“Pebrero 3–9. 2 Nefi 1–5: ‘Nagpuyo Kami suno sa Paagi sang Kalipayan,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)

“Pebrero 3–9. 2 Nefi 1–5,” Dali, Magsunod sa Akon—Para sa mga Indibidwal kag mga Pamilya: 2020

Litrato

Si Adan kag Eva nga nagabiya sang Hardin sang Eden

Si Adan kag si Eva, ni Douglas Fryer

Pebrero 3–9

2 Nefi 1–5

“Nagpuyo Kami suno sa Paagi sang Kalipayan”

Ang balaan nga mga kasulatan sarang magbukas sang pwertahan padulong sa personal nga rebelasyon. Sa imo pagbasa sang 2 Nefi 1–5, mahimo nga matalupangdan mo nga ang Ginuo may isa ka butang nga gusto Niya itudlo sa imo.

Isulat Ang Imo Mga Panghunahuna

Kon nahibal-an mo nga ang imo kabuhi malapit na lang matapos, ano ang imo ipamilin-bilin sa imo mga pinakapalangga? Sang si propetang Lehi nakabatyag nga malapit na lang sia mapatay, gintipon niya ang iya mga kabataan sa ulihi nga tion agud magpropesiya kag magpaambit sang mga kamatuoran sang ebanghelyo nga iya ginpakamahal sa mga tawo nga iya ginapakamahal. Nagpanudlo sia parte sa kahilwayan, pagtuman, ang Pagkapukan ni Adan kag ni Eva, pagtubos paagi kay Jesucristo, kag kalipay. Indi tanan sang iya kabataan ang nagbaton sang iya katapusan nga panaksihon, pero ang mga nagbaton—upod sa minilyon nga nagabasa sini karon—nakasalapo sa iya panaksihon sang mga prinsipyo para magpangabuhi “suno sa paagi sang kalipayan” (2 Nefi 5:27).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

2 Nefi 2

Hilway ako nga magpili sang wala katapusan nga kabuhi.

Si Elder D. Todd Christofferson nagsiling: “Luyag sang Dios nga ang Iya mga anak mag-akto suno sa kahilwayan sa pagpili nga Iya ginhatag sa ila. … Iya plano kag Iya pagbuot nga yara sa aton ang mayor nga papel sa pagdesisyon sa istorya sang aton mismo nga kabuhi” (“Free Forever, to Act for Themselves,” Ensign ukon Liahona, Nob. 2014, 16). Sa iya mga pinanudlo parte sa kahilwayan sa pagpili, ginsambit ni Lehi ang kinahanglanon nga mga kondisyon nga naghimo sang kahilwayan sa pagpili nga posible kag magatugot sa aton nga malab-ot ang aton diosnon nga potensyal, lakip na ang masunod:

Ihibalo parte sa maayo kag malain (2 Nefi 2:5)
Layi nga ginhatag sa katawhan (2 Nefi 2:5)
Nagakontrahanay, makagalanyat nga mga pililian (2 Nefi 2:11)
Gahum sa pag-akto (2 Nefi 2:16)

Sa imo pagbasa sang 2 Nefi 2, ano ang imo matun-an parte sa tagsa sining mga kondisyon sang kahilwayan kag sang ila relasyon sa isa kag isa? Ano ang matabo sa aton kahilwayan sa pagpili kon wala ang isa ukon mas madamo pa sining mga kondisyon? Ano pa ang imo matun-an parte sa kahilwayan sa pagpili gikan sa mga pulong ni Lehi?

2 Nefi 2:22–29

Ang Pagkapukan kag ang Pagbayad-Sala ni Jesucristo importante nga mga bahin sang plano sang Amay nga Langitnon.

Ginatan-aw sang madamo nga tawo nga ang Pagkapukan ni Adan kag Eva isa ka trahedya. Pero, ang pinanudlo ni Lehi parte sa Pagkapukan nagapakita kon ngaa kinahanglanon ato nga parte sang plano sang Amay para sa aton wala katapusan nga pag-uswag. Sa imo pagbasa sining mga bersikulo, pangitaa kon ngaa ang Pagkapukan kinahanglan gid nga matabo para kita—mga anak sang Amay nga Langitnon—magprogreso. Paano ang nagabayad-sala nga sakripisyo sang Maluluwas nagtubos sa aton gikan sa Pagkapukan?

Tan-awa man sa Moses 5:9–12; 6:51–62.

2 Nefi 3:6–24

Si Joseph Smith ang gintangdo (foreordained) nga magpanumbalik sang ebanghelyo.

Ang katapusan nga bahin sang 2 Nefi 3 nagalakip sang propesiya nga ginhatag ni Jose sang Egipto parte sa isa ka manugpanan-aw sa palaabuton nga pareho sa iya ngalan (tan-awa sa mga bersikulo 14–15)—Joseph Smith. Madamo man ini sang ginahambal parte sa misyon ni Joseph Smith. Ano ang ginahambal sa mga bersikulo 6–24 nga himuon ni Joseph Smith, nga isa ka “pinili nga manugpanan-aw (seer),” agud bugayan ang katawhan sang Dios? Paano ang buluhaton ni Joseph Smith nangin may “dako sing bili” sa imo?

Isa ka importante nga bahin sang misyon ni Joseph Smith amo ang pagpa-gwa sang mga sinulatan sang mga kaliwat ni Jose, nga nalakip sa Libro ni Mormon. Ano ang imo matun-an sa sini nga kapitulo parte sa importansya sang Libro ni Mormon?

Tan-awa man sa Joseph Smith Translation, Genesis 50:24–38 (sa appendix sang LDS nga Ingles nga bersyon sang Biblia).

2 Nefi 4:15–35

Makadangop ako sa Dios sa akon kahuyang.

Bag-o lang mailo sa amay si Nefi. Ang responsibilidad sa pagpanguna sang iya pamilya nabilin na karon sa iya. Pamatyagan niya ginapalibutan sia sang tentasyon kag nagapangluya bangod sa iya mga sala. Bisan pa nga lain ang imo sirkumstansya sangsa iya ni Nefi, maintiendihan mo ang iya mga panghunahuna kag emosyon nga narekord sa 2 Nefi 4:15–35. Ano ang nakabulig kay Nefi sa iya mga kabudlayan? Paano makabulig sa imo ang reaksyon ni Nefi sa iya mga hangkat sa pag-atubang sang imo mga kabudlayan?

2 Nefi 5

Ang kalipayan masalapuan sa pagpangabuhi sang ebanghelyo.

Paano mo ilaragway ang kalipayan? Ginsulat ni Nefi nga ang iya katawhan nagpangabuhi “suno sa paagi sang kalipayan” (2 Nefi 5:27). Mahimo mo nga pangitaon ang mga pagpili nga ginhimo ni Nefi kag sang iya katawhan nga nagdala sa ila sa kalipayan—mga paagi nga ginsuportahan nila ang kada isa kag ang ila mga pamilya, ang ila ginahatagan sang bili sa ila komunidad, kag madamo pa. Ano ang imo matun-an nga makabulig sa imo nga magpatukod sang kabuhi nga may kalipay, pareho sang ginhimo sang katawhan ni Nefi?

2 Nefi 5:20–21

Ano ang sumpa nga nagtupa sa mga Lamanhon?

Sang panahon ni Nefi ang sumpa sa mga Lamanhon amo nga “[ginsikway] sila sa nahamtangan [sang Ginuo] … tungod sang ila kalautan” (2 Nefi 5:20–21). Ang buot silingon sini amo nga ang Espiritu sang Ginuo nagbiya na sa ila pangabuhi. Sang ginbaton sang ulihi sang mga Lamanhon ang ebanghelyo ni Jesucristo, “ang pagpakamalaut sang Dios wala na sila pagsundi pa” (Alma 23:18).

Ginsiling man sa Libro ni Mormon nga ang tanda sang maitom nga pamanit nag-abot sa mga Lamanhon pagkatapos nga nagseparar ang mga Nefinhon sa ila. Ang kinaiya kag hitsura sining tanda wala gid maintiendihan sing lubos. Sang primero ang tanda ang nagapain sang mga Lamanhon sa mga Nefinhon. Sang ulihi, sang pareho nga nag-agi ang mga Nefinhon kag Lamanhon sa mga panahon sang kalautan kag pagkamatarong, nangin wala na sang kapuslanan ang marka bilang tanda sang estado sang mga Lamanhon sa atubang sang Dios.

Ginapamatud-an sang mga propeta sa aton panahon nga ang maitom nga pamanit indi tanda sang diosnon nga pagkadisgusto ukon sumpa. Ginasuportahan sang Simbahan ang pinanudlo ni Nefi nga ang Ginuo “wala sang ginadumilian nga bisan sin-o nga nagakari sa iya, itom kag puti, ulipon kag hilway, lalaki kag babayi” (2 Nefi 26:33). Gindeklarar ni Pangulong Russell M. Nelson: “Ginahambal gid sang Ginuo ang Iya importante nga doktrina sang alalangay nga oportunidad para sa Iya mga anak. … Ang mga kinalain sa kultura, lenggwahe, sari [gender], rasa, kag nasyonalidad nagakawad-an sang importansya sa pagsulod sang matinuohon sa dalan sang kasugtanan kag sa iya pagpalapit sa aton pinalangga nga Manunubos” (“President Nelson Remarks at Worldwide Priesthood Celebration” [Hunyo 1, 2018], newsroom.ChurchofJesusChrist.org).

Tan-awa man sa “Till We All Come in the Unity of the Faith” (video, ChurchofJesusChrist.org).

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sang imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

2 Nefi 1:13–25

Ano ang ginatudlo sining mga bersikulo sa aton parte sa dalagko nga mga handum sang isa ka matarong nga ginikanan para sa iya mga kabataan?

2 Nefi 3:6

Ano si Joseph Smith bilang manugpanan-aw? Ngaa mapinasalamaton kita para sa buluhaton nga nahuman ni Joseph Smith? (tan-awa sa 2 Nefi 3:6–24).

2 Nefi 4:20–25

Samtang inyo ginabasa ang 2 Nefi 4:20–25 sing ululupod, magpundo pagkatapos sang tagsa ka bersikulo, kag agdaha ang mga miyembro sang pamilya nga magpaambit kon san-o nila naeksperiyensyahan ukon nabatyagan ang ginalaragway ni Nefi. Ano ang nabuhat na sang Dios para sa aton pamilya?

2 Nefi 5

Ano ang pila sa mga paagi nga nagapangabuhi ang imo pamilya “suno sa paagi sang kalipayan”? Sa pagbasa sang imo pamilya sang 2 Nefi 5, mahimo ninyo hambalan ang mga butang nga ginaulikdan sang mga Nefinhon: pamilya (bersikulo 6), mga kasuguan (bersikulo 10), balaan nga mga kasulatan (bersikulo 12), edukasyon (bersikulo 15), mga templo (bersikulo 16), trabaho (bersikulo 17), kag mga calling sa Simbahan (bersikulo 26). Isa ka paagi agud himuon ini amo ang magpangita sang mga bagay nga nagarepresentar sang pila sining mga butang kag hambalan kon paano naton ipakita nga kita, pareho sang mga Nefinhon, nagahatag man sang bili sa sining mga butang.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magmangin mapanilagon. Kon hatagan mo sang atensyon ang nagakalatabo sa mga kabuhi sang imo kabataan, makakita ka sang maayo nga mga oportunidad sa pagtudlo. Ang mga komento ukon pamangkot sang imo kabataan mahimo man nga mangin oportunidad para sa pagtudlo. (Tan-awa sa Teaching in the Savior’s Way, 16.)