1 Kag dayon magakanta ako sa akon pinalangga sing isa ka ambahanon sang akon pinalangga, parte sa iya ulubasan. Ang akon pinalangga may isa ka ulubasan sa isa ka tuman ka mabungahon nga bungyod.

2 Kag ginkudalan niya ini, kag ginpanguhaan ini sing mga bato, kag gintamnan ini sing labing hamili nga ubas, kag ginpatindogan sing isa ka tore sa tunga sini, kag ginhimoan man sang pulugaan sang ubas sa sulod sini; kag nagpaabot sia nga magadala ini sing mga ubas, kag nagdala ini sing mga ubas nga talunon.

3 Kag karon, O mga pumuluyo sang Jerusalem, kag mga tawo sang Juda, maghukom, ginaampo ko sa inyo, sa tunga nakon kag sang akon ulubasan.

4 Ano pa ayhan ang mahimo sa akon ulubasan nga wala ko pa mahimo sa sini? Gani, sang nagpaabot ako nga magadala ini sing mga ubas nagdala ini sing mga ubas nga talunon.

5 Kag karon, tan-awa; sugiran ko kamo kon ano ang akon himuon sa akon ulubasan—Kuhaan ko ini sing kudal, kag halbon ini; kag rumpagon ko ang kuta sini, kag ini tasakon;

6 Kag gub-on ko ini; indi ini pagpanapsan ukon pagsadulan; kundi tuboan sing mga kahoy-kahoy kag tunukon nga mga tanom; suguon ko man ang mga gal-um nga indi sila mag-ulan sa sini.

7 Kay ang ulubasan sang Ginuo sang mga Kasoldadohan amo ang panimalay ni Israel, kag ang mga tawo sang Juda iya tanom nga matahum; kag nagpaabot sia sang matarong nga paghukom, kag tan-awa, pagpigos; sang pagkamatarong, apang tan-awa, paghibi.

8 Kalisud sa ila nga nagasugpon sing balay sa balay, tubtob nga wala na sing lugar, agud nga mapahamtang nila ang ila kaugalingon nga isahanon sa tunga sang duta!

9 Sa akon dulunggan, nagsiling ang Ginuo sang mga Kasoldadohan, sa pagkamatuod madamo nga balay ang magamingaw, kag dalagko kag matahum nga mga siyudad ang madulaan sing pumuluyo.

10 Huo, napulo ka acre nga ulubasan magapatubas sing isa ka labador, kag ang isa ka homer nga binhi magapatubas sing isa ka pasong.

11 Kalisud sa ila nga magabangon sing aga pa, agud nga makasunod sila sa maisog nga ilimnon, nga nagapadayon tubtob sa gab-i, kag mapainit sila sang alak!

12 Kag ang arpa, kag ang biola, ang pandereta, kag lantoy, kag bino yara sa ila mga piyesta; apang wala nila ginasapak ang buluhaton sang Ginuo, kag wala nila ginahunahuna ang pagpanghikot sang iya mga kamot.

13 Gani, ang akon katawhan nasulod sa pagkabihag, tungod wala sila sing ihibalo; kag ang ila dungganon nga mga tawo ginagutom, kag ang ila kadam-an nagaantos sa kauhaw.

14 Gani, ang impiyerno nagpasangkad sang iya kaugalingon, kag nagnganga sing dako gid sang iya baba; kag ang ila himaya, kag ang ila kadam-an, kag ang ila kadayawan, kag sia nga nagakasadya, magapanaog sa sini.

15 Kag ang kubos nga tawo payaubon, kag ang gamhanan nga tawo paubuson, kag ang mga mata sang matinaas-taason paubuson.

16 Apang ang Ginuo sang mga Kasoldadohan pakataason sa katarongan, kag ang Dios nga balaan pakabalaanon sa pagkamatarong.

17 Dayon ang mga carnero magahalab suno sa ila kinaandan nga paagi, kag ang nalaglag nga mga lugar sang mga matambok pagakaunon sang mga pangayaw.

18 Kalisud sa ila nga nagaguyod sang kalainan paagi sa mga higot sang pagkawala’y pulos, kag sang sala pareho sang kalat sang karo;

19 Nga nagasiling: Padasiga sia, padalia ang iya buluhaton, agud nga makita namon ini; kag papalapita kag paabuta ang laygay sang Balaan sang Israel, agud nga mahibal-an namon ini.

20 Kalisud sa ila nga nagatawag sang malain nga maayo, kag maayo nga malain, nga ginahimo ang kadulom nga kasanag, kag kasanag nga kadulom, nga ginahimo ang mapait nga matam-is, kag matam-is nga mapait!

21 Kalisud sa mga maalam sa ila kaugalingon nga mga mata kag mahinalungon sa ila kaugalingon nga panulok!

22 Kalisud sa mga gamhanan sa pag-inom sang alak, kag sa makusog nga mga tawo sa pagtimpla sang maisog nga ilimnon;

23 Nga nagapakamatarong sang malain tungod sang suhol, kag nagakuha sang pagkamatarong sang matarong halin sa iya!

24 Gani, pareho sang kalayo nga nagalamon sang ginaraban, kag sang dabadaba nga nagatupok sang upa sang humay, ang ila gamot magakaladunot, kag ang ila mga bulak magapaibabaw pareho sang yab-ok; kay ginsikway nila ang layi sang Ginuo sang mga Kasoldadohan, kag ginbale-wala ang pulong sang Balaan sang Israel.

25 Gani, ang kaakig sang Ginuo nagadabadaba batok sa iya katawhan, kag gin-untay niya ang iya kamot batok sa ila, kag ginsakit sila; kag ang mga bungyod nag-uyog, kag ang ila mga bangkay naglinapta sa tunga sang mga dalanon. Tungod sini tanan ang iya kaakig wala nadula, kundi nga ang iya kamot nauntay pa gihapon.

26 Kag magabayaw sia sing bandera sa mga nasyon halin sa malayo, kag magapanitsit sa ila halin sa punta sang kalibutan; kag tan-awa, magaabot sila nga may kadasig kag sing hinali; wala sing lapyuon ukon makasandad sa ila.

27 Wala sing tuyhon ukon matulog; indi man mahubad ang wagkos sang ila mga hawak, ukon mabugto ang higot sang ila mga sandalyas;

28 Nga ang ila mga baslay mangin mataliwis, kag ang tanan nila nga pana nabingat, kag ang mga kuko sang ila mga kabayo mangin pareho sang santikan, kag ang ila mga ruyda pareho sang buhawi, ang ila pagngurob pareho sang leon.

29 Magangurob sila pareho sang bataon nga mga leon; huo, magangurob sila, kag magadakop sang tulukbon, kag magadala sini palayo, kag wala gid sing magasalbar.

30 Kag sa sina nga adlaw magangurob sila batok sa ila pareho sang paghuganas sang dagat; kag kon magtulok sila sa duta, tan-awa, kadulom kag kasubo, kag ang kasanag magadulom sa kalangitan sini.