1 Kag tan-awa, ang Ginuo, ang Ginuo sang mga Kasoldadohan, nagakuha sa Jerusalem, kag sa Juda, sang inugsagod kag sang inugsakdag, ang bug-os nga inugsakdag nga kalan-on, kag ang bug-os nga inugsagod nga tubig—

2 Ang gamhanan nga tawo, kag ang soldado, ang hukom, kag ang propeta, kag ang manugpakot, kag ang tigulang;

3 Ang kapitan sa singkwenta, kag ang dungganon nga tawo, kag ang manuglaygay, kag ang sagad nga madyikero, kag ang batid nga humalambal.

4 Kag magahatag ako sa ila sing mga kabataan nga mangin ila mga prinsipe, kag magagahum ang mga lapsag sa ila.

5 Kag piguson ang katawhan, ang tagsa-tagsa sing isa, kag ang tagsa-tagsa sang iya isigkatawo; magapabugal ang bata batok sa tigulang, kag ang malain batok sa dungganon.

6 Kon ang tawo magadakop sang iya utod sa panimalay sang iya amay, kag magasiling: May biste ka, mangin tagdumala ka namon, kag indi pagtugoti ini nga kalaglagan nga mag-abot sa idalom sang imo kamot—

7 Sa sina nga adlaw magasumpa sia nga nagasiling: Indi ako mangin isa ka manugbulong; kay sa akon balay wala sing kalan-on ukon biste; indi ako paghimoa nga tagdumala sang katawhan.

8 Kay ang Jerusalem nalaglag, kag ang Juda nahulog, kay ang ila mga dila kag ang ila mga binuhatan batok sa Ginuo, sa pagpaakig sang mga mata sang iya himaya.

9 Ang ginapakita sang ila nawong nagasaksi batok sa ila, kag ginabantala ang ila sala nga bisan pa pareho sang Sodoma, kag indi nila ini matago. Kalisud sa ila mga kalag, kay ginpadyaan nila sing malain ang ila mga kaugalingon!

10 Isiling sa mga matarong nga mangin maayo ini sa ila; kay magakaon sila sang bunga sang ila mga binuhatan.

11 Kalisud sa mga malain, kay mawala sila; kay ang padya sang ila mga kamot magatupa sa ila!

12 Kag ang akon katawhan, mga kabataan ang ila mga manugpigos, kag mga babayi ang nagagahum sa ila. O katawhan ko, sila nga nagatuytuy sa imo amo ang nagapasayop sa imo kag nagalaglag sang dalanon sang imo mga banas.

13 Ang Ginuo nagatindog sa pagpangapin, kag nagatindog sa paghukom sa katawhan.

14 Ang Ginuo magasulod sa paghukom sa tunga sang mga tigulang sang iya katawhan kag mga prinsipe sini; kay ginkaon ninyo ang ulubasan kag ang inagaw sa mga imol sa inyo mga balay.

15 Ano ang buot ninyo silingon sini? Ginadugmok ninyo ang akon katawhan, kag ginagaling ang mga nawong sang mga imol, siling sang Ginuong Dios sang mga Kasoldadohan.

16 Dugang pa sina, ang Ginuo nagasiling: Tungod ang mga anak nga babayi sang Sion bugalon, kag nagalakat nga nagatiso ang mga liog kag nagapangganyat ang mga mata, nga nagalakat kag nagakiay-kiay samtang nagalakat sila, kag nagapalagting sang mga pulseras sa ila mga tiil—

17 Gani silotan sang Ginuo sang kugan ang ibabaw sang ulo sang mga babayi sang Sion, kag tukibon sang Ginuo ang ila tinago nga mga bahin.

18 Sa sina nga adlaw kuhaon sang Ginuo ang katahum sang ila nagalagting nga mga ornamento, kag mga kalo sang babayi, kag korte-bulan nga mga ornamento;

19 Ang mga pakabit kag ang mga pulseras, kag ang mga bandana;

20 Ang mga kalo, kag ang mga ornamento sa mga buko-buko, kag ang mga purong, kag ang mga suludlan sang pahamot, kag ang mga aritos;

21 Ang mga singsing, kag mga alahas sa ilong;

22 Ang mailisan nga mga biste, ang mga kunop, kag ang mga takurong, kag ang mga pangkulong sang buhok;

23 Ang mga espeho, kag ang lino nga manipis, kag mga turban, kag ang mga manto.

24 Kag matabo ini, nga sa baylo sang maamyon nga kahamot amo ang kabaho; kag sa baylo sang wagkos, gisi-gisi; kag sa baylo sang pinahipid nga buhok, pagkaupaw; kag sa baylo sang panapton nga malaba, pagwagkos sang panapton nga sako; pagmarka sa baylo sang katahum.

25 Ang imo mga tinawo malaglag sa espada kag ang imo gamhanan sa giyera.

26 Kag ang iya mga ganhaan magapanalambiton kag magapangalisud; kag mangin mamingaw sia, kag magapungko sa duta.