Appendix A

Paano Nagasaksi ang Espiritu sa Akon Nga ang Libro ni Mormon Matuod?

Mahimo nabatian mo ang parte sa pangako ni Moroni sa tanan nga nagabasa sang Libro ni Mormon: “Kon kamo mamangkot sa isa ka bunayag nga tagipusuon, sa matuod-tuod nga tinutuyo, nga may pagtuo kay Cristo, ipakita niya ang kamatuoran [sang Libro ni Mormon] sa inyo, paagi sa gahum sang Balaan nga Espiritu” (Moroni 10:4). Pero ano ang buot silingon sang mahibal-an ang kamatuoran “paagi sa gahum sang Balaan nga Espiritu”? Paano mo mahibal-an kon san-o nagahambal sa imo ang Balaan nga Espiritu?

Mahimo nga makabulig ang tandaan nga ang Balaan nga Espiritu nagapakighambal sa aton sa mga paagi nga lain katama sa paagi nga ginagamit naton para makighambal sa isa kag isa. Pero ang imo Amay nga Langitnon gusto magbulig sa imo nga makilala ang Espiritu. Ginhatagan ka Niya sang Libro ni Mormon, kon sa diin ang pila ka matinuohon nga mga alagad naglaragway sang ila mga eksperiyensya upod sa tingug sang Ginuo.

Halimbawa, ginhambalan ni Nefi ang iya mga utod nga ang Ginuo nakighambal sa ila “sa mahinay kag diutay nga tingug,” bisan pa nga indi ini tingug nga ila mabatian gamit ang ila mga dulunggan. Ang matuod, siling ni Nefi ang iya mga utod “nawad-an sang igbalatyag” kag indi “mabatyagan ang iya mga pulong” (1 Nefi 17:45, mga italic gindugang). Ginlaragway ni Enos ang sabat sa iya mga pangamuyo bilang “ang tingug sang Ginuo” nga nag-abot “sa [iya] kaisipan” (Enos 1:10). Kag panumduma ining mga tinaga nga nagalaragway sang tingug nga naghalin sa langit sang ang nabanhaw nga Manluluwas nagpakita sa duta nga Bugana: “Indi ini isa ka mabaris nga tingug, ukon man isa ka matunog nga tingug; wala’y sapayan, … naglapos ini tubtob sa ila kalag mismo, kag nagtuga sang ila mga tagipusuon nga magdabdab” (3 Nefi 11:3).

Ayhan may mga eksperiyensya ka nga pareho sang mga ini, ukon basi ang imo mga eksperiyensya lain. Ang Balaan nga Espiritu nagapakighambal sa aton sa nagkalain-lain nga mga paagi, kag ang rebelasyon mahimo nga magaabot sa kada isa sa aton sing lain. Kag kon ang Espiritu ara sa aton mga kabuhi, makita naton ang Iya impluwensya sa aton sa madamo nga paagi. Si Apostoles Pablo naghambal parte sa “bunga sang Espiritu”—mga balatyagon sang “gugma, kalipay, paghidaet, pagbatas, pagkalulo, pagkaayo, pagkatutom, pagkamapainubuson, pagpugong sang kaugalingon,” lakip sa madamo pa (Mga Taga-Galacia 5:22–23).

Ari ang pila sa iban pa nga mga pinanudlo kag halimbawa gikan sa Libro ni Mormon parte sa Balaan nga Espiritu. Sa imo pagbasa sang mga ini, mahimo nga makita mo nga ang Balaan nga Espiritu nagapakighambal sa imo sing masami sangsa natalupangdan mo, nga nagasaksi sa imo nga ang Libro ni Mormon matuod gid nga pulong sang Dios.

Kapasalamatan kag Kalipay

Ang Libro ni Mormon nagasugod kay propetang Lehi nga nakakita sang matahum nga palanan-awon. Sa sining palanan-awon, ginhatagan sia sang libro kag gin-agda nga magbasa. “Samtang sia nagabasa,” siling sa rekord, “napuno sia sang Espiritu sang Ginuo.” Ang ining eksperiyensya nagtulod kay Lehi sa pagdayaw sang Dios para sa Iya “gahum, kag kaayo, kag kaluoy,” kag ang [kalag] ni Lehi “nagkalipay, kag ang iya bilog nga tagipusuon napuno” (1 Nefi 1:12, 14–15).

Nakaangkon ka na bala sang pareho nga eksperiyensya? Ang pagbasa bala sang Libro ni Mormon nagpuno na sang imo tagipusuon sang kapasalamatan para sa kaayo kag kaluoy sang Dios? Ang mga dinalan bala sa Libro ni Mormon nagdala na sang kasadya sa imo tagipusuon? Ining mga balatyagon mga impluwensya sang Espiritu, nga nagasaksi sa imo nga ang mga pulong nga imo ginabasa naghalin sa Dios kag nagatudlo sang Iya kamatuoran.

Isa ka Ginbag-o nga Tagipusuon

Pagkatapos nga magwali sang isa ka matahum nga sermon parte sa Pagbayad-Sala ni Jesucristo (tan-awa sa Mosias 2–4), gusto mahibal-an ni Haring Benjamin kon ang iya katawhan “nagapati sa mga pulong nga iya ginhambal sa ila.” Nagsabat sila nga nagapati sila sa iya mensahe. Ngaa? “Tungod ang Espiritu sang Ginuo nga Makaako, nga naghikot sang isa ka dako nga pagbag-o sa amon, ukon sa amon mga tagipusuon, sa bagay nga wala na kami sing huyog nga maghimo sing malain, kundi dalayon nga maghimo sing maayo” (Mosias 5:1–2).

Ayhan natalupangdan mo ang daw pareho nga butang sa imo tagipusuon sang imo ginbasa ang Libro ni Mormon. Halimbawa, mahimo nga nangin inspirado ka nga mangin mas maayo nga tawo, nga magtalikod sa sala, ukon maghimo sang bagay nga maayo para sa isa ka tawo. Amo ini ang espirituhanon nga saksi nga imo ginapangita nga ang libro inspirado sang Dios. Pareho sang gintudlo ni Mormon, “Ang tagsa ka butang nga nagapangagda kag nagapangganyat sa paghimo sang maayo, kag sa pagpalangga sa Dios, kag sa pag-alagad sa iya, may pagtuytoy sang Dios” (Moroni 7:13; tan-awa man sa 2 Nefi 33:4, 10; Alma 19:33; Eter 4:11–12).

Isa ka Ginpasanag nga Kaisipan

Sang gusto buligan ni Alma ang mga Zoramnon sa “pag-eksperimento sa [iya] mga pulong” kag sa paghibalo para sa ila kaugalingon kon ang iya panaksihon matuod, ginkumparar niya ang pulong sang Dios sa isa ka binhi: “Kon hatagan ninyo sing duog, nga ang isa ka binhi mahimo nga matanom sa inyo tagipusuon,” ginpaathag niya, “magasugod ini sa paghabok sa sulod sang inyo mga dughan; kag kon inyo mabatyagan ining nagahabok nga mga hulag, magasugod kamo sa pagsiling sa sulod sang inyo mga kaugalingon—Nagapatimaan nga isa ini ka maayo nga binhi, ukon nga ang pulong maayo, kay ini nagasugod sa pagpadako sang akon kalag; huo, ini nagasugod sa pagpasanag sang akon paghangop, huo, ini nagasugod nga mangin manamit sa akon” (Alma 32:27–28).

“Ginahatagan mo sang lugar” sa imo tagipusuon ang mga pulong sang Libro ni Mormon kon ginatugtan mo ang mga ini nga mag-impluwensya sa imo kabuhi kag maggiya sang imo mga pagpili. Kag paano ining mga pulong “magpadako sang [imo] kalag” kag “magpasanag sang [imo] paghangop”? Mahimo nga mabatyagan mo nga mas nagakusog ka sa espirituhanon. Mahimo nga mabatyagan mo nga mas mapinalanggaon ka kag bukas sa iban nga tawo. Mahimo mo man matalupangdan nga mas naintiendihan mo ang mga bagay sing mas maayo, labi na gid ang espirituhanon nga mga butang—nga daw pareho bala nga may kasanag nga nagaiwag sa imo kaisipan. Kag mahimo nga magaugyon ka nga ang doktrina nga gintudlo sa Libro ni Mormon “manamit.” Ang amo nga mga balatyagon mahimo nga makabulig sa imo sa pag-intiendi nga matuod ka nga nakabaton sang espirituhanon nga saksi sang kamatuoran, pareho sang ginpahayag ni Alma: “O nian, indi bala ini matuod-tuod? Ginasiling ko sa inyo, Huo, sanglit ini kapawa; kag kon ano man ang kapawa, maayo, sanglit ini makita, gani pat-od gid nga inyo mahibal-an nga ini maayo” (Alma 32:35).

Indi Mo Kinahanglan Magpalibog

Pila lang ini sa mga paagi kon paano nagapakig-angot ang Espiritu. May madamo nga iban pa. Padayuna ang pagpangita sang mga oportunidad sa pagpamati sa tingug sang Espiritu, kag mabaton mo ang Iya padayon, nagakumpirma nga saksi sang pagkamatuod sang Libro ni Mormon.

Si Pangulong Russell M. Nelson nagpangako: “Indi mo kinahanglan magpalibog kon ano ang matuod. Indi mo kinahanglan magpalibog kon kay sin-o ka hilway nga makasalig. Paagi sa personal nga rebelasyon, makabaton ka sang imo kaugalingon nga saksi nga ang Libro ni Mormon amo ang pulong sang Dios, nga si Joseph Smith isa ka propeta, kag nga ini amo ang Simbahan sang Ginuo. Bisan ano pa ang ihambal ukon himuon sang iban, wala sang bisan sin-o nga makakuha sang saksi nga ginpabutyag sa imo tagipusuon kag kaisipan sa kon ano ang matuod” (“Revelation for the Church, Revelation for Our Lives,” Ensign ukon Liahona, Mayo 2018, 95).