“Disyembre 7–13. Moroni 7–9: ‘Kabay nga Ibayaw Ka ni Cristo,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Disyembre 7–13. Moroni 7–9,” Dali, Magsunod sa Akon—Para sa Mga Indibidwal kag Mga Pamilya: 2020
Minerva K. Teichert (1888–1976), Moroni: The Last Nephite, 1949–1951, oil sa masonite, 34¾ x 47 inches. Brigham Young University Museum of Art, 1969
Disyembre 7–13
Moroni 7–9
“Kabay nga Ibayaw Ka ni Cristo”
Samtang imo ginatun-an ang Moroni 7–9, pamatii ang mga pagpabatyag sang Balaan nga Espiritu, kag isulat ang Iya mga mensahe sa imo. Sarang ka Niya tudloan sang pareho kinahanglan mo mahibal-an kag kon ano ang kinahanglan mo himuon.
Isulat Ang Imo Mga Panghunahuna
Antes gintapos ni Moroni ang kasulatan nga ginakilala naton sa karon nga ang Libro ni Mormon gamit ang iya kaugalingon nga panghingapos nga mga pulong, nagpaambit sia sang tatlo ka mensahe halin sa iya amay, nga si Mormon: isa ka pamulong-pulong sa “mga mahidaeton nga mga sumolunod ni Cristo” (Moroni 7:3) kag duha ka mga sulat nga ginsulat ni Mormon kay Moroni. Siguro ginlakip ni Moroni ining mga mensahe sa Libro ni Mormon bangud nakita na niya nga daan ang mga pagpalareho sang mga peligro sa iya panahon kag sa aton. Sang ginsulat ining mga tinaga, ang katawhan nga Nefinhon sa kabilugan madasig nga nagakahulog sa apostasiya. Madamo sa ila ang “nadulaan na sang ila gugma, ang isa tuhoy sa isa” kag nagakasadya sa “tanan nga butang luwas sa sinang maayo” (Moroni 9:5, 19). Pero sa gihapon nakakita si Mormon sang rason nga maglaum—nga nagatudlo sa aton nga ang paglaum wala nagakahulugan sang pagbale-wala ukon kakulang sang ihibalo sa mga problema sang kalibutan; nagakahulugan ini sang pag-angkon sang pagtuo sa Amay nga Langitnon kag kay Jesucristo, nga ang gahum mas labaw kag mas wala katubtuban sangsa sina nga mga problema. Nagakahulugan ini sang “[pag]kapyot sa tagsa ka maayo nga butang” (Moroni 7:19). Nagakahulugan ini sang pagtugot sang Pagbayad-Sala ni Jesucristo “kag sang paglaum sang iya himaya kag sang kabuhi nga wala’y katapusan [nga] magapabilin sa imo kaisipan” (Moroni 9:25). Kag tubtob sa mahimayaon nga adlaw sang Ikaduhang Pagkari ni Cristo, nagakahulugan ini sang indi pag-untat sang “pagpangabudlay [naton nga] pagahimuon … [agud] malutos ang kaaway sang tanan nga pagkamatarong” (Moroni 9:6).
Mga Ideya para sa Personal nga Pagtuon sang Balaan nga Mga Kasulatan
Ang kasanag ni Cristo nagabulig sa akon nga maghusga sang maayo kag malain.
Ang kalibutan sa karon nga panahon puno sang maimpluwensya nga mga mensahe; paano naton mahibal-an kon diin ang husto kag kon diin ang sala? Ang mga tinaga ni Mormon sa Moroni 7 nagahatag sa aton sang pila ka mga prinsipyo nga pwede naton gamiton para malikawan ang “magsala sa [pag]hukom” (Moroni 7:18). Sa imo pagtuon sang Moroni 7:12–20, pangitaa ang mga kamatuoran nga makabulig sa imo nga mahibal-an kon ano ang mas magapalapit sa imo sa Dios kag kon ano ang indi. Mahimo mo gamiton ining mga kamatuoran para buligan ka sa pag-usisa sang mga mensahe nga imo masugata kag sang imo mga eksperiyensya sini nga semana kag hibaluon kon bala ini nagaimbitar kag nagaengganyo sa imo nga maghimo sang maayo (tan-awa sa Moroni 7:13).
Paagi sa pagtuo kay Cristo, sarang ako “magkapyot sa tagsa ka maayo nga butang.”
Pagkatapos nga magtudlo kon paano kilalahon ang maayo sa malain, namangkot si Mormon sang pamangkot nga mapuslanon sa karon nga panahon: “Paano ini mahimo [nga] makakapyot kamo sa tagsa ka maayo nga butang?”—ilabi na kon ang mga tentasyon sang kaaway tama gid ka makaelengganyo (Moroni 7:20). Ang sabat ni Mormon makita sa kabilugan sang mga nabilin nga bahin sang kapitulo 7. Samtang imo ginabasa ang mga bersikulo 20–48, pangitaa ang mga kamatuoran nga nagabulig sa imo nga makilala ang “tagsa ka maayo nga butang” nga ara sa imo bangud kay Jesucristo. Paano ang pag-angkon sang pagtuo sa Iya nakabulig sa imo nga pangitaon ang mga butang nga maayo? Paano ka “magkapyot” sa mas maayo nga mga butang?
Tan-awa man sa Mga Artikulo sang Pagtuo 1:13.
“Ang putli nga pagmahal amo ang putli nga gugma ni Cristo.”
Si Pangulong Dallin H. Oaks nagsiling: “Ang rason nga ang putli nga pagmahal wala nagapalya kag ang rason nga ang putli nga pagmahal mas dako pa sangsa pinakamapuslanon nga mga binuhatan sang kaayo … amo nga ang putli nga pagmahal, ‘ang putli nga gugma ni Cristo’ (Moro. 7:47), indi isa ka buhat kundi isa ka kondisyon ukon kahimtangan. … Ang putli nga pagmahal kahimtangan nga ginatinguhaan sang isa ka tawo nga malab-ot” (“The Challenge to Become,” Ensign, Nob. 2000, 34). Samtang imo ginabasa ang Moroni 7:44–48, pamensara ang paglaragway ni Mormon sang putli nga pagmahal, kag pamatii ang mga pagpabatyag halin sa Balaan nga Espiritu; buligan ka Niya nga makakita sang mga paagi nga mag-uswag. Ngaa kinahanglan naton sang pagtuo kag paglaum para makabaton sang regalo sang putli nga pagmahal?
Makuha bala sa akon ang akon kaputli kag dungog?
Ang paglaragway ni Mormon sang makahaladlok nga mga sala sang mga Nefinhon nagtuga sa pila ka mga tawo sa sala nga pagpamensar nga ang mga biktima sang sekswal nga pagpanghimulos ukon abuso ang naglapas sang layi sang kaputli. Ugaling, si Elder Richard G. Scott nagklaro nga indi amo sini. Gintudlo niya, “Maligdong ako nga nagasaksi nga kon ang mga binuhatan sang iban sang kapintas, pagkabalingag (perversion), ukon pagpakigrelasyon sa kapamilya (incest) nagasakit sa imo sing tuman, batok sa imo kabubut-on, wala ka sang salabton kag indi ka dapat magbatyag sang pagkakonsensya” (“Healing the Tragic Scars of Abuse,” Ensign, Mayo 1992, 32).
Makaangkon ako sang paglaum kay Cristo bisan ano pa ang akon sirkumstansya.
Pagkatapos nga ilaragway ang kalautan nga iya nakita, ginhambalan ni Mormon ang iya anak nga indi magkasubo. Ano ang nanamian mo sa mensahe ni Mormon parte sa paglaum? Ano ang buot silingon sa imo sang “ibayaw [ka]” ni Cristo? Ano nga mga kinaiya ni Cristo kag mga prinsipyo sang Iya ebanghelyo ang “nagapabilin sa imo kaisipan” kag nagahatag sa imo sang paglaum? (Mnoroni 9:25).
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Moroni 7:5–11
Suno sa Moroni 7:5–11, ngaa importante nga himuon ang husto nga mga butang sa husto nga mga rason? Paano naton mahibal-an kon nagapangamuyo kita kag nagatuman sang mga kasuguan sang Dios nga may “matuod-tuod nga tinutuyo”? (bersikulo 6).
Moroni 7:12–19
Paano makabulig sa aton ang laygay ni Mormon nga maghimo sang maayo nga mga pagpili parte sa kon paano naton ginagamit ang aton oras kag kon kay sin-o naton ini ginausar? Pwede mo hagaron ang mga miyembro sang pamilya nga magpangita sa inyo balay kag “magkapyot” (Moroni 7:19), ukon mag-uyat sa, mga butang nga nagaimbitar sa ila sa “paghimo sang maayo, kag sa pagpalangga sa Dios, kag sa pag-alagad sa iya” (Moroni 7:13). Dayawa sila sa maayo nga mga butang nga ila makita.
Moroni 7:29
Pagkatapos basahon ining bersikulo, pwede hambalan sang mga miyembro sang pamilya ang parte sa mga milagro nga ila nasaksihan ukon iban pa nga mga paagi nga nakita nila ang impluwensya sang Dios sa ila mga kabuhi.
Moroni 8:5–26
Ano ang wala maintiendihi sang mga Nefinhon nga nagabunyag sang magagmay nga kabataan parte sa Pagbayad-Sala ni Jesucristo? Ano ang aton matun-an parte sa Pagbayad-Sala halin sa mga pinanudlo ni Mormon?
Moroni 8:16–17
Ano ang kahulugan sang pag-angkon sang “himpit nga gugma”? Paano ini nagabulig sa aton nga mapakigbatuan ang kahadlok? Paano ini nagabulig sa aton nga magtudlo sang kamatuoran nga may kaisog? Paano naton pauswagon ini?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Maggamit sang musika para imbitahon ang Espiritu kag magtudlo sang doktrina. “Ang musika may wala tupong nga gahum sa pagtandog [sa aton] padulong sa mas dako nga pagkaespirituhanon” (“First Presidency Preface,” Hymns, x). Ang kanta parte sa gugma, makapanami sang diskusyon sa pamilya parte sa putli nga pagmahal sa Moroni 7:44–48.
Portrait of Christ the Savior, ni Heinrich Hofmann