1 Kalisud sa ila nga nagamando sang di-matarong nga mga mando, kag nagasulat sang paglupig nga ila ginapatuman;

2 Sa pagdumili sang hustisya sa mga nagakinahanglan, kag sa pagkuha sang kinamatarong sa mga imol sang akon katawhan, agud nga ang mga balo nga babayi mangin ila mga biktima, kag agud makawatan nila ang mga ilo!

3 Kag ano ang inyo himuon sa adlaw sang pagbisita, kag sa kamingaw nga magaabot halin sa malayo? kay sin-o kamo madalagan agud mangayo sing bulig? kag diin bala ninyo ibilin ang inyo himaya?

4 Kon wala ako magasioktot lamang sila sa tunga sang mga bilanggo, kag matumba sila upod sang mga pinatay. Tungod sini tanan ang iya kaakig wala nadula, kundi nga ang iya kamot nauntay pa gihapon.

5 O Asiriahanon, ang bilugon sang akon kaakig, kag ang sungkod sa ila kamot amo ang ila kaugot.

6 Ipadala ko sia batok sa isa ka hipokrito nga nasyon, kag batok sa katawhan sang akon kaakig suguon ko sia nga kuhaon ang inagaw, kag kuhaon ang tinukob, kag tasakon sila pareho sa lunang sang mga dalanon.

7 Apang indi amo sina ang iya buot silingon, kag indi man amo sina ang ginahunahuna sang iya tagipusuon; kundi ang sa iya tagipusuon amo ang paglaglag kag pag-utod sang indi lamang pila ka nasyon.

8 Kay nagasiling sia: Indi bala mga hari tanan ang akon mga prinsipe?

9 Indi bala ang Calno pareho sang Carquemis? Indi bala ang Hamat pareho sang Arpad? Indi bala ang Samaria pareho sang Damasco?

10 Pareho sang pagtukod sang akon kamot sang mga ginharian sang mga dios-dios, kag ang ila tinigib nga mga imahen naglabaw pa sa ila sang Jerusalem kag sang Samaria;

11 Indi ko bala paghimuon, pareho sang akon ginhimo sa Samaria kag sa iya mga dios-dios, ang amo man sa Jerusalem kag sa iya mga dios-dios?

12 Gani matabo ini nga kon mahikot sang Ginuo ang iya bug-os nga buluhaton sa Bukid sang Sion kag sa Jerusalem, silotan ko ang bunga sang bugalon nga tagipusuon sang hari sang Asiria, kag ang himaya sang iya matinaas-taason nga panulok.

13 Kay nagasiling sia: Sa kusog sang akon kamot kag sa akon kaalam nahimo ko ining mga butang; kay mahinalungon ako; kag ginkakas ko ang mga dulonan sang katawhan, kag ginkawat ang ila mga manggad, kag gindaug ko ang mga pumuluyo pareho sing isa ka maisog nga lalaki;

14 Kag ang akon kamot nakasapo pareho sing isa ka pugad sang mga manggad sang katawhan; kag pareho sing isa nga nagatipon sang mga itlog nga nabilin gintipon ko ang bug-os nga duta; kag wala sing isa nga naghulag sang pakpak, ukon nagbukas sang baba, ukon nagsiyak.

15 Magapabugal bala sang iya kaugalingon ang wasay batok sa iya nga nagagamit sini? Magapadako bala sang iya kaugalingon ang lagari batok sa iya nga nagagamit sini? Nga daw ang bilugon amo ang magagamit sang iya kaugalingon batok sa ila nga nagaalsa sini, ukon nga daw ang sungkod amo ang magaalsa sang iya kaugalingon nga daw indi ini kahoy!

16 Gani ang Ginuo, ang Ginuo sang mga Kasoldadohan, magapadala sing kaniwang, sa tunga sang iya mga matambok; kag sa idalom sang iya himaya magadabok sia sing dabadaba pareho sang dabadaba sang kalayo.

17 Kag ang kasanag sang Israel mangin kalayo, kag ang iya Balaan mangin dabadaba, kag magasunog kag magalamon sang iya tunukon nga mga tanom kag sang iya mga kahoy-kahoy sa isa ka adlaw;

18 Kag magaupos sang himaya sang iya lasang, kag sang iya mabungahon nga kaumhan, pareho kalag kag lawas; kag sila mangin pareho sang kon ang manugdala sang bandera magluya.

19 Kag diutay na lang ang magakalabilin sang mga kahoy sang iya lasang, sa bagay nga maisip ang mga ini sing isa ka bata.

20 Kag matabo ini sa sina nga adlaw, nga ang nagkalabilin sang Israel, kag yadtong mga nakapalagyo sa panimalay ni Jacob, indi na magsandig sa iya nga nagsakit sa ila, kundi nga sa pagkamatuod, magasandig sa Ginuo, ang Balaan sang Israel.

21 Ang nagkalabilin magabalik, huo, bisan ang nabilin ni Jacob, sa Dios nga makagagahum.

22 Kay bisan ang imo katawhan nga Israel pareho kadamo sang balas sang dagat, apang ang nagkalabilin sa ila lamang ang magabalik; ang lubos nga pagkalaglag nga gintalana magaalawas sa pagkamatarong.

23 Kay ang Ginuong Dios sang mga Kasoldadohan magatalana sing isa ka lubos nga pagkalaglag, bisan nga natalana na sa bug-os nga duta.

24 Gani, amo ini ang ginasiling sang Ginuong Dios sang mga Kasoldadohan: O katawhan ko nga nagapuyo sa Sion, indi magkahadlok sa mga Asiriahanon; sakiton ka niya sing bilugon, kag alsahon ang sungkod batok sa imo, pareho sang naandan sa Egipto.

25 Kay sa diutay na gid lang nga tion pa, ang kaakig sa imo matapos na, kag ang akon kaakig sa ila kalaglagan.

26 Kag ang Ginuo sang mga Kasoldadohan magasugyot sing isa ka silot sa iya pareho sang pagpamatay sa Midian sa bato sang Oreb; kag pareho nga ang iya sungkod yara sa ibabaw sang dagat sa amo man alsahon niya ini pareho sang iya ginhimo sa Egipto.

27 Kag matabo ini sa sina nga adlaw nga ang iya palas-anon pagakuhaon halin sa imo abaga, kag ang iya gota halin sa imo liog, kag ang gota mawasak tungod sang paghaplas.

28 Nag-abot sia sa Ayat, nag-agi sia sa Migron; sa Micmas ginbilin niya ang iya mga dala.

29 Naglampuwas sila sa alagyan; nagdayon sila sa Geba; ang Ramat nahadlok; ang Gabaa ni Saul nagpalagyo.

30 Ibayaw ang tingug, O anak nga babayi sang Gallim; ipabati ini sa Lais, O makaluluoy nga Anatot.

31 Wala na ang Madmena; ang mga pumuluyo sang Gebim nagtililipon sa pagpalagyo.

32 Sa gihapon magapabilin sia sa Nob sa sina nga adlaw; magawaras sia sang iya inumol batok sa bukid sang anak nga babayi sang Sion, ang bungyod sang Jerusalem.

33 Tan-awa, ang Ginuo, ang Ginuo sang mga Kasoldadohan magautod sang sanga sing makahaladlok; kag ang mga matag-as sing tindog pagatapson; kag ang mga bugalon pakaubson.

34 Kag hagbason niya sang salsalon ang mga kasiutan sang mga lasang, kag ang Libano malaglag paagi sa gamhanan.