Pebrero 17–23

2 Nefi 11–25

“Nagakasadya Kita kay Cristo”

Si Nefi nagpanudlo nga ang mga pulong ni Isaias “maathag sa tanan sadtong mga napuno sang espiritu sang panagna” (2 Nefi 25:4). Sa imo pagbasa, pangayoa ang espiritu sang panagna paagi sa paghanda sang imo kaugalingon sa espirituhanon, pagpamati sa Espiritu, kag pagsulat sang imo mga panghunahuna.

Isulat Ang Imo Mga Panghunahuna

Ang pagkurit sa salsalon nga mga lamina indi mahapos, kag ang espasyo sa magagmay nga lamina ni Nefi limitado. Gani ngaa pangabudlayan gid ni Nefi ang pagkopya sang dako nga parte sang mga sinulatan ni Isaias sa iya rekord? Ginhimo niya ini para “kon sin-o man … ang makakita sining mga pulong mahimo nga magpagsik sa ila mga tagipusuon kag magkasadya” (2 Nefi 11:8). Buot silingon, ang imbitasyon nga basahon ang mga sinulatan ni Isaias, isa ka imbitasyon nga magkasadya. Mahimo ka nga magkalipay, pareho sa ginhimo ni Nefi, sa mga propesiya ni Isaias parte sa pagtililipon sang Israel, sa pag-abot sang Mesias, kag sa kalinong sa milenya nga ginpangako sa matarong. Mahimo ka magkalipay nga bisan sa adlaw sang “kalalat-an, kag kadudulman,” “nakakita [ka] sang isa ka dako nga kapawa” (2 Nefi 18:22; 19:2). Mahimo ka magkasadya nga pwede ka “magsag-ob sang tubig gikan sa mga bubon sang kaluwasan” (2 Nefi 22:3). Sa iban nga pulong, mahimo ka nga “magkasadya kay Cristo” (2 Nefi 25:26).

Mga Ideya para sa Personal nga Pagtuon sang Balaan nga Mga Kasulatan

2 Nefi 11–25

Paano ko mas maintiendihan ang mga pinanudlo ni Isaias?

Gin-ako ni Nefi nga para sa iban, “ang mga pulong ni Isaias indi maathag” (2 Nefi 25:4). Sigurado nga matuod gid ini para sa mga indi pamilyar sa sinang-una nga kultura kag heograpiya sang Judio pareho kay Nefi (tan-awa sa 2 Nefi 25:6). Pero naghatag man si Nefi sang laygay para buligan kita nga makita ang kahulugan sang mga sinulatan ni Isaias:

“Idapat ang iya mga pulong” sa imo kaugalingon (2 Nefi 11:2).Madamo sa mga pinanudlo ni Isaias ang may pila ka posible nga mga kahulugan kag gamit. Halimbawa, ang iya sinulatan parte sa paglapta kag pagtipon sang Israel mahimo nga makabulig sa imo pamensar nga kinahanglan ka nga “tipunon” pabalik sa Manluluwas.

Pangayoa nga “mapuno [ka] sang espiritu sang panagna” (2 Nefi 25:4).Ang pinakamaayo nga paagi para maintiendihan ang mga propesiya ni Isaias amo ang magpangayo sang inspirasyon halin sa Espiritu. Magpangamuyo para sa espirituhanon nga giya. Mahimo nga indi mo dayon maintiendihan ang tanan, pero mabuligan ka sang Espiritu nga matun-an ang kinahanglan mo mahibal-an para sa kabuhi mo sini nga adlaw.

Makabulig man sa imo nga basahon ang mga bulig sa pagtuon sa balaan nga mga kasulatan, lakip na ang mga tanda sa idalom, tig-ulo sang mga kapitulo, Giya sa Balaan nga mga Kasulatan, kag iban pa.

2 Nefi 11:2–8; 25:19–29

“Ang husto nga dalan amo ang magpati kay Cristo.”

Ginsugdan kag gintapos ni Nefi ang iya pagsambit kay Isaias paagi sa pagpahayag sang iya panaksihon parte kay Jesucristo (tan-awa sa 2 Nefi 11:2–8; 25:19–29). Ano ang nanamian mo sa iya panaksihon? Sa imo pagtuon sini nga semana, hunahunaa ang handum ni Nefi sa “paglugpay sang [iya] kaanakan … sa pagpati kay Cristo, kag sa pagpakig-uli sa Dios” (2 Nefi 25:23), kag tandai ang mga dinalan nga nagaengganyo sa imo nga magpati kag magsunod kay Jesucristo.

Mahimo nga makabulig ang tandaan nga madamo sang mga pinanudlo ni Isaias parte sa Manluluwas ginpahayag paagi sa mga simbolo. Halimbawa, pwede mo makita ang Manluluwas sa mga simbolo pareho sang ginuo sang ulubasan (tan-awa sa 2 Nefi 15:1–7), bato (tan-awa sa 2 Nefi 18:14), kag kapawa (tan-awa sa 2 Nefi 19:2). Ano pa ang iban nga mga simbolo ni Jesucristo nga imo nakita sa sining mga kapitulo? Ano ang ginatudlo sa imo sining mga simbolo parte sa Iya?

2 Nefi 12–13

Ang mga bugalon kag makakalibutanon igapaubos.

Nakita na nga daan ni Nefi nga ang bugal amo ang mangin tunaan sang pag-usmod sang iya katawhan (tan-awa sa 1 Nefi 12:19). Gani indi katingalahan nga ipaambit ni Nefi sa iya katawhan ang sulit-sulit nga pagpaandam ni Isaias parte sa bugal. Sa mga kapitulo 12 kag 13, pangitaa ang mga tinaga nga gingamit ni Isaias agud ilaragway ang pagkabugalon, pareho sang matinaas-taason kag pagkamalabi-labihon. Dayon pwede mo man suliton ining mga paandam sa imo kaugalingon nga mga pulong, nga daw nagasulat ka sang mensahe sa imo kaugalingon nga nagapaandam parte sa bugal.

Tan-awa man sa “Chapter 18: Beware of Pride” (Teachings of Presidents of the Church: Ezra Taft Benson [2014], 229–40).

2 Nefi 12:2–5; 21:9–12; 22; 24:1–3

Sa Milenya, ang katawhan sang Dios magaeksperiyensya sang kalinong.

Mahimo nga makabulig sa imo ang hunahunaon ang imo kaugalingon sa lugar ni Nefi kag sang iya katawhan. Pamensara nga nalagyo ka sa Jerusalem antes lang gid ini maguba (tan-awa sa 2 Nefi 25:10), kag karon kabahin ka na sang paglinapta sang Israel. Ano ayhan ang pamatyagan sang magbasa sang pinanudlo ni Isaias parte sa palaabuton nga pagtililipon sang Israel kag sang malinong nga Milenya? Bilang mga Santos sa Ulihing-mga-adlaw, gintawag kita sa pagbulig tipon sang katawhan sang Dios sa ulihing mga adlaw bilang preparasyon sang paghari ni Cristo sa milenya. Sa imo pagbasa sining mga bersikulo, pamensara kon paano ka nagabulig tuman sang mga propesiya nga ila ginlaragway. Ano ang ginapabatyag sa imo nga imo himuon para magbulig tipon sang katawhan sang Dios?

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

2 Nefi 12:1–3

Kon nakakadto ka na sa templo—“ang bukid sang balay sang Ginuo”—pwede mo ipaambit sa imo pamilya kon paano nagabulig sa imo ang mga kasugtanan sa templo nga “maglakat sa mga banas [sang Ginuo].” Kon wala ka pa nakakadto sa templo, ang pagbasa sining mga bersikulo sing ululupod mahimo nga mag-inspirar sang diskusyon kon paano kamo maghanda para sa mga bugay sang templo.

2 Nefi 15:18–23

Makadumdom bala ang imo pamilya sang moderno nga mga halimbawa sang indi matarong nga mga ideya nga ginalaragway sa sining mga bersikulo? Paano naton likawan nga maintuan sang sala nga mga ideya parte sa maayo kag malain?

2 Nefi 21

Kon ang imo pamilya nagakinahanglan sang bulig nga maintiendihan ining kapitulo (nga naangot sa Isaias 11), mahimo ka nga makakita sang mga ideya sa Doktrina kag mga Kasugtanan 113:1–6, kon sa diin si Propetang Joseph Smith nagasabat sang mga pamangkot parte sa Isaias 11. Ano ang aton matun-an parte kay Jesucristo sa sining mga bersikulo?

2 Nefi 21:9

Ano ang pila sa pat-od nga mga butang nga pwede naton himuon para makabulig nga pun-on ang kalibutan sang “ihibalo nahanungod sa Ginuo”?

2 Nefi 25:23–26

Paano mo buligan ang mga miyembro sang imo pamilya nga “magkasadya kay Cristo”? Basi pwede mo sila imbitaron nga isulat sa magagmay nga papel ang mga butang parte sa Manluluwas nga nagahatag sa ila sang kalipay. Tapos, sa palaabuton nga mga family home evening ukon pang-pamilya nga pagtuon sang balaan nga mga kasulatan, may isa nga magbasa sang isa ka panid. Pwede ang mga miyembro sang pamilya magdugang sang magagmay nga papel sa bug-os nga tuig.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Magpangita sang mga sulundan. Sa balaan nga mga kasulatan makakita kita sang mga sulundan nga nagapakita sa aton kon paano ang Ginuo nagahikot. Halimbawa, sa 2 Nefi 11–25, mahimo nga makakita ka sang mga sulundan kon paano ang Ginuo nagapaandam kag nagapatawad.

Templo sa Panama City Panama. “Ang balay sang Ginuo pagatukuron sa putok-putokan sang mga kabukiran, … kag ang tanan nga mga pungsod magadugok sa sini” (2 Nefi 12:2).