1 Dugang pa sina, ang pulong sang Ginuo nagsiling sa akon: Magkuha ka sing isa ka dako nga libro nga linukot, kag isulat sa sini nga gamit ang pangsulat sang tawo, ang parte kay Maher-salal-has-baz.

2 Kag nagkuha ako para sa akon sang matutum nga mga saksi sa pagsulat, si Urias nga pari, kag si Zacarias nga anak nga lalaki ni Jeberequias.

3 Kag nagkadto ako sa propeta nga babayi; kag nagpanamkon sia kag nag-anak sing lalaki. Dayon nagsiling sa akon ang Ginuo: Hingalani sia nga Maher-salal-has-baz.

4 Kay tan-awa, indi pa ang bata makahibalo magsinggit, amay ko, kag iloy ko, sa tion nga ang manggad sang Damasco kag ang inagaw sang Samaria dal-on sa atubang sang hari sang Asiria.

5 Ang Ginuo naghambal man liwat sa akon nga nagasiling:

6 Bangod ginsikway sining katawhan ang mga tubig sang Siloe nga nagailig sing mahinay, kag nagakasadya kay Rezin kag sa anak nga lalaki ni Remalias;

7 Karon sa sina nga kabangdanan, tan-awa, ang Ginuo magapasaka sa ila sang mga tubig sang suba, makusog kag madamo, bisan pa ang hari sang Asiria kag ang bug-os niya nga himaya; kag magaawas sia sa tanan niya nga mga iligan, kag magalapaw sa tanan niya nga mga pangpang.

8 Kag magaagi sia patabok sa Juda; magaawas sia kag magalapaw, magalab-ot sia bisan tubtob sa liog; kag ang paghumlad sang iya mga pakpak magapuno sang kasangkaron sang imo duta, O Emmanuel.

9 Magtilingob kamo, O kamo nga katawhan, kag magkalawas-ag kamo; kag magpamati tanan kamo nga yara sa malayo nga mga pungsod; wagkosi ninyo ang inyo mga kaugalingon, kag magkalawas-ag kamo; wagkosi ninyo ang inyo mga kaugalingon, kag magkalawas-ag kamo.

10 Magplano kamo, kag ini mangin wala’y pulos; ihambal ang pulong, kag indi ini mahimo; kay ang Dios upod sa amon.

11 Kay ang Ginuo naghambal sa akon sing amo sini sa makusog nga kamot, kag gintudloan ako nga indi ako maglakat sa dalanon sining katawhan nga nagasiling:

12 Indi kamo magsiling, May pagkunsabo, sa tanan nga kay sin-o ining katawhan magasiling, May pagkunsabo; kag indi kamo magkahadlok sang ila kahadlok, ukon magpakulba.

13 Pakabalaana ninyo ang Ginuo sang mga Kasoldadohan mismo, kag sa iya kamo mahadlok, kag sa iya kamo makulbaan.

14 Kag sia mangin santuaryo; apang isa ka bato nga nagapasandad, kag isa ka bato nga nagapadasma sa duha ka panimalay ni Israel, mangin isa ka tiglapak kag isa ka siod sa mga pumuluyo sang Jerusalem.

15 Kag madamo sa ila ang magakasandad kag magakadasma, kag magkalawas-ag, kag masiod, kag madakop.

16 Bugkosa ang testimonya, takpi ang layi sa akon mga disipulo.

17 Kag magahulat ako sa Ginuo, nga nagatago sang iya nawong sa panimalay ni Jacob, kag pangitaon ko sia.

18 Tan-awa, ako kag ang mga anak nga ginhatag sa akon sang Ginuo mangin ang mga tanda kag mangin mga katilingalahan sa Israel halin sa Ginuo sang mga Kasoldadohan, nga nagapuyo sa Bukid sang Sion.

19 Kag kon magsiling sila sa inyo: Pamangkot sa ila nga mga espiritista, kag sa mga salamangkero nga nagaorasyon—indi bala dapat nga ang isa ka katawhan magpamangkot sa ila Dios agud ang mga buhi makabati halin sa mga patay?

20 Sa layi kag sa testimonya; kag kon indi sila maghambal suno sa sini nga pulong, ini tungod kay wala sing kasanag sa ila.

21 Kag magaalagi sila sa sini nga nabudlayan sing tuman kag ginagutom; kag matabo ini nga kon gutumon sila, magakaugot sila sa ila mga kaugalingon, kag sumpaon ang ila hari kag ang ila Dios, kag magatangla.

22 Kag magatulok sila sa duta kag makita ang kagamo, kag kadulom, ang kadulom sang kasakit, kag pagatabugon sa kadulom.