Mga Promisa sang mga Propeta

Ang pagtuon sang Libro ni Mormon magabag-o sa imo. Pagabag-uhon sini ang imo pamilya. Ang mga propeta sa ulihing mga adlaw naghatag sang promisa parte sa gahum sang Libro ni Mormon sugod sang ginpanumbalik ang Ang Simbahan ni Jesucristo sang Mga Santos sa Ulihing mga Adlaw. Pamensara ang masunod nga mga pahayag, kag tun-i ang mga ini sing masunson. Diin sining mga bugay ang gusto mo mabaton? Sa imo pagbasa sang Libro ni Mormon, pamensara ang pagsulat kag pagpaambit sa iban kon paano ining mga promisa natuman sa imo kabuhi.

Ang Propetang Joseph Smith: “Ginsugiran ko ang mga kauturan nga ang Libro ni Mormon amo ang labing husto sa ano man nga libro sa duta, kag amo ang bato nga pamag-ang (keystone) sang aton relihiyon, kag ang isa ka tawo magmangin mas malapit sa Dios paagi sa pagsunod sang mga pagsulundan sini, sangsa diin man nga libro” (Teachings of Presidents of the Church: Joseph Smith [2007], 64).

Pangulong Ezra Taft Benson: “Indi lamang nga ang Libro ni Mormon nagatudlo sa aton sang kamatuoran, bisan pa nga amo gid man sina ang ginahimo sini. Indi lamang nga ang Libro ni Mormon nagapamatuod kay Cristo, bisan pa nga sa matuod amo man sina ang ginahimo sini. Pero may dugang pa diri. May gahum sa libro nga magasugod sa pag-ilig sa inyo mga kabuhi sa tion nga magsugod kamo sang seryoso nga pagtuon sang libro. Makakita kamo sang mas dako nga gahum sa pagbato sa pagsulay. Makakita kamo sang gahum nga likawan ang maintuan. Makakita kamo sang gahum nga magpabilin sa makitid kag masipot nga banas. Ang balaan nga mga kasulatan ginatawag nga ‘mga pulong sang kabuhi’ (D&C 84:85), kag wala na sang mas matuod pa dira sangsa ang Libro ni Mormon. Sa imo pagsugod sa pagkagutom kag pagkauhaw sa sinang mga pulong, masalapuan mo ang kabuhi sa nagadako nga nagadako nga kabuganaan” (Teachings of Presidents of the Church: Ezra Taft Benson [2014], 141).

Pangulong Gordon B. Hinckley: “Mga kauturan, wala sang pagduha-duha nga ginapromisa ko sa inyo nga kon inyo basahon sing mapinangamuyuon ang Libro ni Mormon, bisan pila na ka beses ninyo ini nabasa sang nagligad, may magaabot sa inyo mga tagipusuon nga dugang nga pagpabatyag sang Espiritu sang Ginuo. May magaabot nga mas ginpabaskog nga determinasyon nga maglakat sa pagkamatinumanon sa iya mga kasuguan, kag may magaabot nga mas mabaskog nga panaksihon sang buhi nga kamatuoran sang Anak sang Dios” (Teachings of Presidents of the Church: Gordon B. Hinckley [2016], 233).

Pangulong Russell M. Nelson: “Pinalangga kong mga kauturan, ginapromisa ko sa inyo nga kon tun-an ninyo sing mainampuon ang Libro ni Mormon adlaw-adlaw, makahimo kamo sang mas maayo nga mga desisyon—adlaw-adlaw. Ginapromisa ko nga kon inyo padaluman pensar ang inyo ginatun-an, ang mga bintana sang langit magabukas, kag mabaton ninyo ang mga sabat sa inyo kaugalingon nga mga pamangkot kag direksyon sa inyo kaugalingon nga kabuhi. Ginapromisa ko nga sa inyo adlaw-adlaw nga pagpaayaw sa Libro ni Mormon, mahimo kamo nga mapangapinan batok sa mga kalainan sang aton panahon, bisan pa ang nagapanggapos nga salot sang pornograpiya kag iban pa nga nagabag-o sang panghunahuna nga mga adiksyon” (“The Book of Mormon: What Would Your Life Be Like without It?” Ensign ukon Liahona, Nob. 2017, 62–63).