Pagkahidlaw nga Magpauli
Iatubang ang inyo kalag sa kasanag. Sugori ang inyo matahum nga pagpanglakaton pauli. Samtang ginahimo ninyo ini, ang inyo kabuhi mangin mas maayo, mas malipayon, kag may dugang nga katuyoan.
Bag-o lang, samtang kami nag-atubang sa kay Presidente Thomas S. Monson, naghambal sia nga may dakung kaligdong kag kalipay, kon daw ano niya ka palangga ang Ginuo kag nabal-an niya nga ang Ginuo nagapalangga sa iya. Palangga ko nga mga kautoran, nabal-an ko nga si Presidente Monson tuman gid nga nagapasalamat sa inyo pagpalangga, mga pangamuyo, kag dedikasyon sa Ginuo kag sa Iya halangdon nga ebanghelyo.
Si Bobbie, ang Milagrosong Ido
Halos isa ka gatos nga tuig ang nagligad, ang isa ka pamilya halin sa Oregon nagabakasyon sa Indiana—kapin sa 2,000 ka milya (3,200 km) ang kalayoon—sang nadula ang pinalangga nila nga ido, si Bobbie. Ang desperadong pamilya nagpangita sa ido bisan diin apang napaslawan. Si Bobbie wala makit-an.
May kasubo, sila nagpauli, ang kada milya nagapalayo sa ila sing dugang sa pinalangga nila nga ido.
Anum ka bulan ang nagligad, ang pamilya nakibot sang masapwan si Bobbie sa sagwa sang ila ganhaan sa Oregon. “Mahigko, maniwang, kag ang mga tiil daw sa napudpod—[ang ido] makit-an nga naglakat sa bilog nga distansya … paagi sa kaugalingon sini.” Ang istorya ni Bobbie nagkuha sa atensyon sang katawhan sa bug-os nga United States, kag sia ginkilala nga si Bobbie ang Milagrosong Ido.
Si Bobbie indi lamang ang sapat nga nagpatingala sa mga siyentista bangud sang makatilingala nga igbalatyag sang direksyon kag kinaiyang huyog nga magpauli. Ang pila ka mga hubon sang monarch nga alibangbang nagalupad 3,000 ka milya (4,800 km) kada tuig saylo sa mga lugar nga bagay sa ila kaluwasan. Ang mga pawikan nga leatherback nagalangoy tabok sa Pacific Ocean halin sa Indonesia padulong sa mga baybayon sang California. Ang mga balyena nga Humpback nagalangoy halin sa matugnaw nga mga tubig sang North kag South Poles padulong sa equator kag balik. Siguro mas sobra pa gid nga daw sa indi mapatihan, ang pispis nga arctic tern nagalupad halin sa Arctic Circle padulong sa Antarctica kag balik kada tuig, mga 60,000 ka milya (97,000 km).
Kon ang mga siyentista magtuon sa sining makawiwili nga batasan, nagapamangkot sila subong sang “Paano nila nabal-an kon diin makadto?” kag “Paano ang kada masunod nga henerasyon nakabalo sining gawi?”
Sang nabasahan ko ining gamhanan nga kinaiyang huyog sang mga sapat, nagapamangkot gid ako, “Posible bala nga ang tawo may ara sang kasubong nga kahidlaw—isa ka nagagiya nga sistema sa sulod, kon sugot kamo—nga nagabutong sa ila padulong sa ila langitnon nga puluy-an?”
Nagapati ako nga ang kada lalaki, babayi, kag bata nakabatyag sang tawag sang langit sa isa ka punto sang ila kabuhi. Tudok sa aton amo ang kahidlaw nga bisan paano luyag naton maglampuwas sa belo kag maghakus sa Langitnon nga mga Ginikanan nga sang una nakilal-an naton kag ginpalangga.
Ang pila basi nagapugong sa sining kahidlaw kag nagapabungol sang ila kalag sa tawag sini. Apang yadtong wala nagapalong sining kasanag sa sulod nila sarang magsugod sa isa ka daw sa di-mapatihan nga pagpanglakaton—isa ka matahum nga pagsaylo padulong sa langitnon nga mga lugar.
Ang Dios Nagatawag sa Inyo
Ang langitnon nga mensahi sang Ang Simbahan ni JesuCristo sang Mga Santos sa Ulihing Mga Adlaw amo nga ang Dios amo ang aton Amay, nga Sia nagaulikid parte sa aton, kag may ara sang alagyan pauli sa Iya.
Ang Dios nagatawag sa inyo.
Nabal-an sang Dios ang inyo kada panghunahuna, mga kalisud, kag ang inyo pinakadakung mga handom. Nabal-an sang Dios kon pila ka beses ninyo Sia ginpangita. Ang madamo nga beses nga kamo nakabatyag sang di-matupongan nga kalipay. Ang madamo nga beses nga kamo nagtangis sa kasubo. Ang madamo nga beses nga kamo nakabatyag sang pagkawalay tabang, pagsalangisag, ukon pagkaakig.
Apang, bisan ano pa ang inyo kasaysayan—kon kamo nagaduhaduha, nalugaw-an, nagabatyag sang pagkahuyang, kapait, ginluiban, ukon napaslawan—hibaloi nga kamo wala nagaisahanon. Ang Dios padayon nga nagapakig-ugyon sa inyo.
Ang Manluluwas nagadaho sang iya kamot sa inyo. Kag, subong sa ginhimo sa yadtong mga mangingisda sa mga pangpang sang Dagat sang Galilee, upod ang walay dulonan nga pagpalangga Sia nagahambal sa inyo: “Dali, magsunod kamo sa akon.”
Kon kamo magapamati sa Iya, Sia magahambal sa inyo subong gid nga adlaw.
Kon kamo maglakat sa banas sang pagkasumulunod—kon kamo magpadulong sa Langitnon nga Amay—may ara sa sulod ninyo nga magakumpirma nga nabatian ninyo ang tawag sang Manluluwas kag maluyag kamo nga mag-atubang sa kasanag. Ini magapahibalo sa inyo nga kamo ara sa husto nga banas kag kamo nagapauli.
Halin sa sinugoran sang tion, ang mga propeta sang Dios nagganyat sa katawhan sa ila panahon sa “pagpamati sa tingog sang Ginuo nga ila Dios, … magtuman sa iya mga sugo kag mga pagsulundan… , [kag] mag-ulikid sa [Iya] sa bug-os nga tagipusuon, kag sa bug-os nga kalag.”
Ang mga kasulatan nagatudlo sa aton sang linibo ka mga rason kon ngaa buhaton naton ini.
Karon nga adlaw, tugoti ako nga maghalad sang duha ka rason kon ngaa dapat mag-ulikid kita sa Ginuo.
Una, ang inyo kabuhi mangin mas maayo.
Ikaduha, ang Dios magagamit sa inyo agud maghimo sa mga kabuhi sang iban nga mangin mas maayo.
Ang Inyo Kabuhi Mangin Mas Maayo
Nagasaksi ako nga kon kita magsugod ukon magpadayon sa daw sa di-mapatihan nga pagpanglakaton padulong sa Dios, ang aton mga kabuhi mangin mas maayo.
Wala ini nagkahulogan nga ang aton mga kabuhi wala sang kalisud. Nabal-an naton tanan ang parte sa mga himpit nga mga sumulunod nga nag-antus sang mga trahedya kag sang di-makatarongan—si JesuCristo mismo nag-antus sing mas tuman sangsa kay bisan sin-o. Subong nga ang Dios nagahimo sa “adlaw nga magbutlak sa malain kag sa maayo,” Sia nagatugot man sa kalisdanan nga magtilaw sa matarong kag sa di-matarong. Sa pagkamatuod, kon kaisa ang aton mga kabuhi daw sa mas kapin nga mabudlay bangud nagatinguha kita sa pagtuman sang aton pagtuo.
Wala, wala ang pagsunod sa Manluluwas nagakuha sang tanan nga mga pagtilaw. Apang, ini nagakuha sang mga nagabalabag sa tunga ninyo kag sa bulig nga luyag sang Langitnon nga Amay nga ihatag sa inyo. Ang Dios magaupod sa inyo. Sia magagiya sang inyo mga tikang. Magalakat Sia sa kilid ninyo kag bisan pa magakungkong sa inyo kon ang inyo pagkinahanglan pinakatuman.
Maagyan ninyo ang langitnon nga bunga sang Espiritu: “pagpalangga, kasadya, paghidaet, pagpaumod, kalulo, kaayo, [kag] pagtuo.”
Ining espirituhanon nga mga bunga indi produkto sang kauswagan sa pagkabutang, kadalag-an, ukon maayo nga swerte. Ang mga ini nagaabot halin sa pagsunod sa Manluluwas, kag ang mga ini sarang nga mangin himpit nga mga manugbulig bisan pa sa tunga sang pinakamadulom nga mga bagyo.
Ang mga kalayo kag pagkinagamo sang mortal nga kabuhi basi nagapamahug kag nagapahadlok, apang yadtong ang mga tagipusuon nagadangop sa Dios pagapalibotan sang Iya kalinong. Indi mabuhinan ang ila kasadya. Indi sila pagpabay-an ukon kalimtan.
“Magsalig sa Ginuo sa bug-os mo nga tagipusuon,” ang tudlo sang mga kasulatan, “kag indi magsalig sa kaugalingon mo nga paghangop. Sa tanan mo nga mga buhat kilalaha sia, kag sia magatuytoy sa imo mga banas.”
Yadtong mga nagapamati sa konsiyensya kag nagapangita sa Dios, yadtong mga nagapangamuyo, nagapati, kag nagalakat sa banas nga ginhanda sang Manluluwas—bisan nga sila makasandad kon kaisa sa banas—nagabaton sang nagapasulhay nga pagpasalig nga “ang tanan nga butang nagaobra para sa [ila] kaayohan.”
Kay ang Dios “nagahatag sang kabakod sa nakapoyan kag nagadugang sa gahum sang mahuyang.”
“Kay bisan ang matarong mapukan sang pito ka beses, sila nagabangon liwat.”
Kag ang Ginuo sa Iya kaayo nagapamangkot:
Luyag mo bala ang makaagi sang nagapabilin nga kasadya?
Nahidlaw ka bala nga makabatyag sa imo tagipusuon sang paghidaet nga nagalampuwas sa paghangop?
Kon amo, iulikid ang imo kalag padulong sa kasanag.
Sugori ang matahum nga kaugalingon ninyo nga pagpanglakaton pauli.
Samtang ginahimo ninyo, ang inyo kabuhi mangin mas maayo, mas malipayon, kag may dugang nga katuyoan.
Ang Dios Magagamit sa Inyo
Sa inyo pagpanglakaton balik sa Langitnon nga Amay inyo matalupangdan sing madali nga ining pagpanglakaton wala nagatumod lamang sa inyo kaugalingon nga kabuhi. Wala, ining banas pat-ud nga nagadala sa inyo nga mangin bugay sa mga kabuhi sang iban nga mga anak sang Dios—ang inyo mga kautoran. Kag ang makawiwili nga butang parte sa pagpanglakaton amo nga samtang kamo nagaalagad sa Dios, kag nagaamuma kag nagabulig sa inyo isigkatawo, makit-an ninyo ang dakung progreso sa inyo kaugalingon nga kabuhi, sa mga paagi nga indi gid ninyo mailaragway.
Siguro wala ninyo ginakabig ang inyo kaugalingon nga amo sina ka mapuslanon. Masami, kon maglantaw kita sa aton mga kaugalingon, makit-an lamang naton ang aton mga limitasyon kag mga kakulangan. Basi nagapinsar kita nga kita dapat mangin mas “dugang” sa isa ka butang agud gamiton kita sang Dios—dugang nga maalam, mas manggaranon, mas naluyagan sang iban, mas may talento, kag mas espirituhanon. Ang mga bugay magaabot kalabanan indi bangud sang inyo mga abilidad apang bangud sang inyo mga pagpili. Ang Dios sang uniberso magabuhat sa sulod ninyo kag paagi sa inyo, magapadaku sang inyo kubos nga mga pagtinguha para sa Iya mga katuyoan.
Ang Iya buluhaton dalayon nga nagauswag suno sa sining importanteng prinsipyo: “Halin sa diutay nga mga butang ginapahanabo inang dalagku nga mga butang.”
Sang nagasulat sa mga santos sa Corinth, ang Apostoles nga si Paul nag-obserba nga diutay sa ila ang sarang kabigon nga maalam suno sa kalibutanon nga mga talaksan. Apang ina wala sang kabilinggan, bangud “ang Dios nagpili sa mahuyang nga mga butang sang kalibutan agud lutoson ang mga butang nga mabakod.”
Ang kasaysayan sang buluhaton sang Dios napuno sang katawhan nga nagkabig sa ila mga kaugalingon nga kulang. Apang sila nag-alagad nga may pagpakubos, nagsalig sa grasya sang Dios kag sa Iya promisa: “Ang butkon nila mangin butkon ko, kag ako ang mangin taming nila … , kag sila magabato nga may kaisog para sa akon; kag …Ako [maga]amlig sa ila.”
Sining nagligad nga tag-init ang amon pamilya may matahum nga oportunidad nga magbisita sa pila ka makasaysayan nga mga lugar sang Simbahan sa sidlangan nga United States. Sa isa ka espesyal nga paagi, gin-asoy namon liwat ang kasaysayan sinang panahon. Ang parte sa mga katawhan nga nabasahan ko sing tuman—subong nanday Martin Harris, Oliver Cowdery, kag Thomas B. Marsh—nangin mas tunay sa akon samtang kami naglakat kon diin sila naglakat kag nagbinagbinag sang mga sakripisyo nga ginhimo nila agud magtukod sa ginharian sang Dios.
May madamo sila sang maayo nga mga kinaiya nga nagtugot sa ila nga makahatag sang makahulogan nga mga bulig para sa Pagpanumbalik sang Ang Simbahan ni JesuCristo. Apang sila mga tawhanon man, mahuyang, kag makasayup—subong sa inyo kag sa akon. Ang pila sa ila wala nakig-angay sa Propetang si Joseph Smith kag naghalin sa Simbahan. Sang ulihi, madamo sa amo nga katawhan ang nagbag-o sing balatyagon, nagpakubos sang ila mga kaugalingon, kag sa liwat nagpangita kag nakasapo sang pagpakig-abyan upod sa mga santos.
Basi may huyog kita nga husgahan ining mga kautoran kag ang iban pa nga mga miyembro kasubong nila. Basi magsiling kita, “Indi gid ako magbiya sa kay Propetang si Joseph.”
Ina sarang nga matuod, apang wala gid naton mabal-an kon daw ano yadto ang mabuhi sa sinang panahon, sa yadtong mga kahimtangan. Indi, indi sila perpekto, apang daw ano ini ka malaumon nga mabal-an nga ang Dios naggamit sa ila walay sapayan sini. Nabal-an Niya ang ila mga kabakod kag mga kahuyangan, kag Sia naghatag sa ila sang labing pinasahing oportunidad nga magbulig sang isa ka bersikulo ukon isa ka musika sa mahimayaon nga ambahanon sang Pagpanumbalik.
Daw ano ka malaumon ang mabal-an, nga bisan kita indi perpekto, kon ang aton mga tagipusuon nagaulikid sa Dios, Sia mangin maalwan kag mabuot kag maggamit sa aton para sa Iya mga katuyoan.
Yadtong mga nagapalangga kag nagaalagad sa Dios kag sa isigkatawo kag kubos kag aktibong nagapartisispar sa Iya buluhaton makakita sang makatilingala nga mga butang nga matabo sa ila mga kabuhi kag sa mga kabuhi sang mga yadtong ginapalangga nila.
Ang ganhaan nga daw sarado pagabuksan.
Ang mga anghel mauna sa ila kag maghanda sang alagyan.
Wala sapayan sang inyo posisyon sa inyo komunidad ukon sa Simbahan, ang Dios magagamit sa inyo, kon luyag kamo. Padakuon Niya ang inyo matarong nga mga handom kag magahimo sang inyo maloloy-on nga mga buhat nga gintanom ninyo padulong sa isa ka bugana nga ani sang kaayohan.
Indi Kita Makaabot Didto nga Wala sang Pagtinguha
Ang kada isa sa aton, “mga estranghero kag mga umalagi”sa sining kalibutan. Sa madamo nga bahin, malayo kita sa puluy-an. Apang ini wala nagakahulogan nga kita magbatyag nga nadula ukon nagaisahanon.
Ang pinalangga nga Amay sa Langit naghatag sa aton sang Kapawa ni Cristo. Kag tudok sa kada isa sa aton, may ara sang langitnon nga pagpabatyag nga nagaduso sa aton nga magtamod kag magpalangga sa Iya samtang nagabiyahi kita pauli sa aton selestiyal nga puluy-an.
Ini nagakinahanglan sang pagtinguha. Indi kamo makaabot didto kon wala sang pagtinguha nga matun-an Sia, mahangpan ang Iya mga panulin, maukod nga magtuman sa mga ini, kag magpadayon.
Indi, indi ang kabuhi isa ka kotse nga nagamaneho sa kaugalingon. Indi ini isa ka eroplano nga nagalupad sa kaugalingon.
Indi kamo sarang magpalutawlutaw sa mga dagat sang kabuhi kag magsalig nga ang sulog magadala sa inyo sa kon diin nga ginalauman ninyo sa isa ka adlaw. Ang pagkasumulunod nagakinahanglan sang aton pagkaluyag nga maglangoy batok sa sulog kon ginakinahanglan.
Wala sang iban nga responsable sa inyo kaugalingon nga pagpanglakaton. Ang Manluluwas magabulig sa inyo kag maghanda sang alagyan sa inyo atubang, apang ang panaad nga magsunod sa Iya kag magtuman sang Iya mga sugo dapat maghalin sa inyo. Amo ina ang solo nga palas-anon, ang solo ninyo nga pribilihiyo.
Ini ang daku ninyo nga pagpasimpalad.
Palihog nga magpamati sa tawag sang Manluluwas.
Magsunod sa Iya.
Ang Ginuo nagtukod sa Ang Simbahan ni JesuCristo sang Mga Santos sa Ulihing Mga Adlaw agud buligan kamo sa sining panaad nga mag-alagad sa Dios kag sa isigkatawo. Ang katuyoan sini amo ang magpadasig, magtudlo, magtib-ong, kag mag-inspirar. Ining matahum nga Simbahan nagahatag sang mga oportunidad para sa inyo agud maggamit sang inyo kalooy, magdab-ut sa iban, kag magbag-o liwat kag magtuman sang sagradong mga kasugtanan. Ini ginplano agud magbugay sa inyo kabuhi kag magpasanyog sang inyo puluy-an, komunidad, kag nasyon.
Kari, magbuylog sa amon kag magsalig sa Ginuo. Ipahulam ang inyo mga talento sa Iya matahum nga buluhaton. Magdab-ut, magpadasig, magpaayo, kag magsuporta sa tanan nga luyag makabatyag kag magsunod sa kahidlaw sa aton langitnon nga puluy-an. Tugoti nga magbuylog kita sing ululupod sa sining mahimayaon nga pagbiyahi sa langitnon nga mga lugar.
Ang ebanghelyo isa ka nagapangibabaw nga mensahi sang paglaum, kalipayan, kag kasadya. Ini amo ang alagyan nga nagatuytoy sa aton pauli.
Samtang ginabaton naton ang ebanghelyo sang pagtuo kag buhat, sa kada adlaw kag kada oras, mangin mas malapit kita sa aton Dios. Ang aton mga kabuhi mangin mas maayo, kag ang Ginuo magagamit sa aton sa halangdon nga mga paagi agud magbugay sa yadtong mga nagapalibot sa aton kag magpahanabo sa Iya walay katapusan nga mga katuyoan. Sa sini ako nagasaksi kag nagabilin sang akon bugay sa inyo sa sagradong ngalan ni JesuCristo, amen.