Indi Akon Pagbuot, Kundi ang Imo, Pagatumanon, ni Harry Anderson

Pebrero 10–16

2 Nefi 6–10

“O Daw Ano Kadako ang Plano sang Aton Dios!”

Sa imo pagbasa sang 2 Nefi 6–10, binagbinaga kon ano ang gusto itudlo sa imo sang Ginuo. Sa imo pagkilala sining mga kamatuoran, isulat ang mga ini kag pamensara sang mainampuon kon paano mo aktuhan ang imo natun-an.

Isulat Ang Imo Mga Panghunahuna

May 40 ka tuig na halin sang magbiya ang pamilya ni Lehi sa Jerusalem. Ara sila sa indi kilala kag bag-o nga lugar, tunga sang kalibutan ang kalayuon sa Jerusalem kag sa iban nga katawhan sang kasugtanan sang Dios. Napatay na si Lehi, kag ang iya kaliwatan nagsugod na sang mangin mga-siglo-nga-kalawigon nga pag-ilinaway sa tunga sang mga Nefinhon—“nga nagapati sa mga paandam kag mga [rebelasyon] sang Dios”—kag sang mga Lamanhon, nga wala nagapati (2 Nefi 5:6). Sa sining mga sirkumstansya, si Jacob, nga manghod ni Nefi kag karon gin-ordinan nga titser sa mga Nefinhon, gusto nga magpahibalo sa katawhan sang kasugtanan nga ang Dios indi gid magkalipat sa ila, gani indi sila dapat malipat sa Iya. Isa ini ka mensahe nga kinahanglanon matuod naton sa aton mismo nga kalibutan, kon sa diin ang mga kasugtanan ginapakanubo kag ang rebelasyon ginasikway. “Dumdumon naton sia, … kay wala kita ginsikway. … Dalagko ang mga panaad sang Ginuo,” siling niya (2 Nefi 10:20–21). Kaupod sining mga pangako, wala na sang mas madako pa sangsa pangako sang isa ka “wala’y dulunan nga pagpasag-uli” agud malampuwasan ang kamatayon kag impiyerno (2 Nefi 9:7). “Gani,” naghingapos si Jacob sa mga pulong, “magkasadya ang inyo mga tagipusuon”! (2 Nefi 10:23).

Mga Ideya para sa Personal nga Pagtuon sang Balaan nga Mga Kasulatan

2 Nefi 6–8

Ang Ginuo maluluy-on sa Iya katawhan kag magatuman sa Iya mga pangako.

Agud buligan ang iya katawhan nga maintiendihan nga kabahin sila sang panimalay sang Israel kag makasalig sa Dios kag sa Iya mga pangako, si Jacob nagsambit sang mga propesiya ni Isaias, nga narekord sa 2 Nefi 6–8. Si Isaias naglaragway sang paglinapta sang Israel kag sang ginpangako sang Manluluwas nga pagtipon kag pagtubos sang Iya katawhan. Sa imo pagbasa, binagbinaga ang mga pamangkot pareho sa masunod:

• Ano ang akon matun-an parte sa nagatubos nga pagpalangga sang Manluluwas sa akon?

• Ano ang kaumpawan nga ginatanyag sang Manluluwas sa ila nga nagapangita sa Iya?

• Ano ang himuon ko agud mas matutom nga “maghulat” sa Manluluwas kag sa Iya ginpangako nga mga bugay?

2 Nefi 9:1–26

Paagi sa Iya Pagbayad-Sala, si Jesucristo nagahilway sang tanan nga tawo gikan sa pisikal kag espirituhanon nga kamatayon.

Ano nga mga tinaga ukon imahe ang imo gamiton agud ipalab-ot sa isa ka tawo ang aton tuman nga panginahanglan para sa isa ka Manunubos nga magsalbar sa aton gikan sa kamatayon kag sala? Si Jacob naggamit sang mga tinaga nga “makahaladlok” kag “gadya [monster].” Ano ang gintudlo ni Jacob parte “sinang gadya, kamatayon kag impiyerno” kag sang “alagyan sa pagpalagyo” nga ginhanda sang Dios para sa aton? (2 Nefi 9:10). Sa imo pagbasa sang 2 Nefi 9:1–26, pamensara nga markahan sa isa ka kolor ang matabo sa aton kon wala ang Pagbayad-Sala ni Jesucristo. Dayon, sa lain nga kolor, mahimo mo markahan ang aton mabaton paagi sa Pagbayad-Sala sang Manluluwas. Ano nga mga kamatuoran ang imo makita parte sa Pagbayad-Sala ni Jesucristo nga nagatulod sa imo nga dayawon ang “kaalam sang Dios, ang iya kaluoy kag grasya”? (2 Nefi 9:8).

 

2 Nefi 9:27–54

Mahimo ako magpalapit kay Cristo kag magbaton sang mahimayaon nga mga bugay sang Iya Pagbayad-Sala.

Si Jesucristo nagkari “sa kalibutan agud nga iya maluwas ang tanan nga mga tawo kon magpamati sila sa iya tingug” (2 Nefi 9:21; mga italics gindugang). Sa iban nga pulong, kinahanglan handa kita sa pagbaton sang nagapangluwas nga mga bugay nga Iya ginatanyag. Pagkatapos ilaragway ang dakong plano sang pagtubos, naghatag si Jacob sang importante nga mga paandam kag imbitasyon, nga makita sa 2 Nefi 9:27–54, agud buligan kita nga mabaton ang mga bugay sang Pagbayad-Sala. Pamensara nga ilista ang mga ini sa isa ka tsart pareho sini:

Mga Paandam	Mga Imbitasyon
Mga Paandam	Mga Imbitasyon
Mga Paandam	Mga Imbitasyon

Ano ang ginapabatyag sang Espiritu nga imo himuon bilang aksyon sa sining mga paandam kag mga imbitasyon?

2 Nefi 10:20, 23–25

Bangod sang sakripisyo ni Jesucristo, mahimo ko nga “pasadyahon” ang akon tagipusuon.

Ang mensahe ni Jacob masinadyahon. “Ginahambal ko sa inyo ining mga butang,” siling niya, “agud nga kamo magkasadya, kag ibayaw ang inyo mga ulo sa wala’y katubtuban” (2 Nefi 9:3). Sa imo pagbasa sang 2 Nefi 10:20, 23–25, ano ang nakita mo nga nagahatag sa imo sang paglaum? Ano pa gid ang imo nakita sa 2 Nefi 9–10 nga naghatag sa imo sang paglaum? Ano ang imo himuon agud madumduman ining mga butang kon ginapangluyahan ka?

Tan-awa man sa Juan 16:33.

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

2 Nefi 8:3–7

Samtang imo ginabasa ang 2 Nefi 8:3, mahimo mo ipakita ang mga litrato sang isa ka disyerto kag isa ka hardin. Paano ginabayluhan sang Ginuo ang mga disyerto sang aton mga kabuhi sang mga hardin? Sa bersikulo 4–7, ano ang ginalaygay sa aton sang Ginuo nga himuon naton agud mabaton ang kalipay nga ginalaragway sa bersikulo 3?

2 Nefi 8:24–25

Paano ang nagapaisog nga mga pulong ni Isaias sa katawhan sang Sion makapabakod sa aton sa aton pagtinguha nga mangin mas matinuohon nga mga disipulo ni Jesucristo? Paano magkaanggid ang pagbugtaw kag pagsuksok sang bayo sa kon ano ang gusto sang Dios nga himuon naton sa espirituhanon?

2 Nefi 9:1–26

Paano mas maintiendihan sang imo pamilya ang kasangkaron sang “wala’y dulunan nga pagpasag-uli” ni Jesucristo? (bersikulo 7). Ayhan mahimo sila magpangita ukon magpanumdom sang mga butang nga daw wala sing dulunan ang kadamuon—mga dahon sang hilamon sa wayang, mga balas sa baybay, ukon mga bituon sa langit. Paano nangin wala dulunan ang Pagbayad-Sala sang Manluluwas? Ano nga mga dinalan sa 2 Nefi 9 ang nagapasangkad sang aton kapasalamatan sa ginhimo sang Manluluwas para sa aton?

2 Nefi 9:27–44

Ayhan sa isa ka adlaw sining semana ang imo pamilya mahimo magbasa sang 2 Nefi 9:27–38, nga nagapangita sang mga paandam (nga ginasugdan sang “kailo”). Diin sini sa ila ang mas labing importante nga hambalan sang inyo pamilya? Sa iban nga adlaw, pwede ninyo basahon ang 2 Nefi 9:39–44, nga ginapangita ang kon ano ang gin-agda ni Jacob nga tandaan sang iya katawhan.

2 Nefi 9:28–29, 50–51

Ano ang pila ka mga halimbawa sang “pagkabugalon, kag ang mga kahuyangan, kag ang pagkabuang-buang sang mga tawo”? (bersikulo 28). Ano ang pwede naton himuon agud hatagan sang mas dako nga bili ang mga butang sang Dios kag buhinan ang mga butang sa kalibutan.

2 Nefi 9:45

Mahimo nga malingaw ang imo pamilya sa pag-obra sang papel nga kadena kag dayon bulos-bulos nga pagsuksok kag pag-uyog-hukas sini. Paano ang mga sala pareho sang mga kadena? Paano kita ginabuligan sang Manluluwas nga hukson ini?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magmangin yara pirme kag mahapos palapitan. “Pila sa pinakanami nga tion sang pagtudlo nagasugod sa pamangkot ukon palaligban sa tagipusuon sang isa ka miyembro sang [pamilya]. … Ipahibalo sa ila paagi sa imo mga tinaga kag aksyon nga malipayon ka magpamati sa ila” (Teaching in the Savior’s Way, 16).

Luwason sang Manluluwas ang tanan nga mga anak sang Dios “kon magpamati sila sa iya tingug” (2 Nefi 9:21). Nagpang-ayo Sia sang Madamo nga Nagkalain-lain nga mga Balatian, ni J. Kirk Richards