“Enero 20–26. 1 Nefi 11–15: ‘Naarmasan sang Pagkamatarong kag sang Gahum sang Dios,’” Dali, Magsunod sa Akon—Para sa Mga Indibidwal kag Mga Pamilya: Libro ni Mormon 2020 (2020)
“Enero 20–26. 1 Nefi 11–15,” Dali, Magsunod sa Akon—Para sa Mga Indibidwal kag Mga Pamilya: 2020
Matam-is Pa Sa Tanan nga Matam-is, ni Miguel Angel González Romero
Enero 20–26
1 Nefi 11–15
“‘Naarmasan sang Pagkamatarong kag sang Gahum sang Dios”
Makita mo bala ang imo kaugalingon sa 1 Nefi 11–15? Ano nga mga dinalan ang may dako nga bili sa imo kag sa imo pamilya?
Isulat Ang Imo Mga Panghunahuna
Kon ang Dios may dako nga buluhaton nga ipaobra sa Iya propeta, masami Sia nga nagahatag sang dako nga palanan-awon sa sinang propeta nga magabulig sa iya nga maintiendihan ang mga katuyuan sang Dios para sa Iya mga anak. Si Moises nakakita sang palanan-awon “sining duta, kag sang mga nagapuyo diri, kag lakip man ang mga langit” (tan-awa sa Moses 1:36). Si Apostoles Juan nakakita sang kasaysayan sang kalibutan kag sang Ika-duha nga Pagkari sang Manluluwas (tan-awa sa libro sang Bugna). Si Joseph Smith nakakita sang Amay kag sang Anak (tan-awa sa Joseph Smith—History 1:17–18). Si Lehi nakakita sang palanan-awon nga nagalaragway sang pagpanglakaton nga kinahanglan naton himuon padulong sa Manluluwas kag sa Iya pagpalangga.
Sa narekord sa 1 Nefi 11–14, nakita ni Nefi ang pagpangalagad sang Manluluwas, ang palaabuton sang kaliwatan ni Lehi sa ginsaad nga duta, kag ang kapalaran sang bulutahon sang Dios sa ulihing mga adlaw. Ang ining palanan-awon nagbulig handa kay Nefi para sa trabaho nga ara sa iya atubang, kag makabulig man ini sa imo—tungod ang Dios may buluhaton nga ipahimo sa imo sa Iya ginharian. Isa ka sa “mga santos sang simbahan sang Cordero” nga nakita ni Nefi, “nga nag-alaplaag sa bug-os nga kadaygan sang duta; kag ang ila armas amo ang pagkamatarong kag kaupod ang gahum sang Dios sa dako nga himaya” (1 Nefi 14:14).
Mga Ideya para sa Personal nga Pagtuon sang Balaan nga Mga Kasulatan
Ginpadala sang Dios si Jesucristo bilang pagpahayag sang Iya pagpalangga.
Para buligan si Nefi nga maintiendihan ang kahulugan sang kahoy nga nakita sang iya amay, isa ka anghel ang nagpakita sa iya sang “Anak sang Wala’y Katapusan nga Amay” (1 Nefi 11:21). Nagtulod ini kay Nefi nga magsiling nga ang kahoy nagarepresentar sang pagpalangga sang Dios. Pero wala pa matapos ang palanan-awon. Sa imo pagbasa kag pagpadalom sa paghunahuna sang 1 Nefi 11, ano ang makita mo nga nagabulig sa imo intiendi kon ngaa si Jesucristo amo ang pinakamataas nga pagpahayag sang pagpalangga sang Dios?
Para tun-an ang iban pa nga mga simbolo sa damgo ni Lehi, tan-awa sa 1 Nefi 11:35–36; 12:16–18; kag 15:21–30.
Tan-awa man sa Juan 3:16.
Ang Ginuo naghanda sang paagi para sa Pagpanumbalik.
Indi na ni Nefi masaksihan ang kalabanan sang iya nakita sa iya palanan-awon. Ngaa sa banta mo nga malahalon para kay Nefi nga mahibal-an ining mga butang? Ngaa malahalon para sa imo nga mahibal-an ining mga butang? Siguro pwede mo ini ipamangkot sa tagsa ka tion nga magbasa ka parte sa nakita ni Nefi sa iya palanan-awon.
Ari ang pila sa mga hitabo nga nakita ni Nefi: ang palaabuton sang iya katawhan (tan-awa sa kapitulo 12), ang pagsakop sang mga Amerika kag ang Rebolusyon sa Amerika (tan-awa sa kapitulo 13:12–19), ang Dako nga Apostasya (tan-awa sa kapitulo 13:20–29), kag ang Pagpanumbalik sang ebanghelyo (tan-awa sa kapitulo 13:32–42).
Ano ang “dako kag makangilil-ad nga simbahan” nga nakita ni Nefi?
Si Elder Dallin H. Oaks nagpaathag nga ang “dako kag makangilil-ad nga simbahan” nga ginlaragway ni Nefi nagarepresentar sang “bisan ano nga pilosopiya ukon organisasyon nga nagakontra sa pagtuo sa Dios. Kag ang ‘pagkabihag’ nga ginahandum sining ‘simbahan’ nga tugahon sa mga santos indi pisikal nga pagkapriso kundi pagkabihag sa sala nga mga ideya” (“Stand as Witnesses of God,” Ensign, Mar. 2015, 32).
Sin-o ang lalaki nga nakita ni Nefi nga “gin-impluwensyahan” sang Espiritu nga “magpalayag sa madamo nga mga tubig”?
Nakita ni Nefi nga ang Balaan nga Espiritu magatandog kay Christopher Columbus nga himuon ang iya sikat nga biyahe pakadto sa mga Amerika. Sang Marso 14, 1493, nagsulat si Columbus parte sining biyahe: “Ining dalagko kag matahum nga mga resulta indi tungod sa akon kahimuan … ; tungod kay inang indi matungkad sang wala ginabugayi nga kaalam sang tawo, ang Espiritu sang Dios naghatag sa pagpaninguha sang tawo, bangod ang Dios nagapamati sa mga pangamuyo sang Iya mga suluguon nga nagapalangga sang Iya mga pagsulundan bisan tubtob pa sa paghimo sinang maathag nga imposible matabo” (The Annals of America [Encyclopedia Britannica, Inc., 1976], 1:5).
Ang balaan nga mga kasulatan sa ulihing mga adlaw nagpanumbalik sang “maathag kag malahalon nga mga butang.”
Nakita ni Nefi sa palanan-awon nga ang Biblia—nga iya ginlaragway bilang “ang kasulatan sang nga Judio”—may “madamo nga maathag kag malahalon nga mga butang nga kinuha gikan [diri]” (1 Nefi 13:23, 28). Pero, nakita man niya nga ang Dios magapanumbalik sining mga butang paagi sa “iban pa nga mga libro”—ang Libro ni Mormon kag iban pa nga balaan nga mga kasulatan sa ulihing mga adlaw (tan-awa sa 1 Nefi 13:39–40). Ano ang pila sa malahalon nga mga kamatuoran nga ginapaintiendi sa aton sing mas maayo sang Libro ni Mormon? Sa ano nangin lain ang imo kabuhi bangod ginpanumbalik ining maathag kag malahalon nga mga butang?
Ang Libro ni Mormon nagapanumbalik sang mga kamatuoran sang ebanghelyo nga nadula sang panahon sang Apostasya.
Ang Ginuo magasabat sa akon kon magpangayo ako nga may pagtuo upod ang mahumok nga tagipusuon.
Nakabatyag ka na bala nga daw wala ka nagabaton sang personal nga rebelasyon—nga ang Dios wala nagapakighambal sa imo? Ano ang laygay ni Nefi sa iya mga utod sang nagabatyag sila sang amo sini? Paano mo magamit ang laygay ni Nefi sa imo kabuhi, kag paano mo magamit ang iya laygay para buligan ang iban?
Mga Ideya para sa Pang-pamilya nga Pagtuon sang Balaan nga Kasulatan kag Family Home Evening
Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.
1 Nefi 11–14
Sa pagbasa sang imo pamilya sining mga kapitulo, magpundo sing panalagsa kag magpamangkot pareho sini: Ano ang nakita ni Nefi sa iya palanan-awon nga nagpalipay sa iya? Ano ayhan ang nagpasubo sa iya? Ngaa?
1 Nefi 13:20–42
Para buligan ang mga miyembro sang pamilya nga maintiendihan ang bili sang “maathag kag malahalon” nga mga kamatuoran sa Libro ni Mormon, ikumparar ang klaro nga nasulat nga mensahe sa mensahe nga ginsamu-samo. Ngaa ayhan nga gusto sang Amay nga Langitnon nga itudlo ang Iya mga kamatuoran sing klaro? Ang mga miyembro sang pamilya mahimo maghatag sang panaksihon sang pila ka “maathag kag malahalon” nga mga kamatuoran nga ila natun-an sa Libro ni Mormon.
1 Nefi 14:12–15
Ngaa ang aton “armas amo ang pagkamatarong kag kaupod ang gahum sang Dios” kon kita nagapangabuhi nga tampad sa aton mga kasugtanan sa Dios?
1 Nefi 15:8–11
Ano nga mga eksperiyensya ang mapaambit sang imo pamilya sang sila “nagpamangkot sa Ginuo”? Ano ang aton matun-an sa ehemplo ni Nefi?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Maggamit sang mga bulig sa pagtuon. Ang mga tanda sa idalom, ang Mga Giya sa Balaan nga mga Kasulatan, kag iban pa nga mga bulig sa pagtuon nagahatag sang ihibalo parte balaan nga mga kasulatan. Halimbawa, ano ang nabulig sa imo sang mga tanda sa idalom sa pag-intiendi sang 1 Nefi 14:20–21?
Palanan-awon ni Nefi kay Maria, ni James Johnson