babayi nga nagatuon sang balaan nga mga kasulatan

Mga Ideya sa Pagpauswag sang Imo Personal nga Pagtuon sang Balaan nga Mga Kasulatan

Ari ang pila ka simple nga mga paagi para pauswagon ang imo pagtuon sang pulong sang Dios sa balaan nga mga kasulatan.

Magpangita sang Mga Kamatuoran parte kay Jesucristo

Ang balaan nga mga kasulatan nagatudlo sa aton sang tanan nga butang nga nagamapatuod kay Cristo (tan-awa sa 2 Nefi 11:4; Moses 6:63), gani pangitaa Sia sa mga kahiwatan, mga istorya, kag mga pinanudlo sa Libro ni Mormon. Pamensara ang pagbutang sang tanda ukon marka sa mga bersikulo nga nagatudlo parte sa Manluluwas kag kon paano Sia sundon.

Magpangita sang Nagainspirar nga mga Tinaga kag Mga Dinalan

Mahimo nga makakita ka sang mga tinaga kag mga dinalan sa balaan nga mga kasulatan nga manamian mo, nga daw ginsulat gid para sa imo. Mahimo nga personal nga mapuslanon ini sa imo kag magainspirar kag magapapagsik sa imo. Pamensara nga markahan ang mga ini sa imo balaan nga mga kasulatan ukon isulat ang mga ini sa isa ka sululatan sang mga tinun-an.

Pangitaa ang Mga Kamatuoran sang Ebanghelyo

Kon kaisa ang mga kamatuoran sang ebanghelyo (masami ginatawag nga doktrina ukon mga prinsipyo) ginahambal sing direkta, kag kon kaisa ginapahangop paagi sa halimbawa ukon istorya. Pamangkuta ang imo kaugalingon, “Ano nga wala katapusan nga mga kamatuoran ang gintudlo sa sining mga bersikulo?”

Magpamati sa Espiritu

Bantayi ang imo panghunahuna kag mga balatyagon, bisan pa nga wala ini sing kaangtanan sa imo ginabasa. Basi inang mga pagpabatyag amo mismo ang mga butang nga gusto sang imo Amay nga Langitnon nga imo matun-an.

Ipaanggid ang Balaan nga mga Kasulatan sa Imo Kabuhi

Pamensara kon paano ang mga istorya kag pinanudlo nga imo ginabasa magamit sa imo kabuhi. Halimbawa, pwede mo pamangkuton ang imo kaugalingon, “Ano ang akon mga eksperiyensya nga pareho sa akon ginabasa?” ukon “Paano ko sundon ang ehemplo sining tawo sa balaan nga mga kasulatan?”

Magpamangkot Samtang Nagatuon

Sa imo pagtuon sang balaan nga mga kasulatan, mahimo nga may mapamensaran ka nga mga pamangkot. Ining mga pamangkot mahimo nga may kaangtanan sa imo ginabasa ukon sa imo kabuhi sa kabilugan. Binag-binaga ining mga pamangkot kag pangitaa ang mga sabat samtang padayon ka nga nagatuon sang balaan nga mga kasulatan.

Maggamit sang mga Bulig sa Pagtuon sang Balaan nga mga Kasulatan

Hunahunaa ang Konteksto sang Balaan nga mga Kasulatan

Makakita ka sang makahuluganon nga mga ideya parte sa balaan nga mga kasulatan kon hunahunaon mo ang iya konteksto—ang sirkumstansya ukon ang lugar sa balaan nga mga kasulatan. Halimbawa, ang paghibalo sang palibot kag pagpati sang mga tawo nga ginsambit sang propeta makabulig sa imo nga maintiendihan ang katuyuan sang iya mga tinaga.

Isulat ang Imo Mga Panghunahuna kag Balatyagon

May madamo nga paagi para isulat ang mga pagpabatyag nga nagaabot sa imo samtang nagatuon ka. Halimbawa, pwede mo markahan ang makahulugan nga tinaga ukon dinalan kag isulat ang imo panghunahuna bilang tanda sa imo balaan nga mga kasulatan. Pwede ka man magmentinar sang sululatan sang mga ideya, mga balatyagon, kag mga impresyon nga imo mabaton.

Tun-i ang Mga Pulong sang mga Propeta kag Apostoles sa Ulihing-mga-Adlaw

Basaha ang pinanudlo sang mga propeta kag apostoles sa ulihing-mga-adlaw parte sa mga prinsipyo nga imo makita sa balaan nga mga kasulatan.

Magpaambit sang mga Ideya

Ang paghambalanay parte sa mga ideya halin sa imo personal nga pagtuon indi lamang maayo nga paagi sa pagtudlo sa iban, kundi nagabulig man ini nga magpabakod sang imo pag-intiendi sang imo ginbasa.

Ipangabuhi ang Imo Natun-an

Ang pagtuon sang balaan nga mga kasulatan dapat wala lang nagainspirar sa aton kundi nagatulod man sa aton nga bag-uhon ang aton pagpangabuhi. Pamatii ang ginapabatyag sa imo sang Espiritu nga imo himuon samtang nagabasa, kag dayon magpangako nga aktuhan inang mga pagpabatyag.

lalaki nga nagatuon sang balaan nga mga kasulatan

Si Pangulong Russell M. Nelson nagsiling: “Kon kita ‘magadutdot pasulong, nga nagapaayaw sa pulong ni Cristo, kag magapadayon tubtob sa katapusan, … [kita] makaangkon sang kabuhi nga wala’y katapusan’ [2 Nefi 31:20].

“Ang pagpaayaw nagahakahulugan sang labi pa sa tilawan. Ang pagpaayaw nagahakahulugan nga saboran. Ginasaboran naton ang balaan nga mga kasulatan paagi sa pagtuon sang mga ini sa espiritu sang masinadyahon nga pagdiskubre kag matinuohon nga pagtuman. Kon nagapaayaw kita sa mga pulong ni Cristo, madulot sila sa ‘mga tapi-tapi nga unod sang mga tagipusuon’ [2 Mga Taga-Corinto 3:3]. Mahimo sila nga importante nga bahin sang aton kinaugali” (“Living by Scriptural Guidance,” Ensign, Nob. 2000, 17).