Pamilya ni Lehi nga nagapanglakaton sa disyerto

Si Lehi Nagabiyahe Malapit sa Dagat nga Pula, ni Gary Smith

Enero 6–12

1 Nefi 1–7

“Malakat Ako kag Himuon Ko”

Ginsulat ni Nefi “ang mga butang sang Dios” (1 Nefi 6:3). Sa imo pagtuon sang rekord ni Nefi, tutoki ang mga butang sang Dios nga imo makita, labi na gid ang mga pagpabatyag halin sa Espiritu.

Isulat Ang Imo Mga Panghunahuna

Ang Libro ni Mormon nagasugod sa kasaysayan sang isa ka matuod-tuod nga pamilya nga nagaeksperiyensya sang matuod-tuod nga mga kabudlayan. Natabo ini sang 600 BC, pero may mga butang sa sining kasaysayan nga mahimo pamilyar sa mga pamilya sa karon. Ang ining pamilya nagapuyo sa isa ka kalibutan sang nagadugang nga kalainan, pero ang Ginuo nagpromisa sa ila nga kon sila magasunod sa Iya, dalhon Niya sila sa kahilwayan. Samtang nagapanglakaton may maayo kag malain sila nga mga inagihan; nakaeksperiyensya sila sang dalagko nga mga bugay kag milagro, pero may ila man nga inagihan sang pagbinaisay kag kagamo. Talagsa lang sa balaan nga kasulatan nga may malawig nga pagsaysay parte sa isa ka pamilya nga nagatinguha nga magpangabuhi sang ebanghelyo: isa ka amay nga nagatinguha sa pagpatubo sang pagtuo sa iya pamilya, mga anak nga lalaki nga nagadesisyon kon bala magpati sa iya, isa ka iloy nga nahadlok para sa kaluwasan sang iya kabataan, kag mga utod nga lalaki nga nagapangatubang sang kahisa kag kagamo—kag kon kaisa sang pagpatawad sa isa kag isa. Sa kabilugan, may matuod nga gahum sa pagsunod sa mga halimbawa sang pagtuo nga ginpakita sining pamilya—wala sapayan nga sila indi perpekto.

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

1 Nefi 1–6

Ang balaan nga mga kasulatan dako kaayo ang bili.

Ang anum ka una nga mga kapitulo sang Libro ni Mormon nagalakip sang madamo nga mga pagtumod sa sagrado nga mga libro, sagrado nga mga rekord, kag sang pulong sang Ginuo. Sa imo pagbasa sang 1 Nefi 1–6, ano ang imo matun-an kon ngaa ang pulong sang Dios “dako sing bili”? (1 Nefi 5:21). Ano ang ginatudlo sining mga dinalan sa imo parte sa balaan nga mga kasulatan? Ano ang imo nakita nga nagainspirar sa imo nga magtuon sang balaan nga mga kasulatan nga may mas dako nga kaukod?

 

1 Nefi 1:7–15

Ang Libro ni Mormon nagasaksi kay Jesucristo.

Tampad sa katuyuan nga ginpahayag sa tig-ulo nga pahina—sa pagpasanag sa tanan nga si Jesus amo ang Cristo—ang Libro ni Mormon nagabukas sa matahum nga palanan-awon ni Lehi parte sa Manluluwas. Ano ang imo matun-an parte kay Jesucristo halin sa nakita ni Lehi? Ano ang pila sa “dalagko kag makatilingala” nga hinimuan sang Manluluwas sa imo kabuhi? (1 Nefi 1:14).

1 Nefi 2

Kon ako magpangita kag magsalig sa Ginuo, sarang Niya pahumukon ang akon tagipusuon.

Bisan pa nga sanday Laman, Lemuel, kag Nefi ululupod nga nagdinalagko sa pareho nga pamilya kag nakaangkon sang magkaanggid nga mga eksperiyensya, may dako nga kinalain sa mga paagi nga nag-akto sila sa diosnon nga direksyon nga nabaton sang ila amay sa sining kapitulo. Sa imo pagbasa sang 1 Nefi 2, tan-awa kon mahibal-an mo kon ngaa ginpahumok ang tagipusuon ni Nefi samtang ang sa iya mga utod wala. Mahimo mo man hunahunaon ang imo kaugalingon nga mga reaksyon sa direksyon halin sa Ginuo, paagi man sa Balaan nga Espiritu ukon sa Iya propeta. Sang san-o ka nakabatyag nga ginpahumok sang Ginuo ang imo tagipusuon para mas hugot mo nga mabaton ang Iya sugo kag laygay?

1 Nefi 3–4

Ang Dios magahanda sang paagi para mahimo ko ang Iya pagbuot.

Sang ginsugo sang Ginuo si Lehi kag ang iya pamilya nga kuhaon ang mga lamina nga saway kay Laban, wala Sia naghatag sang klaro nga instruksyon kon paano tumanon ang ining kasuguan. Sa masami matuod ini sa iban nga mga kasuguan ukon personal nga mga rebelasyon nga ginabaton naton halin sa Dios, kag mahimo nga makatuga ini sa aton nga magbatyag nga ang Iya ginapangayo “isa ka mabudlay nga butang” (1 Nefi 3:5). Ano ang nagainspirar sa imo sa sabat ni Nefi sa sugo sang Ginuo, nga makita sa 1 Nefi 3:7, 15–16? May butang ka bala nga nabatyagan para “maglakat kag maghimo”?

Sa imo pagtuon sang 1 Nefi 1-7, magpangita sang mga paagi nga ang Dios naghanda sang paagi para kay Lehi kag sa iya pamilya. Paano Niya ini ginhimo para sa imo?

Tan-awa man sa Mga Hulubaton 3:5–6; 1 Nefi 17:3; koleksyon sang Book of Mormon Videos sa ChurchofJesusChrist.org ukon sa Gospel Library app.

1 Nefi 4:1–3; 5:1–8; 7:6–21

Ang pagdumdom sang mga binuhatan sang Dios makahatag sa akon sang pagtuo agud tumanon ang Iya mga kasuguan.

Sang gusto ni Laman kag Lemuel nga magkumod, masami ara sila ni Nefi kag Lehi sa malapit para paisugon kag sawayon sila. Kon daw gusto mo magkumod, ang pagbasa sang mga pulong ni Nefi kag Lehi mahimo nga maghatag sang malahalon nga laygay kag perspektibo. Paano gintinguhaan ni Nefi kag Lehi nga buligan ang mga miyembro sang ila pamilya nga magpatubo sang pagtuo sa Dios? (tan-awa sa 1 Nefi 4:1–3; 5:1–8; 7:6–21). Ano ang imo matun-an sa ila mga halimbawa nga makabulig sa imo sa dason nga matentar ka nga magkumod ukon magrebelde?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

1 Nefi 1–7

Sa bug-os nga 1 Nefi 1–7, mahimo mo nga paisugon ang mga miyembro sang pamilya nga talupangdon ang mga inter-aksyon sa tunga sang mga miyembro sang pamilya nanday Lehi kag Sarai. Ano ang aton matun-an sa sini nga mga relasyon nga makabulig sa aton pamilya?

Si Nefi kag ang iya pamilya nga nagatuon sang mga lamina

Si Nefi kag ang iya pamilya naghatag sang bili sa mga pulong sang mga propeta.

1 Nefi 2:20

Ang prinsipyo sa 1 Nefi 2:20 ginasulit pirme sa bug-os nga Libro ni Mormon. Paano ini gamiton sang mga miyembro sang imo pamilya sa ila mga kabuhi sa inyo pagtuon sang Libro ni Mormon sing ululupod sini nga tuig? Ayhan pwede kamo maghimo sang poster sing ululupod nga nagapakita sang pangako sang Ginuo sa sini nga bersikulo kag i-display ini sa inyo balay. Mahimo ini magserbe nga pahanumdom nga hambalan sing regular kon paano ninyo nakita nga ginpauswag sang Ginuo ang inyo pamilya kon gintuman ninyo ang Iya mga kasuguan. Pamensara ang pagsulat sining mga eksperiyensya sa poster.

1 Nefi 2:11–13; 3:5–7

Ayhan makabenepisyo ang imo pamilya sa pagtanda sang kinalain sang reaksyon nanday Laman kag Lemuel sa mga sugo sang Ginuo sangsa reaksyon ni Nefi. Ano ang matun-an naton sa 1 Nefi 2:11–13; 3:5–7 parte sa pagkumod? Ano nga mga bugay ang nagaabot kon magpakita kita sang pagtuo?

1 Nefi 3:19–20; 5:10–22; 6

Ang ining mga bersikulo mahimo nga mag-inspirar sang imo pamilya nga magtago sang rekord sang importante nga mga kahiwatan kag mga eksperiyensya sa inyo kabuhi. Basi pwede kamo magsugod sang pang-pamilya nga journal, nga daw pareho sa mga rekord nga gintipigan nila ni Nefi kag Lehi parte sa mga eksperiyensya sang ila pamilya. Ano ayhan ang imo ilakip sa rekord sang imo pamilya?

1 Nefi 7:19–21

Ano ang ginapalab-ot sa aton sang ehemplo ni Nefi sa sining mga bersikulo? Sa ano ginabugayan ang aton pamilya kon kita “sinsero nga nagapatawad” sa kada isa?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Tun-i ang balaan nga mga kasulatan sing tayuyon. Isa ka yabi sa makahuluganon nga pagtudlo sa balay amo ang pagtuga sang tayuyon nga mga oportunidad sa pagtuon para sa imo pamilya. Si Pangulong Thomas S. Monson nagtudlo, “Ang ginpalip-ot nga mga kurso indi pareho ka-epektibo pareho sang adlaw-adlaw nga pagbasa kag paggamit sang balaan nga mga kasulatan sa aton mga kabuhi” (“Be Your Best Self,” Ensign ukon Liahona, Mayo 2009, 68).

Si Nefi nga nagatindog sa tupad sang hubog nga si Laban

Gintuman Ko ang Tingug sang Espiritu, ni Walter Rane