“Marso 23–29. Enos–Mga Pulong ni Mormon: Nagahikot Sia sa Akon sa Paghimo Suno sa Iya Kabubut-on,” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Marso 23–29. Enos–Mga Pulong ni Mormon,” Dali, Magsunod sa Akon—Para sa Mga Indibidwal kag Mga Pamilya: 2020
Jacob kag Enos, ni Scott Snow
Marso 23–29
Enos–Mga Pulong ni Mormon
Nagahikot Sia sa Akon sa Paghimo Suno sa Iya Kabubut-on
Sa imo pagbasa sang Enos tubtob sa Mga Pulong ni Mormon, pangitaa ang mga mensahe nga mangin mapuslanon sa imo ukon sa imo pamilya.
Isulat Ang Imo Mga Panghunahuna
Nagkadto si Enos sa kakahuyan para mangayam sang mga sapat, pero sang ulihi nagtiner sia didto agud magpangamuyo “sa bug-os nga adlaw … kag sang mag-abot ang gab-i” (Enos 1:3–4). Bangod ang iya kalag gingutom kaayo sa pagbaton sang kapatawaran sang iya mga sala, handa si Enos nga magpangamuyo kon ano man kalawig ang kinahanglanon kag bisan gani sa “pagpakigdumog” sa atubang sang Dios (Enos 1:2). Amo ina ang sinsero nga pangamuyo: indi kaayo parte sa pagpangayo sang bisan ano nga gusto naton kundi isa ka sinsero nga pagtinguha nga makighambal sa Dios kag magpasanto sang aton pagbuot sa Iya. Kon magpangamuyo ka sa sini nga paagi, kon ang imo tingug “nakalambot sa mga langit,” madiskubrehan mo pareho kay Enos nga nagapamati sa imo ang Dios, kag matuod Sia nga nagaulikid sa imo kag sa imo mga mahal sa kabuhi, kag bisan sa imo mga kaaway (tan-awa sa Enos 1:4–17). Sa sina nga tinion, ang Dios sarang magpalab-ot sang Iya pagbuot sa imo, kag ikaw mangin handa kag makasarang sa paghimo sang Iya pagbuot tungod nagapakig-isa ka sa Iya. Pareho kay Mormon, mahimo nga “wala [mo] mahibal-i ang tanan nga mga butang; apang ang Ginuo nakahibalo sang tanan nga mga butang … [kag] nagahikot sia sa [imo] sa paghimo suno sa iya kabubut-on” (Mga Pulong ni Mormon 1:7).
Mga Ideya para sa Personal nga Pagtuon sang Balaan nga Mga Kasulatan
Ang mga pulong sang ginikanan may nagapabilin nga impluwensya.
Ano nga mga mensahe ang ari sa sining mga bersikulo para sa mga ginikanan kag kabataan?
Ang akon sinsero nga mga pangamuyo pagasabton.
Ang eksperiyensya ni Enos sa pangamuyo isa sa indi gid malimtan sa balaan nga kasulatan. Ang imo mga eksperiyensya mahimo nga indi amo sini ka ma-drama, pero indi kinahanglan nga mas manubo ang mga ini sa kahulugan. Ang mga eksperiyensya ni Enos mahimo nga magpakita sang mga paagi agud mas pauswagon ang imo mga pangamuyo. Ari ang pila ka mga pamangkot nga dapat binagbinagon:
-
Ano nga mga tinaga ang nagalaragway sang pagpaninguha ni Enos samtang sia nagapangamuyo?
-
Ano ang una nga ginpangamuyo ni Enos? (tan-awa sa Enos 1:4). Ano ang imo matun-an sa aksyon ni Enos sang makabaton sia sang sabat? (tan-awa sa Enos 1:5–7).
-
Paano ni Enos gin-aktuhan ang mga sabat nga iya nabaton?
-
Ano ang imo matun-an kay Enos parte sa pag-angkon sang “di-mauyog” nga pagtuo sa Ginuo? (Enos 1:11).
Ang Ginuo magabugay sa akon kon tumanon ko ang mga kasuguan.
Isa sang pirme ginasulit-sulit nga promisa sang Dios sa Libro ni Mormon amo nga kon tumanon sang mga Nefinhon ang mga kasuguan, magauswag sila (tan-awa sa 2 Nefi 1:20; Jarom 1:9–12; Omni 1:6). Sa mga libro ni Jarom kag Omni ginapakita ang pila ka paagi kon paano natuman ang ining promisa. Ano ang imo matun-an gikan sa sining mga kasaysayan nga makabulig sa imo nga “mag-uswag sa duta”?
Sin-o ang katawhan sang Zarahemla?
Pagkatapos nga magpalagyo ang mga Nefinhon sa duta sang Nefi, nadiskubrehan nila ang madamo nga katawhan nga nagapuyo sa lugar nga ginatawag Zarahemla. Ang katawhan sang Zarahemla nga kaliwat sang isa ka grupo sang mga Israelnon nga, pareho sa pamilya ni Lehi, nagbiya sa Jerusalem kag ginpangunahan sang Dios padulong sa duta nga ginpangako. Kaupod sa sinang grupo amo si Mulek, isa sa mga anak nga lalaki ni Sedequias, ang hari sang Juda nga gindakop sang mga taga-Babilonia sang mga 587 BC (tan-awa sa Jeremias 52:1–11; Mosias 25:2; Helaman 8:21).
Pagkatapos nga mag-abot ang katawhan sang Zarahemla sa duta nga ginpangako, nakilala nila si Coriantumr (tan-awa sa Omni 1:21), ang katapusan nga nabilin nga nakilal-an nga himata sang mga Jarednon, nga ang istorya ginsaysay sa libro ni Eter.
Ano ang Mga Pulong ni Mormon?
Ang Mga Pulong ni Mormon nagaserbe nga taytay sa duha ka klase sang mga lamina nga nagabug-os sang Libro ni Mormon. Diri nagahatag si Mormon sang paathag parte sa sining duha ka mga rekord, kag ang iya mga pulong nagatudlo sang importante nga mensahe parte sa pagsalig sa Ginuo, bisan pa nga wala naton lubos nga naintiendihan ang Iya sugo.
Sang ginasulat ni Nefi ang rekord sang iya katawhan, ang Dios nagsugo sa iya nga maghimo sang duha ka klase sang mga lamina, nga gintawag nga magagmay nga mga lamina kag dalagko nga mga lamina ni Nefi. Wala si Nefi nakahibalo kon ngaa ginsugo sia nga maghimo sang duha ka klase sang mga lamina, pero nagsalig sia nga ang Ginuo may “isa ka maalam nga katuyuan … , nga ang amo nga katuyuan wala ako makahibalo” (1 Nefi 9:5; tan-awa man sa “Malip-ot nga Paathag nahanungod sa Libro ni Mormon”).
Mga siglo ang nagligad, sang ginapalip-ot ni Mormon ang dalagko nga mga lamina ni Nefi, nakita niya ang magagmay nga mga lamina. Ang magagmay nga lamina nagsaysay sang madamo sang pareho nga mga hitabo nga ginlaragway sa dalagko nga mga lamina nga ginpalip-ot na ni Mormon, pero ang magagmay nga mga lamina mas nagtutok sa espirituhanon nga mga butang kag sa ministeryo kag sa mga pinanudlo sang mga propeta. Gin-inspirar sang Dios si Mormon nga ilakip ang magagmay nga mga lamina ni Nefi sa iya rekord dugang sa dalagko nga mga lamina.
Pareho kay Nefi, wala man naintiendihan ni Mormon ang katuyuan sang Dios sang pag-angkon sang pareho nga klase sang mga lamina, pero nagsalig sia nga para ini sa “mas maalamon nga katuyuan” (Mga Pulong ni Mormon 1:7).
Karon nga panahon nahibal-an naton kon ano ang katuyuan sang Dios. Sang 1828, pagkatapos nga malubad ni Joseph Smith ang bahin sang pinalip-ot ni Mormon sang dalagko nga mga lamina ni Nefi (116 ka pahina sang manuskrito), nadula ni Martin Harris yadtong mga pahina. Ginsugo sang Dios si Joseph nga indi na pag-ilubad liwat ang ining bahin tungod may malain nga mga tawo nga magaliwat sang mga pulong kag tinguhaan nga pakalainon si Joseph (tan-awa sa D&C 10, tig-ulo sang seksyon; D&C 10:14–19, 30–45). Maayo lang, nakita na ini nga daan sang Dios kag nagtigana sang magagmay nga mga lamina, nga nagaunod sang pareho nga kasaysayan nga nadula upod sa 116 ka mga pahina. Ang magagmay nga mga lamina nagabug-os sang mga libro nga makita antes sa Mga Pulong ni Mormon, kag ang pinalip-ot ni Mormon sang dalagko nga mga lamina nagasugod pagkatapos sang Mga Pulong ni Mormon.
Si Mormon Nagasulat sa mga Lamina, ni Jorge Cocco
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Enos 1:1–17
Ang inyo pamilya mahimo nga magtulok sa litrato ni Enos nga nagapangamuyo kag pangitaon sa Enos 1:1–17 ang mga tinaga nga pwede gamiton nga tig-ulo sinang litrato. Mahimo mo man pangabayon ang mga miyembro sang pamilya nga magdrowing sang mga litrato sang eksperiyensya ni Enos. Ano ang aton matun-an kay Enos parte sa pagpangayo sang kapatawaran?
Jarom 1:2
Paano ang aton pagtuon sang Libro ni Mormon “nagpakita sang plano sang kaluwasan” sa aton?
Omni 1:12–22
Ano ang ginatudlo sining mga bersikulo parte sa importansya sang pag-angkon sang pulong sang Dios sa aton mga kabuhi?
Mga Pulong ni Mormon 1:3–9
Paano bala kita mabugayan paagi sa pagtipig sang personal kag pang-pamilya nga mga rekord? Paano naton himuon ang aton mga rekord nga mas nakatutok kay Cristo?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Magtipon sing mas pirme. Si Pangulong Henry B. Eyring nagtudlo: “Indi pagpaligara ang tsansa nga tipunon ang mga kabataan agud magtuon sang doktrina ni Jesucristo. Inang mga tion tuman ka tumalagsa ikumparar sa mga pagpaninguha sang kaaway” (“The Power of Teaching Doctrine,” Ensign, Mayo 1999, 74).
Si Enos nga Nagapangamuyo, ni Robert T. Barrett