Si Jesus nagalab-ot sa isa ka babayi

Pagatuytoyan Ka Niya nga Ginakaptan sa Kamot, ni Sandra Rast

Pebrero 24–Marso 1

2 Nefi 26–30

“Isa Ka Makahalangyag nga Buluhaton kag Kalatingalahan”

Ang Ginuo nagsiling, “Ginasugo ko ang tanan … nga ila isulat ang mga pulong nga akon ginahambal sa ila” (2 Nefi 29:11). Paagi sa Espiritu, ang Ginuo magahambal sa imo samtang ginatun-an mo ang Iya pulong. Isulat ang imo mabaton.

Isulat Ang Imo Mga Panghunahuna

“Magapanagna ako sa inyo nahanungod sa katapusan nga mga adlaw,” ginsulat ni Nefi (2 Nefi 26:14). Sa iban nga pulong, nagasulat sia parte sa aton panahon. Kay may rason nga magkabalaka sa iya nakita: mga tawo nga nagapanghiwala sang gahum kag mga milagro sang Dios, lapnagon nga paghinisaay kag pagsinuay, ang yawa nagagapos sa katawhan sang mabakod nga mga pisi. Pero dugang pa sa sining “mga buluhaton sang kadudulman” (2 Nefi 26:10, 22) nga ginapangunahan sang kaaway, si Nefi naghambal man parte sa “isa ka makahalangyag nga buluhaton kag kalatingalahan” nga ginapangunahan sang Ginuo Mismo (2 Nefi 27:26). Kag sa sentro sinang buluhaton amo ang isa ka libro—isa ka libro nga nagahambal gikan sa yab-ok, nga nagahayag sang mga kabutigan ni Satanas, kag nagatipon sang mga matarong nga daw bandera. Ang inang libro amo ang Libro ni Mormon, ang makahalangyag nga buluhaton amo ang buluhaton sang Simbahan sang Ginuo sa ulihing mga adlaw, kag ang kalatingalahan amo nga Iya kita tanan ginaimbitar, wala sapayan sang aton mga kahuyang, nga magpartisipar.

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

2 Nefi 26:20–33

Si Jesucristo nagaimbitar sang tanan nga magpalapit sa Iya.

Ang Propeta nga si Joseph Smith nagpanudlo nga ang Amay nga Langitnon mas “wala sing dulunan sa iya mga kaluoy kag bugay, sangsa aton kahanda sa pagpati ukon pagbaton” (The Joseph Smith Papers, “History, 1838–1856, volume D-1,” p. 4 [addenda], josephsmithpapers.org). Basaha kon ano ang nakita ni Nefi sa palaabuton sa 2 Nefi 26:20–22 kag kon ano ang iya gintudlo parte sa Manluluwas sa mga bersikulo 23–33, kag ikumparar ini sa pahayag ni Joseph Smith. Ano ang imo matun-an parte sa wala sing dulunan nga kaluoy sang Ginuo? Ano ang imo mahimo bilang miyembro sang Simbahan ni Jesucrusto para mangin mas Cristohanon sa imo pagtratar sang mga anak sang Dios?

Tan-awa man sa 3 Nefi 18:30–32.

2 Nefi 26–27

Ano ang libro nga ginmitlang sa sining mga kapitulo?

Ang propesiya ni Nefi sa 2 Nefi 26–27, nga nagsandig sa dako nga bahin sa nauna nga propesiya ni Isaias (tan-awa sa Isaias 29), nagasugid sang paggwa sang Libro ni Mormon. Ang ining propesiya nagalaragway sang masunod:

• Ang mga pulong sang mga anak ni Lehi (iya mga kaapuhan) nga nagahambal nga “nagahutik gikan sa yab-ok” nga may “manugpagwa sang espiritu” kag “natakpan sa isa ka libro” (2 Nefi 26:14–17; tan-awa man sa Isaias 29:4).

• Isa ka parte sang libro nga ginhatag sa isa ka may tinun-an nga nagasiling, “Indi ko ini mabasa” (2 Nefi 27:15–20; Joseph Smith—History 1:64–65; tan-awa man sa Isaias 29:11).

Dugang pa kay Isaias, iban pa nga mga propeta sa biblia ang nagtumod sa Libro ni Mormon, pero wala nila ginsambit ang ngalan. Halimbawa, sa Ezequiel 37:15–20 nagahambal parte sa “lipak ni Jose,” nga mahimo nagatumod sa kasulatan sang mga Nefinhon, nga mga kaliwat ni Jose. Ining rekord ang mangin isa sa “lipak ni Juda,” buot silingon ang Biblia.

Ang iban pa nga mga halimbawa makita sa “Libro ni Mormon” (Giya sa Balaan nga mga Kasulatan, scriptures.ChurchofJesusChrist.org).

2 Nefi 28

Si Satanas nagahandum nga magpanginto.

Madamo sa mga kabutigan kag taktika ni Satanas ang nahayag sa mga paglaragway ni Nefi sang katapusan nga mga adlaw sa 2 Nefi 28. Tan-awa kon makita mo ang mga ini (halimbawa, tan-awa sa mga bersikulo 6, 8, 21–23, 29). Ngaa kinahanglan mo nga mahibal-an ang mga kabutigan ni Satanas? Ano ang himuon mo kon ang kontra magatinguha sa pagpatalang sa imo?

2 Nefi 28:27–31; 29

Ang Dios padayon nga nagahatag sang rebelasyon para giyahan ang Iya mga anak.

Bilang Santos sa Ulihing mga Adlaw ginbugayan kita sang abunansya sang pulong sang Dios, gani ang mga paandam ni Nefi magamit sa aton: indi kita dapat magbatyag nga “hustuhan na ang ari sa aton!” Sa imo pagbasa sang mga paandam sa 2 Nefi 28 kag 29, padalumi sa pagpamensar ang mga pamangkot nga pareho sini:

• Ano ang gusto sang Ginuo nga batyagon kag isabat ko sa Iya pulong?

• Ngaa ang mga tawo kon kaisa “akig” sa pagbaton sang dugang nga kamatuoran halin sa Dios? (2 Nefi 28:28). Nagabatyag bala ako sang amo sini? Kon amo, sa ano ako mangin mas mabinatyagon sa kamatuoran?

• Ano ang buot silingon sang pagbaton sang pulong sang Dios? Paano ko mapakita sa Iya nga gusto ko magbaton sang dugang nga pulong Niya?

Tan-awa man sa Alma 12:10–11; 3 Nefi 26:6–10.

2 Nefi 29–30

Ginhanda sang Dios ang Libro ni Mormon para sa aton panahon.

Nahibal-an ni Nefi paagi sa rebelasyon, bisan antes pa nakompleto sulat ang Libro ni Mormon, nga sa pila ka adlaw ini “mangin may dako nga bili sa mga anak sang tawo” (2 Nefi 28:2). Ngaa ang Libro ni Mormon may dako nga bili sa imo? Hunahunaa ang ini nga pamangkot sa imo pagbasa sang 2 Nefi 29–30. Ano ang pila sa “makahalangyag” nga mga buluhaton nga ginahimo sang Dios sa kalibutan kag sa imo kabuhi paagi sa Libro ni Mormon?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

2 Nefi 26:12–13

Si Nefi nagpanudlo nga si Jesucristo nagapahayag sang Iya Kaugalingon paagi sa Balaan nga Espiritu. Ano nga mga eksperiyensya ang mapaambit sang mga miyembro sang pamilya sa kada isa sang ang ila mga panaksihon parte sa Manluluwas ginpabakod sang Balaan nga Espiritu?

2 Nefi 26:22; 28:19–22

Mahimo nga ang imo pamilya masadyahan sang isa ka leksyon gamit ang bagay nga nagapakita sang ginatudlo sa 2 Nefi 26:22 parte sa yawa. Samtang imo ginabasa ang parte sa mga taktika ni Satanas sa 2 Nefi 28:19–22, pwede ka maghigot sang hilo sa pulso sang isa ka tawo agud irepresentar ang “mahumok nga pisi.” Paano nangin pareho ang mahumok nga pisi sa mga tentasyon ni Satanas? Paano ini mangin mabakod nga pisi? Paano naton makilala ang mga kabutigan ni Satanas?

Nakarolyo nga pisi

Ginkumparar ni Nefi ang mga tentasyon sang yawa sa “isa ka mahumok nga pisi.”

2 Nefi 27:20–21

Ano ayhan ang buot silingon sang Ginuo sang naghambal sia nga, “Makasarang ako sa paghimo sang kaugalingon nga buluhaton”? Paano nagaimpluwensya ining kamatuoran sa aton pag-alagad sa Iya Simbahan?

2 Nefi 28:30–31

Mahimo bala nga magpanumdom ang imo pamilya sang isa ka butang, pareho sang rebelasyon halin sa Dios, nga mas maayo gid nga mabaton sing amat-amat? Ngaa ginapahayag sang Dios ang kamatuoran sa aton “dinalan sa dinalan, pagsulundan sa pagsulundan, diutay diri kag diutay didto” imbes nga isahay lang?

2 Nefi 29:7–9

Ano ang gusto sang Ginuo nga pamatud-an ukon ipakita paagi sa Libro ni Mormon?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Magpaambit sang mga panghunahuna. Ang makighambal sa iban parte sa imo natun-an makapabakod sang imo kaugalingon nga pag-intiendi. Pagkatapos nga basahon ang 2 Nefi 29:6–14, mahimo nga mangin inspirado ka nga ipaathag sa isa ka abyan kon ngaa kinahanglan naton ang Libro ni Mormon.

Si Nefi nga nagasulat sa bulawan nga mga lamina

Ang mga sinulatan ni Nefi nagasugid sang “isa ka makahalangyag nga buluhaton kag kalatingalahan” nga matabo sa ulihing mga adlaw (2 Nefi 27:26).