“Disyembre 14–20. Moroni 10: ‘Magkari kay Cristo, kag Magmangin Himpit sa Iya,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Disyembre 14–20. Moroni 10,” Dali, Magsunod sa Akon—Para sa Mga Indibidwal kag Mga Pamilya: 2020
That Ye May Know, ni Gary L. Kapp
Disyembre 14–20
Moroni 10
“Magkari kay Cristo, kag Magmangin Himpit sa Iya”
Sa pagtapos sang imo pagbasa sang Libro ni Mormon, pamensara ang pagpangita sang mas ginpabaskog nga saksi halin sa Balaan nga Espiritu nga ini matuod. Samtang imo ini ginahimo, isulat ang mga panghunahuna nga imo mabaton.
Isulat Ang Imo Mga Panghunahuna
Ang Libro ni Mormon nagabukas upod ang promisa ni Nefi agud ipakita sa aton nga ang mahinuklugon nga mga kaluoy sang Ginuo nagapangibabaw sa tanan nga iya mga pinili, tungod sang ila pagtuo” (1 Nefi 1:20). Ang libro nagatakop sa amo-amo man nga mensahe halin kay Moroni sang iya ginahanda nga “pat-inan” ang mga kasulatan: ginhagad niya kita nga “dumdumon kon nangin daw ano ka maluluy-on ang Ginuo” (Moroni 10:2–3). Bisan pa nga panumdumon lang naton ang madamo nga kaluoy nga nasulat sa Libro ni Mormon, nagahatag na ini sa aton sang madamo nga dulumdumon. Ano nga mga halimbawa ang imo mapensaran? Pwede mo binagbinagon ang maluluy-on nga paagi nga ginpangunahan sang Dios ang pamilya ni Lehi patabok sa kamingawan kag patabok sa dalagko nga mga tubig, ang mahinuklugon nga kaluoy nga Iya ginpakita kay Enos sang ang iya kalag ginutom sa kapatawaran, ukon ang kaluoy nga Iya ginpakita kay Alma, isa ka masupog nga kaaway sang Simbahan nga nangin isa sang iya wala kahadlok nga tagpangapin. Ukon mahimo nga magliso ang imo hunahuna sa kaluoy nga ginpakita sang nabanhaw nga Manluluwas sa katawhan sang Iya ginpang-ayo ang ila mga masakiton kag ginbendisyunan ang ila magagmay nga kabataan. Siguro ang pinakaimportante, ining tanan makapadumdom sa imo kon “nangin daw ano ka maluluy-on ang Ginuo” sa imo, kay isa sa mayor nga mga rason sang Libro ni Mormon amo nga agdahon ang kada isa sa aton nga batunon ang kaluoy sang Dios—isa ka imbitasyon nga ginhambal sing simple sa nagapaalam nga mga pulong ni Moroni, “Magkari kay Cristo, kag magmangin himpit sa iya” (Moroni 10:32).
Mga Ideya para sa Personal nga Pagtuon sang Balaan nga Mga Kasulatan
Sarang ko mahibal-an ang kamatuoran paagi sa gahum sang Balaan nga Espiritu.
Ang promisa sa Moroni 10:3–7 nagbag-o sang mga kabuhi sang minilyon nga mga tawo sa bilog nga kalibutan. Nabag-o bala sini ang imo kabuhi? Kon nagapangita ka nga makaangkon ukon pabakuron ang imo panaksihon sang Libro ni Mormon, ang imbitasyon ni Moroni para gid sa imo. Samtang imo ginbasa ang Moroni 10:3–7, pamensara nga basahon ini sing mas maidid sangsa nagliligad. Pwede mo usisaon ang tagsa ka dinalan, nga ginapamangkot ang imo kaugalingon pareho sang mga ini: Ano ang buot silingon sini? Paano ko ini himuon sing mas maayo? Ano ang akon nangin mga eksperiyensya sa sini? Paano ginpakita sang Balaan nga Espiritu sa akon ang kamatuoran sang Libro ni Mormon?
Hunahunaa man ang isa ka tawo nga nagakinahanglan makabati sang imo panaksihon sang Libro ni Mormon. Paano mo buligan inang tawo nga pangitaon ang iya kaugalingon nga pamatuod?
“Indi ninyo pag-ipanghiwala ang mga hiyas sang Dios.”
Madamo ang paagi nga ang isa ka tawo mahimo nga “[magpanghiwala] … [sang] mga hiyas sang Dios” (Moroni 10:8). Pila ka mga tawo ang nagapanghiwala nga may ari sining mga hiyas. Ang iban mahimo nga magpanghiwala nga may ara sila sang espirituhanon nga mga hiyas pero matalupangdan nila ini sa iban nga tawo, Kag sa gihapon ang iban nagapanghiwala sang ila mga hiyas paagi sa pagpatumbaya sini ukon sa indi pagpauswag sang mga ini.
Sa imo pagbasa sang Moroni 10:8–25, pangitaa ang mga kamatuoran nga makabulig sa imo diskubre sang imo espirituhanon nga mga hiyas kag gamiton ang mga ini nga may mas dako nga gahum agud bugayan ang imo kaugalingon kag ang iban. Magpangayo sang mga panghunahuna parte sa mga hiyas nga ginhatag sang Dios sa imo ukon sang mga hiyas nga gusto Niya nga imo pangitaon. Ngaa importante nga “dumdumon nga ang tagsa ka maayo nga hiyas nagahalin kay Cristo”? (Moroni 10:18).
Pamensara man ining laygay ni Elder John C. Pingree Jr.: “Paano naton mahibal-an ang aton mga hiyas? Pwede kita magbase sa aton patriarchal blessing, mamangkot sa iban nga nakakilala gid sa aton, kag personal nga hibaluon kon sa diin kita maayo kag nagakasadya. Pinakaimportante, pwede kita magpamangkot sa Dios (tan-awa sa Santiago 1:5; Doktrina kag mga Kasugtanan 112:10). Nahibal-an Niya ang aton mga hiyas, kay Sia ang naghatag sini sa aton” (“I Have a Work for Thee,” Ensign ukon Liahona, Nob. 2017, 33).
Pwede ako mangin perpekto paagi sa grasya ni Jesucristo.
Ang laygay ni Moroni nga “magkari kay Cristo” nagapangayo sang masobra pa sangsa pagtuon parte sa Iya ukon pagpanumdom sa Iya sing mas pirme ukon bisan sa pagtinguha pa gid nga sundon ang Iya mga kasuguan, bisan nga importante ang mga ini. Kundi, isa ini ka imbitasyon nga magkari kay Cristo sa pinakakompleto nga paagi nga posible—ang mangin pareho sa Iya. Sa imo pagbasa sang Moroni 10:30–33, pat-ini ang mga dinalan nga nagabulig sa imo nga maintiendihan kon ano ang buot silingon sang magkari kay Cristo sing lubos, pareho sang “magkapyot sa tagsa ka maayo nga hiyas,” “dumilian ang inyo kaugalingon sang tanan nga pagkadi-diosnon,” kag, siyempre, “magmangin himpit sa iya” (mga italics gindugang).
Paano ini mangin posible? Pangitaa ang mga sabat sa Moroni 10:30–33. Ano ang ginahambal sa imo sang Espiritu nga dapat mo himuon para mas lubos nga “magkari kay Cristo, kag magmangin himpit sa iya”?
Tan-awa sa Omni 1:26.
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Moroni 10
Basaha ining kapitulo sing ululupod, nga ginapangita ang tagsa ka tion nga gingamit ni Moroni ang tinaga nga ginalaygayan. Ilista ukon markahi kon ano ang ginalaygay ni Moroni—ukon mabaskog nga ginapaisog—nga aton himuon. Ano ang pwede naton himuon para sundon ang iya mga laygay?
Moroni 10:3
Ano ang aton matun-an parte sa kaluoy sang Ginuo sa aton pagbasa sang Libro ni Mormon sini nga tuig? Paano nangin maluluy-on ang Ginuo sa aton pamilya?
Moroni 10:3–5
Pagkatapos nga basahon ining mga bersikulo, pwede mo pangabayon ang mga miyembro sang pamilya nga iistorya kon paano nila nahibal-an nga ang Libro ni Mormon matuod. Pamensara ang pagkanta sang isa ka kalantahon parte sa pagpangita sang kamatuoran. Mahimo mo imbitaron ang mga miyembro sang pamilya nga isulat ang ila mga panaksihon sa isa ka journal sang pamilya.
Moroni 10:8–18
Ang Paskwa isa ka natural nga tiyempro sa pagpanumdom parte sa pagbaton sang mga regalo. Basi pwede magputos ang mga miyembro sang pamilya sang mga regalo para sa kada isa nga nagarepresentar sang “mga hiyas sang Dios” nga ginmitlang sa Moroni 10:9–16. Pwede man ining mga regalo magrepresentar sang iban pa nga maayo nga mga hiyas nga nagahalin kay Cristo nga ila makita sa kada isa.
Moroni 10:27–29, 34
Pwede mag-istorya ang mga miyembro sang pamilya kon ano ang gusto nila ihambal kay Moroni kon sila “magsugat-anay [sa iya] sa atubang sang makapahamuot nga hukmanan sang dakong Jehova.”
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Pangitaa si Jesucristo. Ang katuyuan sang Libro ni Mormon—kag sang tanan nga balaan nga mga kasulatan—amo ang pagpamatuod kay Jesucristo. Ano ang imo matun-an parte kay Jesucristo sa Moroni 10? Ano ang ginapabatyag sa imo nga imo himuon para magkari sa Iya?
Moroni Burying the Plates, ni Jon McNaughton