Suno Sa Diosnon nga Plano
Ang kamot sang Ginuo nagagiya sa inyo. Suno sa “diosnon nga plano,” ara Sia sa diutay nga mga detalye sang inyo kabuhi subong man sa importanteng mga bahin.
Mga kautoran, samtang nagatindog ako diri sa sining maka-inspirar nga bug-os kalibutan kag kabilogan nga konperensya kag magbatyag sang inyo kabakod kag mga balatyagon, mapinsaran ko gid ang mga tinaga ni Apostol Peter: “[Ginuo}, maayo gid nga ari kami diri.”1
Indi amo ina ang ginhambal ni Alma pagkatapos nga sia nagwali sa katawhan sang Ammonihah. Naghalin si Alma sa siyudad bangud sa kalautan sang katawhan. Ang anghel dayon nagpakita kay Alma kag naghambal sa iya nga “magbalik sa siyudad sang Ammonihah, kag magwali liwat sa katawhan sang siyudad.”2
Si Alma “madasig” nga nagbalik, nagasulod “sa siyudad paagi sa isa pa ka alagyan.”3
“Kag samtang nagapasulod sia sa siyudad ginutom sia, kag nagsiling sia sa isa ka lalaki: Pwede mo bala pakan-on ang kubos nga alagad sang Dios?”
Kag ang lalaki nagsiling sa iya:”Isa ako ka Nefinhon, kag nabal-an ko nga ikaw isa ka balaan nga propeta sang Dios, kay ikaw ang lalaki nga ginhambal sang anghel sa isa ka palanan-awon: Batunon mo sia.”4
Ang lalaki amo si Amulek.
Karon, nataboan lang bala nga nasugata ni Alma si Amulek? Indi, indi ato nataboan lang nga sia nagkadto sa siyudad sa alagyan nga masumalang niya ining matinuohon nga tawo nga mangin misyonaryo nga kaupod niya.
Si Elder Neal A. Maxwell sang kaisa nagpaathag: “Wala sa aton sang lubos nga nagagamit sang katawhan-nga-mga-oportunidad nga ginhatag sa aton sa sulod sang sirkulo sang aton pag-inabyanay. Sarang naton tawgon ini nga ‘nataboan lang’ nga mga pagsugat-anay. Ining mga tinaga sarang mahangpan kon gamiton sang mga tawo, apang nataboan langindi nagakaigo nga maglaragway sang mga buhat sang Dios nga nakabalo sang tanan. Wala Sia nagahimo sang mga butang paagi sa "nataboan lang" apang suno sa “diosnon nga plano.’”5
Ang aton mga kabuhi daw isa ka chessboard, kag ang Ginuo nagahulag sa aton halin sa isa ka lugar padulong sa isa—kon kita masinulundon sa espirituhanon nga mga pagpabatyag. Kon aton ulikdon, makit-an naton ang Iya gabay sa aton mga kabuhi.
Makit-an naton ang amo nga langitnon nga pagpatunga sang si Nephi nagabalik agud kuhaon ang mga lamina kay Laban. Sia “gin-ubayan sang Espiritu, wala mahibal-i nga daan ang mga butang [nga dapat niya] himoon.”6 Sa wala madugay, si Laban ara sa atubang niya nga hubog kag sia ginpatay ni Nephi, ginkuha ang mga lamina, kag nagpalagyo balik sa iya kautoran. Maswerte bala sia nga nakasugata kay Laban? Ukon yadto suno sa “diosnon nga plano”?
Importanteng mga hitabo ang nagakalatabo sa ebanghelyo kag sa Simbahan nga nagapauswag sa ginharian sang Dios diri sa duta. Ang mga ini indi aksidente apang suno sa plano sang Dios. Sia nga nagtuga sining kalibutan sarang magpakalma sang kadagatan paagi sa Iya pulong, kag sarang maghimo kanday Alma kag Amulek nga magsugat-anay, kag kay Nephi kag Laban nga magsumalangay sa husto nga lugar kag tion.
Subong man, ang mga hitabo kag mga pagkilalahay nagakalatabo sa kada kabuhi naton nga nagapauswag sa buluhaton sang Dios diri sa duta.
Ang mahal naton nga Si Elder Joseph B. Wirthlin naghambal parte sa isa ka okasyon sang si Presidente Thomas S. Monson nagsiling sa iya: “May ara sang nagagiya nga kamot sa ibabaw sang tanan nga butang. Masami kon ang mga butang nagakatabo, ini indi aksidente. Sa isa ka adlaw, kon ulikdon naton ang mga daw sa nataboan lamang nga mga hitabo sa aton mga kabuhi, matalupangdan naton nga basi ang mga ini wala basta na lang natabo.”7
Masami, ang maayong binuhatan naton nabal-an lamang sang pila ka tawo. Apang, ang mga ini nasulat sa langit. Sa isa ka adlaw, magaatubang kita bilang saksi sang aton bilog-kalag nga debosyon sa mga buhat sang pagkamatarong. Wala sang pagtilaw ukon kalalat-an ang sarang magpaslaw sa plano sang kalipayan sang Dios. Sa pagkamatuod, suno sa “diosnon nga plano,” “ang kasadya nagaabot sa kaagahon.”8 “Nagkari ako sa kalibutan agud magtuman sa pagbuot sang Amay,”9 si Jesus nagtudlo. Mahal kong mga kautoran, kita nagahimo man.
Paagi sa inagihan sang akon kaugalingon nga pagpanglakaton sa kabuhi, nabal-an ko nga ang Ginuo magaduso sa aton sa sinang daw sa chessboard agud buhaton ang Iya buluhaton. Inang daw sa nataboan lang, sa matuod, gindumalahan sang isa ka mapinalanggaon nga Amay sa Langit, nga makaisip sang mga buhok sa kada ulo.10 Wala gani sang bisan isa ka maya nga nahulog sa duta nga wala matalupangdan sang Amay.11 Ang Ginuo ara sa mga diutay nga detalye sang aton mga kabuhi, kag yadtong mga insidente kag mga oportunidad ara agud maghanda sa aton nga magtib-ong sang aton mga pamilya kag sa iban samtang kita nagatukod sa ginharian sang Dios diri sa duta. Dumdoma, subong sa ginsiling sang Ginuo sa kay Abraham, “Nabal-an ko ang katapusan halin sa sinugoran; gani ang kamot ko ang magagiya sa imo.”12
Ang Ginuo nagbutang sa akon sa isa ka puluy-an nga may mga ginikanan nga mapinalanggaon. Sa talaksan sang kalibutan, sila tuman ka kinaandan nga mga tawo; ang akon amay, isa ka deboto nga tawo, isa ka manugmaneho sang trak; ang anghel ko nga iloy, sa balay lamang. Ang Ginuo nagbulig sa akon nga masapwan ang matahum ko nga asawa, si Melanie; ginpabatyag Niya ang isa ka negosyante, nga nangin suod nga abyan, nga hatagan ako sang oportunidad sa pagtrabaho. Ang Ginuo nagtawag sa akon agud mag-alagad sa misyon, angay bilang batan-on kag bilang isa ka presidente sang mission; Gintawag Niya ako sa Korum sang Kapitoan; kag karon gintawag Niya ako bilang isa ka Apostoles. Sa pag-ulikid, natalupangdan ko nga wala ko ginplano ang bisan ano sa yadtong mga hitabo; ang Ginuo ang naghimo, subong nga Siya nagaplano sang importanteng mga hulag para sa inyo kag sa yadtong mga palangga ninyo.
Ano ang dapat ninyo pangitaon sa inyo kaugalingon nga kabuhi? Ano ang mga milagro nga nagapadumdom sa inyo nga malapit Sia sa inyo, nagasiling, “Ari lang Ako diri”? Hunahunaa yadtong mga tion, ang pila sa kada adlaw, sang ang Ginuo nagbuhat sa inyo kabuhi—kag dayon nagbuhat liwat. Ipakabahandi ang mga ini bilang mga higayon nga ang Ginuo nagpakita sang kumpiyansa sa inyo kag sa inyo mga pagpili. Apang tugotan ninyo Sia nga magbuhat sang mas kapin sangsa mahimo ninyo sa inyo nga kaugalingon lamang. Ipakabahandi ang Iya pagpahilabot. Kon kaisa ginakabig naton ang mga pagbaylo sang aton mga plano bilang sayup nga mga tikang sa aton pagpanglakaton. Pinsara sing dugang nga ang mga ini unang mga tikang sa pagtuman “sa tulumanon sang Ginuo.”13
Sang pila ka bulan nga nagligad ang amon apo nga babayi nag-upod sa isa ka grupo sang batan-on agud magbisita sa pila ka mga makasaysayan nga lugar sang Simbahan. Ang katapusan nila nga kaladtoan may nota nga sia magaagi sa lugar kon diin ang iya misyonaryo nga utod nga lalaki, ang amon apo, nagaalagad. Ang amon apo nga babayi wala sang tuyo nga magbisita sa iya utod nga ara sa misyon. Apang, sang ang bus nagsulod sa banwa kon diin ang iya utod nagaalagad, duha ka misyonaryo ang makit-an nga nagalakat sa kalye. Ang isa sa mga misyonaryo amo ang iya utod nga lalaki.
Ang kasadya nagpuno sa bus samtang ang mga batan-on nagpangabay sa driver nga magdulog agud makamusta niya ang iya utod. Kubos sa isa ka minuto, pagkatapos sang luha kag matam-is nga mga pulong, ang iya utod nagbalik agud magtuman sang iya mga katungdanan bilang misyonaryo. Sang ulihi, nabal-an namon nga ang iya utod ato didto sa sinang kalye kubos sa lima ka minuto, nagalakat halin sa pagbisita pabalik sa iya kotse.
Ang Langitnon nga Amay sarang magbutang sa aton sa mga sitwasyon nga may isa ka tuyo sa hunahuna. Ginhimo Niya sa akon kabuhi, kag ginahimo Niya sa inyo, subong sa ginhimo Niya sa mga kabuhi sang amon mahal nga mga apo.
Ang kada isa sa aton bilidhon kag ginapalangga sang Ginuo, nga nagaulikid, nagahutik, kag nagabantay sa aton sa mga paagi nga pinasahi sa kada isa sa aton. Sia pinakalabing maalam kag mas gamhanan sangsa mortal nga mga lalaki kag babayi. Nabal-an Niya ang aton mga panghangkat, mga kadalag-an, kag ang matarong nga mga handom sang aton mga tagipusuon.
Kapin sa isa ka tuig nga nagligad, samtang nagalakat ako sa Temple Square, ang isa ka sister missionary nagpalapit sa akon kag nagpamangkot, “Madumdoman mo bala ako? Halin ako sa Florida.” Ginhambal niya sa akon ang iya ngalan, Sister Aida Chilan. Huo, nadumdoman ko ang pagbisita sa iya kag sa ila pamilya. Ang iya stake president nagpanugyan nga bisitahon namon ang ila pamilya. Nangin maathag nga nagkadto kami para sa ila anak nga babayi, si Aida, nga wala pa mabunyagan. Pagkatapos sang amon pagbisita, kag sang mas kapin sa isa ka tuig nga pagtudlo kag pagpakig-abyan, si Aida nabunyagan.
Pagkatapos sang amon pagkit-anay sa Temple Square, si Aida nagsulat sa akon. Siling niya: “Nabal-an ko sing lubos sa akon tagipusuon nga ang Langitnon nga Amay nakakilala sa kada isa sa aton kag Sia nagapadayon sa pagbutang sa aton nga magkit-anay nga may rason. Salamat nga ikaw isa sa mga misyonaryo ko. Sa paglab-ut kag pagkasapo sa akon sang lima ka tuig nga nagligad.”14 Si Aida nagpadala man sa akon sang iya istorya sang pagkahaylo nag-asoy sang mga “diosnon nga nataboan lang” nga nagkalatabo sa iya kabuhi nga nagpadulong sa iya bunyag kag kumpirmasyon, pag-alagad sa misyon sa Temple Square, kag sa iya bag-o lang nga kasal sa templo.15
Nataboan lang bala ato nga ang stake president nagdala sa amon sa puluy-an Chilan ukon nga sia kag ako sa ulihi makakit-anay sa Temple Square? Ang pagpamatuod ni Aida nagasaksi nga ini tanan kabahin sang “diosnon nga plano” sang Dios.
Luyag gid sang Dios nga makaupod sa aton. Indi nataboan lang nga kon mabatyagan ninyo ang Iya Espiritu kag kamo nagahulag sa una nga mga pagpabatyag nga mabatyagan ninyo Sia sang Sia nagpromisa: “Mauna ako sa inyo atubang. Ara ako sa inyo tuo nga kamot kag sa inyo wala, kag ang akon Espiritu mangin ara sa inyo mga tagipusuon, kag ang mga anghel ko ara sa inyo palibot, agud amligan kamo.”16
Tanan kita may amo man nga mga inagihan sa aton mga kabuhi. Basi may masugata kita nga tawo nga daw naandan na, nagkilalahay liwat, ukon makasapo sang pagkasubong sa isa ka estranghero. Kon yadto matabo, basi ang Ginuo nagapadumdom sa aton nga kita tanan matuod “mag-ululutod.” Tunay nga kita tanan nagabuylog sa kasubong nga kawsa; sa gintawag ni Joseph Smith nga “ang kawsa ni Cristo.”17
Karon, sa diin ang aton pagbuot nahamtang sa isa ka “diosnon nga plano”? May ara kita sang pagpili nga magsunod ukon indi magsunod sa aton Manluluwas kag sa Iya pinili nga mga pinuno. Ang sulundan maathag sa Libro ni Mormon sang ang mga Nefinhon nagtalikod sa Ginuo. Si Mormon nangasubo:
“Kag nakita nila...nga ang Espiritu sang Ginuo wala na nagaamlig sa ila; huo, ini nagtaliwan halin sa ila sanglit ang Espiritu sang Ginuo wala nagapuyo sa di-balaan nga mga templo—
“Gani ang Ginuo nag-untat sa pag-amlig sa ila paagi sa iya milagroso kag walay tupong nga gahum, kay nahulog sila sa kahimtangan sang pagkawalay pagtuo kag tuman nga kalautan.”18
Indi ang tanan nga ginapangayo sang Ginuo sa aton bunga sang kon daw ano kita kabakod, kon daw ano kita ka himpit, ukon ano ang basi aton nabal-an. Pinsara si Saul nga gintapna sang Ginuo sa karsada sang Damascus. Sia ara sa sayup nga direksyon sa iya kabuhi, kag ini wala sang kahilabtanan sa aminhan ukon bagatnan. Si Saul diosnon nga gingiyahan. Sang siya ulihing nakilal-an bilang si Paul, ang iya pagpangalagad bilang Apostoles nagpakita sang nabal-an na sang Ginuo kon ano ang sarang niya mahimo kag magmangin. Ano ang gintudlo ni Apostol Paul? “Kag nabal-an namon nga ang tanan nga butang nagaobra para sa kaayohan nila nga nagapalangga sa Dios, sa ila nga gintawag suno sa iya katuyoan.”19
Kon kita matarong, maluyagon, kag makasarang, kon kita nagatinguha nga mangin takos kag mabaton, kita nagauswag sa mga lugar nga wala naton mahunahunaan kag mangin kabahin sang “diosnon nga plano” sang Langitnon nga Amay. Ang kada isa sa aton may ara sang pagka-diosnon sa sulod naton. Kon makit-an naton ang Dios nga nagabuhat paagi sa aton kag upod sa aton, kabay nga kita mangin malaumon, bisan pa nagapasalamat sa sinang paggiya. Sang ang aton Amay sa Langit nagsiling, “Ini ang akon buluhaton kag himaya—ang magpahanabo sa imortalidad kag kabuhing walay katapusan sang tawo,”20 Sia nagahambal parte sa tanan Niya nga mga anak—labi na sa inyo.
Ang kamot sang Ginuo nagagiya sa inyo. Suno sa “diosnon nga plano,” ara Sia sa diutay nga mga detalye sang inyo kabuhi subong man sa importanteng mga bahin. Subong sa ginsiling sa Proverbs, “Magsalig sa Ginuo sa bug-os ninyo nga tagipusuon;...kag sia magagiya sang inyo mga banas.”21 Nagasaksi ako nga Sia magabugay sa inyo, magasakdag sa inyo, kag magadala sa inyo sang paghidaet. Sa ngalan ni JesuCristo, amen.