“May Buluhaton Ako Para Sa Imo”
Ang kada isa sa aton may ara sang makahulogan nga papel nga himoon sa pagpauswag sa buluhaton sang Dios.
Kay Moses, ang Dios nagpahayag, “May buluhaton Ako para sa imo” (Moses 1:6). Nagapamangkot bala kamo kon ang Langitnon nga Amay may ara sang buluhaton para sa inyo? May importante bala nga mga butang nga kamo ginhanda—kag labi na kamo—agud buhaton? Nagasaksi ako nga ang sabat huo!
Talupangda si Girish Ghimire, nga natawo kag nagdaku sa pungsod sang Nepal. Bilang tinedyer, nagtuon sia sa China, kon diin ang isa niya ka kaklase nagpaambit sa iya sang ebanghelyo ni JesuCristo. Sang ulihi, si Girish nagkadto sa BYU agud magtuon pagkatapos sang iya kurso kag nakilala ang palaaboton nga asawa. Sila nagpuyo sa Salt Lake Valley kag nag-ayop sang duha ka bata halin sa Nepal.
Tinuig ang nagligad, sang ang kapin sa 1500 nga mga refugee halin sa mga kampo sa Nepal ang ginpadala sa Utah, si Girish na-inspirar nga magbulig. Nagaangkon sang kabatid sa hinambalan kag paghangop pangkultura, si Girish nag-alagad bilang interpreter, manunudlo, kag manuglaygay. Pagkatapos nga nahamtang sa komunidad, ang pila ka mga Nepali refugee nagpakita sang pagkaluyag sa ebanghelyo. Isa ka Nepali-speaking Branch ang gin-organisar, kag si Girish sang ulihi ang nag-alagad bilang presidente sini. Sia instrumento man sa paglubad sang Libro ni Mormon sa Nepali nga hinambalan.
Makit-an bala ninyo kon paano ang Langitnon nga Amay naghanda kag naggamit sa kay Girish?
Ang Dios May Ara sang Buluhaton Para sa Kada Isa sa Aton
Mga kautoran, ang Dios may importanteng buluhaton para sa kada isa sa aton. Nagahambal sa mga sister apang nagatudlo sang mga kamatuoran nga nagakadapat sa tanan, si Presidente Spencer W. Kimball nagtudlo: “Antes kita nagkadto [sa kalibutan, kita] ginhatagan sang pila ka mga buluhaton. …Samtang wala naton madumdoman ang mga detalye, ini wala nagabaylo sa mahimayaon nga pagkamatuod sang kon ano nga ginhisugtan naton sang una.” Daw ano ka makapahitaas nga kamatuoran ini! Ang aton Langitnon nga Amay may pinasahi kag makahulogan nga mga butang para sa inyo kag sa akon agud buhaton (lantawa Ephesians 2:10).
Ining langitnon nga mga buluhaton wala gintigana sa pinasahi nga pila ka tawo apang para sa aton tanan—wala sapayan babayi ukon lalaki, edad, rasa, nasyonalidad, andana sang kita, lugar sa katilingban, ukon katungdanan sa Simbahan. Ang kada isa sa aton may ara sang makahulogan nga papel nga himoon sa pagpauswag sang buluhaton sang Ginuo (lantawa Moses 1:39).
Ang pila sa aton nagaduda kon bala ang Langitnon nga Amay sarang maggamit sa aton agud maghimo sang importanteng mga pag-alagad. Apang dumdoma, Sia dalayon nga naggamit sang kinaandan nga katawhan agud magbuhat sang di-kinaandan nga mga butang (lantawa 1 Corinthians 1:27–28; D&C 35:13; 124:1). “[Kita} mga ahente,” kag “ang gahum ara sa [aton] agud “magpahanabo sang madamo nga pagkamatarong” (D&C 58:27–28).
Si Presidente Russell M. Nelson nagpaathag:
“Ang Ginuo may mas madamo nga naisipan para sa imo sangsa naisipan mo para sa imo kaugalingon! Kamo gintigana kag ginpabilin para sa sining tion kag lugar. …
Kinahanglan kamo sang Ginuo agud bag-ohon ang kalibutan. Samtang ginabaton kag ginasunod ninyo ang Iya pagbuot para sa inyo, masapwan ninyo ang inyo kaugalingon nga nagabuhat sang imposible!”
Gani paano kita makaabot sa paghangop kag paghimo sa buluhaton nga ginatuyo sang Dios para sa aton? Ipaambit ko sa inyo ang apat ka mga prinsipyo nga makabulig.
Magtumod sa Iban
Una, magtumod sa iban. Makasunod kita kay Cristo, “nga naglakat sa nagkalainlain nga mga lugar agud maghimo sang maayo nga butang (Acts 10:38; lantawa man 2 Nephi 26:24).
Pagkatapos nga ako nagpauli halin sa bug-os-panahon nga mission, nahidlaw ako sa matag-adlaw nga katuyoan nga akon naluyagan. Maathag, kinahanglan ko nga magtuman sang akon mga kasugtanan, magtuon, magsugod sang pamilya, kag magtrabaho. Apang nagpamangkot ako kon may dugang pa, ukon pinasahi, nga luyag ang Ginuo nga himoon ko. Pagkatapos nga magbinagbinag sang pila ka bulan, nasapwan ko ining bersikulo: “Kon luyag mo, ikaw mangin galamiton sa pagbuhat sang madamo nga kaayohan sa sining henerasyon” (D&C 11:8). Ang Espiritu nagbulig sa akon nga makahangop nga ang unang katuyoan sang diosnon nga mga pagtalana amo ang magbugay sa iban kag magbuhat sang “madamo nga kaayohan.”
Sarang naton hunahunaon ang mga punto sang pagdesisyon sa aton mga kabuhi—subong sang kon ano ang tun-an, ano ang buhaton nga trabaho, ukon diin magpuyo—sa katuyoan sang pagbulig sa iban.
Ang isa ka pamilya nagsaylo sa isa ka bag-o nga siyudad. Imbes nga magpangita sang isa ka puluy-an sa isa ka manggaranon nga lugar, sila ginpabatyag nga magkadto sa isa ka lugar nga may dakung mga kakulangan pangkatilingban kag pang-ekonomiya. Sa nagligad nga mga tinuig, ang Ginuo nagbuhat paagi sa ila sa pagsuporta sang madamo nga tawo kag magpabakod sang ila ward kag stake.
Ang isa ka doktor nagmentenar sang isa ka kinaandan nga pagpamulong apang gingiyahan nga maghatag sang isa ka adlaw sa kada simana agud maghatag sang libre nga pagpamulong sa mga tawo nga wala sang health insurance. Bangud sa kaluyag sining tawo kag sang iya asawa nga magbugay sa iban, ang Ginuo naghatag sang paagi sa ila nga magsuporta sa ginatos ka mga pasyente nga nagakinahanglan samtang sila nagpadaku sang ila daku nga pamilya.
Magtukib kag Magpalambo sang Espirituhanon nga Mga Dulot
Ikaduha, magtukib kag magpalambo sang espirituhanon nga mga dulot. Ang Langitnon nga Amay naghatag sa aton sining mga dulot agud buligan kita nga mabal-an, mahimo, kag malipay sa buluhaton nga may ara Sia para sa aton.
Ang pila sa aton nagapamangkot, “May ara bala ako sang bisan ano nga mga dulot?” Liwat, ang sabat amo ang huo! “Sa kada lalaki [kag babayi] ginhatag ang isa ka dulot sang Espiritu sang Dios … nga ang tanan mabugayan paagi sini” (D&C 46:11–12; emphasis added). Ang pila ka mga dulot nga espirituhanon nasulat sa kasulatan (lantawa 1 Corinthians 12:1–11, 31; Moroni 10:8–18; D&C 46:8–26), apang may madamo pa nga iban. Ang pila ka mga halimbawa nagalakip sang pagkamaloloy-on, paghatag sang paglaum, pagpakig-abyan, pag-organisar sang epektibo, pagpamulongpulong ukon pagsulat nga makabuluyok, pagtudlo sing maathag, kag maukod nga pagtrabaho.
Gani paano kita makaabot sa pagkabalo sang aton mga dulot? Sarang naton gamiton ang aton patriarchal blessing, magpamangkot sa yadtong maayo nga nakakilala sa aton, kag magtalupangod sa aton kaugalingon kon ano ang kinaandan nga aton naluyagan kag nalipayan. Labing importante, sarang kita magpamangkot sa Dios (lantawa James 1:5; D&C 112:10). Nabal-an Niya ang aton mga dulot bangud Sia ang naghatag sang mga ini sa aton (lantawa D&C 46:26).
Samtang ginatukib naton ang aton mga dulot, may responsibilidad kita sa pagpalambo sa mga ini (lantawa Matthew 25:14–30). Bisan si JesuCristo “wala makabaton sang kabug-osan sa una, apang [naglambo] halin sa isa ka grasya padulong sa sunod nga grasya (D&C 93:13).
Isa ka batan-on nga lalaki ang naghimo sang mga pintorang dibuho agud sakdagon ang relihiyosong mga sulundan. Ang paborito ko amo ang laragway sang Manluluwas, isa ka kopya ang nakabitin sa amon puluy-an. Ining brother nagpalambo kag naggamit sang iya mga dulot bilang pintor. Nagabuhat paagi sa iya, ang Langitnon nga Amay naga-inspirar sa iban agud magpasanyug sang ila pagkasumulunod.
Kon kaisa nagabatyag kita nga kita wala sang bisan ano nga importanteng mga dulot. Isa ka adlaw, ang isa ka nadulaan sing paglaum nga batan-on nga babayi nagpangamuyo, “Ginuo, ano ang akon personal nga pagpangalagad?” Ang Ginuo nagsabat, “Talupangda ang iban nga tawo.” Ato isa ka espirituhanon nga dulot! Sugod sadto, nalipay sia sa pagtalupangod sa iban nga tawo nga sa kinaandan ginkalimtan, kag ang Dios nagbuhat paagi sa iya sa pagbugay sa madamo nga tawo. Ang pila sa aton espirituhanon nga mga dulot siguro indi bantug suno sa talaksan sang kalibutan, apang ang mga ini kinahanglanon sa Dios kag sa Iya buluhaton.
Gamita ang Kalisdanan sa Kaayohan Ninyo
Ikatatlo, gamita ang kalisdanan sa kaayohan ninyo. Ang aton mga pagtilaw nagabulig sa pagtukib kag paghanda para sa buluhaton nga ang Langitnon nga Amay may ara para sa aton. Si Alma nagpaathag, “Pagkatapos sang madamo nga pag-antus, ang Ginuo …naghimo sa akon bilang galamiton sa iya mga kamot” (Mosiah 23:10). Subong sa Manluluwas, nga ang nagapasag-uli nga halad nagapakasarang sa Iya nga magtabang sa aton (lantawa Alma 7:11–12), magamit naton ang ihibalo nga naghalin sa mabudlay nga mga inagihan agud magtib-ong, magpabakod, kag magbugay sa iban.
Pagkatapos nga ang isa ka manager sa human resources nadulaan sang obra, ginbasa niya ang iya patriarchal blessing kag na-inspirar nga magsugod sang iya kumpaniya agud buligan ang iban nga mga propesyonal nga makakita sang trabaho. (Ginbuligan pa gani niya ako nga makaobra sang ang amon pamilya nagbalik halin sa pag-alagad sa isa ka mission.) Ang Ginuo naggamit sa iya pagtilaw bilang isa ka oportunidad agud magbugay sa iban, samtang ini naghatag sa iya sang mas makahulogan nga trabaho.
Isa ka batan-on nga magtiayon ang nakaagi sa pagbun-ag sang patay nga lapsag. May kalisud ang mga tagipusuon, sila nagpamat-ud nga magpadungog sa ila bata nga babayi paagi sa paghatag sang paglaygay kag suporta nga materyal sa mga ginikanan nga nag-antus sang amo man nga mga pag-antus. Ang Ginuo nagbuhat paagi sa sining magtiayon bangud sang ila pinasahing balatyagon sang pag-unong, nga ginpalambo sa kalisdanan.
Magsalig sa Dios
Kag ikaapat, magsalig sa Dios. Kon kita magpangayo sa Iya sa pagtuo nga may panaad, ipahibalo Niya ang aton diosnon nga mga buluhaton sa aton. Sa tion nga matukiban naton ang mga ini, Sia magabulig sa aton nga matuman yadtong mga buluhaton. “Ang tanan nga mga butang ara sa [Iya] atubang ” (D&C 38:2; lantawa man Abraham 2:8), kag sa husto nga mga tion, pagabuksan Niya ang mga ganhaan nga kinahanglan para sa aton (lantawa Revelation 3:8).. Ginpadala pa gani Niya ang Iya Anak, si JesuCristo, agud nga kita makasalig sa Iya para sa kabakod nga labaw sa kinaandan naton nga mga abilidad (lantawa Philippians 4:13; Alma 26:12).
Ang isa ka brother, nagkabalaka parte sa mga desisyon sang gobyerno lokal, nakabatyag nga magpadalagan para sa opisina publiko. Walay sapayan sa mabudlay nga proseso sang kampanya, naggamit sia sa pagtuo kag nagtipon sang kwarta agud magpadalagan. Sa ulihi, wala sia magdaug apang nakabatyag nga ang Ginuo naghatag sa iya sang paggiya kag kabakod sa pagpatalupangod sang importante nga mga isyu sa komunidad.
Isa ka solo nga iloy, nagapadaku sa mga bata nga may sablag sa pagdalagku, nagduda kon bala masuporta niya sang nagakaigo ang mga kinahanglanon sang iya pamilya. Bisan nga ini mabudlay, nabatyagan niya ang pagpabakod sang Ginuo agud matuman niya ang pinakalabing importanteng misyon niya nga may kadalag-an.
Isa ka Pulong sang Pagpaandam
Sa amo man nga tion nga ang Dios nagabulig sa aton sa pagtuman sang langitnon nga mga buluhaton, ang kaaway nagaobra man sa pagpasala kag pagpalayo sa aton sa isa ka kabuhing makahulogan.
Ang sala siguro ang pinakadakung salandaran, nagapahabol sang aton pagbatyag sa Balaan nga Espiritu kag nagapakubos sang aton pagkuha sa espirituhanon nga gahum. Agud mahimo ang buluhaton sang Langitnon nga Amay para sa aton, dapat kita magtinguha nga mangin matinlo (lantawa 3 Nephi 8:1). Nagapangabuhi bala kita sa sahi nga ang Dios makabuhat paagi sa aton?
Si Satanas nagatinguha man sa pagpasala sa aton paagi sa mas diutay ka importanteng mga butang. Ang Ginuo nagpaandam sa naunang mga pinuno sang Simbahan, “Ang hunahuna mo ara sa mga butang sang kalibutan mas labi sangsa mga butang nakon …kag sa pagpangalagad kon sa diin ikaw gintawag” (D&C 30:2). Tuman bala kita nga nagahunahuna sa mga butang kalibutanon nga kita wala nagatamod sa aton langitnon nga mga buluhaton?
Dugang pa, si Satanas nagapalas-ay sa aton paagi sa balatyagon nga indi kita makasarang. Ginahimo niya nga ang aton buluhaton daw sa tuman ka mabudlay ukon makakululba. Apang, kita makasalig sa Dios! Palangga Niya kita. Luyag Niya kita nga mangin madinalag-on. Sia “nagauna sa atubang [naton]; magaupod sia sa [aton], indi sia magpaslaw sa [aton]” (Deuteronomy 31:8; lantawa man Psalm 32:8; Proverbs 3:5–6; Matthew 19:26; D&C 78:18).
Si Satanas basi man mag-into sa aton sa paglantaw sang aton buluhaton bilang kubos sangsa buluhaton nga gintalana sa iban. Apang ang kada buluhaton halin sa Dios importante, kag kita makasapo sang katumanan samtang kita “nagapakahimaya sa sinang ginsugo sang Ginuo sa [aton]” (Alma 29:9).
Samtang ang Dios nagabuhat paagi sa aton, ang kaaway basi magsulay sa aton nga mag-angkon sang importansya sa bisan ano nga mga natuman. Apang, sarang naton sundon ang pagkamapainubuson sang Manluluwas paagi sa paglikaw sa personal nga pagdayaw kag pakahimayaon ang Amay (lantawa Matthew 5:16; Moses 4:2). Sang ang isa ka reporter nagtinguha sa pagdayaw kay Mother Teresa sa iya misyon agud buligan ang pobre, sia nagsabat: “Ini buluhaton sang [Dios]. Kasubong ako sang isa … ka lapis sa iya kamot. …Sia ang nagahunahuna. Sia ang nagasulat. Ang lapis wala sang kahilabtanan sini. Ang lapis nagatugot lamang nga gamiton.”
Pamatbat
Pinalangga ko nga mga kautoran, ginadapit ko ang kada isa sa aton sa “paghalad sang [aton mga kaugalingon] sa Dios … bilang mga galamiton sang pagkamatarong” (Romans 6:13). Ang paghalad nagalakip sang pagpahibalo sa Iya nga luyag naton nga gamiton, nagapangita sang Iya direksyon, kag nagakuha sang Iya kabakod.
Sa dalayon, sarang kita maglantaw sa kay JesuCristo, ang aton perpektong halimbawa. Sa kabuhi antes diri, ang Langitnon nga Amay nagpamangkot, “Sin-o ang ipadala ko?”
Si Jesus nagsabat, “Ari ako, ipadala ako” (Abraham 3:27; lantawa man Isaiah 6:8).
Si JesuCristo nagbaton, naghanda, kag naghimo sang Iya gintalana nga papel bilang aton Manluluwas kag Manunubos. Gintuman Niya ang pagbuot sang Amay (lantawa John 5:30; 6:38; 3 Nephi 27:13) kag nagtapos sang Iya langitnon nga mga buluhaton.
Samtang nagasunod kita sa halimbawa ni Cristo kag maghalad sang aton mga kaugalingon sa Dios, nagasaksi ako nga Sia magagamit man sa aton agud magpauswag sang Iya buluhaton kag magbugay sa iban. Sa ngalan ni JesuCristo, amen.