Si Jose, Maria, kag ang lapsag nga si Jesus sa pasungan

Behold the Lamb of God, ni Walter Rane

Disyembre 21–27

Paskwa

“Magakari Sia sa Kalibutan sa Pagtubos sang Iya Katawhan”

Ang panahon sang Paskwa isa ka tion sa pagpanumdom kag pagpahayag sang kapasalamatan para sa pagkabun-ag sang aton Manluluwas, nga si Jesucristo. Samtang imo ginabasa kag ginabinagbinag sining semana ang parte sa Iya pagkabun-ag kag kabuhi, pamensara kon paano ang imo pagtuon sang Libro ni Mormon nagpabakod sang imo panaksihon nga Sia amo ang Manluluwas sang kalibutan. Isulat ang mga pagpabatyag nga nagaabot sa imo.

Isulat Ang Imo Mga Panghunahuna

Halin sa Nefi tubtob sa Moroni, ang tagsa ka propeta sa Libro ni Mormon nangin dedikado sa sagrado nga katuyuan nga ginpalip-ot sa tig-ulo nga pahina: “Sa pagpasanag sa [tanan nga katawhan] nga si Jesus amo ang Cristo.” Isa ka propeta ang nakakita sa Iya bilang isa ka espiritu antes sa kabuhi sa duta, kag ang isa ka nakakita sang Iya pagkabun-ag kag pag-alagad sa isa ka palanan-awon. Ang isa nagtindog sa pader para ipahayag ang mga tanda sang Iya pagkabun-ag kag sang Iya kamatayon, kag ang isa pa nagluhod sa atubang sang Iya nabanhaw nga lawas, nga nagahikap sang mga pilas sa Iya mga kamot, tiil, kag kilid. Tanan sila nakahibalo sining tig-una nga kamatuoran: “Wala na sing iban pa nga paagi ukon mga pahito nga sa sini ang tawo mahimo nga maluwas, lamang paagi sa nagapasag-uli nga dugo ni Jesucristo, nga … magaabot sa pagtubos sang kalibutan” (Helaman 5:9).

Gani sa sining tion sang Paskwa, samtang ang mga tumuluo sa bilog nga kalibutan nagaselebrar sang kaayo kag gugma sang Dios sa pagpadala sang Iya Anak, binagbinaga kon paano ang Libro ni Mormon nagpabakod sang imo pagtuo kay Cristo. Samtang imo ginahunahuna ang Iya pagkabun-ag, binagbinaga kon ngaa Sia nagkari kag kon paano ginbag-o sang Iya pagkari ang imo kabuhi. Kag sa sina mo maeksperiyensyahan ang matuod-tuod nga kalipay sang Paskwa—ang regalo nga ginhatag ni Jesucristo sa imo.

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

1 Nefi 11:13–36; Mosias 3:5–10; Helaman 14:1–13; 3 Nefi 1:4–22

Si Jesucristo nagkari sa kalibutan agud mangin akon Manluluwas.

Kinaandan na nga magbasa sang istorya parte sa pagkabun-ag sang Manluluwas sa Bag-ong Katipan sa tion sang Paskwa, pero makakita ka man sang makatalandog nga mga propesiya sang sining sagrado nga hitabo sa Libro ni Mormon. Halimbawa, ang mga propesiya parte sa pagkabun-ag kag pag-alagad sang Manluluwas makita sa 1 Nefi 11:13–36; Mosias 3:5–10; Helaman 14:1–13; kag 3 Nefi 1:4–22. Ano nga mga panghunahuna parte kay Jesucristo ang nagaabot sa imo samtang imo ginabasa ining mga dinalan kag ginapadaluman sang pensar ang posible nga mga kahulugan sang mga tanda sang Iya pagkabun-ag? Paano ginpabakod sang mga panaksihon sining mga propeta sa dumaan nga Amerika ang imo panaksihon kay Cristo kag sa Iya misyon?

Tan-awa man sa Mateo 1:18–25; 2; Lucas 2.

2 Nefi 2:6; Alma 7:7–13; 11:40; Helaman 5:9; 14:16–17

Si Jesucristo amo ang Manunubos sang tanan nga katawhan.

Wala kuntani kita sang rason nga magselebrar sang pagkabun-ag ni Jesucristo kon indi tungod sang Iya nagabayad-sala nga sakripisyo, nga paagi sini ginaluwas Niya kita halin sa sala kag kamatayon, ginapaumpawan ang aton mga kalisud, kag ginabuligan kita nga “magmangin himpit sa Iya” (Moroni 10:32). Ano ang imo natun-an sa Libro ni Mormon sini nga tuig parte sa gahum sang Manluluwas sa pagtubos sa imo? May mga istorya bala ukon pinanudlo nga daw nangibabaw gid para sa imo? Pamensara kon ano ang ginatudlo sa imo sang masunod nga mga halimbawa parte sa nagapangtubos nga misyon sang Manluluwas: 2 Nefi 2:6; Alma 7:7–13; 11:40; kag Helaman 5:9; 14:16–17. Ano ang ginainspirar sa imo nga imo himuon para ipakita sa Iya ang imo kapasalamatan? 

1 Nefi 6:4; 19:18; 2 Nefi 25:23, 26; 33:4, 10

Ang Libro ni Mormon nagapamatuod kay Jesucristo.

Ang “Isa pa ka Katipan nahanungod kay Jesucristo” labaw pa sangsa pangaduha nga tig-ulo sang Libro ni Mormon; isa ini ka pahayag sang iya diosnon nga katuyuan. Binagbinaga kon ano ang imo matun-an sa masunod nga balaan nga mga kasulatan parte sa misyon sang Libro ni Mormon nga magpamatuod parte kay Cristo: 1 Nefi 6:4; 19:18; kag 2 Nefi 25:23, 26; 33:4, 10.

Pamensara nga isulat sa isa ka journal kon paano ang pagtuon sang Libro ni Mormon sini nga tuig nagpalapit pa gid sa imo kay Cristo. Ang masunod nga mga tanda mahimo nga makabulig:

• “Ang bag-o ko nga natun-an parte sa Manluluwas sini nga tuig amo ang …”

• “Ang pagbasa [sang mga bersikulo parte sa Manluluwas] nagbag-o sang paagi nga ako …”

• “Ang akon paborito nga tawo [ukon istorya] sa Libro ni Mormon nagtudlo sa akon nga ang Manluluwas …”

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

1 Nefi 11:13–23; Mosias 3:5–10; Helaman 14:1–13; 3 Nefi 1:4–22

Basi masadyahan ang mga kabataan nga magdrowing sang mga litrato sang ila mga mabatian samtang inyo ginabasa ang parte sa pagkabun-ag kag pag-alagad ni Cristo sa 1 Nefi 11:13–23; Mosias 3:5–10; Helaman 14:1–13; kag 3 Nefi 1:4–22. Dayon pwede isugid liwat sang imo kabataan ang mga istorya gamit ang mga litrato nga ila gindrowing.

“Sia ang Regalo”

Agud buligan ang imo pamilya nga magtutok sa regalo nga ginhatag sang Amay nga Langitnon sa aton paagi sa pagpadala sang Iya Anak, pwede mo putson ang litrato ni Jesucristo nga daw pang-Paskwa nga regalo. Pwede nga hambalan sang mga miyembro sang pamilya ang paborito nila nga regalo sa Paskwa nga nabaton na ukon gusto mabaton. Dayon pwede nila buksan ang ginputos nga litrato ni Cristo kag hambali kon paano Sia nangin malahalon nga regalo para sa aton. Hambali kon paano ninyo diskubrehon, batunon, kag ipaambit ang regalo sang Manluluwas bilang pamilya sini nga Paskwa.

Basi makapaayo man sa imo pamilya ang magpamensar sang “regalo” nga gusto nila ihatag sa Manluluwas, pareho abi sang pagtinguha nga mangin mas maayo sa iban ukon magtinguha nga dulaon ang isa ka malaw-ay nga kagawian. Pamensara nga hagaron ang mga miyembro sang pamilya nga isulat ang ila mga ideya, putson ang mga ini nga daw regalo, kag ibutang ang ila mga regalo sa palibot sang litrato sang Manluluwas.

Ang Espiritu sang Paskwa

Basi mangin masadya ang magplano sang mga aktibidades nga pwede himuon sang inyo pamilya sa inadlaw padulong sa Paskwa para mabatyagan ang Espiritu ni Cristo, pareho sang pagserbisyo sa isa ka tawo ukon pagkanta sang mga himno sa Paskwa sing ululupod.  

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magpamangkot parte sa mga imbitasyon sa pag-akto. “Kon magpamangkot ka parte sa isa ka imbitasyon sa pag-akto, ginapakita mo [sa mga miyembro sang imo pamilya] nga nagaulikid ka sa ila kag kon paano ang ebanghelyo nagabugay sa ila mga kabuhi. Ginahatagan mo man sila sang mga oportunidad nga maistorya ang ila mga eksperiyensya, nga nagapabakod sa ila pangako kag nagatugot sa ila nga suportahan ang kada isa sa pagpangabuhi sang ebanghelyo” (Teaching in the Savior’s Way, 35).

anghel nga nagapakita kay Nefi sang Birhen nga si Maria sa isa ka palanan-awon

Nephi’s Vision of the Virgin Mary, ni Judith A. Mehr