Paggamit sang Dali, Magsunod sa Akon—Para sa Mga Indibidwal kag Mga Pamilya

Para Kay Sin-o Ang Ining Materyal?

Ang ining materyal para sa tagsa ka indibidwal kag pamilya sa Simbahan. Gindisenyo ini agud buligan ka nga magtuon sang ebanghelyo—nga ikaw lang ukon upod ang imo pamilya. Kon wala mo pa matun-an ang ebanghelyo sing regular sang una, ang ining materyal makabulig sa imo nga magsugod. Kon may ara ka na sang maayo nga kagawian sang pagtuon sang ebanghelyo, ang ining materyal makabulig sa imo nga makaangkon sang mas makahulugan nga mga eksperiyensya.

Paano Ko Gamiton Ining Materyal?

Gamita ang materyal nga ini sa ano man nga paagi nga makabulig sa imo. Mahimo nga makabulig ini sa imo bilang giya ukon bulig para sa personal kag pang-pamilya nga pagtuon sang balaan nga mga kasulatan. Mahimo mo man ini gamiton sa family home evening. Ang mga outline nagatutok sa importante nga mga prinsipyo nga makita sa Libro ni Mormon, nagapanugyan sang mga ideya kag mga kahiwatan para sa mga indibidwal kag mga pamilya, kag nagatigana sang mga lugar para sulatan sang imo mga panghunahuna.

Kamo sang imo pamilya mahimo nga regular na nga nagatuon sang ebanghelyo. Halimbawa, mahimo nga nagabasa ka sang balaan nga mga kasulatan magluwas sa Libro ni Mormon para sa klase sa seminary ukon institute. Ang Dali, Magsunod sa Akon—Para sa Mga Indibidwal kag Mga Pamilya wala nagatuyo nga buslan ukon kompetensyahan ang maayo nga mga butang nga imo ginahimo. Mahimo nga may mga paagi sa pagtuon halin sa Libro ni Mormon sing regular kag sa gihapon pagkompleto sang imo iban nga mga lalab-uton sa pagtuon sang balaan nga mga kasulatan. Halimbawa, mahimo ka nga magbasa sang isa ka libro sang balaan nga mga kasulatan para sa imo personal nga pagtuon sang balaan nga mga kasulatan kag magbasa sang Libro ni Mormon upod ang imo pamilya (ukon baliskad). Sunda ang giya sang Espiritu agud mahibal-an kon paano patigayunon ang imo kaugalingon nga pagtuon sang pulong sang Dios.

Paano Maangot Ining Materyal sa Kon Ano nga Nagakalatabo sa Simbahan?

Ang mga outline sa sining materyal gin-organisar suno sa semanal nga iskedyul sang pagbasa. Ang Dali, Magsunod sa Akon—Para sa Primary kag Dali, Magsunod sa Akon—Para sa Sunday School nagasunod sang pareho nga iskedyul. Para suportahan ang imo pagpanginguha nga tun-an kag ipangabuhi ang ebanghelyo sa balay, ang imo mga titser sa simbahan magahatag sa imo sang mga oportunidad sa pagpaambit sang imo nga eksperiyensya, panghunahuna, kag mga pamangkot parte sa mga dinalan sa balaan nga kasulatan nga imo ginatun-an sa balay.

Tungod ang Sunday School ginatudlo sing duha lang ka beses kada bulan, ang mga titser sa Sunday School mahimo magpili nga laktawan ukon upuron ang mga outline para malagas ang semanal nga iskedyul. Mahimo nga kinahanglan man ini sa mga semana nga wala ginahiwat ang regular nga mga miting sang Simbahan tungod sang komperensya sa stake ukon iban pa nga mga rason. Sa sining mga semana ginaagda ka nga padayon nga tun-an ang Libro ni Mormon sa balay.

Kinahanglan ko Bala nga Sundon ang Iskedyul?

Ang iskedyul makabulig sa imo nga matapos basa ang Libro ni Mormon sa katapusan sang tuig. Dugang pa, ang pagsunod sang pareho nga iskedyul sa iya sang iban sa imo ward mahimo nga magdala sang makahulugan nga mga eksperiyensya sa simbahan. Pero indi ka dapat magbatyag nga daw nahigot sa iskedyul; isa lang ini ka simple nga giya samtang imo ginatayuyon ang kaugalingon. Ang importante amo nga nagatuon ka sang ebanghelyo bilang indibidwal kag bilang isa ka pamilya.

pamilya nga nagatuon sang balaan nga mga kasulatan