Kapitulo 9
Si Nefi naghimo sang duha ka klase sang kasulatan—Ang kada isa gintawag nga mga lamina ni Nefi—Ang dalagko nga mga lamina nagaunod sing isa ka sekular nga kasaysayan; ang magagmay naman nagatalakay ilabi na sa sagrado nga mga butang. Mga 600–592 B.C.
1 Kag ini tanan nakita sang akon amay, kag nabatian, kag ginhambal, samtang nagapuyo sia sa isa ka tolda, sa patag sang Lemuel, kag amo man ang tuman kadamo pa gid nga butang, nga indi masulat sa sining mga lamina.
2 Kag karon, pareho sang ginhambal ko parte sining mga lamina, tan-awa indi ini ang mga lamina nga sa diin ginahimo ko ang bug-os nga kasaysayan sang maragtas sang akon katawhan; kay ang mga lamina nga sa diin ginhimo ko ang isa ka bug-os nga kasaysayan sang akon katawhan ginhatagan ko sang ngalan nga Nefi; gani, gintawag ang mga ini nga mga lamina ni Nefi, sunod sa akon kaugalingon nga ngalan; kag ining mga lamina man ginatawag nga mga lamina ni Nefi.
3 Apang, nakabaton ako sing isa ka kasugoan halin sa Ginuo nga dapat ko himuon ining mga lamina para sa pinasahi nga katuyoan nga dapat may isa ka kasaysayan nga nakurit parte sa pag-alagad sang akon katawhan.
4 Sa iban pa nga mga lamina dapat nga ikurit ang isa ka kasaysayan parte sa pagginahum sang mga hari, kag sang mga giyera kag mga pagbinaisay sang akon katawhan; gani ining mga lamina para sa laban nga bahin parte sa pag-alagad; kag ang iban pa nga mga lamina para sa laban nga bahin parte sa pagginahum sang mga hari kag sang mga giyera kag mga pagbinaisay sang akon katawhan.
5 Gani, ginsugo ako sang Ginuo sa paghimo sining mga lamina para sa isa ka maalam nga katuyoan sa iya, nga ang amo nga katuyoan wala ako nakahibalo.
6 Apang ang Ginuo nakahibalo sang tanan nga butang halin sa ginsuguran; gani, nagahanda sia sang paagi agud matuman ang tanan niya nga buluhaton sa tunga sang mga anak sang katawhan; kay tan-awa, yara sa iya ang tanan nga gahum sa pagtuman sang tanan niya nga pulong. Kag gani amo sini. Amen.