Pagtudlo sang Magagmay nga Kabataan

Kon may magagmay ka nga kabataan sa imo pamilya, ari ang pila sa mga kahiwatan nga makabulig sa ila nga magtuon:

• Magkanta. Ang mga himno kag mga kalantahon gikan sa Mga Himno kag mga Ambahanon sang Kabataan mabaskog nga nagatudlo sang doktrina. Gamita ang index sa likod sang Mga Himno kag mga Ambahanon sang Kabataan para magpangita sang mga kanta nga may kaangtanan sa mga prinsipyo sang ebanghelyo nga imo ginatudlo. Buligi ang imo kabataan nga mapaanggid ang mga mensahe sa mga kanta sa ila mga kabuhi. Halimbawa, mahimo ka magpamangkot parte sa mga tinaga ukon mga grupo sang tinaga sa kanta. Dugang pa sa pagkanta, ang imo kabataan pwede mag-aksyon nga bagay sa mga kanta ukon mamati sa mga kanta nga ginapatukar samtang nagaobra sila sang iban nga mga buluhaton.

• Magpamati ukon magdrama-drama sang isa ka istorya. Ang magagmay nga kabataan nanamian sang mga istorya—halin sa balaan nga mga kasulatan, halin sa imo kabuhi, halin sa kasaysayan sang Simbahan, ukon halin sa mga magasin sang Simbahan. Magpangita sang mga paagi nga makaentra sila sa pagsugid sang istorya. Pwede sila magkapyot sang mga litrato ukon mga bagay, magdrowing sang mga litrato parte sa ila mabatian, magdrama-drama sang istorya, ukon bisan gani magbulig sa pagsugid sang istorya. Buligi ang imo kabataan nga makilala ang mga kamatuoran sang ebanghelyo sa mga istorya nga imo ginasugid.

• Magbasa sang balaan nga kasulatan. Ang magagmay nga kabataan mahimo nga indi pa kaayo makahibalo magbasa, pero pwede mo sila gihapon maentra sa pagtuon gikan sa balaan nga mga kasulatan. Mahimo ka nga magtutok sa isa lamang ka bersikulo, tampok nga dinalan, ukon tinaga. Mahimo nga makasarang na sila magsaulo sang malip-ot nga mga dinalan gikan sa balaan nga mga kasulatan kon suliton nila ang mga ini sing pila ka beses. Sa ila pagpamati sang pulong sang Dios, mabatyagan nila ang Espiritu.

• Magtan-aw sang isa ka litrato ukon magtan-aw sang video. Kon patan-awon mo ang imo kabataan sang litrato ukon video nga may kaangtanan sa prinsipyo sang ebanghelyo ukon istorya sa balaan nga kasulatan, pamangkuta sila sang mga makabulig sa ila nga makatuon halin sa ila ginatan-aw. Halimbawa, mahimo ka magpamangkot, “Ano ang nagakatabo sa sining litrato ukon video? Ano ang ginapabatyag sini sa inyo?”  

• Maghimo. Ang mga kabataan pwede maghimo, magdrowing, ukon magkolor sang isa ka bagay nga may kaangtanan sa istorya ukon prinsipyo nga ila ginatun-an.

• Mag-entra sa mga leksyon nga nagagamit sang mga bagay. Ang simple nga leksyon nga nagagamit sang bagay sa pagtudlo makabulig sa imo kabataan nga maintiendihan ang isa ka prinsipyo sang ebanghelyo nga mabudlay maintiendihan. Kon maggamit sang leksyon nga nagagamit sang mga bagay sa pagtudlo, pangitai sang paagi nga makaentra ang imo kabataan. Mas makatuon sila sang maayo gikan sa eksperiyensya nga may inter-aksyon kaysa magtan-aw lang sa ginahimo.

• Magrole-play. Kon ang kabataan magrole-play sang isa ka sitwasyon nga posible masugata nila sa matuod-tuod nga kabuhi, mas maintiendihan nila kon paano ang prinsipyo sang ebanghelyo magamit sa ila mga kabuhi.

• Sulita ang mga kahiwatan. Ang magagmay nga kabataan mahimo nga kinahanglan makabati sang mga konsepto sing madamo nga beses para maintiendihan nila ang mga ini. Indi mahadlok nga suliton ang mga istorya ukon kahiwatan sing masami. Halimbawa, mahimo ka magsugid sang istorya sa balaan nga mga kasulatan sing pila ka beses sa nagkalain-lain nga paagi—pagbasa gikan sa balaan nga mga kasulatan, pagpalip-ot sa imo kaugalingon nga mga pulong, pagpakita sang video, pagpabulig sang imo mga kabataan nga magsaysay sang istorya, pag-imbitar sa ila nga idrama-drama ang istorya, kag madamo pa.

  pamilya nga nagatuon