ang nabanhaw nga Cristo upod ang Iya mga Apostoles

Si Cristo kag ang mga Apostoles, ni Del Parson

Marso 30–Abril 12

Paskwa sang Pagkabanhaw

“Magabangon Sia … nga may Pagpaayo sa Iya mga Pakpak”

Sa mga inadlaw padulong sa Domingo sang Paskwa sang Pagkabanhaw, pamensara nga itutok ang imo personal kag pang-pamilya nga pagtuon sang balaan nga mga kasulatan sa mabaskog nga panaksihon sang Libro ni Mormon parte sa kabuhi, kamatayon, Pagkabanhaw, kag sa nagabayad-sala nga gahum ni Jesucristo.

Isulat Ang Imo Mga Panghunahuna

Ang dumaan nga mga Apostoles nangin maisog sa ila mga panaksihon kay Jesucristo kag sa Iya Pagkabanhaw. Minilyon ang nagpati kay Jesucristo kag nagatinguha nga sundon Sia tungod sang ila mga pulong nga nasulat sa Biblia. Pero may pila nga magapamangkot, nga kon si Jesucristo amo ang Manluluwas sang bilog nga kalibutan, ngaa nga ang Iya mga saksi ginlimitahan sa pila lamang ka mga tawo halin sa isa ka gamay nga rehiyon?

Ang Libro ni Mormon nagatindog bilang dugang, nagapangkumbinsi nga saksi nga si Jesucristo amo ang Manluluwas sang kalibutan, “nga nagapahayag sang iya kaugalingon sa tanan nga kapungsuran” (tig-ulo nga pahina sang Libro ni Mormon) kag nagatanyag sang kaluwasan sa tanan nga magakari sa Iya. Dugang pa, ining ika-duha nga saksi nagaathag man kon ano ang kahulugan sang kaluwasan. Amo ini kon ngaa si Nefi, Jacob, Mormon, kag ang tanan nga mga propeta nagpangabudlay “sing maukod sa pagkurit sining mga pulong sa mga lamina”—agud ideklarar sa palaabuton nga mga henerasyon nga sila man “nakahibalo nahanungod kay Cristo, kag … nakaangkon sang paglaum sa iya himaya” (Jacob 4:3–4). Sa sining panahon sang Paskwa sang Pagkabanhaw, binagbinaga ang mga panaksihon sa Libro ni Mormon nga ang gahum sang Pagbayad-Sala ni Cristo pareho nga pangkabilugan kag personal—nagatubos sang bilog nga kalibutan kag nagatubos sa imo.

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

2 Nefi 9:6–15, 22; Alma 11:41–45; 40:21–23; 3 Nefi 26:4–5

Tungod sang Pagkabanhaw ni Jesucristo, ang tanan nga tawo mabanhaw.

Kinaandan sa Paskwa sang Pagkabanhaw ang binagbinagon ang Pagkabanhaw ni Jesucristo, pero ano gid bala ang kahulugan sang mabanhaw? Ano nga mga ideya ang ginatanyag sang Libro ni Mormon parte sa pagkabanhaw? Ayhan bilang kabahin sang imo pagsaulog sang Paskwa sang Pagkabanhaw pwede mo ilista ang mga kamatuoran parte sa pagkabanhaw nga imo makita sa 2 Nefi 9:6–15, 22; Alma 11:41–45; 40:21–23; kag 3 Nefi 26:4–5. Pwede mo man isulat kon ngaa sa banta mo nga importante nga mahibal-an ang tagsa sining mga kamatuoran.

Mahimo nga natalupangdan mo nga ang mga kamatuoran parte sa Pagkabanhaw masami ginatudlo kaupod sa mga kamatuoran parte sa Katapusan nga Paghukom. Pamensara kon ano ang ginatudlo sina sa imo parte sa importansya sang Pagkabanhaw sa plano sang kaluwasan.

Tan-awa man sa Lucas 24:36–43; Mga Binuhatan 24:15; 1 Mga Taga-Corinto 15:12–23.

Mosias 3:7; 15:5–9; Alma 7:11–13

Gindala ni Jesucristo sa Iya Kaugalingon ang akon mga sala, mga kasakit, kag mga kahuyang.

Ang Biblia maathag nga nagatudlo nga si Jesucristo nagbayad para sa aton mga sala. Ang Libro ni Mormon, ugaling, nagpasangkad sang aton pag-intiendi sang sakripisyo kag pag-antos ni Cristo sa importante nga mga paagi. Makita mo ang pila sining mga pinanudlo sa Mosias 3:7; 15:5–9; kag Alma 7:11–13. Pagkatapos mo nga basahon ining mga dinalan, pamensara nga isulat ang kon ano nga imo madiskubrehan pareho sini:

Ano ang gin-antos sang Manluluwas?	Ngaa nag-antos Sia?	Ano ang kahulugan sini sa akon?
Ano ang gin-antos sang Manluluwas?	Ngaa nag-antos Sia?	Ano ang kahulugan sini sa akon?

Tan-awa man sa Isaias 53; Mga Hebreo 4:14–16.

Si Cristo nga nagapangamuyo sa Hardin sang Getsemani

Getsemani, ni Michael T. Malm

Mosias 5:1–2; 27:8–28; Alma 15:3–12; 24:7–19

Ang Pagbayad-Sala ni Jesucristo nagatinlo kag nagabulig nga maperpekto ako.

Makabig nga ang Libro ni Mormon sa kabilugan isa ka kasaysayan sang mga tawo nga nagbag-o bangud sa Pagbayad-Sala ni Jesucristo. Sa pagkamatuod, ang pila sinang mga tawo nakahimo sang seryoso nga mga sala kag mga kaaway pa gani sang katawhan sang Dios antes naghikot ang gahum sang Manluluwas sa ila sang dako kaayo nga pagbag-o suno sa ila pagtuo sa Iya. Mabasa mo ang pila sining mga eksperiyensya sa Mosias 5:1–2; 27:8–28; kag Alma 15:3–12; 24:7–19; mahimo ka magpamensar sang iban pa nga mga halimbawa nga tun-an man. Ano ang imo natalupangdan nga komon sa tagsa sining mga eksperiyensya? Ano nga mga kinalain ang imo natalupangdan? Ano ang ginatudlo sining mga panaysayon sa imo parte sa kon paano ang Pagbayad-Sala sang Manluluwas sarang magbag-o sa imo?

Tan-awa man sa Alma 5:6–14; 13:11–12; 18; 19:1–16; 22:1–26; 36:16–21; Eter 12:27; Moroni 10:32–33.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagselebrar sang Paskwa sang Pagkabanhaw upod sa imo pamilya, magpangita sang mga paagi nga magtuon sing ululupod parte sa Manluluwas kag sa Iya Pagbayad-Sala, lakip na ang Pagkabanhaw. Ari ang pila ka mga ideya.

3 Nefi 11; 17

Ang pila ka mga pamilya nakadiskubre nga ang pagtuon sang istorya sang pagbisita sang nabanhaw nga Manluluwas sa mga Amerika nangin mas makahulugan sang panahon sang Paskwa sang Pagkabanhaw. Paisoga ang mga miyembro sang pamilya nga pamensaron kon daw ano ayhan ang maghikap sang Iya mga pilas (tan-awa sa 3 Nefi 11:14–15) ukon mangin isa sa mga bata nga Iya ginbendisyunan (tan-awa sa 3 Nefi 17:21). Paano ginapadalom sining istorya ang aton kapasalamatan para sa Pagkabanhaw sang Manluluwas? Isa ka larawan nga nagapakita sining istorya ang nalakip sa sining outline; ang iban pa mahimo nga makita sa ChurchofJesusChrist.org. Ang mga miyembro sang imo pamilya mahimo nga masadyahan sa pagdrowing sang ila kaugalingon nga mga litrato sang ila mga nabasahan.

Mga mensare halin sa pangkabilugan nga komperensya

Sa madamo nga mga parte sang kalibutan; ang pang-kabilugan nga komperensya sa sining Abril matabo sa semana antes sang Paskwa sang Pagkabanhaw. Ayhan ang pagpamati sa mga mensahe sa komperensya makabulig sa imo pamilya nga magtutok sa Manluluwas sining Paskwa sang Pagkabanhaw. Halimbawa, pwede mo imbitahon ang mga miyembro sang pamilya nga magpamati sa mga mensahe sa komperensya nga nagapamatuod parte kay Jesucristo kag sa Iya Pagkabanhaw—labi na gid sa mga Apostoles, nga mga espesyal nga saksi ni Jesucristo. Dayon pwede ninyo rebyuhon ining mga mensahe sing ululupod kag pangitaon ang mga pinanudlo nga nagapabakod sa inyo mga panaksihon parte sa Manluluwas.

“Ang Buhi nga Cristo: Ang Panaksihon sang mga Apostoles”

Bilang pamilya, basaha ang “Ang Buhi nga Cristo: Ang Panaksihon sang mga Apostoles” (Ensign ukon Liahona, Mayo 2017, sa sulod sang pang-ibabaw nga atubang nga takop; tan-awa man sa ChurchofJesusChrist.org) kag agdaha ang tagsa ka miyembro sang pamilya nga magpili sang mensahe para ipaambit sa iban. Halimbawa, pwede ka maghimo sang mga poster nga i-display sa social media, sa atubang sang inyo balay, ukon sa bintana.

 

     

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Ipangabuhi ang ebanghelyo ni Jesucristo. Ang pinakaimportante nga butang nga imo mahimo bilang ginikanan amo ang ipangabuhi ang ebanghelyo nga hugot sa imo tagipusuon. Amo ini ang pinakamaayo nga paagi para mangin kwalipikado para sa pagpakig-upod sang Balaan nga Espiritu. Indi mo kinahanglan nga mangin perpekto, kundi mangin matutom lamang sa paghimo sang imo pinakamaayo kag pagpangayo sang kapatawaran paagi sa Pagbayad-Sala sang Manluluwas. (Tan-awa sa Teaching in the Savior’s Way, 13–14.)

Si Cristo nga ginatamyaw ang mga Nefinhon

Larawan ni Cristo kaupod ang mga Nefinhon ni Ben Sowards