“Marso 9–15. Jacob 1–4: ‘Magpakig-uli sa Dios Paagi sa Pagpasag-uli ni Cristo,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Marso 9–15. Jacob 1–4,” Dali, Magsunod sa Akon—Para sa Mga Indibidwal kag Mga Pamilya: 2020
Pinatawad, ni Greg K. Olsen
Marso 9–15
Jacob 1–4
Magpakig-uli sa Dios Paagi sa Pagpasag-uli ni Cristo
Kon imo ginarekord ang espirituhanon nga mga panghunahuna, ginapakita mo nga gusto mo nga tudloan ka sang Balaan nga Espiritu. Sa imo pagbasa sang Jacob 1–4, pamensara nga isulat ang imo mga panan-aw.
Isulat ang Imo Mga Panghuhahuna
Ginkabig sang mga Nefinhon si Nefi nga ila “dako nga manug-amlig” (Jacob 1:10). Ginpangapinan niya sila batok sa pagpang-atake sang ila mga kaaway, kag ginpaandaman niya sila parte sa espirituhanon nga mga peligro. Karon wala na sia, kag ang buluhaton sang pagpanguna sang mga Nefinhon sa espirituhanon nagtupa kay Jacob, nga ginkonsagrar ni Nefi nga mangin pari kag titser sang katawhan (tan-awa sa Jacob 1:18). Paagi sa inspirasyon, nabatyagan ni Jacob nga kinahanglan sang iya katawhan nga matudloan nga may “dako nga kaisog,” tungod sila “nagasugod sa pagpangabudlay sa sala” (Jacob 2:7, 5). Ining mga sala daw pareho man sa mga ginapangatubang sang mga tawo sa karon: pagpalangga sa manggad kag sekswal nga imoralidad. Kag bisan pa nga nabatyagan ni Jacob nga kinahanglan niya nga pakalainon ining kalautan, nagasakit man ang iya tagipusuon para sa mga biktima nga ang mga tagipusuon “natuhog sang madalom nga mga pilas” (Jacob 2:35). Si Jacob nagpamatuod nga ang pagpang-ayo para sa magtimbang nga grupo—sa makasasala kag sa pilason sa espirituhanon—nagagikan sa Manluluwas nga si Jesucristo. Ang mensahe ni Jacob, pareho sang mensahe ni Nefi antes sa iya, isa ka panawagan nga “makig-uli sa [Dios] paagi sa pagpasag-uli ni Cristo” (Jacob 4:11).
Mga Ideya para sa Personal nga Pagtuon sang Balaan nga Mga Kasulatan
Luyag sang Ginuo nga tumanon ko ang akon calling.
Para kay Jacob, ang pagpanudlo sang pulong sang Dios labaw pa sangsa tulumanon gikan sa iya utod—isa ini ka “tulumanon gikan sa Ginuo,” gani mapisan sia nga nagpangabudlay agud “padakuon ang [iya] palangakuan” (Jacob 1:17, 19). Si Pangulong Gordon B. Hinckley nagtudlo nga ginapadako naton ang aton mga palangakuan “sa aton pagserbisyo nga may katutom, sa aton pagtudlo upod ang pagtuo kag panaksihon, sa aton pag-alsa kag pagpabakod kag pagtukod sang mabaskog nga pagpati sa matarong sa mga kabuhi sang aton ginalab-ot” (“Magnify Your Calling,” Ensign, Mayo 1989, 47). Panumduma ang imo mismo nga “[mga tulumanon] gikan sa Ginuo” sa imo pagbasa sang Jacob 1:6–8, 15–19 kag 2:1–11. Ngaa nagserbisyo si Jacob sing tuman katutom? Ano ang gin-inspirar sang iya ehemplo sa imo agud padakuon ang imo mga calling sa Simbahan kag ang imo mga responsibilidad sa panimalay?
Ang Ginuo nagakalipay sa kaputli.
Ang sala may mga konsikwensya sa mga indibidwal kag sa mga sosyedad. Sa paghambal parte sa sekswal nga sala, si Jacob nagpaandam sang duha ka klase sang mga konsikwensya. Sa imo pagbasa sang Jacob 2:31–35 kag 3:10, pangitaa ang mga paagi nga ang imoralidad nagaapekto sa mga Nefinhon bilang katawhan kag bilang mga indibidwal. Sa ano nga paagi nagapareho ang mga konsikwensya sang imoralidad nga makita mo sa kalibutan karon? Ano ang makita mo sa mga pulong ni Jacob nga makabulig sa imo sa pagtudlo sa isa ka mahal sa kabuhi parte sa importansya sang pagkaputli? Paano ka nabugayan sa imo pagpaninguha nga mangin putli?
Tandai nga gintumod man ni Jacob ang gawi sang pag-angkon sang masobra isa ka asawa. Ano ang imo makita sa Jacob 2:23–30 nga nagabulig sa imo nga makaintiendi kon ngaa ang Ginuo, sa limitado nga mga sitwasyon, nagsugo sang Iya katawhan nga magpangasawa sing masobra sa isa? Ano ang Iya nabatyagan sa ila nga nagahimo sini nga wala sang Iya pahanugot?
Pwede ako magpakig-uli sa Dios paagi sa Pagbayad-Sala ni Jesucristo.
Si Jacob nag-ayo sa iya katawhan nga “makig-uli sa [Dios] paagi sa pagpasag-uli ni Cristo” (Jacob 4:11). Ano sa banta mo ang kahulugan sina? Makabulig bala kon pangitaon mo ang reconcile sa diksyunaryo? Ayhan makakita ka sang mga tinaga ukon mga dinalan sa sini nga kapitulo nga nagapanugyan kon paano ka magpalapit kay Cristo agud makig-uli sa Dios. Halimbawa, si Jacob nagtudlo nga ang layi ni Moises ginhatag agud itudlo ang katawhan padulong kay Jesucristo (tan-awa sa Jacob 4:5). Ano ang ginpahamtang sang Dios agud itudlo ka padulong kay Cristo? Paano mo ginagamit ining mga butang agud mas magpalapit pa gid sa Dios?
Tan-awa man sa 2 Nefi 10:24.
Sarang ako maglikaw sa espirituhanon nga pagkabulag paagi sa pagtutok sa Manluluwas.
Sa pagpaninguha ni Jacob nga lisuon ang iya katawhan sing mas lubos sa Ginuo, ginpaandaman niya sila nga indi magmangin bulag sa espirituhanon kag indi pagpakanubuon ang “mga pulong sang kaathagan” sang ebanghelyo (tan-awa sa Jacob 4:13–14). Si Elder Quentin L. Cook nagpaandam sang daw pareho nga problema sa aton panahon: “May huyog ang iban sa aton nga ‘maglapaw ang panulukan sa tanda’ imbes nga magmentinar sang panaksihon parte sa tig-una nga mga elemento sang ebanghelyo. Ginahimo naton ini kon ginabuslan naton sang pilosopiya sang tawo ang mga kamatuoran sang ebanghelyo, nagaentra sa pagpasobra sa ebanghelyo, … ukon ginapapangibabaw ang mga patakaran sangsa doktrina. Ang paglikaw sining mga pamatasan magabulig sa aton sa paglikaw sa relihiyoso nga pagkabulag kag pagkatumba pareho sang ginlaragway ni Jacob ” (“Looking beyond the Mark,” Ensign, Mar. 2003, 42).
Suno sa Jacob 4:8–18, ano ang pwede naton himuon agud magtutok sa Manluluwas kag maglikaw sa espirituhanon nga pagkabulag?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Jacob 1:6–8, 15–19; 2:1–11; 4:18
Ano nga mga tinaga kag mga dinalan sa sining mga bersikulo ang nagapahayag sang pagpalangga ni Jacob sa iya mga ginapangunahan? Ano ang nabuhat na sang aton mga lider sa Simbahan agud buligan kita nga mabatyagan ang ila “handum kag kabalaka para sa kaayuhan sang [aton] mga kalag”? (Jacob 2:3). Ayhan ang mga miyembro sang pamilya mahimo magpaambit sang mga paagi nga masuportahan naton ang aton mga lider sa Simbahan. Pwede kamo magplano sa paghimo sang isa ka butang bilang pamilya para sa lokal nga mga lider sang Simbahan, pareho sang pagsulat sang pagpasalamat para sa ila pagserbisyo ukon pagdumdom sa ila kag sa ila mga pamilya sa inyo mga pangamuyo.
Jacob 2:8
Paano ginapaayo sang pulong sang Dios ang “napilasan nga kalag”?
Jacob 2:12–21
Ano ang ginatudlo sining mga bersikulo parte sa kon paano naton kabigon ang materyal nga manggad? Ano ang aton ginahimo agud lab-uton ang iban nga nagakinahanglan sang aton bulig?
Jacob 3:1–2
Ano ang buot silingon sang mangin “putli sing tagipusuon” kag “magtulok sa Dios upod ang kalig-on sang kaisipan”?
Jacob 4:4–11
Isa ka paagi agud buligan ang imo pamilya nga maintiendihan kon ano ang buot silingon sang mangin “di-mauyog” sa ila pagtuo amo ang magpangita sang dako nga kahoy sa palibot kag pangabayon ang mga miyembro sang pamilya nga uyugon ang tagsa ka sanga. Dayon hambala sila nga uyugon ang puno. Ngaa mas mabudlay nga uyugon ang puno? Ano ang matun-an naton sa pinanudlo ni Jacob kon paano magpatubo sang pagtuo nga “di-mauyog”?
Pareho sang puno sang kahoy, ang aton pagtuo pwede mangin “di-mauyog.”
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Magpamati sa Espiritu. Sa imo pagtuon, hatagi sang atensyon ang imo mga panghunahuna kag mga balatyagon (tan-awa sa D&C 8:2–3), bisan pa nga daw wala ini sang labot sa imo ginabasa. Ina nga mga panghunahuna mahimo nga amo ang mga bagay nga gusto sang Dios nga imo mahibal-an kag himuon.
Ipadala Ko ang Ila Mga Pulong Pa-gwa (Si Jacob nga Manunudlo), ni Elspeth Caitlin Young