1 Kag may magagwa nga isa ka salingsing halin sa puno ni Jesse, kag isa ka sanga ang magatubo halin sa iya mga gamot.

2 Kag ang Espiritu sang Ginuo mangin yara sa iya, ang espiritu sang kaalam kag paghangop, ang espiritu sang laygay kag kusog, ang espiritu sang ihibalo kag sang kahadlok sa Ginuo;

3 Kag magahimo sa iya nga maabtik sing paghangop sa kahadlok sa Ginuo; kag indi sia maghukom suno sa panulok sang iya mga mata, ukon magsaway suno sa palamatin-an sang iya mga dulunggan.

4 Kundi sa pagkamatarong hukman niya ang mga imol, kag sawayon sing patas ang mga malulo sang kalibutan; kag sakiton niya ang duta paagi sa bilugon sang iya baba, kag sa ginhawa sang iya mga bibig patyon niya ang mga malain.

5 Kag ang pagkamatarong mangin wagkos sang iya mga balikawang, kag ang pagkatampad mangin wagkos sang iya mga hawak.

6 Ang lobo magapuyo man kaupod ang carnero, kag ang leopardo magahigda kaupod ang tinday nga kanding, kag ang tinday nga baka kag ang bataon nga leon kag ang pinatambok nga magkaupod; kag isa ka diutay nga bata magatuytoy sa ila.

7 Kag ang baka kag ang oso magahalab; ang ila mga tinday magahigda nga magkaupod; kag ang leon magakaon sing dagami pareho sang baka.

8 Kag ang bata nga nagasuso magahampang sa ibabaw sang buho sang man-og nga dalitan, kag ang bata nga linutas magasulod sang iya kamot sa palanagoan sang dalitan nga man-og.

9 Indi sila maghalit ukon maglaglag sa bug-os ko nga bukid nga balaan, kay ang duta mapuno sang ihibalo parte sa Ginuo, pareho nga ang mga tubig nagatabon sang dagat.

10 Kag sa sina nga adlaw may isa ka gamot ni Jesse, nga magatindog bilang isa ka bandera sang katawhan; sa sini ang mga Gentil magatililipon; kag ang iya palahuwayan mangin mahimayaon.

11 Kag matabo ini sa sina nga adlaw nga ang Ginuo magapahamtang liwat sang iya kamot sa ika-duha nga tion sa pagbawi sang nagkalabilin sang iya katawhan nga mabilin, halin sa Asiria, kag halin sa Egipto, kag halin sa Patros, kag halin sa Cus, kag halin sa Elam, kag halin sa Sinar, kag halin sa Hamat, kag halin sa mga pulo sang dagat.

12 Kag magapatindog sia sing isa ka bandera para sa mga nasyon, kag magapanipon sang mga sinikway halin sa Israel, kag magapanipon sang naglinapta sang Juda halin sa apat ka pamusod sang duta.

13 Ang kahisa man sang Efraim madula, kag ang mga kaaway sang Juda laglagon; ang Efraim indi na magkahisa sa Juda, kag ang Juda indi na maggamo sang Efraim.

14 Kundi magasalakay sila sa mga abaga sang mga Filistinhon sa weste; magapangagaw sila sang mga pagkabutang sang este; magapatupa sila sang ila kamot sa Edom kag Moab; kag ang mga anak ni Amon magatuman sa ila.

15 Kag ang Ginuo lubos nga magalaglag sang dila sang dagat sang Egipto; kag paagi sa iya mabaskog nga hangin magawaras sia sang iya kamot sa ibabaw sang suba, kag magasakit sini sa pito ka sapa, kag magapatabok sang mga tawo nga may mamala nga mga sandalyas.

16 Kag may isa ka mayor nga dalan para sa nagkalabilin sang iya katawhan nga mabilin, halin sa Asiria, pareho sang amo sini sadto sa Israel sa adlaw nga naggwa sia sa duta sang Egipto.