1 Kag karon luyag ko nga inyo mahibal-an nga pagkatapos nga ang akon amay nga si Lehi nakahuman sa pagpropesiya parte sa iya kaliwatan, natabo ini nga ang Ginuo naghambal liwat sa iya, nga nagasiling nga indi nagakabagay para sa iya, kay Lehi, nga ang iya lamang panimalay ang iya dal-on sa kamingawan; kundi nga ang iya mga anak nga lalaki dapat nga magdala sang mga dalaga nga pangasaw-on, agud magbangon sila sang kaliwatan para sa Ginuo sa duta sang panaad.

2 Kag natabo ini nga ang Ginuo nagsugo sa iya nga ako, si Nefi, kag ang akon mga kauturan, dapat magbalik liwat sa duta sang Jerusalem, kag dal-on si Ismael kag ang iya panimalay padulong sa kamingawan.

3 Kag natabo ini nga ako, si Nefi, naglakat liwat, upod ang akon mga kauturan, padulong sa kamingawan agud magtaklad sa Jerusalem.

4 Kag natabo ini nga nagkadto kami sa puluy-an ni Ismael, kag naangkon namon ang kahamuot sa panulok ni Ismael, sa bagay nga ginhambal namon sa iya ang mga pulong sang Ginuo.

5 Kag natabo ini nga ginpahumok sang Ginuo ang tagipusuon ni Ismael, kag amo man ang iya panimalay, sa bagay nga nag-upod sila sa amon sa pagpanglakaton padulhog sa kamingawan padulong sa tolda sang amon amay.

6 Kag natabo ini nga samtang nagapanglakaton kami sa kamingawan, tan-awa sanday Laman kag Lemuel, kag duha sa anak nga babayi ni Ismael, kag ang duha ka anak nga lalaki ni Ismael kag ila mga panimalay, nagrebelde batok sa amon; huo, batok sa akon, si Nefi, kag kay Sam, kag sa ila amay, kay Ismael, kag sa iya asawa, kag sa iya tatlo pa ka anak nga babayi.

7 Kag natabo ini nga sa sina nga pagrebelde, luyag nila nga magbalik sa duta sang Jerusalem.

8 Kag karon ako, si Nefi, nga nagbatyag sing kasubo tungod sa katig-a sang ila mga tagipusuon, gani naghambal ako sa ila, nga nagasiling, huo, bisan kanday Laman kag Lemuel: Tan-awa mga magulang ko kamo, kag ngaa man nga sa pagkatig-a sang inyo mga tagipusuon, kag sa pagkabulag sang inyo mga kaisipan, nga nagkinahanglan pa kamo nga ako, ang inyo manghod, amo ang maglaygay sa inyo, huo, kag maghatag sa inyo sing ehemplo?

9 Ngaa man nga wala kamo nagapamati sa pulong sang Ginuo?

10 Ngaa man nga inyo nalimtan nga nakakita kamo sing isa ka anghel sang Ginuo?

11 Huo, kag ngaa man nga inyo nalimtan kon ano kadako nga mga butang ang ginhimo sang Ginuo para sa aton, sa pagluwas sa aton halin sa mga kamot ni Laban, kag amo man agud makuha naton ang kasulatan?

12 Huo, kag ngaa man nga inyo nalimtan nga ang Ginuo makasarang sa paghimo sang tanan nga butang suno sa iya kabubut-on, para sa mga anak sang katawhan, kon lamang gamiton nila ang ila pagtuo sa iya? Gani, mangin tampad kita sa iya.

13 Kag kon tampad lamang kita sa iya, maangkon naton ang duta sang panaad; kag inyo mahibal-an sa palaabuton nga tion nga ang pulong sang Ginuo matuman parte sa pagkalaglag sang Jerusalem; kay ang tanan nga butang nga ginpahayag sang Ginuo parte sa pagkalaglag sang Jerusalem pat-od gid nga matuman.

14 Kay tan-awa, ang Espiritu sang Ginuo sa indi madugay magauntat na sa pag-impluwensya sa ila; kay tan-awa, ginsikway nila ang mga propeta, kag si Jeremias ila ginsulod sa bilanggoan. Kag gintinguhaan nila nga kuhaon ang kabuhi sang akon amay, sa bagay nga natabog nila sia pagwa sa kadutaan.

15 Karon tan-awa, ginasiling ko sa inyo nga kon magbalik kamo sa Jerusalem magkalamatay man kamo upod sa ila. Kag karon, kon amo sini ang inyo pilion, magtaklad kamo sa kadutaan, kag dumduma ang mga pulong nga ginhambal ko sa inyo, nga kon maglakat kamo magkalamatay man kamo; kay gani ang Espiritu sang Ginuo nagatulod sa akon nga maghambal ako.

16 Kag natabo ini nga sang ako, si Nefi, nakatapos sa paghambal sining mga pulong sa akon mga utod, naakig sila sa akon. Kag natabo ini nga ginpadapatan nila ako sang ila mga kamot, kay tan-awa, tuman ang ila kaakig, kag gingapos nila ako sang mga lubid, kay nagtinguha sila sa pagpatay sa akon, agud mabayaan nila ako sa kamingawan agud kaunon sang mabangis nga mga sapat.

17 Apang natabo ini nga nagpangamuyo ako sa Ginuo nga nagasiling: O Ginuo, suno sa akon pagtuo nga yara sa imo, luwasa ako sa mga kamot sang akon mga utod; huo, hatagi ako sing kusog agud mabugto ko ining mga lubid nga nagagapos sa akon.

18 Kag natabo ini nga sang masambit ko ining mga pulong, tan-awa, ang mga gapos nagkalapalos sa akon mga kamot kag mga tiil, kag nagtindog ako sa atubang sang akon mga utod, kag nakighambal ako liwat sa ila.

19 Kag natabo ini nga naakig sila liwat sa akon, kag nagtinguha nga dapatan ako sang mga kamot; apang tan-awa, isa sang mga anak nga babayi ni Ismael, huo, pati ang iya iloy, kag isa sang mga anak nga lalaki ni Ismael, nagpakitluoy sa akon mga utod, sa bagay nga napahumok nila ang ila mga tagipusuon; kag nag-untat sila sa pagtinguha nga patyon ako.

20 Kag natabo ini nga nagkasubo sila, tungod sang ila kalainan, sa bagay nga nagluhod sila sa akon atubang, kag nagpakitluoy sa akon nga patawaron ko sila sang butang nga ila ginhimo batok sa akon.

21 Kag natabo ini nga maalwan ko sila nga ginpatawad sang tanan nila nga ginhimo, kag ginlaygayan ko sila nga magpangamuyo sila sa Ginuo nga ila Dios agud mapatawad. Kag natabo ini nga ila ini ginhimo. Kag sang makatapos sila sa pagpangamuyo sa Ginuo nagpadayon kami sa amon pagpanglakaton padulong sa tolda sang amon amay.

22 Kag natabo ini nga nagdulhog kami padulong sa tolda sang amon amay. Kag pagkatapos nga ako kag akon mga utod kag ang tanan nga panimalay ni Ismael makadulhog padulong sa tolda sang akon amay, naghatag sila sang pasalamat sa Ginuo nga ila Dios; kag naghatag sila sang halad kag mga halad-nga-sinunog sa iya.