Pagpanudlo sang Matuod nga Doktrina, ni Michael T. Malm

Hunyo 8–14

Alma 8–12

Si Jesucristo Magakari sa Pagtubos sang Iya Katawhan

Ang pagtuon sang balaan nga mga kasulatan nagaimbitar sang rebelasyon. Gani samtang imo ginabasa ang Alma 8–12, isulat ang mga impresyon sang Espiritu samtang ginatudloan ka Niya gikan sa mga mensahe ni Alma kag Amulek.

Isulat Ang Imo Mga Panghunahuna

Ang buluhaton sang Dios indi magpalya. Pero ang aton pagtinguha sa pagbulig sa Iya buluhaton kon kaisa daw nagakapaslawan—ang matabo, mahimo nga indi naton makita dayon ang mga resulta nga aton ginapaabot. Kon kaisa makabatyag kita nga daw pareho kay Alma sang nagpangwali sia sang ebanghelyo sa Amonihas—ginsikway, ginduplaan, kag gintabog. Pero sang ginhambalan sia sang anghel nga magbalik kag tilawan liwat, maisog si Alma nga “madasig nga nagbalik” (Alma 8:18), kag ginhanda sang Dios ang dalan sa iya atubang. Wala lang Sia magtigana kay Alma sang pagkaon nga kalan-on kag lugar nga maestaran, kundi ginhanda man Niya si Amulek, nga nangin kaupod nga tagpangabudlay, maisog nga tagpangapin sang ebanghelyo, kag isa ka matinuohon nga abyan. Kon makasugata kita sang mga kabudlayan kag pagkadismaya samtang nagaserbisyo kita sa ginharian sang Ginuo, mahimo naton panumdumon kon paano ginsuportahan sang Dios kag gintuytoyan si Alma, kag makasalig man kita nga ang Dios magasuporta kag magatuytoy man sa aton, bisan sa mabudlay nga mga sirkumstansya.

Mga Ideya para sa Personal nga Pagtuon sang Balaan nga Mga Kasulatan

Alma 8

Ang akon mga pagpaninguha sa pagpaambit sang ebanghelyo mahimo nga magkinahanglan sang pagpursige kag pasensya.

Bisan pa nga may magsikway sang imo panaksihon sang ebanghelyo, wala ina nagakahulugan nga dapat ka madulaan sang paglaum—kon hunahunaon, indi mag-ampo ang Ginuo para sa sinang tawo, kag Iya ka giyahan kon paano mag-akto. Sa kaso ni Alma, isa ka anghel ang nagsugo sa iya nga magbalik sa Amonihas para magwali sang ebanghelyo bisan pa nga ang mga tawo didto bayolente nga nagsikway sa iya (tan-awa sa Alma 8:14–16). Ano ang imo natun-an sa ehemplo ni Alma sa pagpaambit sang ebanghelyo wala sapayan sang mga kabudlayan kag oposisyon? Ano nga mga bersikulo sa Alma 8 ang nagapatubo sang imo handum nga magpaambit sang ebanghelyo?

Alma 9:18–25; 10:16–23

Ginahukman sang Dios ang Iya mga anak suno sa kasanag kag ihibalo nga ila naangkon.

Samtang ginabasa ang parte sa paagi nga gintratar sang mga Nefinhon sa Amonihas ang mga alagad sang Ginuo, madali malimtan nga sila sadto nagapangabuhi sang ebanghelyo kag “tuman kapinasulabi nga katawhan sang Ginuo” (Alma 9:20). Sa matuod, bahin sang mensahe ni Alma sa katawhan sang Amonihas amo nga bangud ginpakatig-a nila ang ila mga tagipusuon wala sapayan sang tuman nga pagbugay, ang ila kahimtangan mas masobra pa sangsa iya sang mga Lamanhon, nga nagpakasala bangud sang pagkakulang sang ihibalo. Ano ang ginatudlo sa aton sining kabaliskaran parte sa kon paano ginahukman sang Dios ang Iya mga anak?

Samtang imo ginabasa ang parte sa dalagko nga mga bugay nga ginhatag sang Dios sa katawhan ni Nefi (tan-awa labi na gid sa Alma 9:19–23), pamensara ang dako nga mga bugay nga Iya ginhatag sa imo. Ano ang imo ginahimo para magpadayon nga tampad sa sining mga bugay? Ano nga mga pagbag-o ang nabatyagan mo nga kinahanglan mo himuon?

Tan-awa man sa Doktrina kag mga Kasugtanan 82:3.

Alma 11–12

Ang plano sang Dios isa ka plano sang pagtubos.

Ang mga propeta sa Libro ni Mormon naggamit sang lainlain nga mga ngalan para ilaragway ang plano sang Dios para sa Iya mga anak, pareho sang plano sang kaluwasan ukon plano sang kalipayan. Sa Alma 11–12, si Alma kag Amulek nagtawag sini nga plano sang pagtubos. Sa imo pagbasa sining mga bersikulo, pamensara kon ngaa gingamit ang tinaga nga “pagtubos” para ilaragway ang plano. Pwede ka man magsulat sang malip-ot nga lista sang gintudlo ni Alma kag Amulek parte sa masunod nga mga aspeto sang plano.

Ang Pagkapukan/The Fall:

Ang Manunubos:

Paghinulsol:

Kamatayon:

Pagkabanhaw:

Paghukom:

Pat-ini ang epekto sang mga pulong ni Amulek sa mga tawo (tan-awa sa Alma 11:46). Ngaa sa banta mo ining mga prinsipyo may amo sadto kabaskog nga impluwensya? Paano ini nakaimpluwensya sa imo kabuhi?

Alma 12:8–18

Kon indi ko pagpatig-ahon ang akon tagipusuon, makabaton ako sang dugang pa nga pulong sang Dios.

Ang pila ka tawo mahimo nga nagapamangkot kon ngaa wala ginapahibalo sang Amay nga Langitnon sa aton ang tanan nga mga butang. Sa Alma 12:9–14, ginpaathag ni Alma ang isa ka posible nga rason nga ang mga misteryo sang Dios kon kaisa ginalipod sa aton. Ining mga pamangkot makabulig sa imo nga pamensaron sing maayo kon ano ang iya gintudlo:

• Ano ang kahulugan sang patig-ahon ang aton mga tagipusuon? Natalupangdan mo bala ining pamatasan sa imo kaugalingon?

• Ngaa ayhan ilipod sang Ginuo ang Iya pulong sa mga nagpatig-a sang ila mga tagipusuon?

• Paano mo naeksperiyensyahan ang promisa sang pagbaton sang “mas dako nga bahin sang pulong”? (Alma 12:10). Daw ano ang eksperiyensya nga ina?

• Ano ang pwede mo himuon para masiguro nga ang pulong sang Dios “makita sa [imo]”? (Alma 12:13). Kon ara sa imo ang pulong sang Dios, ano ang mangin epekto sini sa imo “mga pulong,” “mga binuhatan,” kag “mga panghunahuna”? (Alma 12:14).

Para sa halimbawa sining mga prinsipyo, ikumparar si Amulek sa iban pa nga mga tawo sa Amonihas. Paano ginapakita sang eksperiyensya ni Amulek (labi na sa Alma 10:1–11) kon ano ang gintudlo ni Alma sa sining mga bersikulo?

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Alma 8:10–18

Ano ang aton matun-an kay Alma parte sa pagtuman sa Ginuo sing “madasig” (bersikulo 18) bisan pa nga basi mabudlay ini? Para pabakuron ining prinsipyo sa magagmay nga kabataan, pwede kamo maghampang nga nagahatag ka sang mga instruksyon para sa ulobrahon kag tan-awa kon ano ini kasadig nga tapuson sang mga miyembro sang pamilya. Halimbawa, pwede mo tan-awon kon sin-o ang madasig nga makapiod sang bayo.

Alma 10:1–12

Ano ang aton matun-an sa eksperiyensya ni Amulek sa sining mga bersikulo? Ano ang nangin epekto sang iya panaksihon sa mga nagapamati? Imbitara ang mga miyembro sang imo pamilya nga magplano nga maghimo sang isa ka butang sining semana base sa ila natun-an sa halimbawa ni Amulek.

Alma 10:22–23

Ano ang aton matun-an sa sining mga bersikulo parte sa impluwensya sang grupo sang matarong nga mga tawo sa isa ka malaut nga siyudad?

Alma 11:34–37

Ano ang kinalain sang si Jesucristo nagaluwas sa aton sa aton mga sala kag gikan sa aton mga sala? (tan-awa sa Helaman 5:10; tan-awa man sa 1 Juan 1:9–10).   Paano kita ginaluwas ni Jesucristo halin sa aton mga sala?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Tun-i ang mga pulong sang mga propeta kag apostoles sa ulihing mga adlaw. Basaha ang pinanudlo sang mga propeta kag apostoles sa ulihing mga adlaw parte sa mga kamatuoran nga imo makita sa balaan nga mga kasulatan. Halimbawa, pwede ka magpili sang topiko sa Alma 8–12 kag pangitaon inang topiko sa pinakabag-o nga pangkabilugan nga komperensya (tan-awa sa Teaching in the Savior’s Way, 21).

Larawan ni Alma nga nagakaon upod si Amulek ni Dan Burr