“Marso 2–8. 2 Nefi 31–33: ‘Amo Ini ang Dalan,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)

“Marso 2–8. 2 Nefi 31–33,” Dali, Magsunod sa Akon—Para sa Mga Indibidwal kag Mga Pamilya: 2020

Litrato

Si Jesus nga nagatudlo sa Iya mga disipulo

Si Cristo Nagatudlo sa Iya mga Disipulo, ni Justin Kunz

Marso 2–8

2 Nefi 31–33

“Amo Ini ang Dalan”

Ining outline nagapanugyan sang mga prinsipyo nga mahimo makahulugan para sa imo sa 2 Nefi 31–33. Pero ang pinakaimportante nga mga butang nga matun-an mo sa imo pagtuon magaabot gikan sa mga paghutik sang Espiritu. Pangayoa ining paggiya, kag irekord ang mga pagpabatyag nga magaabot.

Isulat ang Imo Mga Panghunahuna

Upod sa ulihi nga narekord nga mga pulong ni Nefi, makita naton ini nga deklarasyon: “Ginsugo [ako] sang Ginuo, kag kinahanglan gid nga magtuman ako” (2 Nefi 33:15). Daw nagakabagay lang ini nga pagsumada sang kabuhi ni Nefi. Ginpangita niya ang pagbuot sang Ginuo kag maisog nga nagtinguha nga sundon ini—bisan pa nga nagakahulugan ini nga mabutang sa risgo ang iya kabuhi agud makuha ang saway nga mga lamina kay Laban, maghimo sang barko kag magtabok sa dagat, ukon matinuohon nga magtudlo sang doktrina ni Cristo nga may kaathag kag gahum. Sarang ni Nefi nga makakumbinsi sang kakinahanglanon nga “magdutdot pasulong upod ang isa ka kalig-on kay Cristo,” sang paglakat sa “makitid kag masipot nga banas nga nagapadulong sa kabuhi nga wala’y katapusan” (2 Nefi 31:20, 18), tungod amo ina ang dalan nga iya ginsunod. Nahibal-an niya paagi sa eksperiyensya nga ang ining dalan, bisan nga mabudlay kon kaisa, masadya man, kag “wala na sing iban pa nga dalan ukon ngalan nga ginhatag sa idalom sang langit nga paagi sa sini ang tawo mahimo nga maluwas sa ginharian sang Dios” (2 Nefi 31:21).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

2 Nefi 31–32

Si Jesucristo kag ang Iya doktrina amo lamang ang mga paagi padulong sa kabuhi nga wala katapusan.

Kon imo palip-uton ang dalan padulong sa kabuhi nga wala katapusan sa pila lang ka tinaga, ano ang imo ihambal? Si Nefi, upod ang iya duna nga kaathag kag kasimple, naghimo sina sa sini nga paagi: pagtuo kay Cristo, paghinulsol, bunyag, pagbaton sang regalo sang Balaan nga Espiritu, kag pagpadayon tubtob sa katapusan. Pagkatapos mo nga tun-an ang mga pinanudlo ni Nefi sa 2 Nefi 31–32, pamensara kon paano mo ini ipaathag sa isa ka tawo sa imo kaugalingon nga pulong. Panumduma kon paano ka nabugayan sang pagpangabuhi sining mga pinanudlo. Mahimo mo binagbinagon ang mga pinanudlo ni Nefi sa 2 Nefi 31:18–20 kag takson ang imo kaugalingon nga mga pagpaninguha sa “pagdutdot pasulong” sa dalan sang ebanghelyo.

Tan-awa man sa 3 Nefi 11:32–39; 27:13–22; D. Todd Christofferson, “The Doctrine of Christ,” Ensign ukon Liahona, Mayo 2012, 86–90; Brian K. Ashton, “The Doctrine of Christ,” Ensign ukon Liahona, Nob. 2016, 106–9.

Ang pagsunod sang mga pinanudlo ni Jesucristo nagadala sa aton padulong sa kabuhi nga wala katapusan.

2 Nefi 31:4–13

Si Jesucristo nagpahamtang sang perpekto nga ehemplo sang pagkamatinumanon sang Sia ginbunyagan.

Kon ang imo bunyag natabo kahapon ukon 80 katuig na ang nagligad, isa yadto ka importante nga tion—nagsulod ka sa isa ka bug-os-kabuhi nga kasugtanan nga magsunod kay Jesucristo. Panumduma ang imo bunyag samtang imo ginabasa ang parte sa bunyag sang Manluluwas sa 2 Nefi 31:4–13. Ngaa ginbunyagan ang Manluluwas? Sa ano nagaanggid ang mga rason sang Sia nagpabunyag sa mga rason nga nagpabunyag ka? Ano ang imo ginahimo sa karon agud padayon nga sundon ang ehemplo sang Manluluwas sang pagkamatinumanon?

Ang ordinansa sang sakramento isa ka semanal nga oportunidad para sa imo agud mangako liwat nga sundon si Jesucristo. Sa dason nga mag-ambit ka sang sakramento, pamensara nga basahon ang 2 Nefi 31:13 kag binagbinaga ang imo determinasyon nga “sundon ang Anak, sa bug-os nga katuyuan sang tagipusuon” kag ang imo kahanda sa “pagdala sa imo kaugalingon sang ngalan ni Cristo.”

2 Nefi 31:17–20; 32

Ang Balaan nga Espiritu magapakita sa akon kon ano ang akon dapat himuon.

Kon ang bunyag kag kumpirmasyon amo ang mga “gawang nga sa diin [kita] dapat magsulod” sa makitid kag masipot nga banas (2 Nefi 31:17), ano ang aton himuon kon ara na kita sa banas? Amo ina ang ginpaligban sang katawhan ni Nefi (tan-awa sa 2 Nefi 32:1). Ano ang mga sabat nga ginhatag ni Nefi sa 2 Nefi 31:19–20 kag kapitulo 32? Ano ang mga sabat nga nakita mo para sa imo kaugalingon?

Tan-awa man sa David A. Bednar, “Receive the Holy Ghost,” Ensign ukon Liahona, Nob. 2010, 94–97.

2 Nefi 33

Ang Libro ni Mormon nagaganyat sang tanan nga magtuo kay Cristo.

Sa 2 Nefi 33, sa paghingapos ni Nefi sa iya mga sinulatan, ginpaathag niya ang mga rason kon ngaa nagsulat sia. Ano ang mga rason nga nakita mo sa sini nga kapitulo? Binagbinaga kon ano ang imo nabasa sa 1 Nefi kag 2 Nefi kag kon ano ang imo mga sinulat. Sa ano natuman sang mga istorya kag pinanudlo ang katuyuan ni Nefi para sa imo? Halimbawa, paano ka sini naganyat sa “pagpati kay [Cristo], kag sa pagpadayon tubtob sa katapusan”? (bersikulo 4). Pamensara nga isulat ining mga eksperiyensya ukon ipaambit ang mga ini sa isa ka miyembro sang pamilya ukon abyan.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

2 Nefi 31:5–13

May mga miyembro bala sang pamilya nga nagahanda para sa bunyag, ukon wala lang dugay mabunyagi? Ayhan pwede sila magpaambit kon ngaa nagdesisyon sila nga magpabunyag. Suno sa mga pinanudlo ni Nefi, ano ang pila sa mga rason nga dapat kita bunyagan? Ano ang pila sa mga bugay nga mabaton naton kon mabunyagan kita?

2 Nefi 31:17–21

Paano mo buligan ang imo pamilya nga maintiendihan ang paanggid ni Nefi parte sa “makitid kag masipot nga banas”? (2 Nefi 31:18). Halimbawa, mahimo kamo mag-ululupod sa pagdrowing sang banas nga ginlaragway ni Nefi sa 2 Nefi 31:17–21, nga ginamarkahan ini sang mga butang nga kinahanglan gid naton himuon agud makasulod sa banas kag magpadayon pasulong diri. Paano kita ginabuligan sang Manluluwas nga maglakat pasulong sa banas?

2 Nefi 31:20

Kon gusto mo nga mas maintiendihan sang imo pamilya kon paano kita magpadayon tubtob sa katapusan, ang pahina 6 sa Preach My Gospel may kahulugan nga makabulig; amo man ang mensahe ni Elder Dale G. Renlund “Latter-day Saints Keep on Trying” (Ensign ukon Liahona, Mayo 2015, 56–58).

2 Nefi 32:8–9

Agud buligan ang mga miyembro sang pamilya nga maintiendihan nga pwede kita “magpangamuyo pirme,” pwede ka maglista sang mga sirkumstansya nga sarang kita magpangamuyo (ukon magdrowing sang mga litrato nga nagarepresentar sang mga ini). Dayon mahimo magkanta ang imo pamilya sang kalantahon nga nagatudlo parte sa pangamuyo, pareho sang “Sang Magbiya Ka sa Kwarto [Did You Think to Pray]?” (Mga Himno kag mga Ambahanon sang Kabataan, no. 48), nga ginaislan ang pila ka tinaga sa kanta sang mga tinaga nga ara sa ila listahan. Paano kita ginabugayan sang Manluluwas kon nagapangamuyo kita pirme?

2 Nefi 33:1–2

Ano ang pwede magtulod sa mga tawo nga “magpatig-a sang ila mga tagipusuon batok sa Balaan nga Espiritu”? Paano naton masiguro nga ang Balaan nga Espiritu may “duog sa [aton]”?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Sunda ang Manluluwas. Makabulig ang tun-an kon paano ang Manluluwas nagpanudlo—ang mga pamaagi nga Iya gingamit kag ang mga butang nga Iya ginhambal. Pero ang gahum ni Jesus sa pagtudlo kag pag-alsa sang iban labi sa tanan naghalin sa kon sin-o Sia kag kon paano Sia nagkabuhi. Kon mas matutom ka sa pagtinguha nga magkabuhi pareho kay Jesucristo kag pagsalig sa Iya nagabayad-sala nga gahum, mas mangin natural ang imo pagtudlo sa Iya pamaagi.