1 Ang propesiya parte sa Babilonia, nga nakita ni Isaias nga anak ni Amoz.

2 Magbayaw kamo sing isa ka bandera sa ibabaw sang mataas nga bukid, pabaskoga ang tingug sa ila, iwaras ang kamot, nga magkadto sila sa mga ganhaan sang mga dungganon.

3 Ginsugo ko ang akon mga ginpakabalaan, gintawag ko man ang akon mga gamhanan, kay ang akon kaakig indi sa ila nga nagakasadya sa akon kamahalan.

4 Ang kagahod sang kadam-an sa mga kabukiran pareho sang iya sang dako nga katawhan, isa ka magamo nga kagahod halin sa mga ginharian sang mga nasyon nga nagtililipon, ang Ginuo sang mga Kasoldadohan nagatipon sang mga kasoldadohan para sa inaway.

5 Nagaabot sila halin sa isa ka malayo nga pungsod, halin sa punta sang langit, huo, ang Ginuo, kag ang mga armas sang iya kaakig, sa paglaglag sang bug-os nga duta.

6 Magtangis kamo, kay ang adlaw sang Ginuo nagahilapit na; magaabot ini bilang isa ka kalaglagan halin sa Makagagahum.

7 Gani ang tanan nga kamot magaluya, ang tagipusuon sang tagsa ka tawo magalunay;

8 Kag magakahadlok sila; dakpon sila sang tuman nga kasakit kag kasubo; makibot sila sa isa kag isa; ang ila mga nawong mangin pareho sang dabadaba.

9 Tan-awa, ang adlaw sang Ginuo magaabot, mapintas pareho nga naupdan sang kaugot kag mabangis nga kaakig, sa pagpamingaw sang duta; kag laglagon niya ang mga makasasala halin sa sini.

10 Kay ang mga bituon sang langit kag ang mga konstelasyon sini indi na maghatag sang ila kasanag; ang adlaw padulmon sa iya sini pagbutlak, kag ang bulan indi na magpasilak sang iya kasanag.

11 Kag silotan ko ang kalibutan tungod sang kalainan, kag ang mga malain tungod sang ila kalainan; pauntaton ko ang pagkahambog sang mga bugalon, kag pauntaton ko ang pagkabugalon sang mga makakululba.

12 Himuon ko nga mas malahalon pa ang tawo sangsa puraw nga bulawan; bisan ang isa ka tawo sangsa puro nga bulawan sang Ofir.

13 Gani, uyogon ko ang kalangitan, kag ang duta magahalin sa iya lugar, sa kaakig sang Ginuo sang mga Kasoldadohan, kag sa adlaw sang iya mabangis nga kaakig.

14 Kag mangin pareho ini sing isa ka usa nga ginalagas, kag pareho sing isa ka carnero nga wala sing manugpahalab; kag sila magapauli ang tagsa ka tawo sa iya kaugalingon nga katawhan, kag magapalagyo ang tagsa sa iya kaugalingon nga duta.

15 Ang tagsa nga bugalon panuhugon; huo, ang tagsa nga magaupod sa mga malain malaglag sa espada.

16 Ang ila man mga anak pagadugmukon sa atubang sang ila mga mata; ang ila mga balay pagakawatan kag ang ila mga asawa pagaluguson.

17 Tan-awa, painiton ko batok sa ila ang mga Medianhon, nga indi magsapak sang pilak kag bulawan, kag indi man magakalipay sa sini.

18 Ang ila mga pana magadugmok man sang mga pamatan-on; kag indi sila magkaluoy sa bunga sang tiyan; ang ila mga mata indi magkaluoy sa mga kabataan.

19 Kag ang Babilonia, ang himaya sang mga ginharian, ang katahum sang pagkaharianon sang mga Caldeanhon, mangin pareho sang Sodoma kag Gumora sang ginlaglag ini sang Dios.

20 Indi na gid ini pagtawohan, kag indi pagpuy-an pa sa tanan nga henerasyon: kag ang mga Arabianhon indi na magpatindog sang tolda didto; kag ang mga manugpahalab sang carnero indi na magpahigda sang ila mga panong didto.

21 Kundi mabangis nga mga sapat sang desyerto ang magahigda didto; kag ang ila mga balay mapuno sang masinulub-on nga mga sapat; kag mga bukaw ang magapuyo didto, kag maila nga mga kanding ang magalinumpat-lumpat didto.

22 Kag ang mabangis nga mga sapat sang mga isla ang magainuwang sa ila mamingaw nga mga balay, kag ang mga dragon sa ila matahum nga mga palasyo; kag ang iya tion nagahilapit na nga mag-abot, kag indi na pagpalawigon pa ang iya adlaw. Kay laglagon ko sia sing gilayon; huo, kay mangin maluluy-on ako sa akon katawhan, apang mawala ang mga malain.