“Hunyo 15–21. Alma 13–16: ‘Magsulod sa Kapahuwayan sang Ginuo,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Hunyo 15–21. Alma 13–16,” Dali, Magsunod sa Akon—Para sa Mga Indibidwal kag Mga Pamilya: 2020
Larawan ni Alma kag Amulek nga ginahilway sa prisuhan, ni Andrew Bosley
Hunyo 15–21
Alma 13–16
“Magsulod sa Kapahuwayan sang Ginuo”
Malahalon ang inspirasyon nga imo mabaton samtang imo ginapamensar sing maayo ang balaan nga mga kasulatan. Pwede mo ipakita nga ginahatagan mo ini sing bili paagi sa pagrekord kag pag-akto sini.
Isulat Ang Imo Mga Panghunahuna
Sa madamo nga paagi, ang kabuhi sa Amonihas nangin maayo para sa ila ni Amulek kag Zisrom. Si Amulek “isa ka tawo nga may indi diutay nga kabantugan,” sa tunga sang “madamo nga mga himata kag mga kaabyanan” kag “madamo nga mga manggad” (Alma 10:4). Si Zisrom “isa sa labing sampaton” sa mga abogado kag may “madamo nga kalabtanan” (Alma 10:31). Dayon nag-abot si Alma sa Amonihas nga may diosnon nga imbitasyon nga maghinulsol kag “magsulod sa kapahuwayan sang Ginuo” (Alma 13:16). Para kay Amulek, Zisrom, kag sa iban pa, ang pagbaton sining imbitasyon nagakinahanglan sang sakripisyo kag nagadala pa gani sang halos indi maagwanta nga pagtilaw.
Pero siyempro wala didto natapos ang istorya. Sa Alma 13–16, matun-an naton kon ano ang nagakatabo sa ulihi sa mga nagapati “sa gahum ni Cristo tuhoy sa kaluwasan” (Alma 15:6). Kon kaisa may kaumpawan, kon kaisa may pagpang-ayo—kag kon kaisa wala gid nagahapos ang aton kahimtangan sa sining kabuhi. Pero sa gihapon, “ginabaton sang Ginuo [ang Iya katawhan] para sa iya kaugalingon, sa kahimayaan” (Alma 14:11). Sa gihapon, ang Ginuo nagahatag sang “gahum, suno sa [aton] pagtuo nga [yara] kay Cristo” (Alma 14:28). Kag sa gihapon, inang “pagtuo sa Ginuo” nagahatag sa aton sang “paglaum nga magabaton [kita] sang kabuhi nga wala katapusan” (Alma 13:29). Samtang imo ginabasa ining mga kapitulo, pwede ka magkapyot sa kaumpawan sa sining mga promisa, kag mas maintiendihan mo man kon ano ang buot silingon ni Alma sang naghambal sia parte sa “kapahuwayan sang Ginuo.”
Mga Ideya para sa Personal nga Pagtuon sang Balaan nga Mga Kasulatan
Ang mga ordinansa sang priesthood nagabulig sa akon nga makabaton sang pagtubos paagi kay Jesucristo.
Mahimo nga nadumduman mo nga sa Alma 12, nagtudlo si Alma parte sa plano sang pagtubos sang Dios (tan-awa sa Alma 12:24–27). Sa kapitulo 13, naghambal sia parte sa mga pari nga gin-ordinan sang Dios “sa pagtudlo sining mga butang sa katawhan” (Alma 13:1). Ang mga tinaga ni Alma nagpahayag sang madamo nga mabaskog nga mga kamatuoran parte sa priesthood. Basi pwede mo tilawan nga kilalahon bisan isa lang ka kamatuoran kada bersikulo sa Alma 13:1–9. Ari ang pila ka mga ideya agud makasugod kamo:
-
Bersikulo 1.Ang priesthood ginatawag man nga “ang pagbulut-an sang Anak sang [Dios]” (tan-awa sa Doktrina kag mga Kasugtanan 107:1–4).
-
Bersikulo 2.Nagaordin ang Dios sang mga pari para buligan ang mga tawo nga magtulok sa Iya anak para sa pagtubos.
-
Bersikulo 3.Ang mga nagakapot sang priesthood ginhanda para sa ila mga responsibilidad “gikan pa sa sadsaran sang kalibutan.”
Ano pa ang imo nakita? Ano ang nabatyagan mo parte sa priesthood samtang ginapamensar mo sing maayo ining mga kamatuoran? Paano ka nabuligan sang mga ordinansa sa priesthood nga magtulok kay Cristo para sa pagtubos?
Maayo nga tandaan nga madamo sa mga tawo sa Amonihas mga sumulunod ni Nehor (tan-awa sa Alma 14:18; 15:15). Ano ang kinalain sang mga pari sa pagbulut-an ni Nehor (tan-awa sa Alma 1:3–6) sa mga pari nga gin-ordinan “suno sa Pagbulut-an sang Anak sang Dios” (Doktrina kag mga Kasugtanan 107:3), nga ginlaragway ni Alma? (tan-awa sa Alma 13:1–19).
Ang mga ordinansa sa priesthood nagabulig sa aton nga magtulok kay Cristo para sa pagtubos.
Ang mga nagakapot sang priesthood lang bala ang solo nga mga tawo nga “gintawag kag ginhanda gikan pa sa sadsaran kalibutan”?
Ang mga pinanudlo ni Alma sa Alma 13:3 nagatumod gid partikular sa mga nagakapot sang priesthood. Ugaling, ang prinsipyo nga iya ginpanudlo—nga ang mga indibidwal nagbaton sang mga tulumanon kag naghanda nga tumanon ang mga ini “gikan pa sa sadsaran sang kalibutan”—nagatumod sa aton tanan. Si Pangulong Spencer W. Kimball nagsiling: “Sa kalibutan antes pa kita magkadto diri, ang mga matinuohon nga kababayin-an ginpanghatagan sang pila ka mga buluhaton samtang ang matinuohon nga kalalakin-an ginpili na nga daan para sa pila ka mga buluhaton sa priesthood. Indi man naton madumduman ang partikular nga mga buluhaton, wala sini ginaliwat ang mahimayaon nga realidad sang aton ginkasugtan sadto” (Teachings of Presidents of the Church: Spencer W. Kimball [2006], 215–16; tan-awa man sa Doktrina kag mga Kasugtanan 138:55–56).
Kon kaisa gintugtan sang Dios nga mag-antos ang matarong.
Ang Alma 14 nagasugid parte sa matarong nga katawhan nga nag-antos kag napatay pa gani bangud sang ila mga pagpati. Siguro nagakatingala ka, pareho sa madamo, kon ngaa nakatabo ang malain nga mga butang sa mga tawo nga nagatinguha sa pagpangabuhi sing matarong. Mahimo nga indi mo makita ang tanan nga mga sabat sa sining mabudlay nga pamangkot sa Alma 14, pero kadamo sang pwede matun-an sa reaksyon ni Alma kag Amulek sa mga sitwasyon nga ila ginpangatubang. Ano ang ginatudlo sa imo sang ila mga tinaga kag aksyon kon ngaa ginatugtan kon kaisa sang Ginuo nga mag-antos ang matarong nga mga tawo? Ano ang imo matun-an sa ila parte sa pag-atubang sang pagpanghingabot?
Tan-awa man sa Mateo 5:43–44; Marcos 14:55–65; Mga Taga-Roma 8:35–39; 1 Pedro 4:12–14; Doktrina kag mga Kasugtanan 122:5–9.
Ang pagkadisipulo nagakinahanglan sang sakripisyo.
Mangin interesante nga ilista ang mga butang nga ginbaylo ni Amulek para sa ebanghelyo (tan-awa sa Alma 10:4–5; 15:16) kag ikumparar ini sa lista sang iya naagom (tan-awa sa Alma 15:18; 16:13–15; 34:8). Ano ang handa mo nga isakripisyo para mangin mas matinuhon nga disipulo?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Alma 13
Mahimo nga makabenepisyo ang imo pamilya sa pagtanda kada beses nga makita ang tinaga nga “kapahuwayan” sa Alma 13. Ano pa nga mga tinaga kag mga ideya ang makita upod sini? Paano kita ginabuligan sini nga maintiendihan kon ano ang buot silingon sang “kapahuwayan sang Ginuo?” Ano ang kinalain sini sa pisikal nga pagpahuway?
Alma 13:10–12
Para buligan ang imo pamilya nga mapanan-aw ang ginatudlo sining mga bersikulo, pwede kamo maglaba sing isa ka butang sing ululupod—pareho abi sang puti nga bayo. Ano ang aton nabatyagan kon mahigko kita? Ano ang aton nabatyagan kon matinlo na kita liwat? Sa ano nagapareho ining mga pamatyagon sa aton nabatyagan kon kita nakasala kag dayon naghinulsol kag nangin matinlo paagi sa Pagbayad-Sala sang Manluluwas?
Alma 15:1–12
Ano ang aton matun-an sa eksperiyensya ni Zisrom parte sa gahum sang Dios nga magpabakod kag mag-ayo sa aton, bisan pa nga nakahimo kita sang mga sayop? Ano ang papel sang priesthood sa aton pagbaton sang Iya kusog kag pagpang-ayo?
Alma 16:1–10
Pagkatapos nga basahon ining mga bersikulo, pwede ninyo basahon ang Alma 9:4. Ano ang aton matun-an sa pagkumparar sang nabatyagan ni Zoram sa mga pulong sang propeta sa nabatyagan sang katawhan sang Amonihas? Ano ang aton ginahimo para mangin matinuohon sa mga pulong sang aton buhi nga propeta?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Magmangin handa pirme. Ang tinion sa pagtudlo nagalipas lang dayon, gani kuhaa gid ang oportunidad kon mag-abot ini. Ang isa ka trahedya sa kalibutan, halimbawa, mahimo nga isa ka oportunidad sa pagpaambit sang mga prinsipyo sa Alma 14 kon ngaa ginatugtan kon kaisa sang Ginuo nga mag-antos ang mga inosente. (Tan-awa sa Teaching in the Savior’s Way,16
Si Alma kag Amulek sa Prisuhan, ni Gary L. Kapp