1 Magpamati sa akon, kamo nga nagasunod sa pagkamatarong. Magtulok sa bato nga sa diin kamo gintiltig, kag sa guab sang buho nga sa diin kamo ginkali.

2 Magtulok kay Abraham, ang inyo amay, kag kay Sara, sia nga nagbun-ag sa inyo; kay sia lang ang gintawag ko, kag ginpakamaayo sia.

3 Kay paumpawan sang Ginuo ang Sion, paumpawan niya ang tanan niya sini nga nalaglag nga mga lugar; kag himuon niya ang iya kamingawan pareho sang Eden, kag ang iya desyerto pareho sang hardin sang Ginuo. Kalipay kag kasadya ang makita didto, pagpasalamat kag ang tunog sang musika.

4 Magpamati sa akon, katawhan ko; kag pamatii ako, O nasyon ko; kay isa ka layi ang magagwa halin sa akon, kag himuon ko ang akon paghukom nga magluntad bilang kasanag para sa katawhan.

5 Malapit na ang akon pagkamatarong; ang akon kaluwasan nagagwa, kag ang akon butkon magahukom sang katawhan. Ang mga pulo magahulat sa akon, kag sa akon butkon sila magasalig.

6 Magtangla sa kalangitan, kag magtulok sa duta sa idalom; kay ang kalangitan madula pareho sang aso, kag ang duta magadaan pareho sang biste; kag sila nga nagapuyo sa sini magkalamatay sa amo man nga paagi. Apang ang akon kaluwasan mangin wala’y katapusan, kag ang akon pagkamatarong indi gid madula.

7 Magpamati sa akon, kamo nga nakahibalo sang pagkamatarong, ang katawhan nga sa ila tagipusuon ginsulat ko ang akon layi, indi kamo magkahadlok sang pagbasol sang mga tawo, ukon magkahadlok sang ila mga pagpasipala.

8 Kay ang sipit magaut-ot sa ila pareho sang biste, kag ang ulod magakaon sa ila pareho sang bulbol sang carnero. Apang ang akon pagkamatarong mangin wala’y katapusan, kag ang akon kaluwasan sa tanan nga henerasyon.

9 Magbugtaw, magbugtaw! Isul-ob ang kusog, O butkon sang Ginuo; magbugtaw pareho sa dumaan nga mga adlaw. Indi bala ikaw amo sia nga nag-utod sa Rahab, kag nagpilas sang dragon?

10 Indi bala ikaw amo sia nga nagpamala sang dagat, sang mga tubig nga dako ang kadalumon; nga naghimo sang mga kadalumon sang dagat nga alagyan agud makatabok ang mga nagawad?

11 Gani, ang tinubos sang Ginuo magabalik, kag magaabot nga may pagkinanta sa Sion; kag ang wala’y katubtuban nga kalipay kag pagkabalaan mangin yara sa ila mga ulo; kag magaagom sila sang kasadya kag kalipay; ang kasubo kag kalisud magapalagyo.

12 Ako amo sia, huo, ako amo sia nga nagapaumpaw sa inyo. Tan-awa, sin-o bala kamo nga mahadlok kamo sa tawo, nga mapatay, kag sa anak sang tawo, nga pagahimuon pareho sang hilamon?

13 Kag malipat sa Ginuo nga inyo tagtuga, nga naghitad sang kalangitan, kag nagpahamtang sang mga pundasyon sang duta, kag nagkahadlok sing dalayon adlaw-adlaw tungod sang tuman nga kaakig sang manugpigos, nga daw handa sia sa paglaglag? Kag diin bala ang tuman nga kaakig sang manugpigos?

14 Ang bihag nga tinapok nagadali nga mabuy-an sia, kag nga indi sia mapatay sa buho, ukon nga kulangon ang iya tinapay.

15 Apang ako ang Ginuo nga inyo Dios, nga nagapadaguob sang mga balod; ang Ginuo sang mga Kasoldadohan amo ang akon ngalan.

16 Kag ginbutang ko ang akon mga pulong sa inyo baba, kag nagtabon sa inyo sa landong sang akon kamot agud nga matamnan ko ang kalangitan kag mapahamtang ang mga pundasyon sang duta, kag magsiling sa Sion: Tan-awa, kamo ang akon katawhan.

17 Magbugtaw, magbugtaw, magtindog, O Jerusalem, nga nag-inom sa kamot sang Ginuo sang ilimnan sang iya tuman nga kaakig—ginsipot ninyo tubtob ang mga lagdo sang ilimnan nga makahulubog—

18 Kag wala sing isa nga magatuytoy sa iya sa tanan nga anak nga lalaki nga iya ginbun-ag; ukon nagauyat sa iya kamot kag nagagiya, sa tanan nga anak nga lalaki nga iya ginpadako.

19 Ining duha ka anak nga lalaki magapalapit sa inyo, nga magakasubo para sa inyo—ang inyo kahalitan kag kalaglagan, kag ang tiggulutom kag ang espada—kag paagi kay sin-o nga paumpawan ko kamo?

20 Nalipong ang inyo mga anak nga lalaki, luwas sa sining duha; nagahigda sila sa ulohan sang tanan nga dalan; pareho sing isa ka maila nga toro sa isa ka pukot, napuno sila sang tuman nga kaakig sang Ginuo, sang pagsaway sang inyo Dios.

21 Gani pamatii ini karon, kamo nga ginpaantos, kag nahubog, kag indi sang alak:

22 Amo ini ang ginasiling sang inyo Ginuo, ang Ginuo kag ang inyo Dios nagaapin sang iya katawhan; tan-awa, ginkuha ko sa inyo kamot ang ilimnan nga makahulubog, ang mga lagdo sang ilimnan sang akon tuman nga kaakig; indi na kamo mag-inom sini liwat.

23 Kundi nga ibutang ko ini sa kamot nila nga nagapaantos sa inyo; nga nagsiling sa inyo kalag: Duko kamo agud nga makalatay kami—kag ginbutang ninyo ang inyo lawas pareho sang duta kag pareho sang dalan nga ila maagyan.

24 Magbugtaw, magbugtaw, isul-ob ang imo kusog, O Sion; isul-ob ang imo matahum nga mga biste, O Jerusalem, ang balaan nga siyudad; kay sugod subong indi na magsulod sa imo ang mga wala natuli kag ang mga mahigko.

25 Itaktak ang yab-ok halin sa imo kaugalingon; magbangon, magpungko, O Jerusalem; palosi ang imo kaugalingon sang mga gapos sa imo liog, O bihag nga anak nga babayi sang Sion.