Kapitulo 16
Nakita ni Isaias ang Ginuo—Ginpatawad ang mga sala ni Isaias—Gintawag sia sa pagpropesiya—Nagpropesiya sia sang pagsikway sang mga Judio sang mga pinanudlo ni Cristo—Isa sang nagkalabilin sang katawhan sang Juda magabalik—Ikomparar ang Isaias 6. Mga 559–545 B.C.
1 Sa tuig nga napatay si haring Uzias, nakita ko man ang Ginuo nga nagapungko sa isa ka trono, mataas kag nabayaw, kag ang iya sidsid nagpuno sang templo.
2 Sa ibabaw sini nagatindog ang mga serafin; nga ang tagsa-tagsa may anum ka pakpak; sa duha ginatabunan niya ang iya nawong, kag sa duha ginatabunan niya ang iya mga tiil, kag sa duha nagalupad sia.
3 Kag ang isa nagsinggit sa isa, kag nagsiling: Balaan, balaan, balaan, ang Ginuo sang mga Kasoldadohan; ang bug-os nga duta napuno sang iya himaya.
4 Kag ang mga haligi sang puwertahan nag-uyog sa tingug niya nga nagsinggit, kag ang balay napuno sang aso.
5 Dayon nagsiling ako: Kalisud sa akon! Kay nalaglag na ako; tungod isa ako ka tawo nga di-matinlo ang mga bibig; kag nagapuyo ako sa tunga sing isa ka katawhan nga di-matinlo ang mga bibig; kay ang akon mga mata nakakita sang Hari, ang Ginuo sang mga Kasoldadohan.
6 Dayon ang isa sang mga serafin naglupad sa akon, nga may nagabaga nga uling sa iya kamot, nga ginkuha niya sa altar paagi sang kimpit;
7 Kag gintandog niya sini ang akon baba, kag nagsiling: Yari karon, ini nakatandog sang imo mga bibig; kag nakuha ang imo kalainan, kag natinloan ang imo sala.
8 Kag nabatian ko man ang tingug sang Ginuo nga nagasiling: Sin-o bala ang akon ipadala, kag sin-o ang magakadto para sa amon? Dayon nagsiling ako: Yari ako; ipadala ako.
9 Kag nagsiling sia: Lakat kag sugiri ining katawhan—Nakabati kamo sa pagkamatuod, apang wala sila makahangop; kag nakakita kamo sa pagkamatuod, apang wala sila makakita.
10 Patambuka ang tagipusuon sining katawhan, kag pabungola ang ila mga dulunggan, kag papiyunga ang ila mga mata—basi nga makakita sila sa ila mga mata, kag makabati sa ila mga dulunggan, kag makahangop sa ila tagipusuon, kag mahaylo kag mag-ayo.
11 Dayon nagsiling ako: Ginuo, tubtob san-o? Kag nagsabat sia: Tubtob nga ang mga siyudad malaglag nga wala sing pumuluyo, kag ang mga balay wala sing tawo, kag ang duta lubos nga mangin mamingaw;
12 Kag mapapalayo sang Ginuo ang mga tawo, kay may mangin dako nga kamingaw sa tunga sang duta.
13 Apang may isa pa ka ika-pulo, kag magabalik sila, kag pagakaunon, pareho sing isa ka kahoy nga tiro, kag pareho sing isa ka oak nga ang puno nagakabilin kon nagakalagas ang ila sini mga dahon; gani ang balaan nga binhi amo ang mangin puno sini.