1 Pamatii kag dungga ini, O panimalay ni Jacob, nga gintawag suno sa ngalan ni Israel, kag nagbutwa sa mga tubig sang Juda, ukon halin sa mga tubig sang pagbunyag, nga nagapanumpa sa ngalan sang Ginuo, kag nagasambit sang Dios sang Israel, apang wala sila nagapanumpa sa kamatuoran ukon sa pagkamatarong.

2 Apang, ginatawag nila ang ila mga kaugalingon nga iya sang balaan nga siyudad, apang wala sila nagapabakod sang ila mga kaugalingon sa Dios sang Israel, nga amo ang Ginuo sang mga Kasoldadohan; huo, ang Ginuo sang mga Kasoldadohan amo ang iya ngalan.

3 Tan-awa, ginpahayag ko ang una nga mga butang halin sa ginsuguran; kag naggwa ang mga ini sa akon baba, kag ginpakita ko ang mga ini. Gulpi ko ginpakita ang mga ini.

4 Kag ginhimo ko ini bangod nahibal-an ko nga batinggilan ka, kag ang imo liog daw salsalon, kag ang imo agtang daw saway;

5 Kag ginpahayag ko sa imo sa pagsugod pa lang; antes ini natabo ginpakita ko ang mga ini sa imo; kag ginpakita ko ang mga ini sa kahadlok nga basi magsiling ka—Ang akon dios-dios amo ang naghimo sang mga ini, kag ang akon imahen nga tinigban, kag ang akon imahen nga tinunaw amo ang nagsugo sang mga ini.

6 Nakita kag nabatian mo ining tanan; kag indi mo bala pag-ipahayag ang mga ini? Kag ginpakita ko sa imo ang bag-o nga mga butang halin sa sini nga tion, bisan ang tinago nga mga butang, kag wala ka makahibalo sang mga ini.

7 Gintuga ang mga ini subong, kag indi halin sa ginsuguran, bisan antes sa adlaw nga kon san-o wala mo nabatian ang mga ini ginpahayag ang mga ini sa imo, kay basi magsiling ka—Tan-awa nahibal-an ko ang mga ini.

8 Huo, kag wala ka nakabati; huo, wala ka nakahibalo; huo, halin sa sina nga tion ang imo dulunggan wala nabuksi; kay nahibal-an ko nga magadaya ka gid, kag gintawag nga isa ka makasasala halin pa sa imo pagkatawo.

9 Apang, tungod sa akon ngalan ipaisol ko ang akon kaakig, kag tungod sa akon pagdayaw magapugong ako tungod sa imo, nga indi ko ikaw masikway.

10 Kay, tan-awa, ginpaputli ko ikaw, ginpili ko ikaw sa hurno sang pag-antos.

11 Tungod sa akon kaugalingon, huo, tungod sa akon kaugalingon pagahimuon ko ini, kay indi ko pagtugtan ang akon ngalan nga mahigkoan, kag indi ko pag-ihatag ang akon himaya sa iban.

12 Pamatii ako, O Jacob, kag Israel nga akon gintawag, kay ako amo sia; ako ang una, kag ako man ang katapusan.

13 Ang akon kamot nagpasad man sang pundasyon sang duta, kag ang akon tuo nga kamot naghumlad sang mga langit. Ginatawag ko sila kag nagatindog sila sing tingob.

14 Tanan kamo, magtililipon kamo, kag magpamati; sin-o bala sa ila ang nagpahayag sining mga butang sa ila? Palangga sia sang Ginuo; huo, kag magatuman sia sang iya pulong nga ginpahayag niya paagi sa ila; kag himuon niya ang iya pagbuot sa Babilonia, kag ang iya butkon magatupa sa mga Caldeanhon.

15 Siling man sang Ginuo; Ako nga Ginuo, huo, naghambal; huo, gintawag ko sia sa pagpahayag, gindala ko sia, kag pauswagon niya ang iya dalanon.

16 Magpalapit kamo sa akon; wala pa ako naghambal sa tago; halin sa ginsuguran, halin sa tion nga ini ginpahayag naghambal ako; kag ang Ginuong Dios, kag ang iya Espiritu, nagpadala sa akon.

17 Kag amo ini ang ginasiling sang Ginuo, ang imo Manunubos, ang Balaan sang Israel; ginpadala ko sia, ang Ginuo nga imo Dios nga nagatudlo sa imo sa kaayohan, nga nagatuytoy sa imo sa dalan nga imo pagalaktan, ang naghimo sini.

18 O, kon nagpamati ka sa akon mga kasugoan—kuntani ang imo paghidaet nangin pareho sing isa ka suba, kag ang imo pagkamatarong nangin pareho sang mga balod sang dagat.

19 Ang imo man kaliwatan nangin pareho sang balas; ang kaanakan sang imo tiyan nangin pareho sang magagmay nga bato; ang iya ngalan wala kuntani masikway ukon madula halin sa akon atubang.

20 Maggwa kamo sa Babilonia, magpalagyo kamo sa mga Caldeanhon, upod ang isa ka tingug sang pagkanta magpahayag kamo, isugid ini, imitlang sa punta sang kalibutan; magsiling kamo: Gintubos sang Ginuo ang iya alagad nga si Jacob.

21 Kag wala sila pag-uhawa; gintuytuyan niya sila sa pag-agi sa mga desyerto; ginpailig niya ang mga tubig sa bato para sa ila; ginpihak man niya ang bato kag ang mga tubig nagsagawak.

22 Kag bisan nga ginhimo niya ini tanan, kag labaw pa sa sini, wala sing paghidaet, siling sang Ginuo, sa mga malain.