Disyembre 30–Enero 5

Pauna nga Mga Pahina sang Libro ni Mormon

“Isa pa ka Katipan Nahanungod kay Jesucristo”

Ang imo pagtuon sang Libro ni Mormon mahimo nga mapanami kon imo sugdan sa pagbasa ang mga pahina antes sang 1 Nefi. Ano ang nakita mo nga nagapabakod sang imo panaksihon?

Isulat Ang Imo Mga Panghunahuna

Antes ka pa magkadto sa 1 Nefi kapitulo 1, maathag nga ang Libro ni Mormon indi isa ka ordinaryo nga libro. Ang pauna nga mga pahina sini nagalaragway sang ginsuguran sa indi matupungan nga paagi—lakip na ang mga pagbisita sang mga anghel, isa ka dumaan nga rekord nga nalubong sa sulod sang mga siglo sa kilid sang bungyod, kag sang isa ka indi kilala nga mangunguma nga nagalubad sang rekord gamit ang gahum sang Dios. Ang Libro ni Mormon indi lamang isa ka kasaysayan sang dumaan nga sibilisasyon sang Amerika. Nagaunod ini sang “kabug-osan sang ebanghelyo nga dayon” (Pauna sa Libro ni Mormon), kag ang Dios Mismo ang nagpanguna sang iya paggwa sini—kon paano ini ginsulat, paano ini gintipigan, kag kon paano ini gintigana para sa aton panahon. Sini nga tuig, sa imo pagbasa sang Libro ni Mormon, pagpangamuyo parte sini, kag pagtuman sang mga pinanudlo sini, maimbitar mo ang gahum sini sa imo kabuhi, kag mahimo nga makabatyag ka sa paghambal, pareho sang Tatlo ka mga Saksi sa ila mga panaksihon, “Makahalangyag ini sa [akon] panulukan.”

Mga Ideya para sa Personal nga Pagtuon sang Balaan nga Mga Kasulatan

Tig-ulo nga Pahina sang Libro ni Mormon

Ang Libro ni Mormon mahimo magpabakod sang akon pagtuo kay Jesucristo.

Ang pauna nga pahina sang Libro ni Mormon nagahatag sang mas masobra pa sangsa tig-ulo lamang. Upod sa iban pa nga mga butang, nagaunod man ini sang pila ka mga katuyuan sining sagrado nga rekord. Pangitaa ining mga katuyuan, kag dayon samtang ginatun-an mo ang Libro ni Mormon sini nga tuig, isulat ang mga dinalan nga sa pamatyag mo nagatuman sining mga katuyuan. Halimbawa, ano nga mga dinalan ang nagabulig kumbinsir sa imo “nga si Jesus amo ang Cristo, ang Wala’y Katapusan nga Dios”?

Introduksyon sa Libro ni Mormon.

Ang Libro ni Mormon “nagadetalye sang plano sang kaluwasan.”

Ang plano sang kaluwasan amo ang plano sang Amay nga Langitnon agud buligan ang iya mga anak nga mapahitaas, pareho sa Iya, kag maeksperiyensyahan ang kalipay nga Iya nabatyagan (tan-awa sa 2 Nefi 2:25–26). Ang Pagbayad-Sala ni Jesucristo naghimo sini nga plano nga posible, kag ang tagsa ka doktrina, ordinansa, kag kasuguan nga ginhatag sang Dios gintuyo sa pagbulig tuman sang plano.

Kon gusto mo nga maintiendihan ang plano sang kaluwasan, wala na sang may mas maayo pa nga libro nga basahon sangsa Libro ni Mormon. Nagatumod ini sa plano sang Dios—nga nagagamit sang nagkalainlain nga ngalan—sing masobra 20 ka beses. Sa imo pagtuon sini nga tuig, bantayi kon san-o ginamitlang ukon ginatumod ang plano sang Dios kag kon ano ang ginasiling sang Libro ni Mormon parte diri.

Ari ang isa ka kahiwatan agud makasugod ka: Basaha ang masunod nga mga dinalan, kag ilista ang nagkalainlain nga ngalan nga ginhatag sa plano sang Dios: 2 Nefi 9:13; 11:5; kag Alma 12:32–34; 24:14; 41:2; 42:15–16. Ano ang ginapanugyan sining tagsa ka ngalan sa imo parte sa plano sang Amay?

“Ang Panaksihon sang Tatlo ka mga Saksi”; “Ang Panaksihon sang Walo ka mga Saksi”

Sarang ako nga mangin saksi sang Libro ni Mormon.

Ang Balaan nga Espiritu sarang magsaksi sa imo nga ang Libro ni Mormon matuod, bisan nga wala mo makita ang bulawan nga mga lamina pareho sang Tatlo ka mga Saksi kag Walo ka mga Saksi. Paano ang ila mga panaksihon nagpabakod sang imo panaksihon? Paano mo “ihatag [ang imo ngalan] sa kalibutan, agud magsaksi sa kalibutan” kon ano ang imo nahibal-an parte sa Libro ni Mormon? (“Ang Panaksihon sang Walo ka mga Saksi”).

“Ang Panaksihon sang Propeta nga si Joseph Smith”

Ang paggwa sang Libro ni Mormon isa ka milagro.

Kon may magpamangkot sa imo kon sa diin naghalin ang Libro ni Mormon, ano ang imo ihambal? Paano mo ilaragway ang kahilabtanan sang Ginuo sa pagpagwa sang Libro ni Mormon? Paano ni Joseph Smith ginlaragway ang paggwa sang Libro ni Mormon?

“Ang Panaksihon sang Propeta nga si Joseph Smith”

Paano ginlubad ang Libro ni Mormon?

Ang Libro ni Mormon ginlubad “paagi sa hiyas kag gahum sang Dios.” Wala kita makahibalo sang madamo nga mga detalye parte sa proseso sang milagroso nga paglubad, pero nahibal-an naton nga si Joseph Smith isa ka manugtulok (seer), nga ginbuligan sang mga instrumento nga ginhanda sang Dios: duha ka kristal nga bato nga ginatawag nga Urim kag Tumim kag isa pa ka bato nga ginatawag bato sang manugtulok (seer stone). Nakita ni Joseph sa sining mga bato ang Ingles nga interpretasyon sang mga kinurit sa mga lamina, kag ginlawag niya sing matunog ang paglubad samtang ginasulat ini sang isa ka eskriba. Ang tagsa ka eskriba ni Joseph nagsaksi nga nangin hayag ang gahum sang Dios sa paglubad sining sagrado nga buluhaton.

 

Mga Ideya para sa Pang-pamilya nga Pagtuon sang Balaan nga Kasulatan kag Family Home Evening

Sa imo pagbasa sang balaan nga mga kasulatan upod sa imo pamilya, ang Espiritu makabulig sa imo nga mahibal-an kon ano nga mga prinsipyo ang tutokan kag hambalan agud masabat ang mga panginahanglan sang imo pamilya. Ari ang pila ka mga ideya.

Tig-ulo nga Pahina sang Libro ni Mormon

Ayhan pwede ang imo pamilya magsugod lista sang mga bersikulo halin sa Libro ni Mormon nga nagpatubo sang inyo pagtuo nga “si Jesus amo ang Cristo” kag dugangan ini sa bilog nga tuig. Basi insaktuhan gid ini nga tion sa paghimo sang pang-pamilya nga plano nga basahon ang Libro ni Mormon: San-o kag diin kamo magtililipon sa pagbasa? Paano ang tagsa ka miyembro sang pamilya magpartisipar? Para sa dugang nga bulig, tan-awa sa “Mga Ideya sa Pagpauswag sang Inyo Pang-pamilya nga Pagtuon sang Balaan nga mga Kasulatan” sa umpisa sining manwal.

Introduksyon sa Libro ni Mormon.

Ang pamag-ang nga bato (keystone) isa ka korte-pitala (wedge) nga bato sa ibabaw sang arko nga nagahawid sang iban pa nga bato. Para maintiendihan sang imo pamilya kon sa ano ang Libro ni Mormon nangin “ang pamag-ang nga bato sang aton relihiyon,” pwede ka maghimo ukon magdrowing sang arko nga may pamag-ang nga bato sa ibabaw. Ano ang matabo kon kakason ang pamag-ang nga bato? Ano ang matabo kon wala kita sang Libro ni Mormon? Paano naton himuon ang Libro ni Mormon nga pamag-ang sang aton pagtuo kay Jesucristo?

Ang Libro ni Mormon amo ang pamag-ang sang aton relihiyon.

“Ang Panaksihon sang Tatlo ka mga Saksi”; “Ang Panaksihon sang Walo ka mga Saksi”

Pwede nga isulat sang mga miyembro sang imo pamilya ang ila kaugalingon nga mga panaksihon parte sa Libro ni Mormon, sulatan ini sang ila mga ngalan, kag magpamensar sang mga paagi nga mapaambit ang ila mga panaksihon sa iban.

“Ang Panaksihon sang Propeta nga si Joseph Smith”

Sa kasaysayan ni Joseph Smith, ano ang ebidensya nga makita naton nga ang Dios may kahilabtanan sa paggwa sang Libro ni Mormon?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Promisa sang isa ka propeta. Si Pangulong Russell M. Nelson nagsiling, “Ginapangako ko nga sa inyo pagbinagbinag sang inyo natun-an [sa Libro ni Mormon], ang mga bintana sang langit magabukas, kag makabaton kamo sang mga sabat sa inyo mismo nga mga pamangkot kag direksyon sa inyo kaugalingon nga kabuhi” (“The Book of Mormon: What Would Your Life Be Like without It?” Ensign ukon Liahona, Nob. 2017, 62–63).

Si Moroni nga Ginahatag ang Bulawan nga mga Lamina, ni Gary L. Kapp