priesthood (tan-awa sa Marcos 3:13–19), kag ang sakramento (tan-awa sa Mateo 26:26–28). Ugaling, tungod sa Dakong Apostasiya, madamo sa katawhan sa karon ang nagalibog kon paano dapat hikuton ang mga ordinansa—ukon kinahanglanon pa bala ang mga ini. Sa Moroni 2–6, naghatag si Moroni sang importante nga mga detalye parte sa pila ka mga ordinansa sang priesthood nga makabulig klaro sang pila sinang mga palamangkutanon. Ano nga mga impresyon ang nag-abot samtang imo ginatun-an ang parte sa mga ordinansa sa sining mga kapitulo? Ang masunod amo ang pila sang mga pamangkutanon nga pwede mo ipamangkot para mabuligan ka sa pagtuon:

Kumpirmasyon (Moroni 2; 6:4).Ano ang ginatudlo sa imo sang mga instruksyon sang Manluluwas sa Moroni 2:2 parte sa ordinansa sang kumpirmasyon? Ano sa banta mo ang kahulugan sang “maliso kag matinluan paagi sa gahum sang Balaan nga Espiritu”? (Moroni 6:4).

Ordinasyon sa priesthood (Moroni 3).Ano ang makita mo sa sining kapitulo nga makabulig sa isa ka tawo sa paghanda nga ma-ordin sa priesthood? Ano ang imo makita nga makabulig sa isa ka tawo nga maghikot sang ordinasyon?

Ang sakramento (Moroni 4–5; 6:6).Tandai ang mga promisa sa pangsakramento nga mga pangamuyo (tan-awa sa Moroni 4:3; 5:2), kag binagbinaga kon ano ang imo ginahimo para tumanon ang imo mga promisa. Ano ang pwede mo himuon para imbitahon ang impluwensya sang Espiritu sing mas mabaskod samtang nagapartisipar ka sa sakramento?

Bunyag (Moroni 6:1–3).Ano ang pwede mo himuon agud padayon nga mapasaran ang mga kwalipikasyon sa bunyag nga ginhatag sa sining mga bersikulo, bisan pa pagkatapos nga nabunyagan ka? Ano ang ginapanugyan sining mga bersikulo sa imo parte sa kahulugan sang mangin miyembro sang Simbahan ni Jesucristo?

Base sa imo natun-an, paano mo liwaton ang mga paagi nga nagapamensar ka, nagapartisipar, ukon nagahanda sang iban para sa sining mga ordinansa? Ngaa importante nga ining mga ordinansa “mapakamaayo … suno sa mga kasuguan ni Cristo”? (Moroni 4:1).

 

Nagtudlo si Jesus kon paano dapat hikuton ang mga ordinansa.

Moroni 6:4–9

Ang mga disipulo ni Jesucristo nagaatipan sang kaayuhan sang mga kalag sang kada isa.

Bisan matuod nga kita tanan ang dapat “[maghikot] sang [aton] kaugalingon nga kaluwasan” (Mormon 9:27), nagtudlo man si Moroni nga ang “masunson nga [pag]tililipon sing tingob” upod sa pareho nga mga tumuluo makabulig sa aton nga magpadayon “sa husto nga dalan” (Moroni 6:4–5). Sa imo pagbasa sang Moroni 6:4–9, pamensara ang mga bugay nga nagaabot bangud ikaw “gin-isip sa tunga sang katawhan sang simbahan ni Cristo” (Moroni 6:4). Paano ka makabulig nga himuon ang imo mga eksperiyensya sa simbahan kag ang iya sang iban nga mas pareho sang ginalaragway ni Moroni, bisan lider ka man ukon partisipante.

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Moroni 1; Moroni 6:3

Ano ang buot silingon sang “magpanghiwala sang Cristo”? (Moroni 1:2–3). Paano naton ipakita ang aton “malig-on nga pagtapat sa pag-alagad sa iya tubtob sa katapusan”? (Moroni 6:3). Mag-istorya sang mga halimbawa sang mga tawo nga imo kilala nga may amo sini nga determinasyon sa pag-alagad sa Iya.

Moroni 4:3; Moroni 5:2

Ang pagbasa sang pangsakramento nga mga pangamuyo bilang pamilya mahimo nga magapadulong sa paghinambalanay parte sa pagtrato sang sakramento sing mas may pagtahod. Ayhan pwede hambalan sang mga miyembro sang pamilya ang mga dinalan sa sining mga pangamuyo nga mas makahulugan para sa ila. Pwede man nila isulat ang ila mga panghunahuna parte sining mga dinalan ukon magdrowing sang litrato nga nagabulig sa ila nga manumdom parte sa Manluluwas. Pwede nila dalhon ang ila ginsulat ukon gindrowing sa pangsakramento nga miting para buligan sila nga magtutok sang ila mga hunahuna sa Iya. Sugiri ang imo pamilya kon ano ang imo nabatyagan parte sa sakramento kag sa sakripisyo sang Manluluwas.

Moroni 6:1–4

Ano ang buot silingon sang mag-angkon sang “buong nga tagipusuon kag isa ka mahinulsulon nga espiritu”? (Moroni 6:2). Paano ini nagabulig sa aton nga maghanda para sa bunyag? Paano ini makabulig sa aton pagkatapos naton nga mabunyagan?

Moroni 6:4–9

Suno sa sining mga bersikulo, ano ang pila sa mga bugay nga nagaabot bangud “gin-isip sila sa tunga sang katawhan sang simbahan ni Cristo”? (Moroni 6:4). Ngaa kinahanglan naton ang Simbahan?

Moroni 6:8

Ano ang ginatudlo sining bersibulo parte sa paghinulsol? Ano ang buot silingon sang magpangayo sang kapatawaran nga may “matuod-tuod nga tinutuyo”? (Moroni 6:8). Pamensara ang pagkanta sang kalantahon parte sa kapatawaran.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Magpangita sang ebidensya sang gugma sang Dios. Si Pangulong M. Russell Ballard nagtudlo, “[Ang] ebanghelyo isa ka ebanghelyo sang gugma—gugma para sa Dios kag gugma para sa isa kag isa” (“God’s Love for His Children,” Ensign, Mayo 1988, 59). Sa imo pagbasa sang balaan nga mga kasulatan, pamensara ang pagpat-in ukon pagmarka sang mga ebidensya sang gugma sang Dios para sa imo kag sa tanan Niya nga kabataan.

Moroni in the Cave, ni Jorge Cocco