Si Lehi nga nagatulok sa Liahona

Si Lehi kag ang Liahona, ni Joseph Brickey

Enero 27–Pebrero 2

1 Nefi 16–22

“Ihanda Ko ang Alagyan sa Inyo Unahan”

Sa imo pagtuon sang 1 Nefi 16–22, magpangita sang mga dinalan nga nanamian mo. Ang iban nga tawo nanamian mag-highlight sining mga dinalan sa ila balaan nga mga kasulatan; ang iban nagasulat sang mga tanda sa kilid. Pamensara kon paano mo irekord ang mga pagpabatyag nga imo mabaton.

Isulat Ang Imo Mga Panghunahuna

Samtang nagabiyahe ang panimalay ni Lehi padulong sa duta nga ginpangako, ang Ginuo naghimo sining pangako sa ila: “Ihanda ko ang alagyan sa inyo unahan, kon lamang tumanon ninyo ang akon mga kasuguan” (1 Nefi 17:13). Maathag, ang ina nga pangako wala nagakahulugan nga mangin mahapos ang biyahe—ang mga miyembro sang pamilya nagbinaisay sa gihapon, nagkalabali ang mga pana, kag nabudlayan ang mga tawo kag napatay, kag kinahanglan pa nila nga magpasad sang barko halin sa wala pa maproseso nga materyales. Pero, sang magpangatubang ang pamilya sang kabudlayan ukon sang daw imposible nga mga buluhaton, ginkilala ni Nefi nga ang Ginuo wala nagapalayo. Nakahibalo sia nga ang Dios “nagabatiti [sang matinuohon], kag ginapabakod sila, kag ginahatagan sing mga paagi nga sa sini mahimo nila ang butang nga iya ginasugo sa ila” (1 Nefi 17:3). Kon nagakatingala ka kon ngaa nagakatabo ang malain nga mga butang sa maayo nga mga tawo pareho nanday Nefi kag sang iya pamilya, mahimo nga may makita ka nga sabat sa sining mga kapitulo. Pero basi mas importante, makita mo kon ano ang ginahimo sang maayo nga mga tawo kon matabo ang malain nga mga butang.

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

1 Nefi 16–18

Kon tumanon ko ang mga kasuguan, buligan ako sang Dios nga atubangon ang mga problema.

Ang mga kapitulo 16–18 sang 1 Nefi nagalaragway sang pila ka mga problema nga gin-atubang sang pamilya ni Nefi, lakip na ang pagsolbar sang nabali nga pana (tan-awa sa 1 Nefi 16:17–32), ang kamatayon ni Ismael (tan-awa sa 1 Nefi 16:34–39), pagpasad sang barko (tan-awa sa 1 Nefi 17:7–16; 18:1–4), kag kagamo sa pamilya (tan-awa sa 1 Nefi 18:9–22). Ano ang nangin kinalain sang mga sabat ni Nefi sa sining mga problema sa sabat sang pila ka mga miyembro sang iya pamilya? Ano ang konsikwensya sining mga sabat?

Basi makabulig ang pagsulat sang imo makita sa mga kahon nga may tig-ulo pareho sini: “Problema,” “Reaksyon ni Nefi,” “Reaksyon sang Iban,” kag “Mga Resulta.” Ngaa sa banta mo nga nasarangan ni Nefi nga magpadayon nga matinuohon sang ang iban nawad-an na sing pagtuo? Hunahunaa kon paano ang halimbawa ni Nefi kag sang iya pamilya makabulig sa imo sa imo mga problema.

Tan-awa man sa magkaanggid nga mga video sa koleksyon sang Book of Mormon Videos sa ChurchofJesusChrist.org ukon sa Gospel Library app.

1 Nefi 16:10–16, 23–31; 18:11–22

Ang Ginuo nagagiya sa akon paagi sa magagmay kag simple nga mga butang.

Sang gindala sang Dios ang pamilya ni Lehi sa kamingawan (wilderness), wala Niya sila ginhatagan sang detalyado nga plano sang pagbiyahe pakadto sa duta nga ginpangako. Pero ginhatagan Niya si Lehi sang Liahona para giyahan ang iya pamilya adlaw-adlaw padulong sa ila destinasyon. Ano ang ginhatag sang Amay nga Langitnon sa imo para maghatag sang giya kag direksyon? Ano sa banta mo ang kahulugan sang “sa magagmay nga mga paagi ang Ginuo mahimo nga makapahanabo sang dalagko nga mga butang”? (1 Nefi 16:29).

Sa imo pagbasa sang 1 Nefi 16:10–16, 23–31 kag 18:11–22, pamensara ang paglista sang mga prinsipyo nga nagapakita kon paano ang Dios nagagiya sang Iya mga anak (halimbawa, ang 1 Nefi 16:10 makatudlo sa imo nga ang Dios kon kaisa nagagiya sa aton sa paagi nga wala ginapaabot). Ano ang imo mga eksperiyensya sa sining mga prinsipyo?

Tan-awa man sa Alma 37:7, 38–47; Doktrina kag mga Kasugtanan 64:33–34.

Si Lehi nga nagagamit sang Liahona

Kon Handa Kamo Indi Kamo Mahadlok, ni Clark Kelley Price

1 Nefi 19:23–24; 20–22

Mahimo ko “[ibagay] ang tanan nga balaan nga mga kasulatan” sa akon kaugalingon.

Si Isaias nagsulat sa tanan nga mga anak sang Israel, kag nakita ni Nefi nga nalakip diri ang iya gid mismo nga pamilya—kag lakip ka diri (tan-awa sa 1 Nefi 19:23–24). Parte sa mga sinambit ni Nefi halin kay Isaias, si Pangulong Henry B. Eyring nagsiling, “Ginbasa ko ang mga pulong ni Isaias … nga ginapamensar nga ginpili ni Nefi ang mga parte halin sa Isaias, nga wala nagapalibog sa mga simbolo, nga pwede ko dalhon direkta sa akon tagipusuon nga daw pareho bala nga ang Ginuo nagahambal sa akon” (“The Book of Mormon Will Change Your Life,” Ensign, Peb. 2004, 10).

Nga ginapanumdom ang mga ginhambal ni Pangulong Eyring, hunahunaa ang mga pamangkot pareho sa masunod samtang ginabasa mo ang mga kapitulo 20–22:

1 Nefi 20:1–9.Ano nga mga dinalan sa sining mga bersikulo ang nagalaragway sang mga anak sang Israel? Paano sini ginalaragway sanday Laman kag Lemuel? Ano nga mga paandam kag pagdapat (application) ang imo nakita para sa imo kaugalingon?

1 Nefi 20:17–22.Paano gingiyahan sang Ginuo ang mga anak sang Israel? Paano Niya gingiyahan ang pamilya ni Lehi? Paano ka Niya ginagiyahan?

Ano pa gid ang imo makita sa 1 Nefi 20–22 nga nagapabatyag sa imo nga daw ang Ginuo mismo ang nagahambal sa imo? Paano nakabulig sa imo ang komentaryo ni Nefi sa kapitulo 22 nga maintiendihan ang mga ginpropesiya ni Isaias?

1 Nefi 21

Sino ang nalakip sa panimalay sang Israel kag sang mga Gentil?

Ang panimalay sang Israel amo ang kaapuhan sang propeta sa Daan nga Katipan nga si Jacob, nga ginhingadlan nga Israel sang Ginuo (tan-awa sa Genesis 32:28; 35:10). Ang Ginuo naghimo sang pat-od nga mga kasugtanan kay Israel, kag ang iya mga kaapuhan ginkabig nga mga katawhan sang kasugtanan sang Dios. Ugaling, pila ka henerasyon sang ulihi, madamo sa ila ang nagtalikod sa Ginuo kag sang ulihi naglinapta sa bug-os nga kalibutan.

Ang termino nga mga Gentil sa sining mga dinalan nagatumod sa mga tawo nga wala pa sang ebanghelyo. Si Isaias nagpanudlo nga sa ulihing mga adlaw ang mga Gentil pagahatagan sang ebanghelyo kag mangin mga instrumento sa pagtudlo kag pagtipon sang panimalay sang Israel (tan-awa sa 1 Nefi 21:22; 22:8–12; tan-awa man sa Isaias 60; 66:18–20).

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

1 Nefi 17:1–6, 17–22

Ayhan pwede ikumparar sang imo pamilya ang pagsaysay ni Nefi sang pagbiyahe sa kamingawan (tan-awa sa 1 Nefi 17:1–6) sa pagsaysay sang iya mga kauturan (tan-awa sa 1 Nefi 17:17–22). Ngaa sa banta mo nga lain-lain ang ila panan-aw sa pareho nga mga hitabo? Ano ang matun-an naton kay Nefi parte sa pag-angkon sang matinuohon nga panan-aw?

1 Nefi 17:17–22; 18:9–16

Ano ang mga konsikwensya sang kahisa, pag-ilinaway, kag pagreklamo sa sulod sang pamilya? Paano naton malampuwasan ining mga problema?

1 Nefi 19:22–24

Ginbagay ni Nefi ang balaan nga mga kasulatan sa iya pamilya “agud nga mangin para ini sa [ila] kapuslanan kag tinun-an” (1 Nefi 19:23). May pila ka mga istorya sa 1 Nefi 16–18 nga pwede gamiton sang imo pamilya sa inyo kaugalingon. Basi pwede ninyo nga idrama-drama ang isa sining mga istorya kag hambalan kon paano ini magamit sa inyo pamilya.

1 Nefi 21:14–16

Paano ayhan mabuligan sang mensahe sa sining mga bersikulo ang isa ka tawo nga nagabatyag nga daw nalimtan na sia?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Magpangayo sa Ginuo sang bulig. Ang balaan nga mga kasulatan ginhatag paagi sa rebelasyon, kag kinahanglan naton sang rebelasyon para maintiendihan ang mga ini. Ang Ginuo nangako, “Kon [kamo] … mamangkot sa akon sa pagtuo, … pat-od nga ining mga butang igapahibalo sa inyo” (1 Nefi 15:11).

Si Nefi kag ang iya pamilya nagasakay sa barko

Ginpaagyan Nila Ako Sang Tuman nga Kapintas, ni Walter Rane