1 Kag natabo ini nga sa mga adlaw ni Acaz nga anak nga lalaki ni Jotam, nga anak nga lalaki ni Uzias, hari sang Juda, si Rezin, hari sang Siria, kag si Peca nga anak nga lalaki ni Remalias, hari sang Israel, nagtaklad sa Jerusalem sa pagpakig-away batok sa sini, apang wala nila ini nadaug.

2 Kag ginsugid ini sa balay ni David nga nagasiling: Ang Siria kadampig sang Efraim. Kag nagkurog ang iya tagipusuon, kag ang tagipusuon sang iya katawhan, pareho sang mga kahoy sa lasang nga nagauyog sa hangin.

3 Dayon nagsiling ang Ginuo kay Isaias: Lakat subong sa pagsugata kay Acaz, ikaw kag si Sear-jasub nga imo anak nga lalaki, sa punta sang pailigan sang punong nga naibabaw sa mayor nga dalan sang patag sang manuglaba;

4 Kag isiling sa iya: Andam ka, kag maghipos; indi magkahadlok, kag indi magpakulba tungod sining duha ka ikog sang sulo nga nagaaso, tungod sang mabangis nga kaakig ni Rezin kag sang Siria, kag sang anak nga lalaki ni Remalias.

5 Kay ang Siria, ang Efraim, kag ang anak nga lalaki ni Remalias, nagplano sing malain batok sa imo nga nagasiling:

6 Magtaklad kita batok sa Juda kag gamohon ini, kag sudlon naton sila, kag magbutang sing isa ka hari sa tunga sini, huo, ang anak nga lalaki ni Tabeel.

7 Amo ini ang ginasiling sang Ginuong Dios: Indi ini mahimo, kag indi ini matabo.

8 Kay ang ulo sang Siria amo ang Damasco, kag ang ulo sang Damasco, si Rezin; kag sa sulod sang sisenta kag lima ka tuig ang Efraim magalinapta nga indi na ini mangin isa ka banwa.

9 Kag ang ulo sang Efraim amo ang Samaria, kag ang ulo sang Samaria amo ang anak ni Remalias. Kon indi kamo magpati pat-od gid nga indi kamo maglig-on.

10 Dugang pa sina, ang Ginuo naghambal liwat kay Acaz nga nagasiling:

11 Magpangayo ka sing isa ka tanda sa Ginuo nga imo Dios; pangayoa ini sa kadadalman, ukon sa kataasan.

12 Apang si Acaz nagsiling: Indi ako magpangayo, kag indi ko pagsulayon ang Ginuo.

13 Kag nagsiling sia: Pamati kamo karon, O panimalay ni David; diutay bala nga butang sa inyo ang maglapyo sang mga tawo, nga lapyuon man ninyo ang akon Dios?

14 Gani, ang Ginuo mismo ang magahatag sa inyo sing isa ka tanda—Tan-awa, isa ka birhen ang magapanamkon, kag magaanak sing lalaki, kag tawgon ang iya ngalan nga Emmanuel.

15 Mantikilya kag dugus ang iya kaunon, agud nga iya mahibal-an ang magdumili sang malain kag magpili sang maayo.

16 Kay sa wala pa makahibalo ang bata sa pagdumili sang malain kag magpili sang maayo, ang duta nga inyo ginakangil-aran madulaan na sang iya duha ka hari.

17 Ipadala sang Ginuo sa imo, kag sa imo katawhan, kag sa panimalay sang imo amay, ang mga adlaw nga wala pa mag-abot halin sa adlaw nga ang Efraim nagbulag sa Juda, ang hari sang Asiria.

18 Kag matabo ini sa sina nga adlaw nga ang Ginuo magapanitsit sa langaw nga yara sa tanan nga bahin sang Egipto, kag sa buyog nga yara sa duta sang Asiria.

19 Kag magaabot sila, kag magahugpa sila tanan sa mga patag nga mamingaw, kag sa mga litik sang mga bato, kag sa tanan nga tunukon, kag sa tanan nga tanom.

20 Sa amo man nga adlaw, paagi sa ginsuhulan nga labaha, paagi sa ila nga yara sa tabok sang suba, paagi sa hari sang Asiria, kiskison sang Ginuo ang ulo, kag ang bulbol sang mga tiil; kag kakason man sini ang bungot.

21 Kag matabo ini sa sina nga adlaw, nga ang isa ka tawo magasagod sing isa ka baka nga bataon kag duha ka carnero;

22 Kag matabo ini, nga tungod sang kabugana sang gatas nga ila ihatag magakaon sia sang mantikilya; kay ang mantikilya kag dugus ang kaunon sang tagsa-tagsa nga nabilin sa duta.

23 Kag matabo ini sa sina nga adlaw, nga ang tagsa ka lugar, nga may isa ka libo ka puno sang ubas sa tag-isa ka libo ka bilog nga pilak, mangin mga kahoy-kahoy kag tunukon nga mga tanom.

24 Magakadto didto ang mga tawo nga may mga baslay kag mga pana, tungod ang bug-os nga duta mangin mga kahoy-kahoy kag tunukon nga mga tanom.

25 Kag sa tanan nga bungyod nga pagakutkoton sang piko, wala sing magakadto sa kahadlok sa mga kahoy-kahoy kag tunukon nga mga tanom; kundi nga ini mangin buluhian sang mga baka, kag talasakon sang mga carnero kag mga kanding.