“Marso 16–22. Jacob 5–7: ‘Ang Ginuo Nagapangabudlay upod sa Aton,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Marso 16–22. Jacob 5–7,” Dali, Magsunod sa Akon—Para sa Mga Indibidwal kag Mga Pamilya: 2020
Ang Paanggid sang Kahoy nga Olivo, ni Brad Teare
Marso 16–22
Jacob 5–7
Ang Ginuo Nagapangabudlay upod sa Aton
Ang pagbasa sang balaan nga mga kasulatan nagaimbitar sang rebelasyon. Gani sa imo pagbasa sang Jacob 5–7, magpangayo sang giya halin sa Espiritu agud buligan ka kag ang imo pamilya. Ano nga mga mensahe ang ginatigana sang Ginuo para sa imo?
Isulat Ang Imo Mga Panghunahuna
May madamo kaayo nga mga tawo nga wala pa makabati sang ebanghelyo ni Jesucristo. Kon nagapanghalawhaw ka sa kadakuon sang buluhaton sang pagtipon sa ila pasulod sa Simbahan sang Ginuo, ang paanggid sang mga kahoy nga olivo sa Jacob 5 may nagapasalig nga pahanumdom: ang kaolivohan ginapanag-iyahan sang Ginuo. Ginhatagan Niya ang tagsa sa aton sang isa ka gamay nga lugar para magbulig sa Iya buluhaton—ang aton pamilya, ang aton grupo sang mga abyan, ang malab-utan sang aton impluwensya. Kag kon kaisa ang una nga tawo nga ginabuligan naton tipon amo ang aton mga kaugalingon. Pero wala kita nagaisahanon sa sining buluhaton, ang Ginuo sang kaolivohan nagapangabudlay upod sa Iya mga suluguon (tan-awa sa Jacob 5:72). Kilala kag palangga sang Dios ang Iya mga anak, kag magahanda Sia sang paagi para ang kada isa sa ila makabati sang Iya ebanghelyo, bisan pa atong mga nagsikway sa iya sang una (tan-awa sa Jacob 4:15–18). Kag dayon, kon tapos na ang ulubrahon, ang tanan sadtong nangin “maukod sa pagpangabudlay upod sa [Iya] … mangin inyo ang kalipay upod sa [Iya] tungod sang bunga sang [Iya] kaolivohan” (Jacob 5:75).
Mga Ideya para sa Personal nga Pagtuon sang Balaan nga Mga Kasulatan
Ano ang paanggid?
Ang mga paanggid mga istorya nga nagatudlo sang espirituhanon nga mga kamatuoran paagi sa mga simbolo. Sa paanggid sang mga kahoy nga olivo, halimbawa, ang kaolivohan nagarepresentar sang kalibutan, ang kultibado nga kahoy sang olivo nagarepresentar sang Israel (ang mga naghimo sang kasugtanan upod sa Dios), kag ang ilahas nga mga kahoy sang olivo nagarepresentar sang mga pungsod nga gentil (ang mga wala naghimo sang kasugtanan upod sa Dios).
Sa imo pagtuon sang paaggid sa Jacob 5, pangitaa ang dugang nga mga simbolo kag hunahunaa kon ano ayhan ang ila kahulugan. Halimbawa, ano sa banta mo ang ginrepresentar sang maayo nga bunga? Ano ayhan ang ginsimbolo sang malain nga bunga?
Si Jesucristo amo ang Ginuo sang kaolivohan.
Antes ka magsugod sang imo pagtuon sang paanggid sang mga kahoy nga olivo sa Jacob 5, basi makabulig ang pagbasa liwat sang Jacob 4:10–18 para matun-an kon ngaa nangin inspirado si Jacob nga ipaambit ining paanggid sa iya katawhan. Sa Jacob 6:3–5, makita mo ang dugang nga mga mensahe nga gusto ni Jacob tutokan; pangitaa ining mga mensahe sa paanggid. Ano nga mga mensahe ang imo nakita para sa imo kaugalingon sa Jacob 5?
Ang Jacob 5 malaba nga kapitulo—ang pinakalaba sa Libro ni Mormon. Basi makabulig ang pagtunga-tunga sini sa masunod nga mga seksyon, nga nagalaragway sang mga tion sa kasaysayan sang kalibutan:
-
Mga bersikulo 3–14.Ang paglinapta sang Israel antes pa sang tiyempo ni Cristo
-
Mga bersikulo 15–28.Ang pagpangalagad ni Cristo kag sang mga Apostoles
-
Mga bersikulo 29–49.Ang Dako nga Apostasya
-
Mga bersikulo 50–76.Ang pagtipon sang Israel sa ulihing mga adlaw
-
Mga bersikulo 76–77.Ang Milenya kag ang katapusan sang kalibutan
Para sa dugang nga mga ideya parte sa paanggid, tan-awa ang diagram nga kaupod sining outline.
Kita tanan makaserbisyo sa Dios paagi sa pagbulig sa Iya tipon sang Iya mga anak.
Ang Dios nagaimbitar sa akon nga buligan Sia tipon sang Iya mga anak.
Ang “iban pa nga mga suluguon” (Jacob 5:70) nga gintawag sa kaolivohan sang Ginuo nagalakip sang mga tawo pareho sa imo—bilang mga miyembro sang Simbahan, responsable kita tanan sa pagbulig sa Dios tipon sang Iya mga anak. Ano nga mga prinsipyo ang imo nakita sa Jacob 5, labi na gid sa mga bersikulo 61–62 kag 70–75, parte sa pagtrabaho sa kaolivohan sang Ginuo? Paano mo nabatyagan ang Iya pagtawag sa imo nga magserbisyo sa Iya kaolivohan? Ano nga mga eksperiyensya ang imo naangkon samtang nagapasakop sa Iya buluhaton?
Tan-awa man sa “Old Testament Olive Vineyard,” “Help the Church Grow” (videos, ChurchofJesusChrist.org).
Sarang ako magtindog nga mabakod kon ginahangkat sang iban ang akon pagtuo.
Ang eksperiyensya sang mga Nefinhon kay Serem masami nagakasulit sa karon: mahimo nga may mga maalam, maayo maghambal nga mga tawo nga nagatinguha nga gub-on ang imo pagtuo. Pero si Jacob “indi mahimo nga mauyog” (Jacob 7:5). Paano si Jacob nagsabat sang gin-atake ang iya pagtuo? Ano ang matun-an mo sa iya mga reaksyon? Ano ang himuon mo karon para handaan ang mga tion nga hangkaton ang imo pagtuo?
Tan-awa man sa Jeffrey R. Holland, “The Cost—and Blessings—of Discipleship,” Ensign ukon Liahona, Mayo 2014, 6–9.
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
Jacob 5
Natun-an sang pila ka pamilya nga makabulig ang pagdrowing sang mga simbolo sa paanggid sang mga kahoy nga olivo samtang ginabasa nila ini. Basi masadyahan ang imo pamilya kon amhon ninyo sina, ukon basi may iban pa nga paagi nga mabuligan mo ang imo pamilya nga mapanumdum ang mga simbolo sa paanggid. Pwede ka magmarka sang isa ka lugar sa lamesa ukon salog nga nagarepresentar sang kaolivohan (ukon ang kalibutan) kag idrowing ang kultibado nga kahoy sang olivo (ukon ang panimalay sang Israel gamit ang isa ka butang, pareho sang puzzle, nga pwede bahin-bahinon (para irepresentar ang paglapta sang Israel) kag dayon sugpon-sugpunon sila liwat (para irepresentar ang pagtipon sang Israel). Ano ang ginatudlo sining paanggid sa aton parte sa Ginuo? parte sa Iya mga suluguon?
Jacob 5:70–77
Sa imo pagbasa parte sa “katapusan nga tion” nga ang Ginuo magpangabudlay sa iya kaolivohan, ano ang nagainspirar sa imo kag sa imo pamilya para mag-alagad sa Ginuo “sa inyo ikasarang”? (Jacob 5:71). Pwede mo imbitaron ang mga miyembro sang imo pamilya nga himuon nga personal ang bersikulo 75 paagi sa pagdugang sang ila mga ngalan sa sining bersikulo—halimbawa, “Bulahan ka [ngalan].” Pwede sila magpaambit sang mga eksperiyensya kon sa diin nabatyagan nila ang kalipay samtang nagaalagad sa Ginuo sang kaolivohan, halimbawa paagi sa pagpaambit sang ebanghelyo, pag-alagad sa templo, ukon pagpabakod sang mga miyembro sang Simbahan. (Tan-awa man sa M. Russell Ballard, “Put Your Trust in the Lord,” Ensign ukon Liahona, Nob. 2013, 43–45.)
Jacob 6:4–7
Paano gin-untay sang Ginuo ang Iya kamot sang kaluoy sa aton? Ano ang buot silingon sang tinaga nga “magkapyot” sa sining mga bersikulo? Paano ang Ginuo nagakapyot sa aton? Paano kita magkapyot sa Iya?
Jacob 7:1–12
Ano ang aton matun-an sa sining mga bersikulo sa kon paano ang mga tawo nagatinguha nga patalangon ang iban? Paano naton sundon ang halimbawa ni Jacob kag mangin indi mauyog sa aton pagtuo kay Cristo?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Sauloha ang isa ka balaan nga kasulatan. Magpili sang dinalan sa balaan nga kasulatan nga makahulugan sa imo pamilya, kag sauloha ini sing ululupod. Si Elder Richard G. Scott nagpanudlo, “Ang saulado nga balaan nga kasulatan mangin isa ka nagapadayon nga abyan nga wala nagaluya sa pagligad sang panahon” (“The Power of Scripture,” Ensign ukon Liahona, Nob. 2011, 6).