Kapitulo 6
Si Nefi nagsulat parte sa mga butang sang Dios—Ang katuyoan ni Nefi amo ang kumbinsihon ang mga tawo nga magkari sa Dios ni Abraham kag maluwas. Mga 600–592 B.C.
1 Kag karon ako, si Nefi, wala nagahatag sang lista sang kaliwatan sang akon mga katigulangan sa sini nga bahin sang akon kasulatan; ukon sa bisan ano man nga tion indi ko ini pag-ihatag pagkatapos sa sining mga lamina nga akon ginasulatan; kay ginhatag ini sa kasulatan nga ginatipigan sang akon amay; gani, wala ko ini pag-isulat sa sini nga libro.
2 Kay tama na sa akon ang magsiling nga mga kaliwat kami ni Jose.
3 Kag indi ini importante sa akon nga maid-id ako sa paghatag sang bug-os nga kasaysayan sang tanan nga butang nga ginsulat sang akon amay, kay ang mga ini indi mahimo nga masulat sa sining mga lamina, kay luyag ko nga may lugar agud makasulat ako parte sa mga butang sang Dios.
4 Kay ang kabug-osan sang akon tinutuyo amo nga mahimo ko nga makumbinsi ang mga tawo nga magkari sa Dios ni Abraham, kag sa Dios ni Isaac, kag sa Dios ni Jacob, kag maluwas.
5 Gani, ang mga butang nga makapalipay sa kalibutan wala ko pag-isulat, kundi ang mga butang nga makapalipay sa Dios kag sa ila nga indi iya sang kalibutan.
6 Gani, magahatag ako sing kasugoan sa akon kaliwatan, nga indi nila pagsulatan ining mga lamina sing mga butang nga wala sing importansia para sa mga anak sang katawhan.